កិច្ចព្រមព្រៀងនុយក្លេអ៊ែរ អ៊ីរ៉ង់-មហាអំណាចចូលជាធរមាននៅថ្ងៃទី២០មករា
ចុះផ្សាយនៅថ្ងៃ៖
ស្តាប់ - ០៥:៥៨
កិច្ចព្រមព្រៀងបឋមស្តីពីកម្មវិធីនុយក្លេអ៊ែរអ៊ីរ៉ង់ ដែលសំដៅកំរិតការចម្រើនធាតុអ៊ុយរ៉ានីញ៉ូម ជាថ្នូរនឹងការលើកទណ្ឌកម្មសេដ្ឋកិច្ចអន្តរជាតិ នឹងត្រូវផ្តើមអនុវត្តចាប់ពីថ្ងៃទី ២០មករា២០១៤នេះតទៅ។ ការអនុវត្តដែលជាដំណាក់កាលដ៏សំខាន់សម្រាប់ជាឈ្នាន់ឈានឆ្ពោះទៅដល់កិច្ចព្រមព្រៀមពេញលេញ បើទោះបីគ្រប់គ្នាសុទ្ធតែដឹងច្បាស់ថាពិបាកសម្រេចយ៉ាងណាក៏ដោយ។
ជាបឋម សូមជម្រាបជូនថា ទាំងសហរដ្ឋអាមេរិក ទាំងសហភាពអឺរ៉ុប បានសម្តែងការអបអរសាទរយ៉ាងខ្លាំងចំពោះការជូនដំណឹង និងកំណត់កាលបរិច្ឆេទ អនុវត្តកិច្ចព្រមព្រៀងនុយក្លេអ៊ែរ ចាប់ពីថ្ងៃទី ២០មករា សប្តាហ៍ក្រោយនេះតទៅ។ ថ្វីដ្បិតតែកិច្ចព្រមព្រៀងបានចុះហត្ថលេខាជាប្រវត្តិសាស្ត្រ តាំងពីថ្ងៃទី ២៤វិច្ឆិកា ២០១៣មែន ប៉ុន្តែក្រុងតេអេរ៉ង់ និងក្រុម៦ប្រទេស(អាមេរិក បារាំង អង់គ្លេស រុស្ស៊ី ចិន និងអាល្លឺម៉ង់) ដឹកនាំដោយលោកស្រី កាទ្រីន អាស្តុន ប្រមុខការទូតសហភាពអឺរ៉ុប បន្តចរចាឥតដាច់ តាំងពីពេលនោះមករហូតដល់យប់មិញ ដើម្បីកំណត់ កំរិតពាក្យពេចន៍ ដែលមានចែងកិច្ចព្រមព្រៀង ឱ្យកាន់តែច្បាស់។
►សូមអាន ៖ ជាប្រវត្តិសាស្ត្រ ដែលមានកិច្ចព្រមព្រៀងស្តីពីកម្មវិធីនុយក្លេអ៊ែរអ៊ីរ៉ង់
នៅពេលកិច្ចព្រមព្រៀងបឋមចូលជាធរមាន នៅថ្ងៃទី ២០មករា ភាគីអ៊ីរ៉ង់ ត្រូវចាប់ផ្តើម ជាលើកទីមួយ បំផ្លាញធាតុអ៊ុយរ៉ានីញ៉ូមស្តុកទុកដែលចម្រើនរួចដល់២០ភាគរយ ពាក់កណ្តាល និងពាក់កណ្តាលទៀត នៅ៦ខែបន្ទាប់ ដោយបញ្ហាបច្ចេកទេស និងបន្ទាប់មកត្រូវរំសាយហេដ្ឋារចនាសម្ព័ន្ធ ដែលនាំដល់សកម្មភាពចម្រើនធាតុបាន។ ពោលគឺ លក្ខខណ្ឌមួយភាគធំដែលមានចែងក្នុងកិច្ចព្រមព្រៀង ត្រូវចាប់អនុវត្តភ្លាម។
ជាថ្នូរមកវិញ ចាប់ពីថ្ងៃទី១កុម្ភៈ ធនធានអ៊ីរ៉ង់ជាប់គាំងនៅបរទេស នឹងត្រូវបើកទម្លាយ ជាដំណាក់ៗ សម្រាប់រយៈពេល១៨០ថ្ងៃ។ អ៊ីរ៉ង់នឹងទទួលបានជាលើកដំបូង ទឹកប្រាក់៥៥០លានដុល្លារ ក្នុងចំណោមទឹកប្រាក់បង្កកចំនួនជាង៤ពាន់លាន។ រហូតដល់ថ្ងៃចុងក្រោយតែម្តងទើបអ៊ីរ៉ង់បានលុយរបស់ខ្លួនទាំងអស់មកវិញ ដូចមានចែងក្នុងកិច្ចព្រមព្រៀងបឋមដូច្នោះ។
កិច្ចព្រមព្រៀងបឋម
- បញ្ឈប់ការចម្រើនធាតុអ៊ុយរ៉ានីញ៉ូម និងរំសាយបច្ចេកវិទ្យា ដែលនាំដល់ការចម្រើនធាតុអ៊ុយរ៉ានីញ៉ូម លើសពី៥% ព្រោះសម្រាប់ប្រទេសមហាអំណាច សកម្មភាពចម្រើនធាតុអ៊ុយរ៉ានីញ៉ូមដែលលើសពី៥ភាគរយទៅ នឹងចាត់ចូលក្នុងកម្មវិធីនុយក្លេអ៊ែរយោធា ប៉ុន្តែមិនមែននុយក្លេអ៊ែរស៊ីវិល។
- បំផ្លាញធាតុអ៊ុយរ៉ានីញ៉ូមដែលចម្រើនដល់២០ភាគរយរួច
- បញ្ឈប់ការសាងសង់រោងចក្រសម្រាប់ចម្រើនធាតុអ៊ុយរ៉ានីញ៉ូម និង រាល់សកម្មភាពនៅតាមមជ្ឈមណ្ឌលនុយក្លេអ៊ែរ រាប់ទាំងម៉ាស៊ីនប្រតិករនៅ Arakផង។
- មន្ត្រីភ្នាក់ងារថាមពលបរមាណូអន្តរជាតិមានភារៈចុះធ្វើអធិការកិច្ច នៅគ្រប់ទីតាំងនុយក្លេអ៊ែរអ៊ីរ៉ង់ទាំងអស់។
ជាថ្នូរ សហរដ្ឋអាមេរិក និងសម្ព័ន្ធមិត្ត នឹងបន្ធូរបន្ថយទណ្ឌកម្មសេដ្ឋកិច្ច (វិស័យយានយន្ត យន្តហោះ និងទម្លាយធនធានផ្អិបទុកនៅបរទេស) ដែលអាចអនុញ្ញាតឱ្យអ៊ីរ៉ង់បានទទួលប្រយោជន៍ប្រមាណ៧ពាន់លានដុល្លារ។
កិច្ចព្រមព្រៀងពេញលេញ
កិច្ចព្រមព្រៀងពេញលេញចុងក្រោយ នឹងត្រូវចាប់ផ្តើមចរចានៅរវាង ពីរបីសប្តាហ៍ក្រោយ កិច្ចព្រមព្រៀងបឋមចូលជាធរមាន។ ភាគីអ៊ីរ៉ង់ បានគំរាម តាំងពីដំបូងមកម្ល៉េះ ថាកិច្ចព្រមព្រៀងបឋមនេះអាចត្រូវលុបចោលបានគ្រប់វេលាប្រសិនបើភាគីបស្ចឹមលោកមិនស្មោះត្រង់។
ទាំងលោក អូបាម៉ា ទាំងលោកស្រី កាទ្រីន អាស្តុន សុទ្ធតែប្រុងប្រយ័ត្នទាំងអស់គ្នា។ លោកស្រីប្រមុខការទូតសហភាពអឺរ៉ុប ថ្វីដ្បិតតែបានអះអាងថាមូលដ្ឋាននៃការអនុវត្តកិច្ចព្រមព្រៀងមានលក្ខណៈរឹងមាំ ស៊ីចង្វាក់គ្នា និងត្រូវប្រព្រឹត្តទៅដោយសម្រួល មានផែនការច្បាស់លាស់ តែលោកស្រីត្រូវរង់ចាំមើលវិធានការត្រួតពិនិត្យនិងធ្វើអធិការកិច្ចដែលជាបន្ទុករបស់ក្រុមភ្នាក់ងារថាមពលបរមាណូសិន។ ម្យ៉ាងវិញទៀត អឺរ៉ុប ត្រូវពិភាក្សាអំពីលក្ខខណ្ឌនៃការលើកទណ្ឌកម្មមួយភាគពីអ៊ីរ៉ង់ នាឱកាសជំនួបប្រជុំរដ្ឋមន្ត្រីការបរទេសអឺរ៉ុបសិន នៅថ្ងៃទី២០មករាខាងមុខ។ លោកស្រីអាចនឹងអញ្ជើញទៅកាន់ក្រុងតេអេរ៉ង់ នៅពេលណាដែលការចរចាមានការជឿនលឿនទៅមុខ។
ចំណែកលោកប្រធានាធិបតីអាមេរិក ដែលអះអាង ថាកម្មវត្ថុនៃការអនុវត្តកិច្ចព្រមព្រៀងពិបាកសម្រេច ចង់ផ្តល់សំណាងដល់ការស្វែងរក សន្តិភាព សន្តិសុខជាតិ និងពិភពលោក តាមរយៈដំណោះស្រាយការទូត។ ប៉ុន្តែលោកអូបាម៉ា ក៏ត្រូវប្រឈមនឹងសំឡេងប្រឆាំងរបស់សភា។ សភាអាមេរិក ដែលសមាជិកភាគច្រើនគ្រោងនឹងបោះឆ្នោតដាក់ទណ្ឌកម្មថ្មីទៀត ជាឯកតោភាគីលើអ៊ីរ៉ង់ នៅប៉ុន្មានសប្តាហ៍ទៀតខាងមុខនេះ។ លោកអូបាម៉ា អាចប្រើសិទ្ធិវេតូប្រឆាំងនឹងសេចក្តីសម្រេចចិត្តរបស់សភាបាន ប៉ុន្តែទណ្ឌកម្មថ្មីរបស់សភា អាចនឹងធ្វើឱ្យជំហរសហរដ្ឋអាមេរិកចុះខ្យោយ មានរូបភាពជាមនុស្សអាក្រក់បាន។ អាមេរិកដែលបើតាមអ្នកវិភាគអភិរក្សនិយម យល់ជានិច្ចថាកិច្ចព្រមព្រៀងជាប្រវត្តិសាស្ត្រជាមួយអ៊ីរ៉ង់ គ្មានអ្វីជាការធានាអះអាងគួរឱ្យជឿជាក់ គ្មានអ្វីថ្មី សម្រាប់អ្នកដែលស្វែងរកភស្តុតាងពិតៗបញ្ជាក់ច្បាស់ថាអ៊ីរ៉ង់បោះបង់មហិច្ឆតាផលិតអាវុធគ្រាប់បែកនុយក្លេអ៊ែរឡើយ៕
►សូមអាន ៖ ស្វែងយល់ពីវិបត្តិនុយក្លេអ៊ែរអ៊ីរ៉ង់
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ