នាយករដ្ឋមន្ត្រីអង់គ្លេសមកជួបប្រធានាធិបតីបារាំង មើលការប្រកួតបាល់ទាត់ និងនិយាយពីបញ្ហាភេរវកម្ម
លោកស្រី តេរ៉េហ្សា ម៉េ នាយករដ្ឋមន្ត្រីអង់គ្លេស នឹងអញ្ជើញមកទីក្រុងប៉ារីស ប្រទេសបារាំង ជាទីដែលលោកស្រី នឹងត្រូវទទួលជួបដោយលោក អេម៉ានុយអែល ម៉ាក្រុង ប្រធានាធិបតីបារាំង។ ថ្នាក់ដឹកនាំទាំងពីរ នឹងអញ្ជើញទៅបើកការប្រកួត ជាមិត្តភាព រវាងក្រុមកីឡាបាល់ទាត់ជំរើសជាតិអង់គ្លេស និងជំរើសជាតិបារាំង។ ប៉ុន្តែកិច្ចការសំខាន់ នៅពីក្រោយជំនួបនេះ គឺការពិភាក្សាគ្នា ស្តីពីយុទ្ធនាការទប់ស្កាត់ ការសាបព្រួសចរន្តភេរវកម្មនិយម នៅលើបណ្តាញអ៊ីនធើនែត។ អង់គ្លេស និងបារាំង បានរងគ្រោះធ្ងន់ធ្ងរជាងគេ ដោយសារភេរវកម្មជាបន្តបន្ទាប់ ក្នុងពេលកន្លងមកនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
មុននឹងទៅមើលការប្រកួតបាល់ទាត់ រវាងក្រុមជម្រើសជាតិបារាំងនិងអង់គ្លេស នៅពហុកីឡាដ្ឋានជាតិបារាំង នៅយប់ថ្ងៃអង្គារទី ១៣ មិថុនានេះ លោកស្រីតេរ៉ាហ្សា ម៉េ និងលោក អេម៉ានុយអែល ម៉ាក្រុង ត្រូវជួបនិយាយគ្នា ដោះដូរយោបល់គ្នា ស្តីពីវិធានការ ទប់ស្កាត់ការសាបព្រួស អូសទាញ មនុស្សតាមបណ្តាញ អ៊ីនធើនែត ឲ្យធ្លាក់ចូលទៅក្នុងចលនាជ្រុលនិយមភេរវកម្ម។
អ្នកនាំពាក្យរដ្ឋាភិបាលអង់គ្លេសបានបញ្ជាក់ថា សហប្រតិបត្តិការរវាងបណ្តាញស៊ើបការសម្ងាត់អង់គ្លេស និងបារាំង ស្ថិតនៅក្នុងកំរិតមួយល្អប្រសើរហើយ នៅក្នុងការងារបោសសំអាតបណ្តាញភេរវកម្មនេះ ក៏ប៉ុន្តែអង់គ្លេស និងបារាំង មានបំណងធ្វើការជាមួយគ្នា ឲ្យបានល្អជាងនេះទៀត នៅក្នុងការទប់ស្កាត់ ការរីកសាយភាយទ្រឹស្តីជ្រុលនិយមភេរវកម្ម នៅលើអ៊ីនធើនែត។
លោកស្រីនាយករដ្ឋមន្ត្រីអង់គ្លេស នឹងលើកឡើងអំពីវិធានការមួយចំនួន ដើម្បីចាប់បង្ខំឲ្យក្រុមហ៊ុនអ៊ីនធើនែតធំៗ ឬក្រុមហ៊ុនដែលគ្រប់គ្រងបណ្តាញសង្គម ដូចជា Facebook Twitter ជាដើម ឲ្យចូលរួមទប់ស្កាត់ និងលប់បំបាត់នូវសារណា ដែលមានខ្លឹមសារជ្រុលនិយម ឬហិង្សា។ វាគឺជាការទទួលខុសត្រូវ របស់ក្រុមហ៊ុនគ្រប់គ្រងបណ្តាញអ៊ីនធើនែត ទាំងនោះ។
សូមរំលឹកថា ពេលថ្មីៗនេះ អង់គ្លេសបានរងអំពើភេរវកម្មពីរជាប់គ្នា មួយនៅក្រុងManchester កាលពីថ្ងៃទី២២ ឧសភា មានស្លាប់២២នាក់ និងចុងក្រោយនៅថ្ងៃទី៣ មិថុនា នៅកណ្តាលទីក្រុងឡុងដ៍ ដែលបណ្តាលឲ្យមានមនុស្សស្លាប់៨នាក់។ ចំណែកបារាំងវិញ បានបន្តបំបែកបានគំរោងធ្វើភេរវកម្មជារឿយៗ។ បណ្តាញសង្គម Facebook និង Twitter ឬបណ្តាញអ៊ីនធើនែតជាទូទៅ គឺជាជង្រុកនៃការសាបព្រួសចរន្តគំនិតជ្រុលនិយម។ ការសរសេរសារបញ្ចេញមតិ រឺរិះគន់ ដែលមានខ្លឹមសារជ្រុលនិយម ពន្យុះឲ្យប្រើអំពើហឹង្សា បានកើនឡើងកាន់តែខ្លាំង នៅតាមបណ្តាញអ៊ីនធើនែត។
តែយ៉ាងណា ប្រតិបត្តិការទប់ស្កាត់ ការរីកសាយភាយ នៃសារដែលមានខ្លឹមសារជ្រុលនិយមទាំងនោះ នៅតាមអ៊ីនធើនែត គឺមិនមែនជាការងាយឡើយ ហើយវាក៏អាចជាកម្មវត្ថុនៃការរិះគន់ដែរ ដោយសារតែវាអាចប៉ះពាល់ ដល់សេរីភាពក្នុងការបញ្ចេញមតិ។ មិនមែនជាតួនាទីរបស់អាជ្ញាធរតែម្នាក់ទេ ដែលត្រូវទប់ស្កាត់ តែអ្នកប្រើប្រាស់គ្រប់គ្នា ត្រូវមានការទទួលខុសត្រូវ និងប្រុងប្រយ័ត្នខ្ពស់ ដើម្បីកុំឲ្យធ្លាក់ចូលក្នុងការអូសទាញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ