លីបង់បង្កើតរដ្ឋាភិបាលថ្មីក្រោយពីជាប់គាំងនយោបាយជិត១ឆ្នាំ
ក្រោយពីមានការជាប់គាំងនយោបាយអស់រយៈពេលជិត១ឆ្នាំ លីបង់បានបង្កើតរដ្ឋាភិបាលថ្មីមួយបានហើយ កាលពីថ្ងៃសៅរ៍។ ជារដ្ឋាភិបាលរួបរួមជាតិ ដែលមានសមាសភាពចម្រុះ មកពីគ្រប់ភាគីជម្លោះ គឺម្ខាងក្រុមអ្នកស្និទ្ធនឹងរដ្ឋាភិបាលបាស្ហា អាល់អាសាដ និងម្ខាងទៀត ក្រុមអ្នកស្និទ្ធនឹងលោកខាងលិច ហើយគាំទ្រក្រុមប្រឆាំងនៅស៊ីរី។
ចុះផ្សាយនៅថ្ងៃ៖
ស្តាប់ - ០១:៥១
អស់រយៈពេលជាច្រើនខែមកហើយ ដែលលីបង់ត្រូវហែកហួរ ដោយសារតែវិបត្តិនៅក្នុងប្រទេសស៊ីរី។ អំពើហិង្សាបានកើតមានឡើងជាប្រចាំ ចំណែកឯការបង្កើតរដ្ឋាភិបាលថ្មីក៏ត្រូវជាប់គាំង ដោយសារតែការប្រឈមមុខដាក់គ្នា រវាងក្រុមស្ហ៊ីអ៊ីត Hezbllah ដែលគាំទ្រលោកបាស្ហា អាល់អាសាដ និងក្រុមស៊ុននីត ដឹកនាំដោយអតីតនាយករដ្ឋមន្រ្តី Saad Hariri ដែលមានទំនោរទៅខាងលោកខាងលិច និងគាំទ្រក្រុមប្រឆាំងស៊ីរី។
ក្រោយពីមានភាពជាប់គាំងនយោបាយអស់រយៈពេលជិត ១០ខែ និងដោយឆ្លងកាត់ការចរចាយ៉ាងតឹងតែង រដ្ឋាភិបាលថ្មីមួយត្រូវបានបង្កើតឡើង កាលពីថ្ងៃសៅរ៍ ដោយមានសមាសភាពចម្រុះមកពីគ្រប់ភាគីជម្លោះ។
រដ្ឋាភិបាលថ្មីនេះមានសមាសភាព ២៤រូប បែងចែកជា ៣ក្រុមស្មើៗគ្នា។ ៨រូប ដែលរួមមានទាំងនាយករដ្ឋមន្រ្តីផងជាក្រុមអ្នកស្និទ្ធនឹងប្រធានាធិបតីលីបង់ គឺលោក Michel Sleimane ដែលគេចាត់ទុកថាជាក្រុមអព្យាក្រឹត ឬនិយមកណ្តាល។ រដ្ឋមន្រ្តី ៨រូប មកពីក្រុមស្ហ៊ីអ៊ីត Hezbollah និង ៨រូបផ្សេងទៀត មកពីក្រុមស៊ុនីតរបស់លោកអតីតនាយករដ្ឋមន្រ្តី Hariri។
ក្រសួងសំខាន់ៗក៏ត្រូវបានបែងចែកស្មើៗគ្នាដែរ គឺក្រសួងការពារជាតិត្រូវបានទៅក្រុមអព្យាក្រឹតស្និទ្ធិនឹងប្រធានាធិបតី Sleimane ក្រសួងមហាផ្ទៃ និងក្រសួងយុត្តិធម៌បានទៅក្រុមលោកអតីតនាយករដ្ឋមន្រ្តី Hariri ចំណែកក្រសួងការបរទេស និងក្រសួងហិរញ្ញវត្ថុបានទៅក្រុម Hezbollah។
លោក Tammam Salam នាយករដ្ឋមន្រ្តីលីបង់បានថ្លែងថា រដ្ឋាភិបាលថ្មីនេះ គឺជារដ្ឋាភិបាលរួបរួមជាតិ ដែលបង្កើតឡើងតាមរូបមន្តដ៏សមស្របមួយ ដើម្បីឲ្យលីបង់អាចដោះស្រាយបញ្ហាប្រឈមធំៗបាន។
គួររំឭកឡើងវិញថា លីបង់ធ្លាប់ស្ថិតក្រោមការត្រួតត្រាពីសំណាក់កងទ័ពស៊ីរីអស់រយៈពេល ២៩ឆ្នាំ គឺពីឆ្នាំ១៩៧៦ រហូតដល់ឆ្នាំ២០០៥។ បច្ចុប្បន្ននេះ បើទោះបីជាស៊ីរីបានដកថយទៅហើយក៏ដោយ ក៏ប៉ុន្តែ ឆាកនយោបាយលីបង់នៅតែពោរពេញទៅដោយការប្រឈមមុខដាក់គ្នា រវាងក្រុមអ្នកគាំទ្រ និងក្រុមប្រឆាំងស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ