អាកាសធាតុត្រជាក់ខ្លាំងនៅអឺរ៉ុបកំពុងជាគ្រោះថ្នាក់សម្រាប់ជនភៀសខ្លួន
មនុស្សយ៉ាងតិច ១៧នាក់ ត្រូវបាត់បង់ជីវិត នៅក្នុងតំបន់អឺរ៉ុប ដោយសារតែអាកាសធាតុធ្លាក់ចុះត្រជាក់ខ្លាំង ចាប់តាំងពីថ្ងៃសៅរ៍ម្សិលមិញ។ អ្វីដែលធ្វើឲ្យគេកាន់តែព្រួយបារម្ភ គឺជនភៀសខ្លួន ដែលនៅតាមកន្លែងខ្លះ កំពុងរស់នៅតាមទីវាលដោយគ្មានទីជម្រកត្រឹមត្រូវ។
ចុះផ្សាយនៅថ្ងៃ៖
ស្តាប់ - ០១:៥៥
អស់រយៈពេលប៉ុន្មានថ្ងៃមកហើយ ដែលតំបន់អឺរ៉ុបទាំងមូលត្រូវគ្របដណ្តប់ទៅដោយខ្យល់ត្រជាក់ធ្លាក់ពីប៉ូលខាងជើង ហើយសីតុណ្ហភាពបានធ្លាក់ចុះត្រជាក់ខ្លាំង ចាប់ពីថ្ងៃសៅរ៍ម្សិលមិញ។ នៅបារាំង ខេត្តចំនួន ៧ រួមទាំងតំបន់ជុំវិញក្រុងប៉ារីសផង ត្រូវបានដាក់ឲ្យស្ថិតក្នុងភាពប្រុងប្រយ័ត្នខ្ពស់។ ក៏ប៉ុន្តែ គឺនៅតាមបណ្តាប្រទេសក្នុងតំបន់អឺរ៉ុបកណ្តាល និងខាងកើត ដែលសីតុណ្ហភាពចុះត្រជាក់ខ្លាំងជាងគេ ក្នុងចន្លោះពី ២០អង្សាក្រោមសូន្យនៅប៉ូឡូញ រហូតទៅដល់ ៣០អង្សាក្រោមសូន្យនៅម៉ូស្គូ។
ប្រឈមមុខនឹងអាកាសធាតុត្រជាក់ខ្លាំងបែបនេះ អ្នកដែលត្រូវប្រឈមមុខនឹងគ្រោះថ្នាក់ខ្លាំងជាងគេ គឺអ្នកដែលរស់នៅតាមផ្លូវគ្មានទីជម្រក ហើយអង្គការក្រៅរដ្ឋាភិបាលមួយចំនួន ជាពិសេស អង្គការ Human Rights Watch និងអង្គការគ្រូពេទ្យគ្មានព្រំដែន បានទាញសញ្ញាអាសន្ន អំពីគ្រោះថ្នាក់ដែលជនភៀសខ្លួនកំពុងប្រឈម ជាពិសេស នៅតាមបណ្តាប្រទេសនៅអឺរ៉ុបកណ្តាល រួមមានដូចជា ប៊ុលហ្ការី ហុងគ្រី និងស៊ែរប៊ី ជាដើម ដែលសីតុណ្ហភាពធ្លាក់ចុះរហូតដល់ទៅ ២៧អង្សាក្រោមសូន្យ ក៏ប៉ុន្តែ ជនភៀសខ្លួន ឬជនអន្តោប្រវេសន៍ខុសច្បាប់ខ្លះ រស់នៅតាមទីវាល ដោយគ្មានជម្រកត្រឹមត្រូវ។
មន្រ្តីអង្គការ Human Rights Watch បានប្រាប់វិទ្យុបារាំងអន្តរជាតិថា អាជ្ញាធរនៅតាមប្រទេសទាំងនេះ មិនត្រឹមតែមិនបានគិតគូរជួយស្វែងរកទីជម្រកដល់ជនភៀសខ្លួនទាំងនេះនោះទេ តែថែមទាំងរារាំងសមាគម និងអង្គការក្រៅរដ្ឋាភិបាលមិនឲ្យជួយដល់ពួកគេថែមទៀតផង។
នៅស៊ែរប៊ី អង្គការគ្រូពេទ្យគ្មានព្រំដែនបានស្នើសុំសាងសង់ជំរំជនភៀសខ្លួនបណ្តោះអាសន្នមួយ សម្រាប់ជ្រកក្នុងរដូវត្រជាក់នេះ ក៏ប៉ុន្តែ រដ្ឋាភិបាលក្រុងប៊ែលក្រាតមិនបានឆ្លើយតប
នៅប៊ុលហ្ការីវិញ ករណីជនភៀសខ្លួនស្លាប់ដោយអាកាសធាតុត្រជាក់បានកើតមានរួចទៅហើយ ដោយសាកសពជនភៀសខ្លួនអ៊ីរ៉ាក់ពីរនាក់ត្រូវបានគេរកឃើញ កាលពីថ្ងៃសុក្រ នៅក្នុងព្រៃក្បែរព្រំដែនជាមួយនឹងប្រទេសតួកគី។ តួកគី និងក្រិក ដែលជាច្រកឆ្លងកាត់ដ៏សំខាន់ នៃជនភៀសខ្លួន ពីតំបន់មជ្ឈិមបូព៌ា ក៏កំពុងប្រឈមមុខនឹងអាកាសធាតុត្រជាក់ ក្នុងចន្លោះពី សូន្យ ទៅ ១៥អង្សាក្រោមសូន្យផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ