ទស្សនកិច្ចប្រមុខរដ្ឋរុស្ស៊ី លោក Medvedev នៅប្រទេសទួរគី
ក្នុងប្រវត្តិនៃទំនាក់ទំនងការទូតរវាងប្រទេសទាំងពីរដែលឆ្នាំនេះគំរប់បាន៩០ឆ្នាំ។ទស្សនកិច្ចប្រមុខរដ្ឋរុស្ស៊ីលើកនេះ គឺជាលើកទី២បន្ទាប់ពីទស្សនកិច្ចធ្វើក្នុងឆ្នាំ២០០៤ ដោយប្រធានាធិបតីរុស្ស៊ីលើកមុនគឺលោកPoutine។ នាកិច្ចចរចាថ្ងៃនេះ នៅក្រុង Ankara រវាងលោកប្រធានាធិបតីរុស្ស៊ី Medvedev និងថ្នាក់ដឹកនាំកំពូលទួរគី សាច់រឿងធំចំបងគឺ វិស័យពាណិជ្ជកម្មនិងថាមពល។ ជាលទ្ធផលនៃកិច្ចចរចាគូភាគីគ្រោងចុះហត្ថលេខាលើឯកសាររួមមិនតិចជាង២៥ច្បាប់ឡើយ បូកទាំងលើវិស័យដឹកជញ្ជូន កសិកម្ម ថាមពល អប់រំ និងទេសចរណ៍។
ចុះផ្សាយនៅថ្ងៃ៖
សេចក្តីរាយការណ៍របស់ កែវ ឆាយា
ជាបឋម គួររំលឹកថា ពិតជាចេញពីដែនដីប្រទេសទួរគីនេះឯង ជាសមាជិកបក្សសម្ពន្ធ OTAN តាំងពីឆ្នាំ១៩៥២មក ដែលស.រ.អា. កាលក្នុងឆ្នាំ ១៩៦២ បានបង្ខំចិត្តរុះរើចេញទៅវិញនូវកាំជ្រួចមីស៊ីលទាំងអម្បាល់មាណដែលមានតម្រង់មកលើសហភាពសូវៀត ជាថ្នូរនឹងការដកចេញពីប្រទេសគុយបា ដែរ នូវកាំជ្រួចមីស៊ីលទាំងអម្បាលម៉ាណរបស់សហភាពសូវៀតដែលមានតំរង់ទៅលើស.រ.អា. ដើម្បីខ័ណ្ឌបញ្ចប់ទៅវិបត្តិធ្ងន់ធ្ងរដល់កំរិតវិះៗផ្ទុះឡើងជាសង្គ្រាមលោកលើកទី៣តែម្តង។
លុះក្រោយពីសហភាពសូវៀតរលាយបាត់ទៅក្នុងឆ្នាំ១៩៩១ប្រទេសរុស្ស៊ីសម័យថ្មីដែលលើកផលប្រយោជន៍សេដ្ឋកិច្ចខ្ពស់ជាងមនោគមវិជ្ជា បានពង្រីកទំនាក់ទំនងពាណិជ្ជកម្ម-សេដ្ឋកិច្ចយ៉ាងផុសផុលជាមួយប្រទេសទួរគីនេះ ដែលអំណោយផលណាស់ សំរាប់ប្រជាពលរដ្ឋរុស្ស៊ីដែលនាំគ្នាធ្វើដំណើរច្រើនសន្ធឹកសន្ធាប់ទៅសម្រាក ក៍ដូចជាទៅទិញទំនិញយកមកបោះដុំឲ្យឈ្មួញដែលលក់រាយ។ ពីមួយឆ្នាំទៅមួយឆ្នាំ ចំនួនអ្នកទេសចររុស្ស៊ីចេះតែកើនឡើង ហើយក្នុងឆ្នាំមុនកើនដល់ជាង២លាន៥សែនាក់។ ចាញ់តែប្រទេសអាល្លឺម៉ង់ប៉ុណ្ណោះខាងចំនួនទេសចរដែលទៅសម្រាកនៅទួរគី។ ខាងទំហំពាណិជ្ជកម្មជួញដោយឯកជនគឺស្មើនឹងទំហំជួញរវាងរដ្ឋនិងរដ្ឋ ដោយឆ្នាំមុនមានទឺកប្រាក់ ២០.០០០ លាន $។ ហើយនាកិច្ចចរចាថ្ងៃនេះ គូភាគីដាក់ទិសថា ក្នុង៥ឆ្នាំទៅមុខបង្កើនវាឲ្យបាន៥ដងរហូតដល់១០០.០០០លាន$ក្នុង១ឆ្នាំ។
ខាងវិស័យថាមពលគូភាគីគ្រោងចុះជាកិច្ចព្រមព្រៀងដើម្បីឲ្យរុស្ស៊ីសង់នៅប្រទេសទួរគីគឺស្ថានីយអគ្គិសនីទី១សំរាប់ប្រទេសនេះដែលដើរដោយប្រតិករនុយក្លេអ៊ែរចំនួន៤មានកម្លាំងភ្លើងសរុប៥.០០០ Megawatt។ មិនតែប៉ុណ្ណោះទួរគីទិញពីរុស្ស៊ីនូវឧស័្មនធម្មជាតិដល់ទៅ៨០%នៃតម្រូវការខ្លួនដោយទទួលវាតាមបំពង់បង្ហូរឈ្មោះ Blue Stream លូនចេញពីប្រទេសរុស្ស៊ីតាមបាតសមុទ្ទខ្មៅ ទៅកាន់ប្រទេសទួរគី វាដំណើរការពីឆ្នាំ២០០០មកបង្ហូរទៅក្នុង១ឆ្នាំៗឧស្ម័នបរិមាណ១៦.០០០លានម៣។
នាកិច្ចចរចាថ្ងៃនេះ គូភាគីគ្រោងព្រមព្រៀងគ្នាឲ្យបានដាច់ស្រេចដើម្បីបន្លាយការសង់បំពង់នោះបន្តទៅកាន់ប្រទេសIsrael និងប្រទេសឯទៀតនៃតំបន់ដើមបូព៌ាលុះបង្កើនបរិមាណបង្ហូរនោះជា២ដងដល់៣២.០០០លានម៣ក្នុង១ឆ្នាំ។ បំពង់ថ្មីនេះនឹងមានឈ្មោះថា Blue Streamទី២។ នៅមានបំពង់បង្ហូរឧស្ម័នរុស្ស៊ីមួយទៀតឈ្មោះ SouthStream ដែលចុងឆ្នាំមុនបានទទួលការអនុញ្ញាតទៅហើយឲ្យសង់ឆ្លងកាត់ដែនទឹកសេដ្ឋកិច្ចរបស់ទួរគីឆ្ពោះទៅកាន់បណ្តាប្រទេសអឺរ៉ុបខាងត្បូង វានឹងសង់រួចក្នុងឆ្នាំ២០១៥។ មុននឹងផ្តើមទស្សនកិច្ចថ្ងៃនេះ លោកប្រធានាធិបតីMedvedev បានកត់សំគាល់ថា ទំនាក់ទំនងរវាងរុស្ស៊ីនិងទួរគីកំពុងវិវឌ្ឍទៅរកភាពជាដៃគូយុទ្ធសាស្ត្រនឹងគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ