ទាហានបារំាងជាច្រើននាក់កំពុងជាប់ចោទពីបទរំលោភកូនក្មេងនៅសាធារណរដ្ឋអាហ្រ្វិកកណ្តាល
នៅក្នុងប្រទេសបារំាង ព័ត៌មានជុំវិញទាហានបារំាងជាច្រើននាក់បានចាប់រំលោភកូនក្មេងនៅសាធារណរដ្ឋអាហ្រ្វិកកណ្តាលកំពុងបន្តបែកធ្លាយ។ រឿងអាស្រូវនេះបានផ្ទុះឡើង បន្ទាប់ពីកាសែតអង់គ្លេសឈ្មោះ The Guardian បានផ្សព្វផ្សាយរបាយការណ៍មួយរបស់អង្គការសហប្រជាជាតិដែលចោទទាហានជនជាតិបារំាង ជនជាតិឆាដ និងជនជាតិហ្គីណេអេក្វាទ័រពីបទចាប់រំលោភកូនក្មេងក្នុងបេសកកម្មរក្សាសន្តិភាពនៅសាធារណរដ្ឋអាហ្រ្វិកកណ្តាល។ នៅពេលនេះ បារំាងបានបើកការស៊ើបអង្កេតដើម្បីកំណត់អត្តសញ្ញាណទាហានបារំាងទំាងនោះ ហើយរដ្ឋអំណាចសាធារណរដ្ឋអាហ្រ្វិកកណ្តាលក៏បានបើកការស៊ើបអង្កេតដាច់ដោយឡែករបស់ខ្លួនដែរ។ តែជាការស៊ើបអង្កេតដែលទំនងជាពិបាក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
តំាងពីថ្ងៃព្រហស្បតិ៍ ទី៣០ មេសាមកដែលតុលការសាធារណរដ្ឋអាហ្រ្វិកកណ្តាលបានប្រកាសឲ្យដឹងពីដំណើរការស៊ើបអង្កេត ដោយបានបញ្ជូនមន្រ្តីរបស់ខ្លួនទៅកាន់ទីកន្លែងកើតហេតុក្នុងទីក្រុងបង់ហ្គី។ តែរដ្ឋអាជ្ញាអាហ្រ្វិកកណ្តាលបានប្រកាសឲ្យដឹងពីការលំបាកនៅក្នុងការស៊ើបអង្កេតនោះ ព្រោះមកទល់ពេលនេះ នៅមិនទាន់មានការទាក់ទងជាមួយរដ្ឋអំណាចបារំាង និងអង្គការសហប្រជាជាតិដែលជាម្ចាស់របាយការណ៍ស្តីពីរឿងអាស្រូវនោះនៅឡើយទេ។ កម្មវត្ថុអាទិភាពរបស់ក្រុមអ្នកស៊ើបអង្កេតអាហ្រ្វិកកណ្តាល គឺស្វែងរកកូនក្មេងដែលជាជនរងគ្រោះផ្លូវភេទ ឬមួយក៏សាក្សីដែលអាចយកជាការបាន។
គួររម្លឹកជូនថា រឿងអាស្រូវរំលោភផ្លូវភេទលើកូនក្មេងដែលបែកធ្លាយពីរបាយការណ៍របស់អង្គការសហប្រជាជាតិ គឺបានកើតមានឡើងនៅចន្លោះខែធ្នូ ឆ្នំា ២០១៣ និងខែឧសភា ឆ្នំា ២០១៤ និងមានជាប់ពាក់ព័ន្ធនឹងទាហានបារំាងប្រមាណជា ១៥នាក់ និងទាហានជនជាតិឆាដ ព្រមទំាងជនជាតិហ្គីណេអេក្វាទ័សរុប ៥នាក់នៅពេលដែលពួកគេបានបំពេញបេសកកម្មរក្សាសន្តិភាពក្រោមដំបូលអង្គការសហប្រជាជាតិនៅក្នុងជំរំជនភៀសខ្លួនប៉ូកូ (Mpoko) នៃអាកាសយានដ្ឋានទីក្រុងបង់ហ្គីទឹកដីសាធារណរដ្ឋអាហ្រិ្វកកណ្តាល។ បើយោងតាមរបាយការណ៍របស់អង្គការសហប្រជាជាតិ មានកូនក្មេងអាយុចម្លោះពី ៨ ទៅ ១១ឆ្នំាប្រមាណជា ១០នាក់ក្នុងជំរំប៉ូកូបានបង្ខំចិត្តប្រគល់ខ្លួនប្រាណឲ្យទាហានបរទេសប្តូរយកចំណីអាហារ។
តាមពិតទៅ អង្គការសហប្រជាជាតិបានចាត់ទុករបាយការណ៍មួយនេះថា ជារឿងសម្ងាត់ផ្ទៃក្នុង និងបានបញ្ជូនទៅឲ្យរដ្ឋអំណាចបារំាងតំាងពីខែកក្កដា ឆ្នំា ២០១៤ មកម្ល៉េះ។ ទីក្រុងប៉ារីសក៏មិនបានផ្សព្វផ្សាយជាសាធារណៈដែរ តែបានបើកការស៊ើបអង្កេតដោយសម្ងាត់តំាងពីពេលនោះមក។ គឺទើបតែនៅថ្ងៃពុធ ទី២៨ មេសាកន្លងទៅទេដែលកាសែតអង់គ្លេស The Gardian បានទម្លាយរបាយការណ៍ដែលខ្លួនអះអាងថាបានទទួលពីមន្រ្តីអង្គការសហប្រជាជាតិម្នាក់ទទួលបន្ទុកសិទ្ធិមនុស្ស។ នៅពេលនេះ មន្រ្តីសហប្រជាជាតិរូបនោះត្រូវបានគេព្យួរការងារ និងប្រាក់ខែតំាងពីសប្តាហ៍កន្លងទៅម្ល៉េះ តែមានសំណួរដែលគ្រប់គ្នាឆ្ងល់គឺថា រឿងរ៉ាវបានកើតឡើងតំាងពី ៩ខែមកហើយ ចុះហេតុអ្វីបានជាទើបបែកធ្លាយពេលនេះ ?។
យ៉ាងណាក៏ដោយ រដ្ឋអំណាចបារំាងហាក់ដូចជាទើបភ្ញាក់ផ្អើលចំពោះរឿងរ៉ាវនេះ និងសន្យាវែករកមុខ ព្រមទំាងសន្យាដាក់ទណ្ឌកម្មចាស់ដៃចំពោះទាហានដែលជាប់ពាក់ព័ន្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ