អារ៉ាប៊ីសាអូឌីតបង្កើតសម្ព័ន្ធអ៊ីស្លាមប្រឆាំងភេរវកម្ម ចំពេលអាមេរិកចង់ពឹងទ័ពថ្មើរជើងតំបន់
ដើម្បីការពារតុល្យការអាមេរិកក្នុងសង្គ្រាមប្រឆាំងភេរវនិយម លោក អូបាម៉ា បានបើកប្រជុំក្រុមបឹក្សាសន្តិសុខនៅមន្ទីរបញ្ចកោណ ដ៏កម្រមួយ នៅល្ងាចថ្ងៃចន្ទទី ១៤ ធ្នូម្សិលមិញ។ ក្នុងពេលដែលលោកអូបាម៉ា លម្អិតអំពីយុទ្ធសាស្ត្រអាមេរិក និងសម្ព័ន្ធអន្តរជាតិ ក្នុងការប្រយុទ្ធប្រឆាំងនឹងពួកអង្គការរដ្ឋអ៊ីស្លាមនៅស៊ីរី និងអ៊ីរ៉ាក់ ប្រទេសអារ៉ាប៊ីសាអូឌីត ក៏បានប្រកាសបង្កើតសម្ព័ន្ធអារ៉ាប ដើម្បីប្រយុទ្ធប្រឆាំងនឹងភេរវនិយម ដែលមានប្រទេសអ៊ីស្លាមចំនួន៣៤ចូលរួម លើកលែងតែអ៊ីរ៉ង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:១៨
“យើងនឹងវាយពួកភេរវជនឱ្យខ្លាំងជាងពេលណាៗទាំងអស់ » នេះគឺជាការប្រកាសរបស់លោកប្រធានាធិបតី អូបាម៉ា។ នេះគឺពិតជាឃ្លា ដែលមានបំណងចង់ធានារ៉ាប់រងពលរដ្ឋអាមេរិក និងដើម្បីប្តូរទំនោរមតិសាធារណៈ។ ព្រោះសូមបញ្ជាក់ថា នៅក្នុងការស្ទង់មតិចុងក្រោយ នៅអាមេរិក កាលពីដើមខែធ្នូ ក្រោយពីហេតុការណ៍ភេរវកម្មនៅប៉ារីស តែមុនភេរវកម្មនៅSan Bernadino បានបង្ហាញថាពលរដ្ឋអាមេរិកបាត់ទំនុកចិត្តច្រើនលើយុទ្ធសាស្ត្ររបស់ប្រធានាធិបតី ដោយមានពលរដ្ឋតែ៣៨% គាំទ្របន្ទាត់នយោបាយលោកអូបាម៉ា ប្រឆាំងនឹងពួកអង្គការរដ្ឋអ៊ីស្លាម។
ថ្វីបើលោកអូបាម៉ា មិនបានផ្តល់ព័ត៌មានថ្មី លើសពីអ្វី ដែលគេធ្លាប់ដឹងពីមុនមកមែន ប៉ុន្តែយប់មិញនេះ លោកអូបាម៉ា បានផ្តល់ព័ត៌មានលម្អិតច្រើន។ លោកបានបញ្ជាក់ពីការស្លាប់របស់ ជីហាធី ចន ភេរវជនជាតិអង់គ្លេស ដែលបានថតការធ្វើឃាតចំណាប់ខ្មាំងអឺរ៉ុប និងបានរៀបរាប់អំពីការរុលទៅមុខរបស់កម្លាំងសម្ព័ន្ធមិត្ត ដោយបានធ្វើ អង្គការរដ្ឋអ៊ីស្លាម បានបាត់បង់ទឹកដី អស់រាប់ពាន់គីឡូម៉ែត្រការ៉េ នៅស៊ីរី និង៤០%នៅអ៊ីរ៉ាក់។ ហើយការចាញ់ នឹងមានជាបន្តបន្ទាប់ទៀត។
លោកអូបាម៉ា បានធ្លោយសម្តីបែបយោធា គំរាមថា មេដឹកនាំអង្គការរដ្ឋអ៊ីស្លាម មិនអាចលាក់ខ្លួនបានទៀតទេ ! ព្រោះដល់វេនហើយ។ ប្រតិបត្តិការផ្លូវអាកាសលើកក្រោយគឺសំដៅ លើ អាប៊ូ សៃយាហ្វ រដ្ឋមន្ត្រីក្រសួងប្រេងកាត ឬក៏ ជូណាអ៊ីត ហ៊ូសេន អ្នកជ្រើសរើសជនជីហាតតាមប្រព័ន្ធអ៊ីនធ័រនែត ...
អ្វីដែលសំខាន់ជាងគេបំផុត គឺអាមេរិកបានទទួលស្គាល់ថាសង្គ្រាមប្រឆាំងអង្គការរដ្ឋអ៊ីស្លាម លំបាកបន្តិច តែចង់ប្រឹងកម្ចាត់ឱ្យបានកាន់តែលឿន កាន់តែឆាប់ ដោយមានរំពឹងមិនអាចខ្វះបានលើសម្ព័ន្ធមិត្ត នៅក្នុងតំបន់ផ្ទាល់ ជាពិសេសលើក្រុមប្រទេសដែលបានចូលរួម ក្នុងប្រតិបត្តិការវាយប្រហារតាមផ្លូវអាកាស។
ដើម្បីបញ្ជាក់អំពីភាពចាំបាច់នេះ លោកអូបាម៉ា បានបញ្ជូន រដ្ឋមន្ត្រីការបរទេស មកបារាំងនិងរុស្ស៊ី ដើម្បីស្វែងរកដំណោះស្រាយនយោបាយតាមផ្លូវការទូត។ ឯរដ្ឋមន្ត្រីការពារជាតិអាមេរិក ត្រូវធ្វើដំណើរទៅកាន់តំបន់ដើមបូព៌ា ដើម្បីស្វែងរកការគាំទ្រពីពិភពអារ៉ាប ដើម្បីបញ្ចុះបញ្ចូលឱ្យប្រទេសក្នុងតំបន់នេះ ប្រមូលទ័ពថ្មើរ ទៅប្រយុទ្ធយកឈ្នះពួកជីហាតរដ្ឋអ៊ីស្លាម។
អារ៉ាប៊ីសាអូឌីត ប្រកាសបង្កើតសម្ព័ន្ធអារ៉ាប ៣៤ប្រទេសប្រឆាំងភេរវកម្ម
ការបង្កើតសម្ព័ន្ធអារ៉ាបប្រឆាំងភេរវនិយម គឺជាដំណឹងល្អ និងជាដំណឹងដ៏គួរឱ្យភ្ញាក់ផ្អើល ព្រោះតាំងដើមមក រាជាណាចក្រអារ៉ាប៊ីសាអូឌីត គឺជាប្រទេសប្រកាន់អ៊ីស្លាមតឹងតែង និងត្រូវបានបស្ចឹមលោក ចោទថា ស្ពឹកស្រពន់ចំពោះការគំរាមកំហែងភេរវកម្ម។ ប្រមុខដឹកនាំ នៅអឺរ៉ុប និង អាមេរិកខ្លះ បានថែមទាំងធ្លាប់ចោទក្រុងរីយ៉ាត ថាជាអ្នកឧបត្ថម្ភ ផ្តល់ហិរញ្ញវត្ថុដល់វិហារអ៊ីស្លាម ដល់ក្រុមអ៊ីស្លាមជ្រុលនិយមទៀតផង។
តែនៅថ្ងៃនេះ អារ៉ាប៊ីសាអូឌីត ដែលជាមេដឹកនាំក្រុមសម្ព័ន្ធអារ៉ាបប្រឆាំងនឹងពួកឈីអ៊ីត នៅយ៉េមែន និងដែលមានចំណែកក្នុងសម្ព័ន្ធអន្តរជាតិប្រឆាំងនឹងអង្គការរដ្ឋអ៊ីស្លាម បានប្រកាសបង្កើតសម្ព័ន្ធអារ៉ាបមួយ ប្រមូលផ្តុំប្រទេសអ៊ីស្លាម ៣៤ប្រទេស
- តំបន់ដើមបូព៌ា ក្រុមប្រទេសអារ៉ាប ៖ អារ៉ាប៊ីសាអូឌីត ហ្ស័កដានី អេមីរ៉ាតអារ៉ាបរួម បារ៉ែន ទុយនីស៊ី ជីប៉ូទី ស៊ូដង់ សូម៉ាលី ប៉ាឡេស្ទីន កូម័រ កាតា កូវ៉ែត លីបង់ លីប៊ី តួកគីអេហ្ស៊ីប ម៉ារ៉ុក ម៉ូរីតានី យ៉េមែន។
- អាហ្វ្រិក ៖ បេណាំង ឆាដ តូហ្គោ សេណេហ្កាល់ សៀរ៉ាឡេអូន ហ្កាបុង ហ្គីណេ កូដឌីវ័រ ម៉ាលី នីហ្សេ នីហ្សេរីយ៉ា
- អាស៊ី ៖ ប៉ាគីស្ថាន អាហ្វហ្កានីស្ថាន បង់ក្លាដែស ឥណ្ឌូណេស៊ី ម៉ាឡេស៊ី ម៉ាល់ឌីវ និងបណ្តាប្រទេសជាសមាជិក អង្គការកិច្ចសហប្រតិបត្តិការអ៊ីស្លាម... លើកលែងតែ ស៊ីរី អ៊ីរ៉ាក់ និងអ៊ីរ៉ង់។
កម្មវត្ថុចម្បងរបស់សម្ព័ន្ធ គឺប្រយុទ្ធប្រឆាំងនឹងភេរវនិយម ទាំងតាមផ្លូវយោធា មនោគមវិជ្ជា និងប្រព័ន្ធឃោសនាព័ត៌មាន បន្ថែមពីលើការខិតខំប្រឹងប្រែងរក្សាសន្តិសុខ។ សម្ព័ន្ធអារ៉ាប នឹងធ្វើយុទ្ធនាការប្រឆាំងរាល់គ្រប់ទម្រង់ គ្រប់អង្គការភេរវនិយម។ នេះបើតាមប្រសាសន៍របស់រដ្ឋមន្ត្រីក្រសួងការពារជាតិអារ៉ាប៊ីសាអូឌីត នៅចំពោះសំណួរថាតើសម្ព័ន្ធអារ៉ាបថ្មីនេះ នឹងឧទ្ទិសបេសកកម្មប្រឆាំងនឹងពួកអង្គការរដ្ឋអ៊ីស្លាមឬ។
ប៉ុន្តែទោះជាយ៉ាងណាក៏ដោយ បើតាមអារ៉ាប៊ីសាអូឌីត សម្ព័ន្ធអារ៉ាប ដែលមានទីស្នាក់ការកណ្តាលនៅក្រុងរីយ៉ាដ និងដឹកនាំដោយអារ៉ាប៊ីសាអូឌីតនេះ គឺជាសក្ខីកម្មបញ្ជាក់ថាពិភពអារ៉ាបមានឆន្ទៈ និងជាដៃគូមិនអាចខ្វះបានរបស់ពិភពលោក ក្នុងយុទ្ធនាការប្រយុទ្ធប្រឆាំងនឹងភេរវនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ