អង់គ្លេស និងអេស្ប៉ាញឈ្លោះគ្នា ដោយសារដីជ្រោយទំហំ៧គីឡូម៉ែត្រ
ចុះផ្សាយនៅថ្ងៃ៖
ស្តាប់ - ០៦:៥១
នៅប៉ុន្មានសប្តាហ៍ចុងក្រោយនេះ វិបត្តិការទូតរវាងអង់គ្លេស និងអេស្ប៉ាញ កាន់តែតានតឹងឡើងៗ។ កាលពីថ្ងៃចន្ទ ទី ១២ អង់គ្លេសព្រមានថា នឹងតវ៉ាផ្លូវច្បាប់ទៅគណៈកម្មាធិការអឺរ៉ុប ដើម្បីទាមទារឲ្យគេថ្កោលទោសអេស្ប៉ាញ ពីរឿងដែលអេស្ប៉ាញបិទសិទ្ធិធ្វើដំណើរនៅអឺរ៉ុប។
ប៉ុន្មានថ្ងៃមកហើយ រដ្ឋាភិបាលអេស្ប៉ាញបានចេញបញ្ជាឲ្យគេចាប់ត្រួតពិនិត្យលើរថយន្តដែលបើកឆ្លងកាត់ព្រំដែនអេស្ប៉ាញ ដើម្បី ចេញឬ ចូល ទៅទីក្រុង Gibraltar។ Gibraltar ទីក្រុងស្វយ័ត ដែលជាទឹកដីរបស់ចក្រភពអង់គ្លេសនៅបរទេស ប៉ុន្តែ ស្ថិតលើដីជ្រោយ នៅក្នុងទឹកដីប្រទេសអេស្ប៉ាញ។ ការចាប់ឆែកឆេរដែលមិនធ្លាប់មានពីមុនបានបង្កឲ្យកកស្ទះចរាចរណ៍រាប់ម៉ោង កាលពីថ្ងៃចុងសប្តាហ៍កន្លងទៅ និងបានបង្កឲ្យមានការក្តៅក្រហាយពីប្រជាជនGibraltar។ ទីក្រុងម៉ាដ្រីឌបានពន្យល់ថា សកម្មភាពឆែកឆេរធ្វើឡើងដើម្បីប្រយុទ្ធប្រឆាំងនឹងការលួចជួញដូរខុសច្បាប់ដែលសំបូរកើតមាននៅទីក្រុង Gibraltar។
រឿងនេះបានធ្វើឲ្យរដ្ឋាភិបាលអង់គ្លេសមិនសប្បាយចិត្តយ៉ាងខ្លាំង។ ជម្លោះពាក្យសំដីបានកើតមានជាបន្តបន្ទាប់រវាងរដ្ឋាភិបាលអង់គ្លេស និងអេស្ប៉ាញ ចាប់តាំងពីដើមខែសីហា។ នាយករដ្ឋមន្រ្តីអង់គ្លេសធ្លាប់បានទូរស័ព្ទទៅសមភាគីអេស្ប៉ាញរបស់លោក ដោយព្រមានថា ចំណាត់ការរបស់រដ្ឋាភិបាលអេស្ប៉ាញ នឹងអាចបំផ្លាញទំនាក់ទំនងរវាងប្រទេសទាំងពីរ។
ក្រៅតែពីវិធានការចាប់ឆែកឆេរ រដ្ឋាភិបាលអេស្ប៉ាញគ្រោងផងដែរ នឹងយកថ្លៃពន្ធផ្លូវប្រមាណ ៥០អឺរ៉ូ លើរថយន្តដែលបើកឆ្លងកាត់ព្រំដែនអេស្ប៉ាញ។ មួយវិញទៀត អេស្ប៉ាញគ្រោងនឹងហាមមិនឲ្យ យន្តហោះដែលចុះចតលើដីជ្រោយដីរបស់អង់គ្លេស Gibraltar ប្រើប្រាស់ដែនអាកាសអេស្ប៉ាញ។ នៅមានវិធានការមួយចំនួនទៀតដែរ ដែលអេស្ប៉ាញគ្រោងនឹងអនុវត្ត ដាក់សម្ពាធលើរដ្ឋាភិបាលស្វយ័ត Gibraltar របស់អង់គ្លេស ដូចជាការដំឡើងពន្ធលើអ្នកវិនិយោគ Gibraltar ដែលមានអចលនទ្រព្យ ឬ មុខរបររកស៊ី នៅទឹកដីអេស្ប៉ាញ។
រដ្ឋាភិបាលអេស្ប៉ាញ ចាប់ផ្តើមគាបសង្កត់លើរដ្ឋាភិបាលស្វយ័ត Gibraltar បន្ទាប់ពី Gibraltar បានទម្លាក់ថ្មបេតុង ៧០ដុំ ទៅក្នុងទឹកសមុទ្រ ក្បែរទីក្រុងរបស់ខ្លួន ដើម្បីបង្កើតជម្រកសិប្បនិមិត្តមួយសម្រាប់សត្វសមុទ្រ។ ប៉ុន្តែ អាជ្ញាធរអេស្ប៉ាញយល់ថា ធ្វើដូច្នេះគឺបំផ្លាញផលរបររបស់អ្នកនេសាទអេស្ប៉ាញ។ អ្នកនេសាទអេស្ប៉ាញមិនអាចចូលទៅនេសាទ នៅម្តុំដីជ្រោយ Gibraltarបានដូចមុន។
រដ្ឋមន្រ្តីក្រសួងការបរទេសអេស្ប៉ាញវិញបានពន្យល់ថា ពន្ធផ្លូវតម្លៃ ៥០អឺរ៉ូ ដែលរដ្ឋាភិបាលប្រុងនឹងយក ពីរថយន្តបើកឆ្លងកាត់ព្រំដែនចូលទៅGibraltar គឺដើម្បីយកទៅប៉ះប៉ូវ ថ្លៃខូចខាត និងផ្គត់ផ្គង់ជីវភាពរបស់អ្នកនេសាទអេស្ប៉ាញដែលរងគ្រោះ ដោយវិធានការទម្លាក់ថ្មរបស់រដ្ឋាភិបាល Gibraltar។
ក្នុងស្ថានភាពដែលកាន់តែតានតឹង នាវាចម្បាំងអង់គ្លេស នឹងធ្វើដំណើរទៅកាន់ជ្រោយ Gibraltar។ សម្រាប់រដ្ឋាភិបាល Gibraltar វត្តមាននាវាចម្បាំងរបស់អង់គ្លេស បញ្ជាក់ពីការគាំទ្រ និងការការពារទឹកដីរបស់រដ្ឋាភិបាលអង់គ្លេស។ ប៉ុន្តែ រដ្ឋាភិបាលទាំងពីរ គឺអង់គ្លេស និងអេស្ប៉ាញព្យាយាមពន្យល់ថា វត្តមានរបស់នាវាចម្បាំង អង់គ្លេស នៅ Gibraltar គឺជាលំហាត់យោធា ដែលធ្លាប់តែមានជាប្រចាំតែប៉ុណ្ណោះ។
អេស្ប៉ាញចង់ទាមទារទឹកដីរបស់ខ្លួនពី អង់គ្លេសវិញ
វិបត្តិនៅ Gibraltar គឺគ្រាន់តែជាផ្កាភ្លើង ដែលធ្វើឲ្យរងើកភ្លើង គឺជម្លោះ ដណ្តើមទឹកដីដ៏យូរអង្វែង រវាងអង់គ្លេស និងអេស្ប៉ាញ ឲ្យចាប់ឆេះឡើងវិញ តែប៉ុណ្ណោះ។ រដ្ឋាភិបាលអេស្ប៉ាញសំលឹងចង់ក្តោបក្តាប់ យកGibraltar គ្រប់គ្រងក្នុងដៃរបស់ខ្លួនវិញ។ អេស្ប៉ាញចង់ទាមទារ Gibraltarពីអង់គ្លេស ដែលខ្លួនបានបាត់បង់ទៅក្នុងដៃរបស់ចក្រភពអង់គ្លេស ទៅតាមសន្ធិសញ្ញាUtrechtចុះឆ្នាំ ១៧១៣។ ក្នុងសន្ធិសញ្ញាគេ រាប់បញ្ចូលតាំងពីដីនៅទីក្រុង រាជវាំង Gibraltar និងកំពង់ផែ ប៉ុន្តែ វាមិនបានចែងពីដែនទឹកដែលអង់គ្លេសទទួលបាននោះទេ។ ការមិនកំណត់ដែនទឹកបានធ្វើឲ្យរដ្ឋាភិបាល Gibraltar បិទ ហាមមិនឲ្យអ្នកនេសាទអេស្ប៉ាញចូលទៅនេសាទក្នុងដែនទឹកជិតទឹកដីរបស់ខ្លួន។
លោករដ្ឋមន្រ្តីការបរទេសអេស្ប៉ាញបាននិយាយប្រាប់អ្នកកាសែតក្នុងស្រុក នៅថ្ងៃអាទិត្យថា រដ្ឋាភិបាលអេស្ប៉ាញគ្រោងនឹងដាក់ពាក្យបណ្តឹងទៅក្រុមប្រឹក្សាសន្តិសុខរបស់អង្គការសហប្រជាជាតិ ដើម្បីសើរើ និងទាមទារ ដែនអធិបតេយ្យភាពរបស់អេស្ប៉ាញពីអង់គ្លេសមកវិញ។ អេស្ប៉ាញសង្ឃឹមទទួលបានការគាំទ្រ និងកៀកស្មាជាមួយ អាហ្សង់ទីន ពេលនេះ ជាសមាជិកមិនអចិន្រ្តៃយ៍របស់ក្រុមប្រឹក្សាសន្តិសុខរបស់អង្គការសហប្រជាជាតិ។ ត្រូវដឹងថា អាហ្សង់ទីន បានរងគ្រោះបាត់បង់កោះ Malouine ដែលអង់គ្លេសវាយដណ្តើមយកទៅគ្រប់គ្រង នៅឆ្នាំ ១៩៨២។
កាលពីថ្ងៃចន្ទទី ១២ សីហា ព្រះមហាក្សត្រីយានី Elisabethបានថ្លែងព្រះសុន្ទរកថា ថា ព្រះអង្គនឹងការពារសិទ្ធិរបស់ប្រជាជន ដែលរស់នៅនៅទីក្រុង Gibraltar និងនៅកោះ Malouine ដែលជាទឹកដីរបស់អង់គ្លេស។ នេះជាលើកទីមួយ ក្នុងរយៈពេល ១០ឆ្នាំ ដែលព្រះមហាក្សត្រីយានីអង់គ្លេសចេញព្រះភ័ក្រ្ត ថ្លែងទាក់ទងនឹងអធិបតេយ្យភាពរបស់ចក្រភពអង់គ្លេស។
ទឹកដី Gibraltar ដែលមានឈ្មោះមួយទៀតថា Rocher មានទំហំដីតូចណាស់ គឺតែ ៧គីឡូម៉ែត្រការ៉េ និងមានប្រជាជនរស់នៅប្រមាណ៣ម៉ឺននាក់។ Gibraltarជាទីក្រុងតូចមែន ប៉ុន្តែ វាមានសក្តានុពលខ្លាំង ខាងផ្នែកសេដ្ឋកិច្ច ដោយសារតែវាស្ថិតនៅជាប់សមុទ្រ ជាកំពង់ផែឆ្លងកាត់របស់កប៉ាល់ទំនិញនានាដែលឆ្លងកាត់ពីមហាសមុទ្រអាត្លង់ទិកទៅក្នុងសមុទ្រមេឌីទែរ៉ាណេ។
Gibraltar ជាទឹកដីរបស់អង់គ្លេសមែន ប៉ុន្តែ សេដ្ឋកិច្ចរបស់ Gibraltarមិនពឹងផ្អែកទៅលើអង់គ្លេស ហើយ Gibraltar ក៏មិនបង់ពន្ធទៅឲ្យរដ្ឋាភិបាលអង់គ្លេសដែរ។ សេដ្ឋកិច្ច Gibraltarពឹងផ្អែកលើកំពង់ផែ ធនាគារ ទេសចរណ៍ និងនេសាទ។ ក្នុងពេលដែលកំណើនសេដ្ឋកិច្ចរបស់អង់គ្លេសមានត្រឹមតែ ០,២ភាគរយ ហើយអេស្ប៉ាញវិញធ្លាក់ចុះ១,៤ភាគរយ សេដ្ឋកិច្ចរបស់ Gibraltarកើនឡើងដល់ទៅ ៧,៨ភាគរយ។ ចំនួនអ្នកអត់ការងារធ្វើមានត្រឹមតែ ២,៥ភាគរយ នៅពេលតំបន់នៅក្បែរ Gibraltarដែលស្ថិតក្រោមរដ្ឋាភិបាលអេស្ប៉ាញជួបវិបត្តិអ្នកអត់ការងារធ្វើ ដែលមានដល់ទៅ ៣៥ភាគរយ។ រដ្ឋាភិបាលអេស្ប៉ាញចោទទីក្រុង Gibraltarគឺជាជំរកឋានសួគ៌របស់អ្នកលួចរត់គេចពីការបង់ពន្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ