វិបត្តិខាងកើតអ៊ុយក្រែន៖ ជំនួបកំពូលនៅបារីស ដើម្បីសាកល្បងរកច្រកចេញ
ចុះផ្សាយនៅថ្ងៃ៖
ស្តាប់ - ០៧:០៦
ថ្ងៃចន្ទទី៩ធ្នូ នៅទីក្រុងប៉ារីស មានជំនួបកំពូលមួយ ក្រោមអធិបតីភាព របស់លោកប្រធានាធិបតីបារាំង អេម៉ានុយអែល ម៉ាក្រុង និងលោកស្រីអធិកាបតីអាល្លឺម៉ង់ អង់ហ្គេឡា មែរគែល ដើម្បីសាកល្បងរកផ្លូវដោះស្រាយវិបត្តិ នៅភាគខាងកើតអ៊ុយក្រែន ដែលជាប់គាំងប្រមាណ៥ឆ្នាំមកហើយ។ ក្នុងជំនួបកំពូលនេះ លោកពូទីន ប្រធានាធិបតីរុស្ស៊ី នឹងជួបនិយាយគ្នាដោយផ្ទាល់ ជាលើកដំបូង ជាមួយនឹងលោកប្រធានាធីបតីថ្មីរបស់អ៊ុយក្រែន លោក វ៉ូឡូឌីមៀរ ហ្សេឡិនស្គី។ ក្របខណ្ឌនៃការចរចា ៤ភាគី អ៊ុយក្រែន រុស្ស៊ី ដោយមានបារាំងនិងអាល្លឺម៉ង់ ជាអ្នកសម្របសម្រួលនេះ ត្រូវបានផ្តួចផ្តើមឡើង កាលពីឆ្នាំ២០១៦ ក៏ប៉ុន្តែតាំងពីនោះមក មិនបានវិវឌ្ឍន៍ទៅមុខទាល់តែសោះ។
ខានប្រជុំ៣ឆ្នាំ
ការចរចារកសន្តិភាពភាគខាងកើតអ៊ុយក្រែន ដែលគេដាក់ឈ្មោះថា “ទម្រង់ន័រម៉ង់ឌី” នេះ គឺជាការផ្តួចផ្តើមរបស់បារាំង និងអាល្លឺម៉ង់ ដើម្បីអូសទាញភាគីជម្លោះ រុស្ស៊ី និងអ៊ុយក្រែន ឲ្យមកចរចាគ្នា។ គំនិតនេះបានចាប់ផ្តើមកាលពីឆ្នាំ២០១៦ ដោយគេបានជួបប្រជុំគ្នា បានតែម្តងគត់ ដោយពុំបានលទ្ធផលអ្វីទាំងអស់ ព្រោះរុស្ស៊ី និងអ៊ុយក្រែនមានគោលជំហររឹងៗរៀងខ្លួន។
ដូចយើងដឹងហើយ វិបត្តិនៅភាគខាងកើតអ៊ុយក្រែន បានចាប់ផ្តើមនៅឆ្នាំ២០១៤ ដោយបានផ្តាច់ជីវិតមនុស្សមិនតិចជាង១៣០០០នាក់ទេ។ ក្រុមឧទ្ទាមផ្តាច់ខ្លួនដែលមានរុស្ស៊ីជួយទំនុកបំរុង បានធ្វើសង្រ្គាមបំបែកទឹកដី ហើយមកទល់ពេលនេះ ថ្វីបើការប្រយុទ្ធគ្នាបានស្ងាត់ទៅហើយ តែពុំទាន់មានការដោះស្រាយណាមួយ ឲ្យជាក់លាក់ យូរអង្វែងទេ។
នៅឆ្នាំ២០១៥ បារាំង និងអាល្លឺម៉ង់ បានអូសអ៊ុយក្រែន និងរុស្ស៊ី សម្រេចបានកិច្ចព្រមព្រៀងបណ្តោះអាសន្នមួយនៅទីក្រុងមីនស្គ៍។ ប៉ុន្តែខ្លឹមសារមិននៃកិច្ចព្រមព្រៀងនេះ គ្មានភាគីណាគោរពទេ រហូតមកទល់ពេលនេះ។ សញ្ញាណវិជ្ជមានខ្លះ ដែលយើងអាចសង្កេតឃើញ នារយៈពេលចុងក្រោយនេះ មានដូចជា ការដោះដូរអ្នកទោសគ្នាទៅវិញទៅមក ម្ខាង៣៥នាក់កាលពីខែកញ្ញា។ ហើយចាប់ពីខែមិថុនា គេសង្កេតឃើញដែរ ថាភាគីទាំងសងខាង បានដកទ័ពរៀងៗខ្លួន នៅតាមតំបន់សមរភូមិ ក្នុងទឹកដីដុនបាស ដោយមានការត្រួតពិនិត្យ ពីអង្គការដើម្បីសន្តិសុខនិងសហប្រតិបត្តិការអឺរ៉ុប OSCE។
មន្ត្រីធ្វើការផ្ទាល់ជាមួយនឹងលោកប្រធានាធិបតីបារាំង ក្នុងសំណុំរឿងនេះ បានលើកឡើងក្នុងន័យសុទិដ្ឋិនិយមថា គេមានសញ្ញាណវិជ្ជមានច្រើន ដែលជម្រុញឲ្យគេរៀបចំជំនួបកំពូលនាពេលនេះ។ ដូចគ្នាដែរ មន្ត្រីការទូតអាល្លឺម៉ង់ បានលើកឡើងថា គេសង្ឃឹមថាកិច្ចប្រជុំលើកនេះ នឹងផ្តល់សន្ទុះដល់ការប្រឹងប្រែងកសាងសន្តិភាព នៅតំបន់ដុនបាស ភាគខាងកើតអ៊ុយក្រែន។ ក៏ប៉ុន្តែ សួរថា តើសញ្ញាវិជ្ជមានទាំងនោះ មានទំហំប៉ុណ្ណា យើងមិនអាចសន្និដ្ឋានបានទេ។
លោក ហ្សេឡិនស្គី ខុសពីលោក ប៉ូរ៉ូឆិនកូ
មានមតិខ្លះ បានដាក់ការសង្ឃឹម ទៅលើលោក វ៉ូឡូឌីមៀរ ហ្សេឡិនស្គី ប្រធានាធិបតីថ្មីរបស់អ៊ុយក្រែន ដែលខុសអ្នកមុន គឺលោក ប៉េត្រូ ប៉ូរូឆិនកូ ដែលមានគោលជំហរប្រឆាំងនឹងរុស្ស៊ីខ្លាំង។លោកវ៉ូឡូឌីមៀរ ហ្សេឡិនស្គី ប្រធានាធិបតីអ៊ុយក្រែន បានផ្តល់សន្ទុះថ្មីដល់ការចរចាជាមួយនឹងរុស្ស៊ី។ យ៉ាងណាមិញ មួយផ្នែកនៃជ័យជំនះក្នុងការបោះឆ្នោតរបស់លោក គឺបានមកពីឆន្ទៈ ចង់បើកការចរចា ជាជាងការដំឡើងសរសៃក ភ្ជង់កាំភ្លើងដាក់រុស្ស៊ី។ មតិសាធារណៈអ៊ុយក្រែន ប្រមាណ៧៥% គាំទ្រចំពោះបំណងចរចាជាមួយរុស្ស៊ីនេះ។
បើផ្អែកតាមក្រុមការងារអាល្លឺម៉ង់ គេលើកឡើងថា ចាប់តាំងពីលោក វ៉ូឡូឌីមៀរ ហ្សេឡិនស្គី ចូលកាន់តំណែងមក គេឃើញដំណើរការចរចា ទាក់ទងគ្នារវាងអ៊ុយក្រែន នឹងរុស្ស៊ី បានវិវឌ្ឍន៍ និងមានសន្ទុះគួរឲ្យសង្ឃឹម។ ភាគីបារាំង ក៏លើកឡើងដែរ ថា វិធីសាស្ត្ររបស់លោកប្រធានាធិបតីថ្មីអ៊ុយក្រែន គឺឆ្លៀតរកច្រកចូល ទោះបីជាចង្អៀតយ៉ាងណាក៏ដោយ ដើម្បីឲ្យលោកពូទីនផ្លាស់ប្តូរគោលជំហរជាក់ស្តែងខ្លះ។
គេចោទថាលោក ហ្សេឡិនស្គី អាចឆោតកាត់ដីឲ្យរុស្ស៊ី
រុស្ស៊ីព្រមវិលមកចរចានាពេលនេះ ក៏ប្រហែលជា គេចង់សាកល្បង ចង់តេស្តមើលគោលជំហររបស់ប្រធានាធិបតីថ្មី របស់អ៊ុយក្រែនដែរ។ រុស្ស៊ី ដឹងថាលោក វ៉ូឡូឌីមៀរ ហ្សេឡិនស្គី ជាមនុស្សថ្មី វ័យក្មេង ដែលមានបទពិសោធន៍នយោបាយតិចតួចណាស់។ ដូច្នេះ លោកលោក វ៉ូឡូឌីមៀរ ហ្សេឡិនស្គី អាចមានជំហរទន់ជ្រាយ ងាយធ្វើតាមការចង់បានរបស់រុស្ស៊ី។
ដូច្នេះយើងឃើញថា កាលៈទេសៈនេះ មិនមែនជាការងាយប៉ុន្មានទេ សម្រាប់លោកប្រធានាធិបតីរបស់អ៊ុយក្រែន។ កុំភ្លេចថា លោកត្រូវស្ថិតក្រោមការកៀបសង្កត ពីសំណាក់មតិសាធារណៈរបស់ប្រជាជនអ៊ុយក្រែន ព្រមទាំងអ្នកនយោបាយអ៊ុយក្រែនទាំងអស់។
កន្លងមក មានមតិជាច្រើន បានលើកឡើងថា លោក លោក វ៉ូឡូឌីមៀរ ហ្សេឡិនស្គី មានអាយុត្រឹមតែ៤១ឆ្នាំ ជាអតីតារាកំប្លែង តារាសម្តែង មិនដែលធ្លាប់ធ្វើនយោបាយពីមុនមកសោះនោះ ច្បាស់ជាគ្មានសមត្ថភាព ទៅចរចាទល់មុខ ជាមួយនឹងលោកពូទីនបានទេ។ គេចោទថា ហេតុតែចង់បញ្ចប់សង្រ្គាមជាមួយរុស្ស៊ីពេក លោកលោក វ៉ូឡូឌីមៀរ ហ្សេឡិនស្គី អាចនឹងឆោត ព្រមកាត់ដំបន់ដុនបាសឲ្យទៅរុស្ស៊ីមិនខាតទេ។
បន្ទាត់ក្រហម
ក្រុមបក្សនយោបាយធំៗទាំងអស់ របស់អ៊ុយក្រែន បានរួមគ្នាធ្វើលិខិតប្រកាសមួយ ដោយបានដាក់បន្ទាត់ក្រហម ទាមទារឲ្យលោក វ៉ូឡូឌីមៀរ ហ្សេឡិនស្គី ត្រូវតែគោរព មិនត្រូវចុះញ៉មនឹងរុស្ស៊ីឲ្យសោះ។ បន្ទាត់ក្រហមនោះ គឺការទាមទារឲ្យបាន នូវការដកទ័ពរបស់រុស្ស៊ីទាំងស្រុង ចេញពីតំបន់ដុនបាស ហើយកងទ័ពអ៊ុយក្រែន ត្រូវឈានទៅដាក់តាំងនៅតាមបន្ទាត់ព្រំដែនវិញ។ ពុំនោះទេ នឹងគ្មានការបោះឆ្នោតនៅតំបន់ដុនបាសជាដាច់ខាត។
ជាការពិត គេអាចថាលោក វ៉ូឡូឌីមៀរ ហ្សេឡិនស្គី គ្មានបទពិសោធន៍ តែលោកមិនមែនជាមនុស្សល្ងង់ទេ។ ដោយដឹងពីការបារម្ភ របស់អ្នកនយោបាយ ក៏ដូចជារបស់ប្រជាជន កាលពីថ្ងៃទី២ធ្នូ នៅចំពោះមុខអ្នកកាសែត លោកលោក វ៉ូឡូឌីមៀរ ហ្សេឡិនស្គី បានប្រាប់ឲ្យដឹងមុន នូវបន្ទាត់ក្រហមរបស់គាត់ ដែលស្រដៀងគ្នានឹង ការទាមទាររបស់ក្រុមគណបក្សនយោបាយធំៗដែរ។
ជម្រើសផែនការទី២ បើរុស្ស៊ីនៅតែបិទផ្លូវ
លោក Mykola Kapitonenko សាស្ត្រាចារ្យនៅវិទ្យាស្ថានទំនាក់ទំនងអន្តរជាតិទីក្រុងកៀវ បានលើកឡើងថា លោកមិនគិតថា លោកលោក វ៉ូឡូឌីមៀរ ហ្សេឡិនស្គី ជាមនុស្សល្ងង់ឆោតនោះទេ។ លោកពន្យល់ថា លោក វ៉ូឡូឌីមៀរ ហ្សេឡិនស្គី ស្ថិតក្នុងគំនៀបទាំងសងខាង ណារុស្ស៊ីរឹតទទឹង ណាមតិសាធារណៈអ៊ុយក្រែន ដែលមិនចង់បាត់បង់ទឹកដី។ អ្វីដែលលោក លោក វ៉ូឡូឌីមៀរ ហ្សេឡិនស្គី កំពុងព្យាយាមធ្វើ មិនមែនជាការកាត់ដីឲ្យរុស្ស៊ី ដោយឆោតល្ងង់នោះទេ តែគឺលោកកំពុងព្យាយាមអូសទាញរុស្ស៊ី ឲ្យគោរពកិច្ចព្រមព្រៀងទីក្រុងមីនស្គ៍ ដែលលោកប៉េត្រូ ប៉ូរ៉ូឆិនកូ ប្រធានាធិបតីអ៊ុយក្រែនមុន ជាអ្នកចុះហត្ថលេខា។
យ៉ាងណាមិញ លោក Andrii Yermak ទីប្រឹក្សាផ្ទាល់របស់ លោក វ៉ូឡូឌីមៀរ ហ្សេឡិនស្គី បានអះអាងថា លោកប្រធានាធិបតីហ្សេឡិនស្គី នឹងប្រឹងប្រែងបិទបញ្ចប់សង្រ្គាមនៅតំបន់ភាគខាងកើត ដោយសន្តិវិធី ដោយមិនប្រើអាវុធ។ ប៉ុន្តែបើសិនជា រុស្ស៊ីនៅតែបិទទ្វារ នៅតែមិនព្រមគោរពកិច្ចព្រមព្រៀងទីក្រុងមីនស្គ៍ទេនោះ នោះអ៊ុយក្រែន នឹងអនុវត្តផែនការទី២មួយទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ