ប៉ារីសបើកកិច្ចប្រជុំអន្តរជាតិគាំទ្រលីបង់ ដោយមានវត្តមានចូលរួមរបស់ប្រមុខការទូតរុស្ស៊ីនិងអាមេរិក
នៅរសៀលថ្ងៃពុធទី៥មីនានេះ នៅក្រុងប៉ារីស ប្រទេសបារាំង ប្រធានាធិបតីហ្វ្រង៊ស៊័រ ហូឡង់ ធ្វើជាម្ចាស់ផ្ទះ បើកកិច្ចប្រជុំអន្តរជាតិ ស្តីពីប្រទេសលីបង់។ កិច្ចប្រជុំនេះមានទិសដៅគាំទ្រលីបង់ ប្រឈមនឹងវិបត្តិសង្គ្រាមស៊ីរីដែលនៅជិតខាងក្បែរនោះ។ ក្រៅពីវត្តមានរដ្ឋមន្ត្រីបរទេសច្រើនរូប ប្រមុខការទូតអាមេរិក ចន ឃែររី និងប្រមុខការទូតរុស្ស៊ីស៊ែរហ្កី ឡាវ្រ៉ូវ តួអង្គលេចមុខសំខាន់ក្នុងវិបត្តិនយោបាយអ៊ុយក្រែន ក៏នឹងមានវត្តមានក្នុងកិច្ចប្រជុំនេះដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
នៅរសៀលថ្ងៃពុធនេះ នៅក្រុងប៉ារីសប្រទេសបារាំង បណ្តាប្រទេសស្ថិតក្នុងក្រុមអន្តរជាតិជួយលីបង់ ហៅកាត់ថា GIS នោះ នឹងជួបប្រជុំគ្នា ដើម្បីពិភាក្សាពីការគាំទ្រជួយលីបង់ ប្រឈមនឹងវិបត្តិសង្គ្រាមស៊ីរី ដែលនៅជិតខាងក្បែរនោះ។ ក្រុមប្រទេសអន្តរជាតិជួយលីបង់នេះ ទើបបានបង្កើតឡើង កាលពីខែកញ្ញាឆ្នាំ២០១៣ កន្លងទៅប៉ុណ្ណោះ។ ប្រមុខការទូតអាមេរិក ចន ឃែររី និងប្រមុខការទូតរុស្ស៊ី ស៊ែរហ្កី ឡាវ្រ៉ូវ ជាតួអង្គ២ប្រឈមមុខគ្នា ក្នុងវិបត្តិអ៊ុយក្រែន នឹងចូលរួមក្នុងកិច្ចប្រជុំនេះផងដែរ។ លោក វីល្លីយ៉ាំ ហែក រដ្ឋមន្ត្រីការបរទេសអង់គ្លេស ក៏ចូលរួមកិច្ចប្រជុំនេះដែរ។
គិតពីពេលរុស្ស៊ីបានកាន់កាប់តំបន់គ្រីមេ នៅអ៊ុយក្រែន ចុងសប្តាហ៍មុនមក នេះជាលើកទី១ហើយ ដែលប្រមុខការទូតរុស្ស៊ីស៊ែរហ្កី ឡាវ្រ៉ូវ ត្រូវជួបផ្ទាល់មុខគ្នា ជាមួយប្រមុខការទូតអឺរ៉ុបជាច្រើននាក់។ ពិសេស គឺជួបលោកចន ឃែររី តែម្តង។ កាលពីថ្ងៃចន្ទ លោកឡាវ្រ៉ូវ បានជួបប្រមុខការទូតអាល្លឺម៉ង់ លោក ហ្វ្រង់ វ៉លទែរ ស្តិនម៉ីយែរ រួចមកហើយដែរ តែប្រមុខការទូតអាល្លឺម៉ង់បា្រប់ថា មិនទាន់ឃើញមានដំណោះស្រាយអ្វីសម្រាប់វិបត្តិអ៊ុយក្រែននៅឡើយទេ។ ដូច្នេះ កិច្ចប្រជុំអន្តរជាតិស្តីពីលីបង់ នៅក្រុងប៉ារីសថ្ងៃពុធនេះ ជាឱកាសជួយអោយថ្នាក់ដឹកនាំទាំងអស់នេះ បានពិភាក្សាគ្នាជាមួយរុស្ស៊ី ស្តីពីអ៊ុយក្រែនផងដែរ។ ការពិភាក្សានេះ ប្រហែលជាអាចបង្កភាពតានតឹង។
ដោយឡែក ទាក់ទងនឹងលីបង់ ដែលជាទិសដៅចំបងនៃកិច្ចប្រជុំអន្តរជាតិនេះ បណ្តាប្រទេសដែលចូលរួមក្នុងកិច្ចប្រជុំ ត្រូវធ្វើការបូកសរុបមើលឡើងវិញ ពីជំនួយកន្លងមក ក្នុងការធានាសន្តិសុខ និងស្ថិរភាពជួយលីបង់។ គួរបញ្ជាក់ថា ដោយសារសង្គ្រាមរ៉ាំរ៉ៃនៅស៊ីរី លីបង់កំពុងប្រឈមនឹងការហូរចូលនៃជនភៀសខ្លួនស៊ីរី ក្នុងទឹកដីខ្លួនយ៉ាងសន្ធឹកសន្ធាប់។ ដើម្បីជួយសេដ្ឋកិច្ចលីបង់ ធនាគារពិភពលោកបានបង្កើតមូលនិធិមួយ។ ហើយ ថវិកា៥០លានដុល្លារ ដែលមូលនិធិនេះអាចប្រមូលបាន នឹងយកទៅជួយក្នុងកម្មវិធីប្រយុទ្ធភាពក្រីក្រ ការសិក្សា ពិសេសជួយកុមារជនជាតិស៊ីរីទាំងឡាយដែលភៀសខ្លួនមកនៅលីបង់ អោយបានចូលរៀនសូត្រនឹងគេ។
អារ៉ាប៊ីសាអូឌីត ដែលគ្មានឈ្មោះក្នុងក្រុមប្រទេសជួយលីបង់ ធ្លាប់បានសន្យាជួយ៣ពាន់លានដុល្លារ សម្រាប់ផ្នែកសម្ភារៈយោធាកងទ័ពលីបង់។ អារ៉ាប៊ីសាអូឌីតក៏ត្រូវបានបារាំងអញ្ជើញចូលរួមកិច្ចប្រជុំថ្ងៃពុធនេះដែរ។ គួររំលឹកថា លីបង់ទើបតែបានបង្កើតរដ្ឋាភិបាលថ្មី កាលពីពាក់កណ្តាលខែកុម្ភៈមុននេះ មានគ្រប់ភាគីជម្លោះទាំងអស់ចូលរួម។ លីបង់ត្រូវធ្វើយ៉ាងណា រៀបចំការបោះឆ្នោតប្រធានាធិបតីអោយបាន ចន្លោះពីថ្ងៃ២៥មីនា ដល់ថ្ងៃ២៥ឧសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ