ភេរវកម្មនៅប៉ារីស ៖ ហេតុអ្វីបែលហ្សិកក្លាយជាជង្រុកជីហាតអ៊ីស្លាមជ្រុលនិយម ?
ចុះផ្សាយនៅថ្ងៃ៖
ស្តាប់ - ០៤:២៦
ការអង្កេតនិងស្វែងចាប់ជនដៃដល់ប្រព្រឹត្តភេរវកម្មនៅប៉ារីសថ្ងៃទី១៣ វិច្ឆិកា កំពុងតែបន្ត។ បែលហ្សិក បានចូលរួមចំណែកនិងកំពុងសហការយ៉ាងណែនជាមួយបារាំងក្នុងធ្វើអង្កេតនេះ ព្រោះភេរវជនបានប្រើប្រាស់ក្រុងព្រុចសែលជាមូលដ្ឋានសម្រាប់រៀបចំការវាយប្រហារ។ ហេតុអ្វីបែលហ្សិកធ្លាក់ខ្លួនដល់ថ្នាក់នេះ ?! អឺរ៉ុបធូររលុងជ្រុលឬយ៉ាងណា បានជាពួកជីហាតអាចចូលស្រុក ដោយមិនខ្លួនយ៉ាងដូច្នេះ ?!
បែលហ្សិកបានក្លាយជាមូលដ្ឋានជើងក្រោយរបស់ពួកភេរវជន ដែលបានចេញមកវាយប្រហារភេរវកម្មនៅក្រុងប៉ារីស កាលពីយប់ថ្ងៃសុក្រទី ១៣វិច្ឆិកា។ ព្រុចសែលក្លាយជាទីណាត់ជួបរបស់ពួកជីហាត ហើយហេតុការណ៍នេះមិនមែនថ្មីថ្មោងឡើយ។ រាជាណាចក្រដ៏តូចមួយនេះ ធ្លាប់ត្រូវបានពួកអ៊ីស្លាមជ្រុលនិយមអាល់ហ្សេរីខ្ចីប្រើដើម្បីរៀបចំផែនការភេរវកម្មប្រឆាំងបារាំងនៅឆ្នាំ១៩៩៥។ ពីរថ្ងៃមុនមហាភេរវកម្ម១១កញ្ញា២០០១ នៅសហរដ្ឋអាមេរិក ឃាតករសម្លាប់មេទ័ពដ៏អង់អាចរបស់អាហ្វហ្កានីស្ថាន Missoud បានប្រើលិខិតឆ្លងដែនបែលហ្សិក ដើម្បីធ្វើបំលាស់ទី។ មរណភាពដែលជំរុញឱ្យអាល់កែដាអាចបើកប្រតិបត្តិការវាយប្រហារអាគារភ្លោះនៅញូវយ៉ក។ នៅឆ្នាំ២០០៥ ពលរដ្ឋអឺរ៉ុបដំបូងគេដែលផ្តាច់ខ្លួនទៅជាជនអ៊ីស្លាមជ្រុលនិយម ដើម្បីប្រព្រឹត្តអំពើភេរវកម្មអត្តឃាត គឺជាស្ត្រីជនជាតិបែលហ្សិក។
កាលពីមួយឆ្នាំមុន ការកាត់ក្តីលើសំណុំរឿងSharia4belgum បានបង្ហាញអំពីសន្ធឹកនៃអ៊ីស្លាមជ្រុលនិយមនៅក្នុងប្រទេស។ មានសកម្មភាពតាំងពីឆ្នាំ២០១០ និងរលាយខ្លួនទៅវិញនៅពីរឆ្នាំក្រោយ Sharia4belgum ចង់បញ្ចូលច្បាប់អ៊ីស្លាមCharia ទៅក្នុងប្រទេស និងបានជ្រើសរើសជនស្ម័គ្រចិត្តចូលធ្វើយុទ្ធជនទៅប្រយុទ្ធនៅស៊ីរី។
បែលហ្សិកបានក្លាយជាប្រទេសជាប់ចំណាត់ថ្នាក់លេខមួយខាងមានចំនួនជនជីហាតច្រើនជាងគេ បើប្រៀបទៅចំនួនពលរដ្ឋសរុប (ពី៣៣០ទៅ៥០០ជីហាត សម្រាប់ប្រជាជន១១លាននាក់)។ នៅក្នុងការវាយប្រហារភេរវកម្មប៉ារីស ភេរវជនក៏មានប្រភពចេញពីបែលហ្សិកនេះដែរ។ រថយន្តប្រើសម្រាប់ធ្វើភេរវកម្មជាច្រើន ជួលមកពីព្រុចសែល ... ហេតុអ្វីបានជាបែលហ្សិកក្លាយជាជម្រករបស់ពួកជ្រុលនិយមអ៊ីស្លាមដូច្នេះ ?! ចម្លើយមានច្រើន ! បើនិយាយអំពីទីតាំងភូមិសាស្ត្រ ព្រុចសែលជាបេះដូងអឺរ៉ុប ជាទីក្រុងរបស់សហភាពអឺរ៉ុប ជាទីប្រជុំជនមនុស្សនិងសេដ្ឋកិច្ច ដូច្នេះហើយបានជាពួកជីហាតត្រូវការប្រើប្រាស់ដើម្បីវាយប្រហារឱ្យដល់បេះដូងអឺរ៉ុប។
បែលហ្សិកមានសហគមន៍អ្នកកាន់សាសនាអ៊ីស្លាមសំខាន់ទីពីរបន្ទាប់ពីបារាំង។ ពួកជ្រុលនិយមពិតជាងាយយកចំណេញពីនយោបាយអនុគ្រោះរបស់បែលហ្ស៊ិក។ ម្យ៉ាងទៀត ផ្ទៃក្នុងនយោបាយបែលហ្ស៊ិកមិនសូវស៊ីចង្វាក់គ្នារវាងអ្នកនិយមភាសាបារាំង និងភាសាផ្លាម៉ង់ បានធ្វើទំនូលខុសត្រូវសន្តិសុខមិនរលូន។ ភាពកម្សោយរបស់រដ្ឋ គឺជាឱកាសល្អបំផុតសម្រាប់ពួកជ្រុលនិយម ព្រោះសូមបញ្ជាក់ថា មិនដឹងថាជាភាពចៃដន្យឬយ៉ាងណាទេ ដោយហេតុវិបត្តិនយោបាយ រាជាណាចក្របែលហ្ស៊ិកនេះ ដំណើរការដោយគ្មានរដ្ឋាភិបាលរបស់ពេល ៥៤១ថ្ងៃ។ គ្មានរដ្ឋាភិបាល ប្រទេសអាចដំណើរការបានមែន ប៉ុន្តែមិនគ្រប់គ្រាន់សម្រាប់ប្រយុទ្ធប្រឆាំងនឹងពួកភេរវនិយម ដែលរង់ចាំតែឱកាសនោះឡើយ។
នេះអាចចាត់ទុកជាភាពទន់ខ្សោយមួយរបស់បែលហ្ស៊ិកដែលបណ្តោយឱ្យបណ្តាញជីហាតលូតលាស់ខ្លាំង។ ប៉ុន្តែនៅមានភាពប្រហែសប្រហោងមួយទៀតថ្នាក់អឺរ៉ុប ដែលក្រោយពីមានភេរវកម្មផ្ទុះឡើងម្តងៗ គេតែងឃើញមានការអត្ថាធិប្បាយនិងប្រតិកម្មឥតឈប់ គឺសេរីភាពនេះការដើរហើររបស់អឺរ៉ុប។ សេរីភាពជាមូលដ្ឋានគ្រឹះរបស់សហភាព គ្មាននរណាអាចប៉ះពាល់បានឡើយ តែនេះមិនមែនជាបញ្ហាទេ ! បញ្ហាគឺរំលែកព័ត៌មាន ពីប្រទេសមួយទៅមួយ។
ប្រទេសក្នុងសហភាព ឬហៅកាត់ក្រុមSchengen គ្មានព្រំដែនទេ មានតែព្រំដែនខាងក្រៅ គឺព្រំដែននៃប្រទេសសមាជិកអឺរ៉ុបជាប់នឹងប្រទេសមិនមែនសមាជិក។ គ្រប់ប្រទេសជាសមាជិកអឺរ៉ុបសុទ្ធតែយល់ពីតំលែនៃបង្កើតទិន្នន័យព័ត៌មានអ្នកដំណើរ សម្រាប់ងាយចាប់សម្គាល់យុទ្ធជនមកស៊ីរីឬអ៊ីរ៉ាក់។ ទិន្នន័យនេះមានហើយក្នុងថ្នាក់ជាតិ ប៉ុន្តែគ្មានបណ្តាញភ្ជាប់គ្នាពីប្រទេសមួយទៅប្រទេសមួយឡើយ។
ជាឧទាហរណ៍ជាក់ស្តែង ករណីភេរវជន អត្តឃាតនៅទីក្រុងប៉ារីស ពីរបីនាក់ មានឈ្មោះក្នុងបញ្ជីភេរវកម្មបារាំង បានចាកចេញទៅស៊ីរី តែបារាំងគ្មានដានត្រលប់ចូលស្រុកទេ ព្រោះភេរវជនដឹងល្បិច ដើរចូលអឺរ៉ុបច្រកប្រទេសផ្សេង បានរួចផុតពីសំណាញ់ប៉ូលិសបារាំង ឬបែលហ្ស៊ិក ដោយគ្មានលំបាកអ្វីទាំងអស់។ តើនេះមិនមែនបណ្តាលមកពីអឺរ៉ុបគ្មានប្រព័ន្ធចែករំលែកព័ត៌មានរួមគ្នាទេឬ ? ភេរវកម្មបានផ្ទុះឡើងម្តងជាពីរដង ហើយទំនងជាមិនទាន់ចប់ទេ តើមើលទៅអឺរ៉ុបអាចសម្រេចប្រមូលផ្តុំ រួចចែករំលែកគ្នាបានត្រឹមណា ?!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ