ប្រជាមតិនៅតួកគី៖ សម្លេង "យល់ព្រម" ឈ្នះស្តួចស្តើង ខណៈបក្សប្រឆាំង បដិសេធលទ្ធផលឆ្នោត
ចុះផ្សាយនៅថ្ងៃ៖
ស្តាប់ - ០៦:៥៤
ការបោះឆ្នោតប្រជាមតិនៅប្រទេសតួកគី កាលពីថ្ងៃអាទិត្យទី១៦មេសា កំពុងចោទជាបញ្ហានាពេលនេះ បន្ទាប់ពីលទ្ធផលបណ្តោះអាសន្ន បង្ហាញថា សម្លេងឆ្នោតដែលគាំទ្រ ការធ្វើកំណែទំរង់ មានចំនួនលើសសម្លេងឆ្នោតប្រឆាំង តែបន្តិចបន្តួចប៉ុណ្ណោះ។ ចំណែក គណបក្សប្រឆាំងធំៗនៅតួកគី បានលើកឡើងពីភាពមិនប្រក្រតី ហើយសន្យាដាក់ពាក្យប្តឹង មិនទទួលយកលទ្ធផលនៃការធ្វើប្រជាមតិនេះ។ ចំណែក សារព័ត៌មានធំៗ នៅទូទាំងពិភពលោក បាននាំគ្នាចុះផ្សាយ ពីជោគជ័យ របស់លោកអ៊ែរដូហ្កាន់ ដែលបានទទួលការយល់ព្រមពីប្រជាជនតួកគី ឲ្យធ្វើកំណែទំរង់រដ្ឋធម្មនុញ្ញ តែយ៉ាងណា សារព័ត៌មានទាំងនោះ បានចំអកថា វាជាជោគជ័យ ឈ្នះតែប៉ុនសរសៃសក់ តែប៉ុណ្ណោះ។
ឈ្នះទាំងត្រដាបត្រដួស
សារព័ត៌មាន មិនថានៅអេស្ប៉ាញ បារាំង អង់គ្លេស អាល្លឺម៉ង់ រឺអាមេរិកទេ គឺសុទ្ធតែបានចុះផ្សាយលើទំព័រមុខ ស្តីពីលទ្ធផលឆ្នោតប្រជាមតិនៅតួកគី កាលពីម្សិលមិញ ទាំងអស់គ្នា។ គ្រប់គ្នាសុទ្ធតែសរសេរ ថាលោកអ៊ែរដូហ្កាន់ឈ្នះមែន តែឈ្នះតែប៉ុនចុងក្រចក យ៉ាងប្រផិតប្រផោយបំផុត។ សារព័ត៌មានអាល្លឺម៉ង់ វិញបានហ៊ាននិយាយថា វាមិនមែនជាជោគជ័យទេ តែលទ្ធផលនេះ បង្ហាញពីបរាជ័យរបស់លោកអ៊ែរដូហ្កាន់ទៅវិញទេ ដែលកន្លងមកគាត់មានអំនួត សុទ្ធតែធានាថា ប្រជាជនតួកគី នឹងបោះឆ្នោតគាំទ្រគំរោងកំណែទម្រង់រដ្ឋធម្មនុញ្ញនេះ ភ្លូកទឹកភ្លូកដីមិនខាន តែទីបំផុត គឺឈ្នះយ៉ាងត្រដាបត្រដួស។
បើយោងតាមតួលេខបណ្តោះអាសន្ន ផ្សាយដោយ ទីភ្នាក់ងារព័ត៌មានតួកគី អាណាដូលូ នៅព្រឹកថ្ងៃចន្ទ បង្ហាញថា សម្លេងឆ្នោតគាំទ្រកំណែទម្រង់ មានចំនួនតែ ៥១,៣៧% ប៉ុណ្ណោះ។ លទ្ធផលនេះ គឺជាលទ្ធផលនៃការរាប់សន្លឹកឆ្នោតប្រមាណ៩៩% នៃមណ្ឌលបោះឆ្នោតទាំងអស់។ នៅមានសន្លឹកឆ្នោតប្រមាណជា៦សែនសន្លឹកទៀត ដែលមិនទាន់រាប់អស់។ តួលេខបណ្តោះអាសន្នដដែល ក៏បានបញ្ជាក់ថា សម្លេងគាំទ្រ មានលើសសម្លេងមិនគាំទ្រ តែប្រមាណជា ១លាន ២សែន ៥ម៉ឺន សន្លឹកតែប៉ុណ្ណោះ។ ចំណែកអ្នកចូលរួមបោះឆ្នោត មានប្រមាណជា៨៥% នៃចំនួនសរុបទាំងអស់៥៥លាននាក់។
ប្រជាជនតាមទីក្រុងធំៗ បោះឆ្នោត “មិនយល់ព្រម” ភាគច្រើន
បើយើងវិភាគ ឲ្យល្អិតល្អន់មែនទែនទៀត ទៅលើតួលេខនេះ យើងឃើញថា លោកប្រធានាធិបតី អ៊ែរដូហ្កាន់ ពិតជាបានបរាជ័យមែន បើទោះបីជាសម្លេងឆ្នោតគាំទ្រ សរុបទូទាំងប្រទេស មានលើសសម្លេងប្រឆាំងក៏ដោយ។ ជាក់ស្តែង នៅតាមទីក្រុងធំៗ ទាំងបី របស់តួកគី មានដូចជា ទីក្រុងអ៊ីស្តង់ប៊ូល ទីក្រុងអង់ការ៉ា និងទីក្រុងអ៊ីហ្សមៀរ គឺប្រជាជនភាគច្រើនបោះឆ្នោតបដិសេធ ការធ្វើកំណែទំរង់រដ្ឋធម្មនុញ្ញ។ ជាទំលាប់កន្លងមក ទីក្រុងធំៗទាំងបីនេះ តែងតែបោះឆ្នោតគាំទ្រ គណបក្ស AKP របស់លោកអ៊ែរដូហ្កាន់ ជានិច្ច។ តែលើកនេះ គេមិនគាំទ្រទេ។
នេះសរបង្ហាញថា បើទោះបីលោកអ៊ែរដូហ្កាន់ ប្រឹងប្រែងបំបិទមាត់អ្នកកាសែត ហាមឃាត់សារព័ត៌មានរិះគន់ និងវិទ្យុទូរទស្សន៍ ដែលមាននិន្នការប្រឆាំងគាត់ យ៉ាងណា ក៏ប្រជាជនតាមទីក្រុងធំៗ គេនៅតែយល់ ពីចំណុចអវិជ្ជមាន នៃកំណែទំរង់រដ្ឋធម្មនុញ្ញ ដែលលោកអ៊ែរដូហ្កាន់ចង់បានដែរ។ ផ្ទុយទៅវិញមានតែប្រជាជន នៅតាមទីជនបទ ឆ្ងាយៗទេ ដែលបានបោះឆ្នោតគាំទ្រ ការធ្វើកំណែទំរង់នេះ ព្រោះពួកគេមិនមានកំរិតវប្បធម៌ជ្រៅជ្រះ ហើយមិនបានទទួលព័ត៌មានអ្វីផ្សេង ក្រៅតែពីការឃោសនាបំផុសបំផុល គ្រប់មធ្យោបាយរបស់រដ្ឋាភិបាលតួកគី។
ដូច្នេះ លទ្ធផលប្រជាមតិនេះ បង្ហាញថាលោកអ៊ែរដូហ្កាន់មានជោគជ័យមែន តែជោគជ័យតែតួលេខប៉ុណ្ណោះ ផ្ទុយទៅវិញ លោកអ៊ែរដូហ្កាន់ បានបរាជ័យ ក្នុងការប្រមែរប្រមូលមតិសាធារណៈ ឲ្យមូលគ្នា ជាធ្លុងតែមួយ ដើរតាមមហិច្ឆិតាអំណាចរបស់គាត់។
សន្លឹកឆ្នោតគ្មានត្រាផ្លូវការ មានជាង១លានសន្លឹក បក្សប្រឆាំងបដិសេធលទ្ធផល
ខាងគណបក្សប្រឆាំងទាំងពីរ គឺគណបក្ស CHP និង បក្សHDP បានលើកឡើងអំពីករណីនីតិវិធីផ្ទុយនឹងច្បាប់បោះឆ្នោត ដែលខាងក្រុមប្រឹក្សាជាតិរៀបចំការបោះឆ្នោត បានសម្រេចយ៉ាងតក់ក្រហល់ កាលពីយប់ថ្ងៃអាទិត្យ ក្នុងពេលរាប់សន្លឹកឆ្នោត។
បញ្ហានោះ គឺថាក្រុមប្រឹក្សាជាតិរៀបចំការបោះឆ្នោត បានសម្រេច ដោយមានការស្នើរសុំ ពីអ្នកសង្កេតការបោះឆ្នោត មកពីគណបក្ស AKP របស់រដ្ឋាភិបាល ឲ្យទទួលស្គាល់ ផ្តល់សុពលភាព ដល់សន្លឹកឆ្នោត ដែលគ្មានបោះត្រាផ្លូវការនៅពីលើ។ តាមធម្មតា គ្រប់សន្លឹកឆ្នោតទាំងអស់ ដែលបោះចូលហិបឆ្នោត ត្រូវតែមានវាយត្រាផ្លូវការ ទើបអាចយកជាការបាន។ តែ គេបានរកឃើញ សន្លឹកឆ្នោត ដែលគ្មានស្នាមត្រា ដល់ទៅជាងមួយលានសន្លឹក។ ជាការគួរឲ្យភ្ញាក់ផ្អើស ស្រាប់តែក្រុមប្រឹក្សាជាតិ រៀបចំការបោះឆ្នោត សម្រេចទទួលស្គាល់សុពលភាពសន្លឹកឆ្នោត ទាំងនោះទៅវិញ។
លោក Sadi Guven ប្រធានក្រុមប្រឹក្សាជាតិរៀបចំការបោះឆ្នោត បានអះអាងនៅមុខអ្នកកាសែតថា ការសម្រេចរបស់អាជ្ញាធរ ដោយទទួលស្គាល់សន្លឹកឆ្នោត ដែលគ្មានស្នាមត្រានៅពីលើ បែបនេះ មិនមែនជាលើកទីមួយទេ ហើយម្យ៉ាងវិញទៀត គេសម្រេចបែបនេះ គឺបន្ទាប់ពីមានការតវ៉ា របស់ប្រជាជនជាច្រើន ដែលបានបោះឆ្នោតរួចហើយ តែបានអះអាងថា សន្លឹកឆ្នោតខ្លួន ត្រូវបានគេភ្លេចវាយត្រាពីលើ។
ក្រុមបក្សប្រឆាំង បដិសេធលទ្ធផលឆ្នោត
តែយ៉ាងណា ក្រុមគណបក្សប្រឆាំង បានចោទប្រកាន់ ពីចេតនា កែបន្លំលទ្ធផលសន្លឹកឆ្នោត ពីសំណាក់ ក្រុមប្រឹក្សារៀបចំការបោះឆ្នោត ដោយឃុបឃិត ជាមួយនឹងមន្ត្រីរបស់គណបក្ស AKP ។ គណបក្សប្រឆាំងទាំងពីរ បានសន្យាថា នឹងប្តឹងទាស់ ដើម្បីបដិសេធលទ្ធផលឆ្នោត ហើយទៀមទារឲ្យរាប់ សាឡើងវិញ។
ដោយឡែក នៅទីក្រុងអ៊ីស្តង់ប៊ូល មានមនុស្សម្នាជាច្រើនពាន់នាក់ បានមកជួបជុំគ្នា ធ្វើបាតុកម្ម នៅយប់ថ្ងៃអាទិត្យ និងចន្ទដើម្បីបដិសេធលទ្ធផលឆ្នោត ព្រមទាំងបរិហា ពីចេតនាក្តោបក្តាប់អំណាច ផ្តាច់ការ របស់លោកប្រធានាធិបតីអ៊ែរដូហ្កាន់។ ទាក់ទិននឹងបញ្ហានេះ សហភាពអឺរ៉ុប ទើបបានប្រកាសអំពាវនាវ សុំឲ្យរដ្ឋាភិបាលតួកគី ស្វែងរកការស្រុះស្រួលគ្នា ដោយយកប្រយោជន៍ជាតិជាធំ ចៀសវៀងការធ្លាក់ទៅក្នុងអំពើហិង្សា និងវិបត្តិនយោបាយ។
ក្តាប់អំណាចក្នុងស្រុក តែឯកោនៅក្រៅស្រុក
បើយើងពិនិត្យ ក្នុងពេលឃោសនាកន្លងមកនេះ លោកអ៊ែរដូហ្កាន់ បានជ្រើសរើសយុទ្ធសាស្ត្រក្តៅ ប្រឆាំងគេប្រឆាំងឯង ជាពិសេសជាមួយអាល្លឺម៉ង់ និងសហភាពអឺរ៉ុប។ ប្រទេសធំៗនៅអឺរ៉ុប សុទ្ធតែបានក្រើនរំលឹក ពីទំនោរផ្តាច់ការនិយមរបស់លោកអ៊ែរដូហ្កាន់។ ជាងនេះទៅទៀត កាលពីយប់ថ្ងៃអាទិត្យ ក្រោយដឹងលទ្ធផលឆ្នោត លោកអ៊ែរដូហ្កាន់ បានលើកឡើងពីបំណង ចង់ធ្វើប្រជាមតិមួយទៀត ដើម្បីរៀបចំ ឲ្យមានទោសប្រហារជីវិត។ នេះជាចំនុចមួយធំណាស់ ដែលប្រទេសជាច្រើននៅសហភាពអឺរ៉ុប គេមិនគាំទ្រ។ ដូច្នេះ មានន័យថាចាប់ពីពេលនេះ តួកគី នឹងនៅឆ្ងាយពីសហភាពអឺរ៉ុប។
បើទោះបីជាតួកគី ជាសមាជិកអង្គការអូតង់ ក៏ប៉ុន្តែមួយរយៈចុងក្រោយនេះ រុស្ស៊ីបានព្យាយាម មកអូសទាញតួកគីច្រើនណាស់។ ដោយបូកបន្ថែម ជាមួយបញ្ហា រវាងតួកគី និងសហភាពអឺរ៉ុប ដែលជាសម្ព័ន្ធអូតង់ដ៏ធំនោះ សហរដ្ឋអាមេរិក អាចចាត់ទុកតួកគី ថាកំពុងក្បត់ខ្លួនក៏ថាបានដែរ។ លោកអ៊ែរដូហ្កាន់ អាចមានផ្លូវ ពង្រឹកក្តោបក្តាប់អំណាចក្នុងដៃ រហូតដល់ឆ្នាំ២០២៩ក៏ពិតមែន តែលើឆាកអន្តរជាតិ គាត់ប្រាកដជាឯកោ ហើយត្រូវដើរដោយប្រុងប្រយ័ត្ន បំផុត រវាង អាមេរិក និងរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ