លោកស្រីមែរគែល អំពាវនាវឲ្យរួមគ្នាកាត់បន្ថយអាវុធ រាប់ទាំងចិន រុស្ស៊ី អាមេរិក និងអឺរ៉ុប
លោកស្រីអង់ហ្គេឡា មែរគែល ប្រមុខរដ្ឋាភិបាលអាល្លឺម៉ង់ បានអំពាវនាវ នៅថ្ងៃសៅរ៍ ទី១៦កុម្ភៈថា ត្រូវតែប្រឹងប្រែង ក្នុងការកាត់បន្ថយគ្រឿងសព្វាវុធទាំងអស់គ្នា ដោយរាប់បញ្ចូលទាំងចិន រុស្ស៊ី សហរដ្ឋអាមេរិក និងអឺរ៉ុបផង។ ការថ្លែងអំពាវនាវនេះ គឺលោកស្រីបានធ្វើនៅក្នុងឱកាស បើកសន្និសីទអន្តរជាតិ ស្តីពីកត្តាសន្តិសុខ ដែលបានបើកទ្វារនៅទីក្រុមមុយនិច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ការកាត់បន្ថយគ្រឿងសព្វាវុធ គឺជារឿងដែលទាក់ទងនឹងយើងទាំងអស់គ្នា។ ពួកយើងនឹងសប្បាយចិត្ត ប្រសិនបើការចរចា ស្តីពីការកាត់បន្ថយគ្រឿងសព្វាវុធនេះ ត្រូវបានលើកមកនិយាយគ្នា មិនមែនតែត្រឹមរវាង អឺរ៉ុប និងអាមេរិកទេ តែត្រូវរាប់ទាំងចិន ព្រមទាំងរុស្ស៊ីផងដែរ។ នេះគឺជាប្រសាសន៍ អំពាវនាវ របស់លោកស្រីអង់ហ្គេឡា មែរគែល អធិកាបតីអាល្លឺម៉ង់។
សម្តីអំពាវនាវ របស់លោកស្រីមែរគែលនេះ បានឆ្លុះបញ្ចាំង អំពីការព្រួយបារម្ភ របស់លោកស្រី ក៏ដូចជារបស់សហភាពអឺរ៉ុប ស្តីពីការពង្រឹងសមត្ថភាពសព្វាវុធ របស់ចិន និងរុស្ស៊ី ដែលកាន់តែខ្លាំងឡើងៗជាលំដាប់ គួរឲ្យព្រួយបារម្ភ។
យ៉ាងណាមិញ សហរដ្ឋអាមេរិក បានសម្រេចដកខ្លួនចេញពីសន្ធិសញ្ញាដកអាវុធមីស៊ីលកម្លាំងមធ្យម INF ដែលខ្លួនបានចុះជាមួយរុស្ស៊ី កាលពីឆ្នាំ១៩៨៧។ អាមេរិក បានចោទរុស្ស៊ី ថាបានបំពានសន្ធិសញ្ញានេះ តាមរយៈការបង្កើនការផលិត និងការដាក់បញ្ឈរ ប្រព័ន្ធមីស៊ីលជាច្រើន នៅតាមព្រំដែនជាមួយអឺរ៉ុប។ អាមេរិក ដែលមានការគាំទ្រពីអូតង់ផងនោះ បានអះអាងថា មិនមែនតែអាមេរិកទេ ដែលមានភស្តុតាង សូម្បីប្រទេសសមាជិកអូតង់ផ្សេងទៀត ក៏មានភស្តុតាង បញ្ជាក់ថារុស្ស៊ី បានបំពានសន្ធិសញ្ញាឆ្នាំ១៩៨៧ដែរ។
សម្រាប់សហភាពអឺរ៉ុប ការដកខ្លួនឈប់គោរពសន្ធិសញ្ញាឆ្នាំ១៩៨៧ គឺជារឿងមួយគួរឲ្យព្រួយបារម្ភមែនហើយ ព្រោះវានឹងបើកដៃ ឲ្យម្ខាងៗ គឺរុស្ស៊ី និងសហរដ្ឋអាមេរិក មានឱកាសដំឡើង ឬបន្ថែមអាវុធ រៀងៗខ្លួន។ ការចរចានិយាយគ្នា ត្រូវតែចាប់ផ្តើម។ ក៏ប៉ុន្តែដើម្បីឲ្យអនាគតនៃចក្ខុវិស័យ កាត់បន្ថយអាវុធនេះ កាន់តែមានសុក្រិត្យភាព និងវិសាលភាពទូលាយ គឺគេត្រូវតែរាប់ចិនចូលជាមួយ ដើម្បីចរចាគ្នា។ យោងតាមមន្ត្រីជំនាញរបស់អូតង់ ចិនមានកម្លាំងសព្វាវុធ កើនឡើងខ្លាំងណាស់។
យ៉ាងណាមិញ ការដកខ្លួនរបស់អាមេរិក ចេញពីសន្ធិសញ្ញាឆ្នាំ១៩៨៧ មួយផ្នែកក៏ដោយសារតែអាមេរិកសម្លឹងឃើញថា ចិនកំពុងពង្រឹងសមត្ថភាពអាវុធ ខណៈដែលអេមេរិកវិញ ត្រូវជាប់ខ្នោះដោយសារសន្ធិសញ្ញានេះ ជាមួយរុស្ស៊ី។ អ្វីដែលធ្វើឲ្យគេបារម្ភមួយទៀតនោះ គឺវាសនាអនាគត នៃសន្ធិសញ្ញា NEW START ចុះនៅឆ្នាំ២០១០ ស្តីពីការកាត់បន្ថយអាវុធនុយក្លេអ៊ែរយុទ្ធសាស្ត្រ រវាងអាមេរិក និងរុស្ស៊ី។ បើម្នាក់ៗនាំគ្នាដកខ្លួនចេញ នោះការប្រណាំងប្រជែងគ្នាផ្នែកអាវុធមីស៊ីល និងនុយក្លេអ៊ែរ នឹងក្លាយជាល្បែងមួយដ៏គ្រោះថ្នាក់បំផុត សម្រាប់ពិភពលោកយើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ