គណបក្សប្រឆាំងនឹងនយោបាយអឺរ៉ុបទទួលជោគជ័យក្នុងការបោះឆ្នោតក្រិក
ចុះផ្សាយនៅថ្ងៃ៖
ស្តាប់ - ០៥:៣៩
សហភាពអឺរ៉ុប ជាពិសេស តំបន់ចាយលុយអឺរ៉ូ កំពុងតែស្គាល់នូវភាពរំជើបរំជួលនៅថ្ងៃចន្ទនេះ ក្រោយពីគណបក្សឆ្វេងនិយម ដែលជាអ្នកប្រឆាំងនឹងនយោបាយសេដ្ឋកិច្ចអឺរ៉ុប ជាពិសេស ប្រឆាំងនឹងការរឹតត្បឹតការចំណាយរដ្ឋ បានទទួលជោគជ័យក្នុងការបោះឆ្នោតតំណាងរាស្រ្ត នៅក្នុងប្រទេសក្រិក។
យោងតាមលទ្ធផលបណ្តោះអាសន្ន ចេញផ្សាយដោយក្រសួងផ្ទៃក្រិក នៅព្រឹកថ្ងៃចន្ទនេះ ការរាប់សន្លឹកឆ្នោតបានប្រមាណ ៩៩% បង្ហាញថា គណបក្សស៊ីរីហ្សា បានទទួលអាសនៈក្នុងរដ្ឋសភា ចំនួន ១៤៩ ដាច់ឆ្ងាយពីគណបក្សដែលជាគូប្រជែងដ៏ធំ ហើយដែលទើបនឹងផុតអាណត្តិ ដែលទទួលបានត្រឹមតែ ៧៦អាសនៈ។
គណបក្សស៊ីរីហ្ស៊ីត្រូវការតែ ២អាសនៈទៀតប៉ុណ្ណោះ ដើម្បីបង្រ្គប់សំឡេងភាគច្រើនដាច់ខាត (១៥១អាសនៈ ក្នុងចំណោមអាសនៈសរុប ៣០០ ក្នុងរដ្ឋសភា) គ្រប់គ្រាន់ក្នុងការបង្កើតរដ្ឋាភិបាល។
នៅព្រឹកថ្ងៃចន្ទ លោក Alexis Tsipras ប្រមុខដឹកនាំគណបក្សស៊ីរីហ្សា និងជាបេក្ខជននាយករដ្ឋមន្រ្តី បានជួបចរចាភ្លាមៗជាមួយនឹងគណបក្សស្តាំនិយមមួយ ដែលមានឈ្មោះ ថា គណបក្សក្រិកឯករាជ្យ ដែលមាននិន្នាការនយោបាយប្រឆាំងនឹងការរឹតត្បឹតការចំណាយរដ្ឋដូចគ្នា ហើយដែលទទួលបានអាសនៈ ១៣ នៅក្នុងរដ្ឋសភា។ នៅក្រោយជំនួបនេះ ប្រមុខដឹកនាំគណបក្សក្រិកឯករាជ្យបានប្រកាសថា ខ្លួននឹងបោះឆ្នោតគាំទ្រឲ្យគណបក្សស៊ីរីហ្សាបង្កើតរដ្ឋាភិបាល។
វិមានប្រធានាធិបតីក្រិកក៏បានចេញសេចក្តីប្រកាសព័ត៌មានមួយបញ្ជាក់ថា ប្រធានាធិបតីក្រិកនឹងប្រកាសតែងតាំងលោក Alexis Tsipras ជានាយករដ្ឋមន្រ្តីជាផ្លូវការ នៅម៉ោង ៤រសៀលថ្ងៃចន្ទម៉ោងក្នុងប្រទេសក្រិក (ត្រូវជាម៉ោង ១១យប់ នៅកម្ពុជា)។
ជោគជ័យរបស់គណបក្សស៊ីរីហ្សានៅក្រិកកំពុងចោទជាសំណួរដ៏ធំមួយ គឺទាក់ទងនឹងបំណុលរបស់ក្រិក ដោយសារតែគណបក្សស៊ីរីហ្សាមានគោលនយោបាយមួយ គឺទាមទារឲ្យគេលុបចោលបំណុលក្រិក។
នៅក្នុងពេលបច្ចុប្បន្ននេះ បំណុលសាធារណៈរបស់ក្រិកមានទំហំជាទឹកប្រាក់ រហូតដល់ទៅជិត ៣២២ពាន់លានអឺរ៉ូ គឺជាង ទៅជាង ១៧៥% នៃផលិតផលក្នុងស្រុកសរុប។ ម្ចាស់បំណុលដ៏ធំរបស់ក្រិក (ជាង ៧០%) គឺស្ថាប័នសាធារណៈអន្តរជាតិ ក្នុងនោះកម្ចីពីមូលនិធិរូបិយវត្ថុអន្តរជាតិ (IMF) មាន ៣២ពាន់លានអឺរ៉ូ ប្រទេសក្នុងតំបន់ចាយលុយអឺរ៉ូ មាន ៥៣ពាន់លានអឺរ៉ូ ក្នុងក្របខ័ណ្ឌជាកម្ចីទ្វេភាគី ចំណែកម្ចាស់បំណុលធំជាងគេ គឺ មូលនិធិអឺរ៉ុប (Fonds européen de stabilité financière) ដែលបានផ្តល់កម្ចីដល់ក្រិករហូតដល់ទៅ ជិត ១៤២ពាន់លានអឺរ៉ូ។ គួរបញ្ជាក់ថា លុយរបស់មូលនិធិអឺរ៉ុបនេះ ក៏បានមកពីវិភាគទានរបស់រដ្ឋជាសមាជិកផងដែរ។
និយាយជារួម បំណុលភាគច្រើនរបស់ក្រិក គឺកម្ចី ដែលបានពីលុយពន្ធរបស់ប្រជាជននៅក្នុងតំបន់អឺរ៉ុប។ ហេតុដូច្នេះហើយបានជាការចរចាលុបចោលបំណុល ឬកាត់បន្ថយបំណុលមួយផ្នែករបស់ក្រិក វាគឺជារឿងដែលស្មុគស្មាញខ្លាំង ដោយសារតែរដ្ឋាភិបាលក្នុងតំបន់អឺរ៉ុប ប្រាកជានឹងត្រូវទទួលសម្ពាធនយោបាយក្នុងស្រុក។
ធនាគារកណ្តាលអឺរ៉ុប ដែលជាម្ចាស់បំណុលដ៏ធំមួយដែររបស់ក្រិក ក៏បានបញ្ជាក់ទុកជាមុនរួចហើយដែរថា បំណុលដែលក្រិកជំពាក់ធនាគារកណ្តាលអឺរ៉ុបនឹងមិនអាចលុបចោល ឬកាត់បន្ថយបានទេដោយសារតែមានចំណងផ្លូវច្បាប់។
នៅសល់លទ្ធភាពមួយទៀត ដែលក្រិកអាចចរចាជាមួយអឺរ៉ុបបាន គឺមិនទាមទារលុបចោល ឬកាត់បន្ថយទឹកលុយដែលជំពាក់ទេ តែសុំត្រឹមពន្យារពេលសង និងសុំបញ្ចុះអត្រាការប្រាក់។
ប្រសិនបើការចរចាលើប្រាក់បំណុលនេះមិនទទួលជោគជ័យ ក្រិកមានជម្រើសពីរ។ ឬមួយក្រិកត្រូវសងបំណុលទៅតាមការកំណត់ និងត្រូវអនុវត្តទៅតាមលក្ខខណ្ឌ ដែលបានព្រមព្រៀងជាមួយសហភាពអឺរ៉ុប នៅពេលខ្ចីបំណុល។ ឬមួយ ក្រិកប្រកាសជាឯកតោភាគីថានឹងមិនសងបំណុល ពោលគឺ ក្រិកត្រូវប្រកាសក្ស័យធន ដែលអាចនឹងជំរុញឲ្យក្រិកត្រូវដើរចេញពីតំបន់ចាយលុយអឺរ៉ូ ឬក៏ត្រូវចេញពីសហភាពអឺរ៉ុបតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ