ធ្លាក់យន្តហោះរុស្ស៊ី៖អង់គ្លេស និងអាមេរិកសង្ស័យការបំផ្ទុះគ្រាប់បែកក្នុងយន្តហោះពេលហោះហើរ
៥ថ្ងៃ ក្រោយគ្រោះថ្នាក់ធ្លាក់យន្តហោះរុស្ស៊ីមួយគ្រឿងប្រភេទ Airbus A៣២១ នៅតំបន់ស៊ីណៃ ក្នុងប្រទេសអេហ្ស៊ីបដែលបានផ្តាច់ជីវិតមនុស្សទំាង ២២៤នាក់មក ការស៊ើបអង្កេតកំពុងបន្តធ្វើដោយក្រុមអ្នកជំនាញកំពុងធ្វើការសិក្សា វិភាគលើប្រអប់ខ្មៅទំាងពីររបស់យន្តហោះនៅក្នុងទីក្រុងគែរ។ តំាងពីថ្ងៃទី១ នៃការធ្លាក់យន្តហោះ មានការអះអាងខុសៗគ្នាជុំវិញមូលហេតុនៃការធ្លាក់យន្តហោះ។ តែពេលនេះ អង់គ្លេស និងអាមេរិកបានបញ្ជាក់ដូចគ្នាថា យន្តហោះនោះបានផ្ទុះធ្លាក់ដោយសារតែការបំផ្ទុះគ្រាប់បែកក្នុងយន្តហោះបង្កឡើងដោយក្រុមជីហាតអង្គការរដ្ឋអ៊ីស្លាម។ អំណះអំណាងនេះបានធ្វើឡើង ចំពេលដែលលោកប្រធានាធិបតីអេហ្ស៊ីបកំពុងបំពេញទស្សនកិច្ចនៅអង់គ្លេសក្នុងថ្ងៃទី៥ វិច្ឆិកា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៤៧
តំាងពីថ្ងៃដំបូងនៃការធ្លាក់យន្តហោះរុស្ស៊ីក្នុងតំបន់ស៊ីណៃ ប្រទេសអេហ្ស៊ីប មានសម្មតិកម្មជាច្រើនត្រូវបានលើកឡើងទាក់ទងនឹងមូលហេតុនៃគ្រោះថ្នាក់យន្តហោះ ទី១ អាចមកពីបញ្ហាបច្ចេកទេស ទី២ អាចមកពីកំហុសអ្នកបើកបរ ទី៣ អាចមកពីបញ្ហាអាកាសធាតុ និងទី៤ អាចជាអំពើភេរវកម្មបង្កដោយក្រុមជីហាតអង្គការរដ្ឋអ៊ីស្លាមក្នុងប្រទេសអេហ្ស៊ីប។ ចំណែកក្រុមជីហាតរដ្ឋអ៊ីស្លាមក៏បានចេញមុខប្រកាសក្នុងថ្ងៃដំបូងថា ខ្លួនជាអ្នកកម្ទេចយន្តហោះរុស្ស៊ី។ តែអេហ្ស៊ីប ក៏ដូចរុស្ស៊ីមានការប្រយ័ត្នប្រយែងចំពោះការសារភាពរបស់ក្រុមជីហាតដោយគេយល់ឃើញថា ក្រុមជីហាតគ្មានគ្រាប់មីស៊ីលដែលអាចបាញ់ទម្លាក់យន្តហោះក្នុងកំពស់យ៉ាងខ្ពស់ទេ។
បន្ទាប់មកទៀត សម្មតិកម្មស្តីពីបញ្ហាអាកាសធាតុត្រូវបានផាត់ចោល ដោយនៅសល់សម្មតិកម្មតែពីរគត់ គឺបញ្ហាបច្ចេកទេស ឬមួយក៏ទង្វើភេរវនិយម។ សម្មតិកម្មទំាងពីរនេះត្រូវបានក្រុមអ្នកជំនាញកំពុងបន្តធ្វើការសិក្សា វិភាគលើប្រអប់ខ្មៅទំាងពីររបស់យន្តហោះនៅក្នុងទីក្រុងគែរ ប្រទេសអេហ្ស៊ីប។ ដោយឡែក ក្រុមជីហាតអង្គការរដ្ឋអ៊ីស្លាមបានប្រកាសជាថ្មីនៅថ្ងៃពុធ ទី៤ វិច្ឆិកាថា ខ្លួនជាអ្នកកម្ទេចយន្តហោះរុស្ស៊ី។ ស្របពេលគ្នានេះ អង់គ្លេស និងអាមេរិកបានបញ្ជាក់រួមគ្នាថា យន្តហោះនោះបានផ្ទុះឆេះធ្លាក់ដោយសារតែការបំផ្ទុះគ្រាប់បែកនៅក្នុងយន្តហោះបង្កឡើងដោយក្រុមជីហាតអង្គការរដ្ឋអ៊ីស្លាម។
ទីក្រុងឡុងដ៏ និងវ៉ាស៊ីតោនបានអះអាងថា អ្វីដែលខ្លួនបានលើកឡើងនេះគ្រាន់តែជាការប៉ាន់ស្មានដោយសំអាងលើទិន្នន័យរបស់ផ្កាយរណប។ តាមទូរទស្សន៍ CNN ដែលស្រង់សម្តីអ្នកទទួលខុសត្រូវអាមេរិកម្នាក់មិនព្រមបញ្ចេញឈ្មោះឲ្យដឹងថា ផ្កាយរណបអាមេរិកចាប់បានចំហាយកំដៅពីយន្តហោះនោះក្នុងពេលជួបគ្រោះថ្នាក់។ តម្រ៉ុយនេះត្រូវបានអ្នកទទួលខុសត្រូវអាមេរិកដដែលសន្និដ្ឋានថា អាចជាវត្តមានគ្រាប់បែកនៅក្នុងយន្តហោះ។
រុស្ស៊ីចាត់ទុកសម្មតិកម្មកន្លងមកថាជាការក្រឡុកព័ត៌មាន
រហូតមកដល់ថ្ងៃនេះ ពោល ៥ថ្ងៃ ក្រោយគ្រោះថ្នាក់ធ្លាក់យន្តហោះមក រុស្ស៊ី និងអេហ្ស៊ីបមិនបានទាត់ចោលសម្មតិកម្មណាមួយទេ។ តែអ្វីដែលទីក្រុងគែរ និងមូស្គូចង់បាន គឺចង់ឲ្យមានការស៊ើបអង្កេត និងវិភាគឲ្យបានល្អិតល្អន់ជាមុនសិន មុននឹងធ្វើការសន្និដ្ឋានអ្វីមួយ។ នៅថ្ងៃព្រហស្បតិ៍ ទី៥ វិច្ឆិកានេះ អ្នកនំាពាក្យវិមានក្រិមឡាំងបានថ្លែងនៅក្នុងសន្និសីទកាសែតដោយបានចាត់ទុកការលើកឡើងនូវសម្មតិកម្មខុសៗគ្នានាពេលកន្លងមកថា ជាការក្រឡុកព័ត៌មានដោយគ្មានមូលដ្ឋានច្បាស់លាស់។ រូបអ្នកនំាពាក្យវិមានក្រិមឡាំងដដែលបានបន្ថែមថា សម្មតិកម្ម និងមូលេហតុគ្រប់យ៉ាងទាក់ទងនឹងគ្រោះថ្នាក់ធ្លាក់យន្តហោះត្រូវតែបង្ហាញឡើងដោយក្រុមអ្នកស៊ើបអង្កេត ពោលមិនមែនដោយអ្នកនេះ ឬអ្នកនោះទេ។
ទាក់ទងនឹងការអះអាងរបស់អង់គ្លេស និងអាមេរិកដែលថា ប្រហែលជាមានការបំផ្ទុះគ្រាប់បែកក្នុងយន្តហោះបង្កឡើងដោយក្រុមជីហាតអង្គការរដ្ឋអ៊ីស្លាម អ្នកនំាពាក្យវិមានក្រិមឡាំងមិនបាននិយាយវាយប្រហារអាមេរិក ឬអង់គ្លេសចំៗទេ គ្រាន់តែថា អ្នកណាដែលមានព័ត៌មានទាក់ទងនឹងរឿងធ្លាក់យន្តហោះគួរតែផ្តល់ព័ត៌មានទំាងនោះទៅឲ្យក្រុមអ្នកស៊ើបអង្កេត។ រីឯនៅខាងប្រទេសអេហ្ស៊ីប រដ្ឋមន្រ្តីក្រសួងអាកាសចរណ៍ស៊ីវិលបានបញ្ជាក់នៅថ្ងៃព្រហស្បតិ៍ ទី៥ វិច្ឆិកានេះថា ក្រុមអ្នកស៊ើបអង្កេតនៅមិនទាន់មានភស្តុតាង ឬទិន្នន័យណាមួយដែលបញ្ជាក់ពីការបំផ្ទុះគ្រាប់បែកនៅក្នុងយន្តហោះទេ។
ទស្សនកិច្ចប្រមុខរដ្ឋអេហ្ស៊ីបនៅអង់គ្លេសបំផុសឲ្យមានភាពចម្រូងចម្រាស
នៅថ្ងៃព្រហស្បតិ៍ ទី៥ វិច្ឆិកានេះ លោកប្រធានាធិបតីអេហ្ស៊ីបអាល់ស៊ីស៊ីបានផ្តើមទស្សនកិច្ចរយៈពេល ៣ថ្ងៃនៅក្នុងប្រទេសអង់គ្លេស។ មានប្រធានបទជាច្រើនដែលលោកប្រធានាធិបតីអេហ្ស៊ីបអាល់ស៊ីស៊ី និងលោកនាយករដ្ឋមន្រ្តីអង់គ្លេសដាវីដ កាមេរ៉ូនលើកទៅជជែក រួមមាន យុទ្ធនាការប្រយុទ្ធប្រឆំាងនឹងពួកជីហាតនៅអេហ្ស៊ីប និងស្ថានការណ៍ទូទៅនៅអាហ្រ្វិកខាងជើង និងនៅតំបន់មជ្ឈិមបូព៌ា ពិសេសនៅប្រទេសលីប៊ី។ ទំាងនេះមិនភ្លេចទេពីការពង្រឹងកិច្ចសហប្រតិបត្តិសេដ្ឋកិច្ចរវាងទីក្រុងគែរ និងឡុងដ៏។
តែប្រធានបទជាបន្ទាន់នៅចំពោះមុខ គឺរឿងគ្រោះថ្នាក់ធ្លាក់យន្តហោះរុស្ស៊ីនៅតំបន់ស៊ីណៃកាលពី ៥ថ្ងៃមុន។ អ្វីដែលអង់គ្លេសកំពុងព្រួយបារម្ភខ្លំាងនោះ គឺបញ្ហាសន្តិសុខចំពោះពលរដ្ឋអង់គ្លេសដែលនិយមទៅដើរលេងនៅក្នុងប្រទេសអេហ្ស៊ីប ពិសេសនៅក្នុងទីក្រុង Charm el-Cheikh។ អ៊ីចឹងហើយបានជានាឱកាសទស្សនកិច្ចរបស់លោកអាល់ស៊ីស៊ីនៅអង់គ្លេសថ្ងៃនេះ ទីក្រុងឡុងដ៏បានចាត់វិធានការបន្ទាន់មួយចំនួនដើម្បីធានាសន្តិសុខពលរដ្ឋខ្លួន។ វិធានការទំាងនោះរួមមាន ការជម្លៀសពលរដ្ឋអង់គ្លេសចេញពីអេហ្ស៊ីប និងការផ្អាកការហោះហើរផ្ទាល់រវាងទីក្រុងឡុងដ៏ និង Charm el-Cheikh។
រដ្ឋអំណាចអង់គ្លេសមិនបានបញ្ជាក់ថា តើការហោះហើរផ្ទាល់រវាងទីក្រុងឡុងដ៏ និង Charm el-Cheikh នឹងត្រូវចាប់ផ្តើមជាថ្មីនៅពេលណាទេ គ្រាន់តែបញ្ជាក់ថា ខ្លួននឹងបញ្ជូនក្រុមអ្នកជំនាញអង់គ្លេសទៅទីក្រុង Charm el-Cheikh ដើម្បីសិក្សា វិភាគពីបញ្ហាសន្តិសុខជាក់ស្តែងនៅទីនោះ។ យ៉ាងណាក៏ដោយ វត្តមានលោកប្រមុខរដ្ឋអេហ្ស៊ីបអាល់ស៊ីស៊ីនៅអង់គ្លេសបានបំផុសឲ្យមានប្រតិកម្មប្រឆំាងពីសំណាក់ក្រុមប្រឆំាងនៅអង់គ្លេស ក៏ដូចជានៅអេហ្ស៊ីប។ ក្រុមអ្នកប្រឆំាងទំាងនោះបានបរិហារលោកអាល់ស៊ីស៊ីពីការប្រើអំណាចផ្តាច់ការគាបសង្កត់ក្រុមប្រឆំាងនៅអេហ្ស៊ីប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ