មេដឹកនាំកងទ័ពថៃទៅចិន ក្នុងពេលថៃកំពុងរងការស្តីបន្ទោសពីលោកខាងលិចរឿងរដ្ឋប្រហារ
ចុះផ្សាយនៅថ្ងៃ៖
ស្តាប់ - ០៤:៥៨
នៅថ្ងៃពុធនេះ គណៈប្រតិភូមួយក្រុមរបស់រដ្ឋាភិបាលយោធាថៃ ដឹកនាំដោយរដ្ឋមន្រ្តីក្រសួងការពារជាតិ បានចេញដំណើរទៅបំពេញទស្សនកិច្ច នៅក្នុងប្រទេសចិន។ នេះជាដំណើរទស្សនកិច្ចក្រៅប្រទេសដ៏កម្រមួយ ចាប់តាំងពីកងទ័ពថៃឡើងកាន់អំណាច ដោយរដ្ឋប្រហារ កាលពីថ្ងៃទី២២ឧសភាកន្លងទៅ។ រដ្ឋប្រហារដែលទទួលរងនូវការថ្កោលទោសពីសំណាក់ប្រទេសលោកខាងលិច ជាពិសេស ពីសហរដ្ឋអាមេរិក ដែលជាសម្ព័ន្ធមិត្តរបស់ថៃ។
បើតាមការប្រកាសរបស់ឧត្តមសេនីយ៍ ស៊ូរ៉ាសាក់ កាញ់ចាណារ៉ាត់ (Surasak Kanjanarat) រដ្ឋមន្រ្តីក្រសួងការពារជាតិថៃ គណៈប្រតិភូថៃនឹងត្រូវជួបជាមួយនាយសេនាធិការរងនៃកងទ័ពចិន ដើម្បីជជែកអំពីទំនាក់ទំនងរវាងកងទ័ពទាំងពីរ អំពីគម្រោងហ្វឹកហ្វឺនកងទ័ពរួមគ្នា និងអំពីបញ្ហាសន្តិសុខក្នុងតំបន់។
គួរបញ្ជាក់ថា ខុសពីប្រទេសមួយចំនួន ជាពិសេស ប្រទេសលោកខាងលិច ដែលនាំគ្នាថ្កោលទោសរដ្ឋប្រហាររបស់មេទ័ពថៃ ចិនវិញ មិនត្រឹមតែមិនបានថ្កោលទោសរដ្ឋប្រហារថៃនោះទេ តែថែមទាំងបង្ហាញពីជំហរគាំទ្រទៀតផង។
មេដឹកនាំកងទ័ពថៃបានអះអាងទៅទៀតថា ចិនគាំទ្ររដ្ឋាភិបាលយោធាថៃបច្ចុប្បន្ន ក្រោយពីឯកអគ្គរដ្ឋទូតចិនបានចូលជួបមេដឹកនាំកងទ័ពថៃ កាលពីសប្តាហ៍មុន។ ម្យ៉ាងទៀត កាលពីថ្ងៃចន្ទ ក្រុមហ៊ុនទូរស័ព្ទ China Mobile ដែលជាក្រុមហ៊ុនរដ្ឋរបស់ចិនទើបនឹងបានព្រមព្រៀងចូលហ៊ុនប្រមាណជា ៨៨០លានដុល្លារ ដើម្បីរកស៊ីជាមួយក្រុមហ៊ុនទូរស័ព្ទរបស់ថៃ ដែលជាកិច្ចសន្យាវិនិយោគដ៏ធំបំផុត ចាប់តាំងពីរដ្ឋាភិបាលយោធាថៃឡើងកាន់អំណាច។
ជំហររបស់ចិន ចំពោះរដ្ឋប្រហារនៅថៃ វាមិនមែនជារឿងចម្លែកនោះទេ។ តាំងពីដើមមក ចិនតែងតែប្រកាន់យកនូវគោលការណ៍មិនជ្រៀតជ្រែកចូលក្នុងកិច្ចការផ្ទៃក្នុងប្រទេសដទៃ ហើយជាទូទៅ គេសង្កេតឃើញថា រដ្ឋាភិបាលចិនមិនដែលប្រកាន់ថា មេដឹកនាំណាជាមេដឹកនាំដែលកើតចេញពីការបោះឆ្នោតប្រជាធិបតេយ្យ ឬក៏ជាមេដឹកនាំផ្តាច់ការទេ ឲ្យតែមានផលប្រយោជន៍ ចិនអាចសហការ អាចធ្វើការរកស៊ីជាមួយបានទាំងអស់។
ម្យ៉ាងទៀត ការធ្វើរដ្ឋប្រហារទម្លាក់រដ្ឋាភិបាលប្រជាធិបតេយ្យនៅថៃ មិនមែនជារឿង ដែលត្រូវឲ្យចិនស្តាយស្រណោះនោះដែរ ពីព្រោះចិនមិនដែលស្រឡាញ់ចូលចិត្តលទ្ធិប្រជាធិបតេយ្យនេះទេ។ កាលពីថ្ងៃចន្ទកន្លងទៅនេះ កាសែតផ្លូវការរបស់បក្សកុម្មុយនិស្តចិន ទើបនឹងបានចុះផ្សាយបទវិចារណកថាមួយ លើកឡើងពីភាពអនាធិបតេយ្យ ឬសង្រ្គាមស៊ីវិល ដែលបង្កឡើងដោយរបបប្រជាធិបតេយ្យ តាមបែបលោកខាងលិច ដោយក្នុងនោះ ចិនបានលើកឡើងចំៗ ពីឧទាហរណ៍នៃប្រជាធិបតេយ្យនៅប្រទេសថៃនេះតែម្តង។
ថៃគឺជាសម្ព័ន្ធមិត្តដ៏សំខាន់មួយរបស់អាមេរិក នៅក្នុងតំបន់អាស៊ី។ ក៏ប៉ុន្តែ ចាប់តាំងពីរដ្ឋប្រហារថ្ងៃទី២២ឧសភាមក ទំនាក់ទំនងរវាងប្រទេសទាំងពីរ កំពុងស្ថិតក្នុងភាពតានតឹងខ្លាំង។ រដ្ឋាភិបាលអាមេរិកបានថ្កោលទោសការធ្វើរដ្ឋប្រហារ និងបានទាមទារឲ្យថៃវិលត្រឡប់ទៅរកគន្លងប្រជាធិបតេយ្យវិញ។ លើសពីនេះទៅទៀត ជំនួយយោធា គម្រោងធ្វើសមយុទ្ធរួមគ្នា ព្រមទាំងគម្រោងដំណើរទស្សនកិច្ចរបស់មន្រ្តីយោធាថៃទៅអាមេរិក ក៏ត្រូវបានរដ្ឋាភិបាលក្រុងវ៉ាស៊ីងតោនប្រកាសផ្អាកមួយរយៈផងដែរ។
ការណ៍ដែលមេដឹកនាំរដ្ឋាភិបាលយោធាថៃទៅបង្ហាញភាពជិតស្និទ្ធជាមួយចិន នៅពេលនេះ វាមិនមែនជារឿងល្អទេ សម្រាប់អាមេរិក ជាពិសេស នៅក្នុងពេលដែលលោកអូបាម៉ាកំពុងចង់បង្កើនវត្តមាន និងឥទ្ធិពលនៅក្នុងតំបន់អាស៊ី។
នៅក្នុងពេលបច្ចុប្បន្ននេះ អាមេរិកកំពុងតែខិតខំព្យាយាមពង្រឹងទំនាក់ទំនងជាមួយបណ្តាប្រទេសជាច្រើននៅអាស៊ី។ សូម្បីតែប្រទេសដែលធ្លាប់តែមើលមុខគ្នាមិនចំ កាលពីមុន ដូចជា ភូមា ឬវៀតណាម ជាដើម ក៏អាមេរិកកំពុងតែចែចង់មិនតិចដែរ ដើម្បីព្យាយាមទប់ទល់នឹងឥទ្ធិពលរបស់ចិន។ ចំណែកប្រទេសដែលជាសម្ព័ន្ធមិត្តស្រាប់ ដូចជា ថៃ ជាដើម អាមេរិកក៏កំពុងតែត្រូវកាន់តែខ្លាំងថែមទៀត។
ប្រហែលជាក្នុងហេតុផលនេះហើយហើយបានជាគេសង្កេតឃើញថា អាមេរិកហាក់ដូចជាមានការប្រយ័ត្នប្រយែងខ្លាំង ក្នុងការបញ្ចេញប្រតិកម្មតបនឹងការធ្វើរដ្ឋប្រហារនៅថៃ។ អាមេរិកបានថ្កោលទោសរដ្ឋប្រហារ និងផ្អាកជំនួយយោធា គឺដោយសារតែវាជារឿងចាំបាច់ដែលត្រូវតែធ្វើដោយខានមិនបាន ពីព្រោះ នេះជាគោលការណ៍មូលដ្ឋានរបស់អាមេរិក ហើយម្យ៉ាងទៀត អាមេរិកមានច្បាប់ ដែលហាមឃាត់មិនឲ្យរដ្ឋាភិបាលសហការជាមួយរដ្ឋាភិបាលណាដែលឡើងកាន់អំណាចដោយធ្វើរដ្ឋប្រហារ។ ក៏ប៉ុន្តែ បើយើងពិនិត្យមើលទៅ ជំនួយយោធាទៅថៃដែលអាមេរិកសម្រេចព្យូរនៅពេលនេះ ក៏មិនមានទំហំច្រើនប៉ុន្មានដែរ ពោលគឺ មានតែ ៣,៥លានដុល្លារតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ