បារាំង៖ ទិវាពលកម្មអន្តរជាតិ ស្ថិតក្នុងបរិយាកាសអួរអាប់ នៃការបោះឆ្នោតប្រធានាធិបតី
ជាទំលាប់ ទិវាពលកម្មអន្តរជាតិ ថ្ងៃទី១ ឧសភា តែងតែជាថ្ងៃដ៏សំខាន់បំផុត សម្រាប់បុគ្គលិកកម្មករ និងជាពិសេសសម្រាប់ក្រុមសហជីពបារាំង ដើម្បីរួបរួមគ្នាដើរដង្ហែរក្បួន ទូទាំងប្រទេស ទាមទារឲ្យរដ្ឋាភិបាល ជួយកែលំអរលក្ខខណ្ឌការងារ ព្រមទាំងជួយជ្រោមជ្រែងជីវភាព របស់ពលករ។ ក៏ប៉ុន្តែ ទិវាពលកម្មឆ្នាំនេះ បានស្ថិតនៅក្នុងបរិយាកាស ដ៏អួរអាប់ដោយសារតែការឃោសនាបោះឆ្នោតប្រធានាធិបតីបារាំង ហើយសហជីពបានបែកខ្ញែកគ្នា ដោយសារតែមានគោលជំហរនយោបាយមិនដូចគ្នា ទាក់ទិនទៅនឹងបេក្ខជនឈរឈ្មោះប្រធានាធិបតី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៧
ទិវាពលកម្មអន្តរជាតិ ទី១ឧសភា ឆ្នាំនេះ ត្រូវបានផ្សារភ្ជាប់ជាមួយនឹងបរិយបទនយោបាយ យ៉ាងតឹងតែងដោយសារតែសហជីពធំៗរបស់បារាំង មិនមានការចុះសម្រុងនឹងគ្នា។ វាជាទំលាប់នៅបារាំង ដែលមុនពេលបោះឆ្នោតប្រធានាធិបតីម្តងៗ គឺមិនថាគណបក្សនយោបាយ រឺសហជីពធំៗទាំងអស់ តែងតែប្រកាសគោលជំហរខ្លួន ហើយអំពាវនាវ ឲ្យសមាជិក ឬអ្នកគាំទ្រខ្លួន បោះឆ្នោតទៅឲ្យបេក្ខជនណាម្នាក់។
ក្នុងចំណោមសហជីពធំៗបារាំង សហជីព CFDT និង Unsa បានអំពាវនាវច្បាស់តែម្តងថា ត្រូវតែបោះឆ្នោតឲ្យលោក Macron ដើម្បីទប់កុំឲ្យគណបក្សស្តាំនិយមជ្រុលរបស់លោកស្រី Le Pen អាចឈោងចាប់អំណាចបាន។ ក៏ប៉ុន្តែ សហជីពមួយចំនួនទៀត ដូចជា CGT FSU Force Ouvrière ជាដើមគ្រាន់តែបានថ្លែងបរិហារពី នយោបាយដ៏គ្រោះថ្នាក់ របស់លោកស្រី Le Pen ក៏ប៉ុន្តែមិនបានអំពាវនាវឲ្យប្រជាជនបោះឆ្នោតឲ្យលោក Macron ទេ។ សម្រាប់ សហជីពដែលមានទំនោរសង្គមនិយមទាំងនេះ បេក្ខភាពលោក Macron គឺគេមិនអាចទទួលយកបានទេ ដោយសារតែវាសេរីនិយម គិតតែប្រយោជន៍មូលធន របស់នាយទុនពេក។
គួររំលឹកថា កាលពីពេលបោះឆ្នោតឆ្នាំ២០០២ ដែលមានលោក Jean Marie Le Pen ឪពុករបស់លោកស្រី Marine Le Pen ជាបេក្ខជន ប្រជែងជាមួយលោក Jacques Chirac កាលនោះ សហជីពបារាំងទាំងអស់ បានរួមគ្នាដើរដង្ហែរក្បួន ប្រមូលមនុស្សដល់ទៅ១លាន៣សែននាក់ ដើម្បីប្រឆាំងនឹងបក្សស្តាំនិយមជ្រុលរបស់គ្រួសារ Le Pen ហើយអំពាវនាវឲ្យបោះឆ្នោតជូនលោក Jacques Chirac វិញ។ ក៏ប៉ុន្តែ សម្រាប់ពេលនេះ សហជីពបារាំងបានខ្វែងគំនិតគ្នា ហើយបើតាមការស្មាន ការដង្ហែរក្បូននៅថ្ងៃនេះ នឹងត្រូវធ្វើដាច់ដោយឡែកពីគ្នា ជាមួយនឹងមនុស្សចូលរួមប្រហែលជា៨ម៉ឺននាក់ប៉ុណ្ណោះ។
ដោយឡែក ថ្ងៃទី១ឧសភានេះ លោក Jean Marie Le Pen បានទៅធ្វើគារវកិច្ច នៅចំពោះមុខរូបសំណាក នាង Jeanne d’Arc ដែលជានិម្មិតរូបនៃចរន្តជាតិនិយមរបស់បារាំង។ បក្សស្តាំនិយមជ្រុល បានឆក់ឱកាសទិវាពលកម្មនេះ ដើម្បីអូសទាញការគាំទ្រពីសំណាក់ ស្រទាប់ពលករ និងកម្មករបារាំង។ ចំនែកលោកMacron វិញ បានយកបាច់ផ្កាទៅដាក់នៅកន្លែងដែលជនជាតិម៉ារ៉ុកម្នាក់ ត្រូវបានសកម្មជនស្តាំនិយមជ្រុល សម្លាប់ដោយសារតែការរើសអើង នៅឆ្នាំ១៩៩៥។ លោកបានអំពាវនាវ ឲ្យប្រជាជនបារាំងកុំអាលឆាប់ភ្លេច ពីអតីតកាលនិងប្រវត្តិរបស់បក្សស្តាំនិយមជ្រុល Le Front National (FN) ដែលជាបក្សជំរុញការស្អប់ខ្ពើមមនុស្សដូចគ្នា។
ប៉ុន្មានថ្ងៃចុងក្រោយនេះ ឥស្សរជននយោបាយធំៗ ឬសិល្បៈករល្បីៗ បាននាំគ្នាចេញមុខជាបន្តបន្ទាប់ អំពាវនាវឲ្យប្រជាជនបារាំង ទៅបោះឆ្នោត ដើម្បីរារាំង កុំឲ្យលោកស្រី Marine Le Pen អាចឈានទៅក្លាយជាប្រធានាធិបតីបារាំង បានឲ្យសោះ ព្រោះគណបក្ស Le Front National របស់លោកស្រីម្នាក់នេះ គឺពោរពេញទៅដោយនយោបាយញុះញ៉ង់ បំបែកបំបាក់ រើសអើងប្រកាន់ពូជសាសន៍ និងជាពិសេសគឺវានឹងធ្វើឲ្យបារាំង ឯកោនៅតែម្នាក់ឯងលើឆាកអន្តរជាតិ។ បើទោះបីជាបេក្ខភាពលោក Macron មិនល្អគ្រប់គ្រាន់ តែសម្រាប់អ្នកស្រលាញ់ប្រជាធិបតេយ្យ គេត្រូវតែបោះឆ្នោតឲ្យលោក Macron ដើម្បីបង្អាក់ជោគជ័យរបស់លោកស្រី Le Pen៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ