ប្រមុខរដ្ឋាភិបាលថ្មីក្រិកចេញធ្វើយុទ្ធនាការប្រឆាំងបំណុល
ចុះផ្សាយនៅថ្ងៃ៖
ស្តាប់ - ០៤:០៤
ទទួលស្វាគមន៍ដោយសមភាគីអ៊ីតាលី នៅថ្ងៃអង្គារ ! ចូលជួបប្រធានគណៈកម្មការអឺរ៉ុប លោក ហ្សង់ក្លូត ចាំងគ័រ (Jean-Claude Juncker) នៅព្រឹកថ្ងៃពុធ ហើយនៅពេលរសៀលថ្ងៃពុធដដែលនេះត្រូវមកពិភាក្សាជាមួយប្រធានាធិបតីបារាំងនៅទីក្រុងប៉ារីស មុននឹងបន្តដំណើរទៅកាន់ក្រុងប៊ែឡាំងដើម្បីចរចាជាមួយលោកស្រី មែរកិល ... ដំណើរទស្សនកិច្ចមួយជុំលើកដំបូងរបស់ លោក អាឡិចស៊ី ស៊ីប្រាស (Alexis Tsipras) នាយករដ្ឋមន្ត្រីក្រិកថ្មី មានកម្មវត្ថុចំបងតែមួយគឺ ដើម្បីស្វែងរកការគាំទ្រពីប្រមុខរដ្ឋ-រដ្ឋាភិបាលអឺរ៉ុប ប្រឆាំងនឹងនយោបាយរឹតត្បិតថវិកា និងចរចាឡើងវិញអំពីលក្ខខណ្ឌនៃការសងបំណុល។ ក្រិកបានទទួលការគាំទ្រដ៏ចំបងបំផុតមួយរួចហើយពីសហរដ្ឋអាមេរិក។
រដ្ឋាភិបាលក្រិកបន្តប្រតិបត្តិការចែចង់ ! ១០ថ្ងៃក្រោយជាប់ឆ្នោត លោកនាយករដ្ឋមន្ត្រីថ្មី អាឡិចស៊ី ស៊ីប្រាស បានដើរពិគ្រោះជាមួយប្រមុខដឹកនាំអឺរ៉ុបជាបន្តបន្ទាប់ មានជាអាទិ៍ ប្រមុខរដ្ឋាភិបាលអ៊ីតាលី ប្រធានាធិបតីបារាំង ប្រមុខរដ្ឋាភិបាលអាល្លឺម៉ង់ ដើម្បីត្រៀមចូលប្រជុំក្រុមប្រឹក្សាអឺរ៉ុបនៅថ្ងៃទី ១២កុម្ភៈសប្តាហ៍ក្រោយ ដែលជាពេលវេលាផ្តាច់ព្រ័ត្រនៃជោគវាសនាក្រិក។
ប្រមុខរដ្ឋាភិបាលក្រិកសង្ឃឹមលើប្រធានាធិបតីបារាំង ក្នុងការទៅជួយបញ្ចុះបញ្ចូលម្ចាស់បំណុលធំទាំងបី “Les Troika” (សហភាពអឺរ៉ុប មូលនិធិរូបិយវត្ថុអន្តរជាតិ ធនាគារកណ្តាលអឺរ៉ុប អំពីលក្ខខណ្ឌនៃកម្ចី ព្រោះថាផែនការផ្តល់ជំនួយដល់ក្រិករបស់អឺរ៉ុប នឹងដល់ឱសានវាទនៅថ្ងៃទី ២៨កុម្ភៈ។
ជាប់ឆ្នោតដោយសារតែសន្យាបិទបញ្ចប់វិធានការរិតត្បិត លោក អាឡិចស៊ី ស៊ីប្រាស ត្រូវការដើមទុន ថវិកា ដើម្បីដាក់កម្មវិធីនយោបាយរបស់លោកឱ្យដើរ។ ក្នុងន័យក្រិក ត្រូវការបញ្ចុះបញ្ចូលជាពិសេសអាល្លឺម៉ង់របស់លោកស្រីមែរកិល។
កាត់បន្ថយបំណុលមួយភាគ ឬលុបចោលបំណុលទាំងស្រុងតែម្តង ដូចដែលធ្លាប់បានលើកឡើងជាញយៗពីមុន លែងជាបច្ចុប្បន្នភាពទៀតហើយ ! រដ្ឋមន្ត្រីក្រសួងហិរញ្ញវត្ថុក្រិក ដែលបានចេញធ្វើទស្សនកិច្ចមួយជុំអឺរ៉ុបបើកផ្លូវឱ្យនាយករដ្ឋមន្ត្រី បានត្រឹមសុំស្នើ ឱ្យមានការចរចាឡើងវិញ ផ្តោះប្តូរបំណុលដោយផ្អែកលើកំណើនសេដ្ឋកិច្ច។ "សូមជួយយើងឱ្យធ្វើកំណែទម្រង់ និងផ្តល់ពេលវេលាឱ្យយើងមានដង្ហើមហិរញ្ញវត្ថុខ្លះផង បើនៅតែចងកក្រិកតឹងយ៉ាងនេះ ក្រិកនឹងដាច់ខ្យល់ លែងជាក្រិកមានកំណែទម្រង់ ទៅជាក្រិកប្តូរទម្រង់ហើយ”! នេះជាការថ្ងូចថ្ងូររបស់រដ្ឋមន្ត្រីហិរញ្ញវត្ថុទៅកាន់សារព័ត៌មានFinancial Times។
ភាសាផ្សះផ្សា ដែលបានធ្វើឱ្យទីផ្សារភាគហ៊ុនមានទំនុកចិត្តខ្លះ ឡើងវិញ និងកើនឡើងខ្លះនៅថ្ងៃម្សិលមិញ។ ទំនងជាដល់វេលាដែលត្រូវទទួលស្គាល់ការពិតហើយថា ការត្បិតត្បៀតខ្លាំងពេក មិនអាចដំណើរការសេដ្ឋកិច្ចបានឡើយ។ អ្នកវិភាគសេដ្ឋកិច្ចជាច្រើនក៏យល់ដូច្នេះដែរ។ ជំហររបស់រដ្ឋាភិបាលលោក ស៊ីប្រាស ពេលនេះ ចង់និយាយថា អាល្លឺម៉ង់ គឺជាអ្នកទទួលខុសត្រូវលើស្ថានភាពក្រិក ដោយមានលក្ខខណ្ឌមិនអាចទ្រាំបាន ដូច្នេះគឺជាការធម្មតាទេដែលប៊ែរឡាំងត្រូវជួយអាទែននោះ។
ដំណើរទស្សនកិច្ចនៅក្រុងរ៉ូម កាលពីថ្ងៃអង្គារ បានផ្តល់ផ្លែផ្កា ដោយលោកអាឡិចស៊ី ស៊ីប្រាស បានទទួលការលើកទឹកចិត្តពីប្រមុខរដ្ឋាភិបាលអ៊ីតាលី ប៉ុន្តែអ្វីដែលលំបាកបំផុតគឺត្រូវធ្វើឱ្យស្ថាប័នអឺរ៉ុប និងអាល្លឺម៉ង់យល់ស្របតាម។ ប្រធានគណៈកម្មការអឺរ៉ុប លោក ហ្សង់ក្លូត ចាំងគ័រ (Jean-Claude Junker)បានព្រលយពាក្យ តាំងពីមុនជំនួបជាមួយលោកស៊ីប្រាសទៀត ថា “គេត្រូវរើរុះនយោបាយច្រើនមែន ប៉ុន្តែគេមិនអាចប្តូរទាំងស្រុងបានទេ”។ ចំណែកលោកស្រីមែរកិលវិញ បានបដិសេធរហូតមក មិនប៉ះពាល់នយោបាយរឹតត្បឹតទេ។ ពេលនេះលោកស្រីហាក់ដូចជាប់ចំណង បើដកថយ តាមក្រិក ទំនុកចិត្តលើលោកស្រីនឹងត្រូវបាត់បង់ តែបើលោកស្រីនៅរឹងរក្សាជំហរដដែល អាចនឹងគ្រោះធំបង្កជាវិបត្តកាន់តែធ្ងន់ រុញច្រានក្រិកឱ្យដើរចេញពីអឺរ៉ុប ហើយតំបន់អឺរ៉ូនឹងអាចផ្ទុះ។
ការគាំទ្រដ៏មានទម្ងន់របស់លោកអូបាម៉ា
លោកហ្វ្រង់ស័រហូឡង់ ចង់ដើរតួនាទីជាអាជ្ញាកណ្តាលឱ្យក្រិកនិងអាល្លឺម៉ង់ ពីព្រោះរូបលោកផ្ទាល់ក៏គាំទ្រនយោបាយផ្តល់សន្ទុះដល់សេដ្ឋកិច្ចដែរ។ ប្រធានាធិបតីបារាំង អាចពឹងពាក់បុរសខ្លាំងដ៏មានឥទ្ធិពលម្នាក់ទៀត គឺប្រធានាធិបតីអាមេរិក។ លោក បារ៉ាក់ អូបាម៉ា ដែលបានប្រកាសកាលពីថ្ងៃអាទិត្យប្រឆាំងនឹងនយោបាយរឹតត្បិតដែលដាក់តម្រូវលើក្រិក ត្រូវទទួលជួបលោកស្រីប្រមុខរដ្ឋាភិបាលអាល្លឺម៉ង់ នៅសេតវិមាន នាថ្ងៃចន្ទខាងមុខនេះ។
តើលោកអូបាម៉ា និងស៊ីរីហ្សា ធ្វើសង្គ្រាមដូចគ្នាប្រឆាំងនឹងនយោបាយត្បិតត្បៀតឬ ?
ថ្វីបើប្រសាសន៍ដ៏ច្បាស់ៗ ប្រឆាំងនឹងការត្បិតត្បៀតថវិកានៅក្រិក មិនមែនជាការភ្ញាក់ផ្អើល និងដើម្បីជាបឋមបម្រើឱ្យប្រយោជន៍នយោបាយផ្ទៃក្នុងអាមេរិក នយោបាយថវិការបស់លោកអូបាម៉ាខ្លួនឯងផ្ទាល់ក៏ដោយ ក៏ពាក្យសំដីនេះអាចឆ្លុះបញ្ចាំងឱ្យឃើញអំពីទិសដៅនយោបាយច្បាស់លាស់របស់រដ្ឋបាលលោកអូបាម៉ាផង និងអំពីការព្រួយបារម្ភរបស់អាមេរិកខ្លាចអឺរ៉ុបជួបវិបត្តិជាថ្មីផង។
រដ្ឋបាលលោកអូបាម៉ា មិនរអានឹងដាក់ថវិកាឱ្យឡើងដល់៤២៦ពាន់លានដុល្លារនៅតុសម្រាប់ចាយទេ នៅឆ្នាំ ២០០៩ ដើម្បីប្រឆាំងនឹងវិបត្តិហិរញ្ញវត្ថុ ហើយអាមេរិកក៏បានអំពាវនាវជាប់រហូតមក មិនជាប៉ុន្មានលើកប៉ុន្មានសាទេ ឱ្យអឺរ៉ុបកុំបិទខ្ទប់កំណើនសេដ្ឋកិច្ច ដោយសារតែត្រូវរឹតបន្តឹងថវិកាត្បៀតជ្រុលពេក។ រដ្ឋមន្ត្រីហិរញ្ញវត្ថុអាមេរិកក៏ធ្លាប់ដាស់តឿនអឺរ៉ុបជាញយដង ឱ្យគិតគូរកែ តាមតម្រូវការ ឡើងវិញ ដោយមិនរាប់អាល្លឺម៉ង់បញ្ចូល ព្រោះចោទថាហ្វ្រាំងទប់សន្ទុះកំណើនសេដ្ឋកិច្ច ខ្លាំងពេក។
ដូច្នេះ បើក្រលេកទៅមើលសេដ្ឋកិច្ចអាមេរិកនៅពេលនេះ ប្រធានាធិបតីអាមេរិក ជាអ្នកមានបទពិសោធន៍ជាងគេ ដឹងច្បាស់ថាការត្បិតត្បៀតអាចបំផ្លាញសេដ្ឋកិច្ច ដល់កំរិតណា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ