អង្គការសហប្រជាជាតិបដិសេធមិនបានខ្ទប់រឿងចាប់រំលោភកុមារនៅអាហ្វ្រិកកណ្តាល
នៅរសៀលថ្ងៃសុក្រទី ១ ឧសភា នេះ អង្គការសហប្រជាជាតិបានចេញថ្លែងការណ៍មួយច្រានចោលបទចោទប្រកាន់ដែលថា អង្គការប្រជាជនបានព្យាយាមបិទបាំងសំណុំរឿងអាស្រូវ ទាហានមួកខៀវ (បារាំង ឆាដ ហ្គីណេ អេក្វាទ័រ) ចាប់រំលោភកុមារអាហ្វ្រិកកណ្តាល ពេលកំពុងបំពេញបេកសកម្មរក្សាសន្តិភាពនៅប្រទេសអាហ្វ្រិកកណ្តាលទេ។ ជាមួយគ្នានេះ អង្គការសហប្រជាជាតិបានអំពាវនាវតុលាការកុំអនុគ្រោះដល់ជនណាដែលប្រព្រឹត្តអំពីឧក្រិដ្ឋបែបនេះ។
ចុះផ្សាយនៅថ្ងៃ៖
ស្តាប់ - ០១:៥៨
“រាល់ពាក្យសំដី ដែលថាអង្គការសហប្រជាជាតិ បានសាកល្បងបិទខ្ទប់អំពើចាប់រំលោភកុមាររបស់ទាហានបារាំង គឺជាការប្រមាថមើលងាយ” ! នេះជាសេចក្តីប្រកាសរបស់អ្នកនាំពាក្យអង្គការសហប្រជាជាតិ ទៅកាន់អ្នកសារព័ត៌មាន ដោយបានគូសបញ្ជាក់ថែមទៀត ឧត្តមស្នងការការពារសិទ្ធិមនុស្សបច្ចុប្បន្ន ដែលអង្គការសហប្រជាជាតិចាត់ទុកជាអ្នកឯកទេសផ្នែកអំពើហិង្សាផ្លូវភេទរបស់ក្រុមទាហានរក្សាសន្តិសុខ (មួកខៀវ) ជាអ្នកសរសេររបាយការណ៍បែបនេះនៅឆ្នាំ២០០៥។
បើតាមអ្នកនាំពាក្យអង្គការសហប្រជាជាតិដដែល ពេលខ្លះអង្គការមិនអាចលើកយករឿងអង្កេតមកបង្ហាញ ឬបើកចំហជាសាធារណៈ គឺដើម្បីការពារជនរងគ្រោះ ជាពិសេសនៅពេលជនរងគ្រោះជាក្មេងពេក ដូចករណីនៅអាហ្វ្រិកកណ្តាល ដែលមានកុមារខ្លះអាយុទើប៩ឆ្នាំ តែត្រូវទាហានបារាំង ចាប់រំលោភដើម្បីដូរបាយ ឬដោយការគំរាម។
ខ្លឹមសារលម្អិតនិងរបាយការណ៍ ដែលមានសម្តីកុមាររងគ្រោះជាសាក្សីផង ត្រូវបានបញ្ជូនទៅឱ្យឧត្តមស្នងការដ្ឋាន តាំងពីខែកក្កដា ២០១៤ម្ល៉េះ ! ដូច្នេះគ្មានទេ ការអនុគ្រោះយោគយល់ មិនថាចំពោះជាទាហានមួកខៀវរក្សាសន្តិសុខ ឬបុគ្គលផ្សេងទៀតដែលប្រព្រឹត្តអំពើហិង្សា រំលោភផ្លូវភេទ។ នេះបើតាមសេចក្តីប្រកាសរបស់អ្នកនាំពាក្យអង្គការសហប្រជាជាតិប្រចាំទីក្រុងហ្សឺណែវ។
សូមបញ្ជាក់ថា ការចោទប្រកាន់អង្គការសហប្រជាជាតិថាព្យាយាមបិទខ្ទប់រឿងអាស្រូវ ទាហានបារាំងចាប់រំលោភកុមារអាហ្វ្រិកកណ្តាលនេះ បន្ទាប់ពីកាសែតអង់គ្លេស The Guardian បានបើកទម្លាយរឿងកាលពីថ្ងៃព្រហស្បតិ៍ ហើយ មន្ត្រីជាន់ខ្ពស់ឧត្តមស្នងការដ្ឋានសិទ្ធិមនុស្សអង្គការសហប្រជាជាតិម្នាក់គឺ លោក Andres Kompass ត្រូវបានព្យួរពីការងារ ទំនងដោយមកពីហ៊ានទម្លាយឯកសារសម្ងាត់ទៅឱ្យអាជ្ញាធរបារាំង ដោយគ្មានឆ្លងកាត់ថ្នាក់លើ។ អង្គការសហប្រជាជាតិបានបញ្ជាក់ថាពិតជាបានព្យួរការងារមន្ត្រីរូបនេះមែន ដើម្បីធ្វើអង្កេតផ្ទៃក្នុង។ អង្គការក្រៅរដ្ឋាភិបាលតែងបរិហារជាញយដងអំពីពុតត្បុតរបស់អង្គការសហប្រជាជាតិក្នុងសំណុំរឿងអាស្រូវរំលោភផ្លូវភេទ។ អង្គការសហប្រជាជាតិធ្លាប់រឿងអាស្រូវផ្លូវភេទពីសំណាក់ទាហានមួកខៀវច្រើនមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ