អ្នកដឹកនាំការប្រឆាំងការធ្វើរដ្ឋប្រហារថៃតាមប្រព័ន្ធ Internet ម្នាក់ ប្រឈមនឹងការផ្តន្ទាទោស១៤ឆ្នាំ
យោងតាមការផ្តល់ព៌តមានរបស់នគរបាលថៃ មេដឹកនាំសំខាន់ម្នាក់នៃក្រុមអ្នកប្រឆាំង នឹងការធ្វើរដ្ឋប្រហារយោធាថៃ ដែលបានធ្វើសកម្មភាពប្រឆាំងតាមប្រព័ន្ធ Internet អាចនឹងប្រឈមមុខ ជាមួយនឹងការផ្តន្ទាទោស ឲ្យជាប់ពន្ធនាគាររយៈពេល១៤ឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ជនជាប់ចោទឈ្មោះ សម្បត្តិ ប៊ុនកាម៉ាណុង ត្រូវបានគេឃុំខ្លួនបណ្តោះអាសន្ន អស់រយៈពេលមួយសប្តាហ៍កន្លងមកហើយ។ បើតាមសម្តីរបស់នាយអធិការនគរបាលថៃម្នាក់ ជនជាប់ចោទត្រូវបានចាប់ខ្លួន ពីបទញុះញង់បង្កឲ្យមានចលាចល និងអស្ថិរភាពសង្គម។ ទោសនេះអាចនឹងត្រូវផ្តន្ទាទោសឲ្យជាប់ពន្ធនាគាររយៈពេល៧ឆ្នាំ។ មន្ត្រីម្នាក់នេះបន្តថា លើសពីនេះទៀត ជនជាប់ចោទអាចនឹងប្រឈមនឹងទោស៥ឆ្នាំទៀត ពីបទផ្សព្វផ្សាយព៌តមានមិនពិត តាមប្រព័ន្ធ Internet ហើយនិងទោស ២ឆ្នាំទៀត ពីបទ គេចវេសមិនព្រមចូលខ្លួនតាមការកោះហៅរបស់អំណាចយោធា។
គួររំលឹកផងដែរថា លោក សម្បត្តិ ប៊ុនកាម៉ាណុង ស្ថិតក្នុងចំណោមបណ្តាឥស្សរជននយោបាយថៃ ដែលអំណាចយោធាបានធ្វើការកោះហៅឲ្យចូលខ្លួន បន្ទាប់ពីរដ្ឋប្រហារ កាលពីថ្ងៃ២២ ឧសភា។ ក្នុងចំណោមអ្នកដែលបានចូលខ្លួនតាមការកោះហៅ មានដូចជា លោកស្រី យីងឡាក់ ស៊ីណាវ៉ាត អតីតនាយករដ្ឋមន្ត្រី ជាដើម ត្រូវបានយោធាដោះលែងមកវិញហើយ ដោយតំរូវឲ្យឥស្សរជនទាំងនោះ សន្យាថា ឈប់ធ្វើនយោបាយតទៅទៀត។ ដោយឡែក លោក សម្បត្តិ ប៊ុនកាម៉ាណុង មិនបានចូលខ្លួនទេ ហើយបានបន្តការប្រឆាំងតាមប្រព័ន្ធ Internet។ លោកត្រូវបានយោធាចាប់ខ្លួន នៅភាគអាគ្នេយ៍ក្រុងបាងកក កាលពីថ្ងៃព្រហស្បតិ៍សប្តាហ៍មុន។
អង្គការ Human Rights Watchs បានហៅការចាប់ខ្លួននេះថា ជាការតាមប្រមាញ់មនុស្សដែលប្រឆាំងនឹងខ្លូនរបស់របបសឹកថៃ ហើយថា សវនាការផ្តន្ទាទោសនេះ នឹងគ្មានតម្លៃយុត្តិធម៌នោះទេ។
ឥស្សរជនយោបាយម្នាក់ទៀតដែលប្រឈមនឹងការកាត់ទោសដែរ គឺលោក ចតុរង្គ ចៃសាង អតីតរដ្ឋមន្ត្រីក្រសួងអប់រំ។ លោកអតីតរដ្ឋមន្ត្រីរូបនេះ ត្រូវបានយោធាចាប់ខ្លួនក្រោមក្រសែភ្នែករបស់អ្នកសារព៌តមានអន្តរជាតិជាច្រើននាក់ បន្ទាប់ពីគាត់បានធ្វើការរិះគន់ ដោយចំៗទៅលើការធ្វើរដ្ឋប្រហាររបស់ក្រុមយោធា។ ក្រោយមក យោធាបានដោះលែងគាត់មកវិញ ប៉ុន្តែគាត់នៅតែប្រឈមនឹងទោសជាប់ពន្ធនាគារ២ឆ្នាំ ដោយសារតែគាត់មិនបានចូលខ្លួនតាមការកោះហៅ។
អ្នកវិភាគទូទៅកំពុងសង្ស័យថា អំណាចសឹកថៃកំពុងតែធ្វើប្រតិបត្តិការ តាមកម្ចាត់ពួកអ្នកនយោបាយ និងបញ្ញវន្ត នានា ដែលមាននិន្នាការនិយមក្រុមគ្រួសារ ថាក់ស៊ីន ដោយមិនឲ្យពួកអ្នកទាំងនោះ វិលមកជាន់ឆាកនយោបាយវិញជាដាច់ខាត។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ