លោកប្រធានាធិបតីបារាំងបំពេញទស្សនកិច្ច ផ្លូវការនៅកាតារ
លោកប្រធានាធិបតីបារាំង នឹងអញ្ជើញទៅដល់ប្រទេសកាតារ នៅល្ងាចថ្ងៃសៅរ៍ទី ២២មិថុនា នេះ។ ទស្សនកិច្ចផ្លូវការ រយៈពេលខ្លីនេះ នឹងឧទ្ទិសស្ទើរតែទាំងស្រុងទៅលើទំនាក់ទំនងសេដ្ឋកិច្ចបារាំង-កាតារ ដោយសង្ឃឹមថានឹងអាចប្រមូលបានកិច្ចសន្យាដ៏ច្រើនបំផុតជាមួយប្រទេសជង្រុកប្រេងកាតមួយនេះ។ បន្ទាប់មក លោកប្រធានាធិបតីបារាំងនឹងបន្តដំណើរទៅប្រទេសហ្ស័កដានី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៩
នៅក្នុងដំណើរទស្សនកិច្ចផ្លូវការពីរថ្ងៃនៅកាតារ លោកប្រធានាធិបតីបារាំងនឹងត្រូវ ជួបធ្វើគារកិច្ចពីសំណាក់ឥស្សរជននយោបាយគ្រប់ជាន់ថ្នាក់របស់កាតារ។ កាលពីឆ្នាំទៅ លោកហ្វ្រង់ស័រហូឡង់បានអញ្ជើញមកកាន់តំបន់នេះម្តងហើយតែមិនបានឆ្លងកាត់ក្រុងដូហាទេ។
កម្មវត្ថុនៃដំណើរទស្សនកិច្ចនេះ ផ្តោតទាំងស្រុងទៅលើវិស័យវិនិយោគសេដ្ឋកិច្ច។ ហេតុដូច្នេះហើយទើបគេឃើញមានថៅកែក្រុមហ៊ុនបារាំងគ្រាក់ៗជាច្រើនរូបអបដំណើរប្រធានាធិបតីនាពេលនេះ។ ក្រុមហ៊ុនបារាំងសង្ឃឹមថានឹងអាចទាក់ទាញរកបានកិច្ចសន្យាធំៗ មានជាអាទិ៍ការសាងសង់រថភ្លើងក្រោមដីនៅក្រុងដូហា រថភ្លើងក្នុងក្រុង Traimway។ ក្រុមហ៊ុនតូតាល់បារាំង មានវិនិយោគស្រាប់ទៅហើយនៅកាតារនេះ ក្នុងទំហំទឹកប្រាក់ជាង ៥ពាន់លានអឺរ៉ូ។ ប៉ុន្តែសំណុំរឿងដ៏ធំសំខាន់បំផុត និងជាយុទ្ធសាស្ត្រនោះ គឺទំនងការលក់យន្តហោះប្រដេញ Rafale។
ការផ្តោះប្តូរ សេដ្ឋកិច្ចនិងយោធា រវាងកាតារនិងបារាំង នារយៈពេលចុងក្រោយនេះ ហាក់ដូចគ្មានដែនកំណត់ រហូតចង់ក្លាយទៅជារឿងអាស្រូវផង។ ប្រទេសកាតារក៏បានចូលធ្វើវិនិយោគយ៉ាងច្រើនសន្ធឹកសន្ធាប់ដែរនៅបារាំង ដោយប្រមូលទិញទាំងសណ្ឋាគារធំៗ និងក្លឹបកីឡាបាល់ទាត់ប៉ារីសSaint Germainទៀត។ ប៉ុន្តែទោះជាទំហំពាណិជ្ជកម្មធំធេង និងមានការស្វាគមន៍ជានិច្ចក៏ដោយ ក៏សំណុំរឿងការទូត វិបត្តិស៊ីរី មិនត្រូវបាន បារាំងនិងកាតារ មើលរំលងឡើយ ព្រោះថា ទស្សនកិច្ចរបស់លោកប្រធានាធិបតី បារាំងនៅកាតារ ប្រព្រឹត្តទៅជួនចំពេលដែលក្រុងដូហា ទទួលរៀបចំជំនួបប្រជុំប្រទេសជាមិត្តរបស់ស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ