ក្រុមប្រឹក្សាសន្តិសុខចេញសេចក្តីសម្រេច កាត់ផ្តាច់ប្រភពចំណូលរបស់ជីហាត រដ្ឋអ៊ីស្លាម
សមាជិកក្រុមប្រឹក្សាសន្តិសុខ កាលពីថ្ងៃព្រហស្បតិ៍ ម្សិលមិញ បានមូលមតិ គ្នា ជាឯកច្ឆន្ទ បោះឆ្នោតសេចក្តីសម្រេច លើវិធានការបិទខ្ទប់ប្រាក់ចំណូលរបស់ក្រុមជីហាតអង្គការរដ្ឋអ៊ីស្លាម។ សេចក្តីសម្រេចបានអំពាវនាវឲ្យគ្រប់ប្រទេសចូលរួមយ៉ាងសកម្ម ដើម្បី កាត់ផ្តាច់ប្រភពហិរញ្ញវត្ថុ ដែលក្រុមជីហាតយកទៅប្រើដើម្បីធ្វើសង្រ្គាមនៅស៊ីរី និងអ៊ីរ៉ាក់។
ចុះផ្សាយនៅថ្ងៃ៖
ស្តាប់ - ០៧:០៩
រដ្ឋមន្រ្តីសេដ្ឋកិច្ចរបស់ប្រទេសទាំង១៥ របស់ក្រុមប្រឹក្សាសន្តិសុខរបស់អង្គការសហប្រជាជាតិ នៅយប់ថ្ងៃព្រហស្បតិ៍ម្សិលមិញ បានបោះឆ្នោត ជាឯកច្ឆ័ន្ទ សេចក្តីសម្រេច លើវិធានការកាត់ផ្តាច់ប្រភពហិរញ្ញវត្ថុរបស់ក្រុមជីហាត អង្គការរដ្ឋអ៊ីស្លាម។
ក្រុមជីហាតអង្គការរដ្ឋអ៊ីស្លាម មានប្រភពហិរញ្ញវត្ថុបានមកពីការបូមលក់ប្រេង គាស់ លក់វត្ថុបុរាណ យកពន្ធពីប្រជាជន ហើយនិង ចាប់ជំរិតមនុស្ស យកលុយ។ ការសិក្សាចុងក្រោយបានបង្ហាញថា ក្រុមជីហាត រដ្ឋអ៊ីស្លាម រកប្រាក់ចំណូលបានប្រមាណ ៨០លានដុល្លារ ក្នុងមួយខែៗ រហូតធ្វើឲ្យក្រុមនេះមានទ្រព្យសម្បត្តិច្រើនជាងក្រុមភេរវនិយម ក្នុងពិភពលោក ប្រមាណ ២,៣ពាន់លានដុល្លារ។ ជាមួយនឹងលុយរាប់លាននេះ ក្រុមជីហាត អាចទិញអាវុធ ជួលទាហានស៊ីឈ្នួលឲ្យធ្វើសង្រ្គាមសម្រាប់ក្រុមខ្លួន បានដោយរំភើយ។
ដើម្បីធ្វើឲ្យក្រុមជីហាត អង្គការរដ្ឋអ៊ីស្លាម ចុះខ្សោយ មធ្យោបាយមានតែមួយ គឺ កាត់ផ្តាច់ប្រភពចំណូលរបស់ក្រុមនេះជាមុនសិន។ យើងដឹងហើយថា តាំងពីដើមឆ្នាំនេះ ទាំងយន្តហោះចម្បាំងអាមេរិក និងរុស្ស៊ី ដែលបើកការវាយប្រហារទៅលើក្រុមជីហាតនៅស៊ីរី បានបាញ់បំផ្លាញរថយន្តដឹកប្រេង និងទីតាំងរោងចក្រចម្រាញ់ប្រេងរបស់ក្រុមជីហាតបានជាច្រើនកន្លែង។ ក្រសួងការពារជាតិអាមេរិកបានអះអាងថា គេបានបាញ់បំផ្លាញរថយន្តដឹកប្រេងរបស់ក្រុមជីហាត ប្រមាណ ៤០០គ្រឿង ចំណែករុស្ស៊ី វិញ បាននិយាយថាខ្លួនបានបំផ្លាញដល់ទៅ ១ពាន់គ្រឿង។
ការបាញ់បំផ្លាញរថយន្តដឹកប្រេង និងរោងចក្រចម្រាញ់ប្រេងបានប៉ះពាល់កញ្ចប់លុយមួយផ្នែក របស់ក្រុមជីហាតអង្គការរដ្ឋអ៊ីស្លាម ប៉ុន្តែ មិនទាំងស្រុងនោះទេ។ សេចក្តីសម្រេចរបស់ក្រុមប្រឹក្សាសន្តិសុខ ដែលស្នើឡើងដោយភាគី រុស្ស៊ី និងអាមេរិក មានគោលដៅ កាត់បំផ្លាញទាំងស្រុងប្រភពចំណូលរបស់ក្រុមជីហាតអង្គការរដ្ឋអ៊ីស្លាមតែម្តង។ សេចក្តីសម្រេចរបស់ក្រុមប្រឹក្សាសន្តិសុខបានទាមទារឲ្យគ្រប់ប្រទេស ចូលរួម យ៉ាងស្វាហាប់បំផុត ដើម្បី បិទខ្ទប់ប្រភពលុយរបស់ក្រុមជីហាត។
នៅក្នុងសេចក្តីសម្រេចរបស់ក្រុមប្រឹក្សាសន្តិសុខ គេមានវិធានការរឹតបន្តឹង លើការលក់ប្រេងខុសច្បាប់ ការជួញដូរវត្ថុបុរាណ និងការបង់ប្រាក់ទៅឲ្យក្រុមជីហាតអង្គការដើម្បីជាថ្នូរនឹងការដោះលែងចំណាប់ខ្មាំង។ សេចក្តីសម្រេច របស់ក្រុមប្រឹក្សា បានចែងផងដែរពីការដាក់ទណ្ឌកម្ម ឬផ្អឹបទ្រព្យសម្បត្តិរបស់បុគ្គល ឬស្ថាប័នដែលបានទិញប្រេង ឬវត្ថុបុរណាខុសច្បាប់ ពីក្រុមជីហាតអង្គការរដ្ឋអ៊ីស្លាម។ លើសពីនោះ សេចក្តីសម្រេចនឹងលាតសន្ធឹងផងដែរទៅលើការដាក់ទណ្ឌកម្ម អ្នកដែលគាំទ្រផ្តល់ហិរញ្ញវត្ថុ ជួយលុយដោយផ្ទាល់ដល់ក្រុមជីហាតអង្គការរដ្ឋអ៊ីស្លាម។
ក្រុមប្រឹក្សាសន្តិសុខអង្គការសហប្រជាជាតិធ្លាប់ចេញសេចក្តីសម្រេចមួយ កាលពីខែកុម្ភៈ កន្លងទៅ ដើម្បី ដាក់ទណ្ឌកម្មលើបុគ្គលដែលផ្តល់ហិរញ្ញវត្ថុដល់ក្រុមជីហាត តាមរយៈ ការទិញប្រេងរត់ពន្ធ និងវត្ថុបុរាណ ដែលលួចគាស់នៅក្នុងប្រទេសស៊ីរី និងអ៊ីរ៉ាក់។
នៅក្នុងសេចក្តីសម្រេចកាលពីថ្ងៃព្រហស្បតិ៍ ដែលបំពេញបន្ថែមទៅលើសេចក្តីសម្រេចមុនៗ គេបានចែងថា ប្រទេសនីមួយៗ មានរយៈពេល ៣ខែ ដើម្បីស្នើវិធានការដែលគេត្រូវធ្វើ ដើម្បីទប់ស្កាត់លំហូរលុយទៅក្នុងដៃរបស់ក្រុមជីហាតរដ្ឋអ៊ីស្លាម។ អង្គការសហប្រជាជាតិមានរយៈពេល ៤៥ថ្ងៃ ដើម្បីកសាងអត្ថបទយុទ្ធសាស្រ្ត ដែលនិយាយពីការគំរាមកំហែងរបស់ក្រុមជីហាត និងប្រាក់ចំណូលរបស់ក្រុមនេះ។
តើក្រុមជីហាតអង្គការរដ្ឋអ៊ីស្លាមលក់ប្រេងទៅឲ្យអ្នកណាខ្លះ?
ហ្សកដានី តួកគី ស៊ីរី និងអ៊ីរ៉ាក់ ជាអតិថិជនទិញប្រេងពីក្រុមជីហាតអង្គការរដ្ឋអ៊ីស្លាម។ ដោយសារតែសកម្មភាពលក់ប្រេងរបស់ក្រុមជីហាតរដ្ឋអ៊ីស្លាមខុសច្បាប់ ដូច្នេះ ប្រេងដែលលក់ទៅប្រទេសទាំងនោះ គឺធ្វើឡើងក្នុងរូបភាពប្រេងរត់គេចពន្ធ។ នៅពេលវាយចូលកាន់កាប់ទឹកដីស៊ីរី និងអ៊ីរ៉ាក់ គេវាយតម្លៃថា ក្រុមជីហាតគ្រប់គ្រងអណ្តូងប្រេង ៨០ភាគរយរបស់ស៊ីរី និង១០ភាគរយនៅអ៊ីរ៉ាក់។ ការវាយប្រហារតាមផ្លូវអាកាសរបស់សម្ព័ន្ធអន្តរជាតិ ដឹកនាំដោយអាមេរិក និងយន្តហោះចម្បាំងរុស្ស៊ី នៅប៉ុន្មានខែចុងក្រោយនេះ បានធ្វើឲ្យក្រុមជីហាតបាត់បង់ កន្លែងបូមប្រេងរបស់ខ្លួន ពីជាង ៣០កន្លែង មកនៅត្រឹមជាង ១០កន្លែងតែប៉ុណ្ណោះ។
ទាំងនៅស៊ីរី និងនៅអ៊ីរ៉ាក់ ក្រុមជីហាតរដ្ឋអ៊ីស្លាមធ្វើការប្រមូលផ្តុំសកម្មភាពបូម និងលក់ប្រេង។ ក្រុមជីហាតអាចបូម លក់ដោយខ្លួនឯងទៅទីផ្សារងងឹតនៅតួកគី ឬ ហ្សកដានី ឬក្រុមនេះអាចលក់បន្តទៅឲ្យប្រជាជនស៊ីរី ឬអ៊ីរ៉ាក់ ដែលដឹកតាមថ្មើរជើង យកទៅលក់នៅតួកគី ឬនៅស៊ីរី និងអ៊ីរ៉ាក់តែម្តង។
ទាំងនៅស៊ីរី និងនៅអ៊ីរ៉ាក់ ក្រុមជីហាតលក់ប្រេងរបស់ខ្លួន ទៅឲ្យទាហានរដ្ឋាភិបាល និងក្រុមប្រឆាំងស៊ីរី។ ស្តាប់ទៅ ដូចជាចម្លែកបន្តិច ដែលក្រុមជីហាតលក់ប្រេងទៅឲ្យគូសត្រូវរបស់ខ្លួន។ ប៉ុន្តែ ដោយពិតទៅគ្មានអ្វីចម្លែកទេ ព្រោះថា រដ្ឋាភិបាលស៊ីរី ត្រូវការប្រេងដើម្បីផ្គត់ផ្គង់ថាមពលអគ្គិសនី។ ក្រសួងហិរញ្ញវត្ថុអាមេរិកទើបតែបានផ្អឹបទ្រព្យសម្បត្តិមន្រ្តីជាន់ខ្ពស់របស់រដ្ឋាភិបាលស៊ីរីម្នាក់ ដែលមានជាប់ពាក់ព័ន្ធនឹងការរត់ពន្ធ ទិញប្រេងពីក្រុមជីហាត រដ្ឋអ៊ីស្លាម។
នៅខាងក្រុមប្រឆាំងស៊ីរី គេត្រូវការប្រេងដើម្បី ចាក់បំពេញរថយន្តដឹកទាហានធ្វើសង្រ្គាម។ ប្រាក់ចំនូលបានមកពីការលក់ប្រេង ឬវត្ថុបុរាណគឺសំខាន់ណាស់ សម្រាប់ទ្រទ្រង់សេដ្ឋកិច្ចរបស់ខ្លួន ក្រុមជីហាត ត្រូវតែលក់ប្រេងឲ្យបានច្រើន នោះទោះបីជាអ្នកទិញ ជាសត្រូវរបស់ខ្លួនក៏ដោយ។
តួកគីកំពុងត្រូវគេចង្អុលមុខ ដោយសារតែជំហរមិនច្បាស់លាស់ ក្នុងការប្រយុទ្ធប្រឆាំងនឹងក្រុមជីហាត រដ្ឋអ៊ីស្លាម
ការសិក្សា និងព័ត៌មានជាច្រើនបានបង្ហាញថា មួយផ្នែកធំប្រេងលក់ដោយក្រុមជីហាតត្រូវនាំទៅចម្រាញ់ និងលក់ក្នុងទីផ្សារងងឹត នៅភាគខាងជើងស៊ីរី និងក្នុងទឹកដីតួកគី។ នៅក្រោយពេលតួកគីបាញ់ទម្លាក់យន្តហោះចម្បាំងរុស្ស៊ី លោកប្រធានាធិបតីពូទីនថែមទាំងលើកបង្ហាញភស្តុតាង ដែល ថា កូនប្រុស និងក្រុមគ្រួសាររបស់លោកប្រធានាធិបតីតួកគី កំពុងរកស៊ីមានបាន នឹងការធ្វើជំនួញ ទិញប្រេង រត់ពន្ធពីក្រុមជីហាតអង្គការរដ្ឋអ៊ីស្លាម។ ប្រធានាធិបតីតួកគីលោកអ៊ែរដូហ្កានបានរុញច្រានចោលការចោទប្រកាន់។ ប៉ុន្តែ ការពិតនៅតែការពិត តួកគីរស់បានដោយសារការនាំចូលប្រេងពីបរទេស។ ដូច្នេះ ចង់ មិនចង់ រដ្ឋាភិបាលតួកគី ទោះបីមិនបានប្រព្រឹត្តដោយខ្លួនឯង ប៉ុន្តែ បានបិទភ្នែក ឲ្យមានការហូរចូលប្រេងរត់ពន្ធក្នុងទឹកដីតួកគី។ ប្រេងបានមកពីក្រុមជីហាតរដ្ឋអ៊ីស្លាមមានតម្លៃថោក មហាសែនថោក គឺប្រមាណតែ ១២ដុល្លារ ប៉ុណ្ណោះក្នុងមួយធុង នៅពេលប្រេងឆៅនៅទីផ្សារអន្តរជាតិ មានតម្លៃប្រមាណ ៤៥ដុល្លារ ក្នុងមួយធុង។
មន្រ្តីហិរញ្ញវត្ថុអាមេរិកាំងដែលដឹកនាំការប្រជុំពីម្សិលមិញ បានសង្កត់ធ្ងន់ថា គ្រប់ប្រទេស ត្រូវតែចាត់សកម្មភាពផ្តល់លុយទៅឲ្យក្រុមជីហាត ថា បទឧក្រិដ្ឋធ្ងន់ធ្ងរ នៅក្នុងច្បាប់ជាតិរបស់ពួកគេ។ ចំណែករដ្ឋមន្រ្តីសេដ្ឋកិច្ចបារាំងវិញ សង្ឃឹមចង់បានការដាក់សំពាធថ្នាក់អន្តរជាតិ ដើម្បីបិទខ្ទប់ប្រភពលុយរបស់ក្រុមជីហាតអង្គការរដ្ឋអ៊ីស្លាម។ តាមលោករដ្ឋមន្រ្តីបារាំង Michel Sapin ក្រុមសកម្មហិរញ្ញវត្ថុ ដែលជាស្ថាប័នអន្តររដ្ឋាភិបាល និងមានមូលដ្ឋាននៅទីក្រុងប៉ារីស នឹងរៀបចំបង្កើតបញ្ជីរប្រទេសដែលមិនសូវចង់ចូលរួមប្រយុទ្ធ ប្រឆាំងប្រភពចំនូលរបស់ក្រុមជីហាតអង្គការរដ្ឋអ៊ីស្លាម។ តាមរយៈបញ្ជីចំណាត់ថ្នាក់យ៉ាងដូច្នេះ ប្រទេសដែលមានជាប់ពាក់ព័ន្ធ ប៉ុន្តែ មិនសូវសកម្មខ្លាំងក្នុងរឿងប្រយុទ្ធប្រឆាំងនឹងក្រុមជីហាត នឹងត្រូវក្រើនរំលឹកឲ្យបង្កើនសកម្មភាពរបស់ខ្លួន បើមិនដូច្នោះទេ គេនឹងអាចរងការដាក់ទណ្ឌកម្មជាមិនខាន៕
កិច្ចប្រជុំដើម្បីដោះស្រាយវិបត្តិនយោបាយនៅស៊ីរី
នៅថ្ងៃសុក្រ ក្រុមប្រឹក្សាសន្តិសុខអង្គការសហប្រជាជាតិបើកកិច្ចប្រជុំ ដើម្បីរកច្រកចេញនយោបាយសម្រាប់វិបត្តិស៊ីរី។ ប្រទេសចំនួន ១៧ រួមទាំងស្ថាប័នអន្តរជាតិចំនួន បី គឺ អង្គការសហប្រជាជាតិ សហភាពអឺរ៉ុប និងសម្ព័ន្ធអារ៉ាប់នឹងពិភាក្សាគ្នាដើម្បីស្វែងរកផែនការសន្តិភាពនៅស៊ីរី។ ជោគវាសនារបស់ប្រធានាធិបតីស៊ីរី នៅក្នុងនយោបាយអន្តរកាលនៅស៊ីរី នៅតែជាបញ្ហាចម្រូងចម្រាស ខ្វែងគំនិតគ្នា រវាងភាគី អាមេរិក អារ៉ាប៊ី សាអូឌីត ដែលជាក្រុមប្រទេសគាំទ្រក្រុមប្រឆាំងស៊ីរី ហើយនិងក្រុមប្រទេសដែលគាំទ្រលោកបាស្ហា អាល់អាសាដ ដូចជារុស្ស៊ី និងអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ