ម៉ូស្គូនឹងទាមទារលុះទាល់តែស.រ.អា.បង្វែរពលរដ្ឋរុស្ស៊ីមកឲ្យរុស្ស៊ីវិញ
នេះជាប្រតិកម្មបញ្ចេញយ៉ាងពុះខ្ជោលព្រឹកមិញដោយអ្នកនាំពាក្យផ្លូវការរបស់ក្រសួងការបរទេសរុស្ស៊ីលោក Alexandre Loukachevich ទល់នឹងសេចក្តីវិនិច្ឆ័យជាឯកច្ឆន្ទយប់មិញ របស់ប្រជាចៅក្រមអាមេរិកាំងចំនួន១២នាក់ថាពលរដ្ឋរុស្ស៊ីឈ្មោះ Viktor Bout ដែលទទួលរហ័សនាមជា “ឈ្មួញមរណៈ” ត្រូវជាប់ទោសពិរុទ្ធមែន ចំពោះការចោទប្រកាន់៤ករណីដែលក្នុងករណីនីមួយៗអាចត្រូវតុលាការអាមេរិកកាត់ទោសឲ្យជាប់គុកដល់២៥ឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ការចោទប្រកាន់៤ករណីនេះ គឺសុទ្ធតែជាការសមគំនិតដ៏ឧក្រិដ្ឋ ៖
ទី១-ដើម្បីធ្វើឃាតប្រជាពលរដ្ឋអាមេរិក។
ទី២-ដើម្បីធ្វើឃាតពួកមន្ត្រីដែលបម្រើកិច្ចការរដ្ឋ។
ទី៣-ដើម្បីរកឲ្យបានហើយយកទៅលក់គឺកាំជ្រួចការពារដែនអាកាស។
ទី៤-គឺដើម្បីបំពាក់អាវុធដល់ពួកក្រុមភេរវជន។
ដោយហេតុថាចំពោះករណីនីមួយៗខាងលើឈ្មោះ Viktor Bout ដែលសព្វថ្ងៃអាយុ៤៤ឆ្នាំទៅហើយអាចធ្លាក់ខ្លួនជាប់គុកដល់២៥ឆ្នាំ បានជាទោសសរុបរបស់គាត់គឺត្រូវជាប់ពន្ធនាគារពី២៥ឆ្នាំ លុះរហូតដល់មួយជីវិតតែម្តង។
ជាការកត់សម្គាល់ សេចក្តីវិនិច្ឆ័យដែលថាពលរដ្ឋរុស្ស៊ីឈ្មោះ Viktor Bout ត្រូវតែមានទោសចំពោះករណីទាំង៤នោះ គឺអនុម័តយកជាឯកច្ឆន្ទដោយប្រជាចៅក្រម១២នាក់ដែលមានជ្រើសតាំងឡើងពីក្នុងចំណោមអ្នកស្រុកសាមញ្ញអាមេរិកាំង ក្រោយពីគេបានសិក្សាទៅលើភស្តុតាងដាក់ចេញដោយអាជ្ញាធរស.រ.អា.។ បន្ទាប់មក ដោយសំអាងលើសេចក្តីវិនិច្ឆ័យនេះ តាមសំដីចៅក្រមសហព័ន្ធតុលាការអាមេរិកនឹងប្រកាសសាលក្រមកាត់ទោសផ្ទាល់គឺក្នុង៣ខែទៀត នៅថ្ងៃទី៨កុម្ភៈឆ្នាំក្រោយ។ ហើយក្នុង១ខែទៅមុខ គឺទៅទល់ថ្ងៃទី២ធ្នូ មេធាវីរបស់ Viktor Bout អាចដាក់ពាក្យប្តឹងឧទ្ធរណ៍។ ឈ្មោះ Viktor Bout ដែលជាអាជីវកររុស្ស៊ីធ្លាប់មានយន្តហោះរកស៊ីដឹកជញ្ជូនបានបដិសេធដាច់អហង្ការការចោទប្រកាន់ទាំងនោះលើរូបគាត់។
ក្រសួងការបរទេសរុស្ស៊ីក្នុងប្រតិកម្មខ្លួនថ្ងៃនេះ រំលឹកថាពលរដ្ឋរុស្ស៊ីViktor Bout ដែលកាលពីខែមីនាឆ្នាំ២០០៨បានត្រូវឃាត់ខ្លួនដោយអាជ្ញាធរថៃ រួចបន្ទាប់មកបញ្ជូនទៅស.រ.អា.នៅខែវិច្ឆិកាឆ្នាំ២០១០ គឺនៅក្រោមសម្ពាធនយោបាយមិនធ្លាប់មានដូចពីខាងទីក្រុងវ៉ាស៊ីនតោនតែម្តង។ ក្រសួងការបរទេសរុស្ស៊ី ចាត់ទុកជាការមិនអាចទទួលយកបានជាដាច់ខាត” ប្រតិបត្តិការ “ចាប់ពង្រត់ពលរដ្ឋជាតិផ្សេងដោយមានការចូលរួមនៃពួកចារកិច្ចអាមេរិកាំងបន្ទាប់មក សួរចម្លើយគាត់ដោយប្រើវិធីបង្ក្រាបគាត់តាមផ្លូវរូបកាយផង ចិត្តសាស្ត្រផង ហេតុដែលផ្ទុយនឹងច្បាប់អន្តរជាតិ ផ្ទុយនឹងកាតព្វកិច្ចអន្តរជាតិរបស់ស.រ.អា.ផ្ទាល់។
ក្រសួងការបរទេសរុស្ស៊ីនឹងបន្តចាត់វិធានការសព្វបែបយ៉ាង ដើម្បីធានានូវសិទ្ធិនិងផលប្រយោជន៍ស្របច្បាប់របស់លោក Viktor Bout ក្នុងឋានៈជាពលរដ្ឋរុស្ស៊ីលុះទាល់តែបង្វែររូបគាត់មកប្រទេសរុស្ស៊ីវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ