សហភាពអឺរ៉ុបព្យួរកិច្ចសហប្រតិបត្តិការជាមួយថៃដោយសាររដ្ឋប្រហារ
នៅថ្ងៃចន្ទនេះ សហភាពអឺរ៉ុបបានសម្រេចព្យួរកិច្ចសហប្រតិបត្តិការជាមួយរដ្ឋាភិបាលថៃ ដើម្បីជាការឆ្លើយតបទៅនឹងការធ្វើរដ្ឋប្រហារ កាលពីខែឧសភា។ នៅឯប្រទេសថៃឯណោះវិញ របបសឹកបានបង្កើនការបង្រ្កាបទៅលើអ្នកប្រឆាំងនឹងរដ្ឋប្រហារ ដោយបានប្រកាសផ្តល់រង្វាន់ដល់អ្នកណាដែលជួយផ្តល់ព័ត៌មាន ដែលអាចនាំទៅដល់ការចាប់ខ្លួនអ្នកតវ៉ាប្រឆាំង។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងកិច្ចប្រជុំ នៅក្នុងប្រទេសលុចសំបួរ នៅថ្ងៃចន្ទ រដ្ឋមន្រ្តីក្រសួងការបរទេសនៃសហភាពអឺរ៉ុបបានថ្កោលទោសការធ្វើរដ្ឋប្រហារ នៅក្នុងប្រទេសថៃ ហើយបានព្រមព្រៀងគ្នាដាក់ចេញនូវវិធានការមួយចំនួន ដើម្បីដាក់ទណ្ឌកម្មចំពោះរបបសឹកថៃ និងដើម្បីបង្ខំឲ្យថៃវិលត្រឡប់ទៅរកគន្លងប្រជាធិបតេយ្យវិញជាបន្ទាន់។
វិធានការទាំងនេះរួមមានការផ្អាករាល់ដំណើរទស្សនកិច្ចផ្លូវការរបស់មន្រ្តីសហភាពអឺរ៉ុបទៅកាន់ប្រទេសថៃ ព្រមទាំងផ្អាកការចុះហត្ថលេខាលើកិច្ចព្រមព្រៀងជាដៃគូ ដែលសហភាពអឺរ៉ុបគ្រោងចុះជាមួយថៃ។ សហភាពអឺរ៉ុបក៏បានទាមទារផងដែរឲ្យរបបសឹកថៃដោះលែងរាល់អ្នកទោសនយោបាយ ព្រមទាំងគោរពនូវសិទ្ធិសេរីភាពរបស់ប្រជាជន។
នៅក្នុងសេចក្តីថ្លែងការណ៍ក្រោយកិច្ចប្រជុំនៅថ្ងៃចន្ទនេះ រដ្ឋមន្រ្តីក្រសួងការបរទេសសហភាពអឺរ៉ុបបានបញ្ជាក់បន្ថែមថា បណ្តាប្រទេសនីមួយៗ ដែលជាសមាជិកសហភាពអឺរ៉ុបក៏នឹងធ្វើការសើរើមើលឡើងវិញផងដែរ នូវទំនាក់ទំនងយោធាទ្វេភាគីជាមួយថៃ ហើយថា ទំនាក់ទំនង រវាងសហភាពអឺរ៉ុប និងថៃ អាចវិលត្រឡប់មករកប្រក្រតីភាពឡើងវិញបានទាល់តែមេដឹកនាំរបបសឹករៀបចំដំណើរការបោះឆ្នោតស្របតាមលទ្ធិប្រជាធិបតេយ្យ ដើម្បីវិលត្រឡប់ទៅរករបបដឹកនាំស្របតាមរដ្ឋធម្មនុញ្ញ។
នៅឯប្រទេសថៃឯណោះវិញ របបសឹកកំពុងតែបង្កើនសកម្មភាពបង្រ្កាបក្រុមអ្នកប្រឆាំងនឹងរដ្ឋប្រហារ ដោយអគ្គស្នងការរងប៉ូលិសជាតិបានប្រាប់ទីភ្នាក់ងារព័ត៌មានបារាំង AFP ថា ប៉ូលិសនឹងផ្តល់រង្វាន់ដល់អ្នកណាដែលផ្តល់ភស្តុតាងដល់អាជ្ញាធរ ដើម្បីឈានទៅចាប់ខ្លួនអ្នកធ្វើបាតុកម្មប្រឆាំងនឹងរដ្ឋប្រហារ។
គួរបញ្ជាក់ថា កាលពីថ្ងៃអាទិត្យប៉ូលិសបានព័ទ្ធចាប់បុរសម្នាក់ នៅក្នុងទីក្រុងបាងកក នៅក្នុងពេលដែលគាត់កំពុងអានសៀវភៅប្រលោមលោកមួយរបស់ George Orwell ដែលមានអត្ថន័យប្រឆាំងនឹងរបបផ្តាច់ការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ