អឺរ៉ុបបើកប្រតិបត្តិការបោសសម្អាតបណ្តាញភេរវជនជីហាត
ចុះផ្សាយនៅថ្ងៃ៖
ស្តាប់ - ០៦:០៩
អឺរ៉ុបបង្កើនប្រតិបត្តិការប្រឆាំងនឹងភេរវនិយមជីហាតច្រើនឡើង ចាប់ពីថ្ងៃព្រហស្បតិ៍ម្សិលមិញមក។ ប៉ូលិសប៊ែលហ្សិកបានប្រើកម្លាំង ទ្រង់ទ្រាយធំមួយចេញធ្វើសកម្មភាពប្រឆាំងនឹងភេរវកម្មពេញផ្ទៃប្រទេស កាលពីល្ងាចមិញ។ សម្លាប់ជនជីហាត ទើបត្រលប់មកពីស៊ីរីបានយ៉ាងហោចណាស់ពីរនាក់ និងចាប់ខ្លួនបានម្នាក់។ នៅប្រទេសបារាំងវិញ ជនសង្ស័យមានជាប់ពាក់ព័ន្ធនឹងភេរវកម្មនៅទីក្រុងប៉ារីស កាលពីសប្តាហ៍មុន ១២នាក់ត្រូវប៉ូលិសចាប់ខ្លួនបាននៅយប់មិញ។ នៅប្រទេសអាល្លឺម៉ង់ក៏មានការចាប់ខ្លួនជនសង្ស័យជីហាតបានដែរ នៅព្រឹកមិញនេះ។ ប្រធានាធិបតីបារាំង បានអំពាវនាវឱ្យសហរដ្ឋអាមេរិករកដំណោះស្រាយរួមជាមួយអឺរ៉ុប ប្រឆាំងនឹងការគំរាមកំហែងភេរវកម្មជីហាត។
បែលហ្សិកកម្ចាត់ភេរវកម្មបានទាន់ពេលវេលា
ម្សិលមិញនេះបែលហ្សិក បានបើកប្រតិបត្តិការទ្រង់ទ្រាយធំ ស្ទើរពេញផ្ទៃប្រទេសប្រឆាំងនឹងបណ្តាញភេរវនិយមជីហាត។ មានដល់ទៅជាង១០កន្លែងផ្សេងៗគ្នា រាប់ទាំងនៅក្រុងព្រុចសែលផង តែប្រតិបត្តិការដែលធំជាងគេ បានកើតឡើងនៅភាគខាងកើតប្រទេស ជិតព្រំដែនអាល្លឺម៉ង់ ដោយមានការបាញ់រះតគ្នាផង។ ជាលទ្ធផល គឺមានជនជីហាតពីរនាក់ ត្រូវបានប៉ូលិសបាញ់ស្លាប់ និងចាប់ខ្លួនបានម្នាក់។
ប្រតិបត្តិការនេះបានផ្ទុះឡើង ដោយជនសង្ស័យទាំងបីបានប្រើអាវុធស្វ័យប្រវត្តិ អាវុធសម្រាប់ធ្វើសង្គ្រាម បាញ់រះមកលើកម្លាំងមានសមត្ថកិច្ចមុន។ នេះបើតាមរដ្ឋអាជ្ញា ដែលបានអះអាងបញ្ជាក់ថា ភ្នាក់ងារប៉ូលិសប្រយុទ្ធប្រឆាំងនឹងភេរវកម្មបែលហ្សិក បានសម្រេចចេញធ្វើប្រតិបត្តិការ បន្ទាប់ពីចាប់បានសំឡេងនិយាយគ្នាលើកឡើងពីផែនការភេរវកម្ម។ ជនទាំងបីទើបត្រលប់មកពីស៊ីរី ស្ថិតក្រោមការឃ្លាំមើលរបស់ប៉ូលិស មានគម្រោងរៀបចំផែនការភេរវកម្មធំ និងក្នុងពេលឆាប់ៗតែម្តង នៅលើទឹកដីបែលហ្សិក ប្រឆាំងប៉ូលិស។ អាវុធ និងជាតិផ្ទុះជាច្រើន ព្រមទាំងឯកសណ្ឋានប៉ូលិស ត្រូវបានរកឃើញនៅក្នុងកន្លែងលាក់មួយ។
គ្មានទំនាក់ទំនងជាមួយភេរវកម្មនៅប៉ារីស
ក្រោយការបំបែកគម្រោងភេវកម្មនេះភ្លាម នាយករដ្ឋមន្ត្រីបែលហ្សិកបាន ដំឡើងកំរិតអាសន្នគំរាមកំហែងភេរវកម្ម ឡើងដល់លំដាប់ទីបី ក្នុងចំណោមកំរិតខ្ពស់បំផុតលេខបួន។ ប៉ុន្តែភាគីបែលហ្សិក មិនបានភ្ជាប់គម្រោងភេរវកម្មនេះ ទៅនឹងភេរវកម្មនៅប៉ារីសទេ។ បណ្តាញរបស់ភេរវជនក៏ខុសគ្នា។ បើតាមអ្នកនាំពាក្យរដ្ឋាភិបាលបែលហ្សិក ប្រតិបត្តិការម្សិលមិញនេះគឺជាផ្លែផ្កានៃការស៊ើបអង្កេត តាំងពីជាច្រើនខែ ពោលគឺមុនហេតុការណ៍ភេរវកម្មសម្លាប់អ្នកកាសែតcharlie-Hebdo និងហាងជ្វីហ្វ នៅទីក្រុងប៉ារីសទៅទៀត។
អាចថាគ្មានចំណងពាក់ព័ន្ធអ្វីដោយផ្ទាល់នឹងគ្នាមែន នៅពេលនេះ តែភេរវកម្មនៅប៉ារីស ជាមេរៀន សម្រាប់បណ្តាប្រទេសជិតខាងក្នុងអឺរ៉ុបទាំងមូល ឱ្យមានការប្រុងប្រយ័ត្នកាន់ខ្ពស់ និងពិសេសឱ្យប្រទេសជាសមាជិកប្រមូលផ្តុំគ្នាប្រយុទ្ធប្រឆាំងថ្នាក់អឺរ៉ុប។ ប្រតិបត្តិការបែលហ្សិកកម្ចាត់ភេរវកម្មទាន់ពេលវេលាម្សិលមិញ ក៏ជាលទ្ធផលនៃការផ្តោះប្តូរព័ត៌មានគ្នារវាងប៉ូលិសបារាំងនិងបែលហ្សិក។ ក្រៅពីនៅបែលហ្សិក ប្រតិបត្តិការកម្ចាត់បណ្តាញអ៊ីស្លាមជ្រុលនិយមជីហាត ក៏មានធ្វើនៅអាល្លឺម៉ង់ ព្រឹកមិញនេះ ដោយចាប់ខ្លួនជនសង្ស័យពីរនាក់។ នៅក្រុងប៉ារីសវិញ ចាប់បានជនសង្ស័យ១២នាក់ ក្នុងនោះមានបីនាក់ទំនងជាពាក់ព័ន្ធក្នុងភេរវកម្មនៅប៉ារីសផង។ ចំណែកអេស្ប៉ាញ ក៏មិននៅស្ងៀមដែរ រដ្ឋាភិបាលអេស្ប៉ាញកំពុងស្រាវរកបណ្តាញនិងដានភេរវជនគូលីបាលីនិងប្រពន្ធពេលឆ្លងកាត់អេស្ប៉ាញដើម្បីបង្វែងអារម្មណ៍ក្រុមអង្កេតមុននឹងបញ្ចេញសកម្មភាពភេរវកម្ម។
លោក ចន ឃែរី នៅ ប៉ារីស
លោកឃែរី អញ្ជើញមកប៉ារីសថ្ងៃនេះ បំណងធំបំផុតគឺដើម្បីស្តារមុខមាត់អាមេរិក ដែលខកខានមិនមកចូលរួមលើកទឹកចិត្ត សម្តែងសាមគ្គីភាពជាមួយបារាំង ក្នុងពេលរងគ្រោះភេរវកម្មកណ្តាលរដ្ឋធានី។ ប្រមុខរដ្ឋ ប្រមុខរដ្ឋាភិបាលប្រទេសធំតូច អង់គ្លេស អាល្លឺម៉ង់ អឺរ៉ុប ធ្លាយដល់ម៉ាលី អាហ្វ្រិក ជាង៥០រូប ស្មោះស្ម័គ្រនាំគ្នាចុះដើរដង្ហែក្បួន ក្នុងផ្លូវក្រុងប៉ារីស ដើម្បីសម្តែងការប្រឆាំងនឹងអំពើភេរវនិយម ដើម្បីគាំទ្រលទ្ធិប្រជាធិបតេយ្យ សិទ្ធិសេរីភាពដែលជាគោលការណ៍របបសាធារណរដ្ឋ បាត់ឈឹងតែសហរដ្ឋអាមេរិកមួយ។ ការខកខាននេះ បានធ្វើឱ្យសេតវិមានស្តាយក្រោយ ទើបត្រូវមកលុបលាង សងចិត្តឡើងវិញ។ លោក ចន ឃែរី បានពន្យល់លួងចិត្តបារាំងថារវល់ទៅបំពេញការងារនៅឥណ្ឌា និងនៅប៉ូឡូញ ទើបត្រូវយឺតដំណើរជាងគេបន្តិច។ នៅថ្ងៃនេះ ដែលមានការបញ្ចុះសពចាងហ្វាងកាសែតស្ហាលី និងមិត្តរួមការងារផ្សេងទៀតក្នុងគ្រួសាររៀងខ្លួនៗ ប្រមុខការទូតអាមេរិកក៏បានទៅគោរពវិញ្ញាណក្ខន្ធជនរងគ្រោះដាក់កម្រងផ្កានៅមុខទីស្នាក់ការទស្សនាវដ្តីCharlie-Hebdo ផង និងនៅមុខហាងជ្វីហ្វផង។
ទស្សនកិច្ចរបស់លោកចនឃែរីនេះ ក៏ជាឱកាសដែលបារាំងនិងសហរដ្ឋអាមេរិក ជួបពិភាក្សាគ្នារកមធ្យោបាយប្រយុទ្ធប្រឆាំងនឹងភេរវកម្មជីហាត។ ជំនួបរវាងលោកហ្វ្រង់ស័រហូឡង់ និងឃែរី ព្រឹកមិញផ្តោតទាំងស្រុងលើសំណុំរឿងនេះ។ ប្រមុខដឹកនាំទាំងពីរបានព្រមព្រៀងគ្នាបន្តការពង្រឹងកិច្ចសហប្រតិបត្តិការទ្វេភាគី ក្នុងវិស័យប្រយុទ្ធប្រឆាំងភេរវកម្ម ព្រោះទាំងអាមេរិក ទាំងបារាំង សុទ្ធតែបានរងគ្រោះធ្ងន់ធ្ងរដូចគ្នា ក្នុងភេរវកម្មជីហាត។
ម្យ៉ាងវិញទៀត ការប្រយុទ្ធប្រឆាំងនឹងភេរវកម្មជីហាត ពេលនេះ បានក្លាយជាបុព្វហេតុរួមរបស់បស្ចឹមលោក ថ្វីបើយើងនិយាយច្រើនពីបារាំងនិងពីបែលហ្សិកឬអាល្លឺម៉ង់ ចលនាយុវជនផ្តាច់ខ្លួនជាជីហាតក៏មានទំហំធំធេងដែរនៅអង់គ្លេស នាយករដ្ឋមន្ត្រីអង់គ្លេស ដេវីត កាមឺរោន បានហោះទៅសេតវិមានជួបជាមួយលោកអូបាម៉ា នៅថ្ងៃម្សិលមិញ ដើម្បីពិភាក្សារកមធ្យោបាយប្រយុទ្ធប្រឆាំងភេរវនិយម។ ទាំងពីររូបសន្យាពង្រឹងវិស័យសន្តិសុខអ៊ីនធ័នែត ការពារសេរីភាពនៃការបញ្ចេញមតិ ច្បាប់និងស្ថាប័នប្រជាធិបតេយ្យ។ សូមបញ្ជាក់ថា ក្រៅអំពីភេរវកម្មនៅក្រុងប៉ារីស ពួកជីហាតរដ្ឋអ៊ីស្លាមក៏បានការវាយប្រហារតាមអ៊ីនធ័រនែត និងយកអ៊ីនធ័រនែតជាមធ្យោបាយទាក់ទាញ ឃោសនារកបេក្ខជនជីហាតថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ