ប៉ូលិសអេស្ប៉ាញបំបែកបណ្តាញជួញដូរមនុស្សក្នុងប្រទេសអេស្ប៉ាញ និងបារំាង
ចុះផ្សាយនៅថ្ងៃ៖
ស្តាប់ - ០៥:៥២
នៅថ្ងៃសៅរ៍ ទី១០ សីហាម្សិលមិញ ប៉ូលិសអេស្ប៉ាញបានប្រកាសពីការបើកប្រតិបត្តិការវាយបង្រ្កាបបណ្តាញអន្តោប្រវេសន៍ខុសច្បាប់នៅក្នុងប្រទេសអេស្ប៉ាញ និងប្រទេសបារំាង។ នៅក្នុងប្រតិបត្តិការនោះ មានការចាប់ខ្លួនមនុស្ស ៧៥នាក់ដែលជាសមាជិករបស់អង្គការជួញដូរមនុស្សខុសច្បាប់ចូលទៅរស់នៅក្នុងទ្វីបអឺរ៉ុប និងសហរដ្ឋអាមេរិក។
ក្នុងចំណោមមនុស្សចាប់ខ្លួនទំាង ៧៥នាក់ មាន ៥១នាក់ចាប់ខ្លួននៅក្នុងប្រទេសអេស្ប៉ាញ និង ២៤នាក់នៅក្នុងប្រទេសបារំាង។ មនុស្សចាប់ខ្លួនទំាង ៧៥នាក់ គឺជាសមាជិករបស់អង្គការមួយដែលជាអ្នករៀបចំនំាមនុស្សដោយប្រើលិខិតឆ្លងដែនខុសច្បាប់ឆ្លងចូលទៅរស់នៅក្នុងទ្វីបអឺរ៉ុប ឬមួយក៏សហរដ្ឋអាមេរិក។ ជាមួយគ្នានេះ ប៉ូលិសក៏រឹបអូសបានម៉ាស៊ីនកុំព្យូទ័រ ព្រមលិខិតឆ្លងដែនក្លែងក្លាយចំនួន ៨១ក្បាលដែលធ្វើនៅតៃវ៉ាន់ ហុងកុង ឬមួយក៏នៅម៉ាឡេស៊ី។ បើយោងតាមប៉ូលិសអេស្ប៉ាញ ថា្នក់ដឹកនំាសំខាន់ៗ និងទីស្នាក់ការកណ្តាលរបស់អង្គការនេះស្ថិតក្នុងទីក្រុង Barcelone ប្រទេសអេស្ប៉ាញ។ ម្យ៉ាងទៀត ក្នុងចំណោមមនុស្សចាប់ខ្លួនទំាង ៧៥នាក់ មាន ២នាក់ជាជនជាតិអឺរ៉ុបដោយមិនបានប្រាប់ពីសញ្ជាតិ និងអ្នកផ្សេងដែលភាគច្រើនជាជនជាតិចិន។
គួរជម្រាបជូនថា ប្រតិបត្តិការវាយបង្រ្កាបបណ្តាញអន្តោប្រវេសន៍ខុសច្បាប់ពីសំណាក់ក្រុមប៉ូលិសអេស្ប៉ាញនៅក្នុងប្រទេសអេស្ប៉ាញ និងប្រទេសបារំាងនាថ្ងៃម្សិលមិញបានធ្វើឡើង បន្ទាប់ពីប៉ូលិសអេស្ប៉ាញបានផ្តើមបើកការតាមដាន ស៊ើបអង្កេតតំាងតែពីខែកក្កដា ឆ្នំា ២០១១ មក។ តម្រូវការពេលវេលាស៊ើបអង្កេតរហូតដល់ទៅជាង ២ឆ្នំា គឺមកពីអង្គការមួយនេះមានរចនាសម្ព័ន្ធគ្រប់គ្រងល្អឥតខ្ចះ ជាមួយនឹងមេខ្លោងរស់នៅក្នុងប្រទេសចិន និងដែលមានសាខានៅក្នុងប្រទេសសំខាន់ៗមួយចំនួនក្នុងទ្វីបអឺរ៉ុប និងអាស៊ី។ ក្រៅពីមានតួនាទីជាអ្នករត់ពន្ធមនុស្សទៅរស់នៅក្នុងប្រទេសទី៣អង្គការមួយនេះក៏បានដើរតួនាទីជាអ្នករត់ពន្ធស្រ្តីពេស្យាចារដែរ,។
អ្នកចង់ចាកចេញត្រូវចំណាយលុយពី ៤០ ០០០ ទៅ ៥០ ០០០អឺរ៉ូ
ជាទូទៅ មនុស្សភាគច្រើនដែលអង្គការមួយនេះបាននំាចូលទៅក្នុងទ្វីបអឺរ៉ុប ឬមួយក៏សហរដ្ឋអាមេរិក គឺជាជនជាតិចិន។ ដើម្បីអាចធ្វើយ៉ាងនេះបាន អង្គការមួយនេះបានរៀបចំធ្វើលិខិតឆ្លងដែនក្លែងក្លាយ និងតម្រូវឲ្យជនជាតិចិនម្នាក់ៗដែលចង់ចាកចេញត្រូវចំណាយលុយពី ៤០ ០០០ ទៅ ៥០ ០០០អឺរ៉ូ។ នៅពេលរៀបចំសំណុំឯកសារក្លែងក្លាយចប់សព្វគ្រប់អស់ហើយ ការធ្វើដំណើរចាកចេញរបស់ជនជាតិចិនពីស្រុកចិនទៅកាន់ប្រទេសទី៣ ត្រូវធ្វើឡើងជាពីរដំណាក់កាល ទីមួយ មានអ្នកជូនដំណើរដែលជាជនជាតិចិនដូចគ្នា ឬមួយក៏ម៉ាឡេស៊ីពីចិនទៅកាន់ប្រទេសអេស្ប៉ាញ និងដំណាក់កាលទី២ មានអ្នកជូនដំណើរបន្តពីអេស្ប៉ាញទៅកាន់ប្រទេសទី៣ ដែលជាគោលដៅចុងក្រោយ ភាគច្រើនគឺសហរដ្ឋអាមេរិក និងប្រទេសអឺរ៉ុបមួយចំនួន ដូចជាអង់គ្លេស អេស្ប៉ាញ បារំាង ក្រិក អ៊ីតាលី អៀរឡង់ ឬមួយក៏ប្រទេសតួកគី។
គួរបញ្ជាក់ជូនថា នៅក្នុងរយៈពេលធ្វើដំណើរតំាងពីប្រទេសកំណើតរហូតដល់ប្រទេសគោលដៅចុងក្រោយ អ្នកដំណើរម្នាក់ៗបានទទួលការណែនំាយ៉ាងល្អិតល្អន់ពីអង្គការ ក៏ដូចជាអ្នកជូនដំណើរដែរ ពិសេសនៅពេលឆ្លងកាត់ប៉ុស្តប៉ូលិសព្រំដែនម្តងៗ ដោយគេឲ្យអ្នកដំណើររូបនោះចូលទៅបន្លំខ្លួននៅក្នុងជួរក្រុមអ្នកទេសចរណ៍ជាដើម។
និយាយពីបុគ្គលិកលក្ខណៈរបស់អ្នកជូនដំណើរវិញ ទោះបីជាអ្នកនោះ ជាជនជាតិចិន ឬមួយក៏ម៉ាឡេស៊ី គឺជាមនុស្សស្មោះត្រង់ និងទុកចិត្តរបស់អង្គការ ព្រមទំាងស្គាល់ច្បាស់អំពីភូមិសាស្រ្តរបស់អាកាសយានដ្ឋាននីមួយៗដែលគេឆ្លងកាត់។ មួយវិញទៀត ទំាងអ្នកជូនដំណើរនៅក្នុងវគ្គទី១ និងទី២ ត្រូវតែរួសរាន់វិលទៅកាន់ប្រទេសដើមរបស់ខ្លួនវិញ ដើម្បីចៀសវាងការតាមដានស៊ើបអង្កេតពីប៉ូលិស។
អ្នកចាកចេញជាស្រ្តី ច្រើនធ្លាក់ខ្លួនជាស្រីលក់ខ្លួនក្នុងប្រទេសទី៣
ជារួម ការចាកចេញរបស់ជនជាតិចិនភាគច្រើន គឺដើម្បីស្វែងរកអនាគតល្អដែលពួកគេគិតថា មានតែនៅអឺរ៉ុប និងអាមេរិកទេ។ ដើម្បីអាចទៅដល់ប្រទេសទី៣បាន ម្នាក់ៗត្រូវចំណាយលុយពី ៤ម៉ឺន ទៅ ៥ម៉ឺនអឺរ៉ូ។ ជាទូទៅ គេសង្កេតឃើញថា មានជនជាតិចិនដែលគ្មានលុយបានទៅចងការលុយគេដើម្បីអាចចេញបាន។ តែបញ្ហានៅត្រង់ថា នៅពេលបានមកដល់ប្រទេសទី៣ហើយ មិនថាអឺរ៉ុប ឬមួយក៏អាមេរិកទេ មានភាគច្រើនហាក់ដូចជាបានខកចិត្តយ៉ាងខ្លំាង ខកចិត្តដោយសារតែអនាគតល្អដែលពួកគេបានស្រមើលស្រម៉ៃនោះ មិនពិតទាល់តែសោះ។ ភាសាក៏មិនចេះ សំបុត្រស្នាមស្របច្បាប់ក៏គ្មានដែរ ព្រោះថា តម្លៃ ៤ម៉ឺន ឬ ៥ម៉ឺនដែលម្នាក់ៗបានចំណាយនោះ គឺបានត្រឹមទៅជាន់ដល់ដីអឺរ៉ុប ឬមួយអាមេរិកប៉ុណ្ណោះ គឺមិនបានធានាដល់ការរស់នៅស្របច្បាប់របស់ពួកគេទេ។ អ៊ីចឹងហើយបានជាមានអ្នកខ្លះ ភាគច្រើនជាស្រ្តី ត្រូវបង្ខំចិត្តរកស៊ីលក់ខ្លួនដើម្បីសងបំណុលគេនៅស្រុកកំណើត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ