ភេរវជនពីរនាក់ស្លាប់ ក្នុងប្រតិបត្តិការប្រមាញ់របស់ប៉ូលិស នៅជាយក្រុងប៉ារីស
ប៉ូលិសបារាំង កំពុងតាមប្រមាញ់រកភេរវជន ដែលចូលរួម ធ្វើភេរវកម្ម កាលពីថ្ងៃសុក្រ នៅកណ្តាលក្រុងប៉ារីស។ នៅថ្ងៃពុធ តាំងពីព្រឹកម៉ោង ៤ កន្លះភ្លឺ ម៉ោងក្នុងស្រុកបារាំង ប៉ូលិសបារាំង បានបើកប្រតិបត្តិការ ឡោមព័ទ្ធ សាំងដេនី សង្កាត់ជាយក្រុងប៉ារីស ជាទី ដែលគេសង្ស័យថា Abdelhamid Abaaoud អាឌែលហាម៉ីដ អាបាអ៊ូត មេក្លោងធ្វើភេរវកម្មនៅ ប៉ារីស កំពុងសំងំលាក់ខ្លួន។ ជាតុល្យការចុងក្រោយ ភេរវជនពីរនាក់បានស្លាប់ ចំណែកមនុស្ស ៧នាក់ ត្រូវបានប៉ូលិសចាប់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:២៨
ក្នុងចំណោមជនសង្ស័យដែលប៉ូលិសឃាត់ខ្លួន គ្មានទេ ឈ្មោះ អាឌែលហាម៉ីដ អាបាអ៊ូត ដែលជាមេក្លោង ធ្វើភេរវកម្ម កាលពីថ្ងៃសុក្រ។ មនុស្ស ៧នាក់ ត្រូវបានចាប់ឃាត់ខ្លួន ដែលនៅក្នុងនោះ មានម្នាក់ជាម្ចាស់ផ្ទះ ដែលផ្តល់បន្ទប់ស្នាក់នៅដល់ភេរវជន និងដែលធ្លាប់ជាប់ពន្ធនាគារ៨ឆ្នាំក្នុងបទវាយមនុស្សរហូតដល់ស្លាប់។ ចំណែកភេរវជនពីរនាក់ បានស្លាប់ ដោយម្នាក់ត្រូវប៉ូលិសបាញ់សម្លាប់ ចំណែកម្នាក់ទៀត បានចុចបំផ្ទុះខ្សែក្រវ៉ាត់គ្រាប់បែកនៅលើខ្លួន។ រហូតមកដល់ពេលនេះ គេនៅមិនទាន់បានដឹងពីអត្តសញ្ញាណរបស់ភេរវជនទាំងពីរនាក់នៅឡើយទេ។
នៅ៥ថ្ងៃក្រោយភេរវកម្ម កណ្តាលក្រុងប៉ារីស ដែលបានសម្លាប់មនុស្ស ១២៩នាក់ ប៉ូលិសបារាំង រួមសហការ ជាមួយប៉ូលិសប៊ែលហ្សិក ធ្វើការស៊ើបអង្កេតលើគ្រប់ដានទាំងអស់។ គេដឹងថា ភេរវជនដែលបានធ្វើភេរវកម្ម កាលពីថ្ងៃសុក្រ មានគ្នីគ្នា សរុប ៩នាក់។ ភេរវជនបែងចែកគ្នា ជាបីក្រុម ដើម្បីធ្វើសកម្មភាពសម្លាប់មនុស្ស នៅជិតស្តាត នៅសាលប្រគំតន្រី្ត បាតាក្លង់ ហើយនិងតាមភោជនីយដ្ឋាន ក្នុងសង្កាត់ប្រជុំជន ដែលក្នុងនោះមានផងដែរ ភោជនីយដ្ឋានខ្មែរ Le petit Cambodge។
តាមរយៈ ឡានទាំង៣គ្រឿងដែលក្រុមភេរវជនចតទុកចោល នៅបីកន្លែងផ្សេងគ្នា និងការចុះឆែកឆេរនៅបន្ទប់ជួលរបស់ក្រុមភេរវជន ប៉ូលិសបារាំងដឹងថា មានមនុស្សពីរនាក់ផ្សេងទៀត ដែលបានចូលរួមធ្វើភេរវកម្ម កាលពីថ្ងៃសុក្រ។ ក្នុងនោះ មានម្នាក់ ជា បងប្រុសរបស់អត្តឃាតជន ប្រាហ៊ីម ឈ្មោះ សាឡា អាប់ដែលស្លាម អាយុ ២៦ឆ្នាំដែលកំពុងរត់គេចខ្លួន ចំណែកមនុស្សម្នាក់ទៀត ប៉ូលិសនៅមិនទាន់កំណត់អត្តសញ្ញាណបាននៅឡើយទេ។ ប៉ូលិសបារាំង គិតថា ជនទី ៩នោះ ជាអាឌែលហាម៉ីដ អាបាអ៊ូត ជាមេក្លោង រៀបចំធ្វើភេរវកម្មនៅប៉ារីស។
ការដែលប៉ូលិសបារាំង ឡោមព័ទ្ធផ្ទះ នៅ ជាយក្រុងប៉ារីស នៅព្រឹកមិញ ក៏ព្រោះតែគេជឿថា អាឌែលហាម៉ីដ អាបាអ៊ូតកំពុងស្ថិតនៅស្រុកបារាំង និងកំពុងសំងំលាក់ខ្លួន នៅក្នុងផ្ទះ ដែលប៉ូលិសឡោមព័ទ្ធ សម្រុកចូលព្រឹកមិញ។ តាមមន្រ្តីស៊ើបអង្កេតបារាំង គេជឿថា អាឌែលហាម៉ីដ អាបាអ៊ូត នៅស្រុកបារាំង ព្រោះតាមទម្លាប់ មេក្លោងធ្វើភេរវកម្មជនជាតិប៊ែលហ្សិករូបនេះ មានទម្លាប់ នៅក្បែរ ក្រុមរបស់ខ្លួន នៅក្នុងពេលធ្វើភេរវកម្ម ដូចករណី ភេរវកម្មនៅប្រទេសប៊ែលហ្ស៊ិក កាលពីឆ្នាំ មុន។
ជនសង្ស័យម្នាក់ ដែលប៉ូលិសបារាំង ចាប់ខ្លួន កាលពីខែសីហាកន្លងទៅ បានសារភាពថា ខ្លួនបានទទួលបញ្ជារពី អាឌែលហាម៉ីដ អាបាអ៊ូត ឲ្យធ្វើភេរវកម្មសម្លាប់មនុស្សឲ្យបានច្រើនបំផុត នៅប្រទេសបារាំង។ តាមជនសង្ស័យ ដែលស្ថិតនៅក្នុងគុកបារាំង អាឌែលហាម៉ីដ អាបាអ៊ូតបានផ្តល់ លុយ ជាង ២ពាន់អឺរ៉ូ សម្រាប់សកម្មភាពធ្វើភេរវកម្មនៅតាមរោងប្រគំតន្រ្តី នៅស្រុកបារាំង។ គឺព័ត៌មានដែលថា អាឌែលហាម៉ីដ អាបាអ៊ូតមានជាប់ទាក់ទងនឹងក្រុមជនសង្ស័យដែលមានគម្រោងធ្វើភេរវកម្ម ក្នុងប្រទេសបារាំង ហើយ តាមទម្លាប់គឺ មេក្លោងរូបនេះ តែងតែនៅជាប់ជានិច្ចនឹងក្រុមរបស់ខ្លួន ទើបប៉ូលិសស៊ើបអង្កេតបារាំង សម្រេចឡោមព័ទ្ធផ្ទះ ដែលស្ថិតនៅមិនឆ្ងាយប៉ុន្មានពីស្តាត កន្លែងដែលមានភេរវកម្មបំផ្ទុះគ្រាប់បែក កាលពីថ្ងៃសុក្រ។
ម្ចាស់ផ្ទះ ដែលប៉ូលិសបារាំងឡោមព័ទ្ធ រាប់ម៉ោង នៅ ព្រឹកមិញនេះ ក៏បានទទួលស្គាល់ដែរថា ខ្លួនបានជួយផ្តល់កន្លែងស្នាក់នៅដល់មិត្តភក្តិ របស់មិត្តភក្តិខ្លួនមកពី ប្រទេសប៊ែលហ្ស៊ិក។ ប៉ូលិស ចាប់មិនបាន រកមិនឃើញ អាឌែលហាម៉ីដ អាបាអ៊ូត នៅក្នុងផ្ទះ មែន ប៉ុន្តែ មិនមែនមានន័យថា មេក្លោងភេរវកម្មរូបនេះ មិនបានស្ថិតនៅក្នុងផ្ទះដែលគេឡោមព័ទ្ធនោះទេ។ តាមមន្រ្តី ប៉ូលិសស្និទ្ធនឹងក្រុមស៊ើបអង្កេត មេក្លោងអាឌែលហាម៉ីដ អាបាអ៊ូតប្រហែលបានចាកចេញ រួចហើយ ពីបារាំង មុនប្រតិបត្តិការរបស់ប៉ូលិសបារាំងទៅទៀត។
ភេរវជនពីរនាក់បានស្លាប់
ភេរវជនម្នាក់ត្រូវប៉ូលិសខ្មាន់កំភ្លើងបាញ់សម្លាប់។ ចំណែក ភេរវជនម្នាក់ទៀត ជាស្រ្តីភេរវជនអត្តឃាត ដែលបានចុច បំផ្ទុះខ្សែក្រវ៉ាត់គ្រាប់បែក នៅក្នុងពេលដែលប៉ូលិសសម្រុកចូលទៅក្នុងផ្ទះ ដែលគេសង្ស័យ។ តាមប៉ូលិស ស្រ្តីភេរវជនត្រូវបានប៉ូលិសបារាំង តាមដានសង្ស័យ ក្នុងបទផ្តល់កន្លែងស្នាក់នៅដល់អាឌែលហាម៉ីដ អាបាអ៊ូត។ នេះជាលើកទីមួយ នៅក្នុងប្រទេសបារាំង ដែលគេឃើញមានភេរវជនអត្តឃាត។ កន្លងមក គេតែងតែឃើញ ភេរវកម្មអត្តឃាតនៅក្នុងប្រទេសដែលកំពុងជួបសង្រ្គាម ដូចជានៅអ៊ីរ៉ាក់ ឬអាហ្វហ្កានស្ថាន ដែលនៅទីនោះ ក្រុមភេរវជន ឬក្រុមតាលីបង់ ធ្វើភេរវកម្មអត្តឃាតប្រឆាំងទាហានបរទេស។
នៅក្នុងភេរវកម្មកាលពីថ្ងៃសុក្រ គេឃើញមានភេរវជនអត្តឃាត យ៉ាងតិច ៥នាក់ ដែលបានបំផ្ទុះខ្សែក្រវ៉ាត់គ្រាប់ផ្ទុះ។ រឿងនេះបានធ្វើឲ្យគេភ្ញាក់ផ្អើលម្តងហើយ ហើយឥលូវនេះទៀត គេក៏ឃើញមានស្រ្តីចូលរួមធ្វើភេរវកម្មបំផ្ទុះគ្រាប់បែកដែរ។
ប្រធានាធិបតីបារាំងលោកហ្វ្រង់ស័រ ហូឡង់បានមានប្រសាសន៍ថា សកម្មភាពធ្វើភេរវកម្ម កាលពីថ្ងៃសុក្រ នៅ ប៉ារីស ត្រូវបានផ្តួចផ្តើមគំនិតនៅក្នុងប្រទេសស៊ីរី បន្ទាប់មក គឺបង្កើតចេញជាគម្រោងនៅប៊ែលហ្ស៊ិក និងចុងបញ្ចប់ ភេរវកម្មចេញរូបរាង ក្នុងប្រទេសបារាំង។ ក្រុមជីហាតនៃអង្គការរដ្ឋអ៊ីស្លាមប្រកាសទទួលស្គាល់ថា ភេរវកម្មកាលពីថ្ងៃសុក្រ ជាស្នាដៃរបស់ក្រុមខ្លួន ប៉ុន្តែ តាមអ្នកជំនាញខាងភេរវកម្ម តាមពិត ក្រុមតូចៗ មកពីអឺរ៉ុប ដែលជាសមាជិករបស់ក្រុមជីហាត រដ្ឋអ៊ីស្លាមជាអ្នកមានគំនិត ផ្ទាល់ខ្លួន ចង់ វាយប្រហារបារាំង និងអឺរ៉ុប។ តាមអ្នកជំនាញ ការវាយប្រហារភេរវកម្មនៅប៊ែលហ្សិក និងបារាំង នៅប៉ុន្មានឆ្នាំចុងក្រោយនេះ បង្ហាញថា ក្រុមទាហានបរទេស ពីអឺរ៉ុប ពីបារាំង ឬប៊ែលហ្ស៊ិកជាអ្នកធ្វើភេរវកម្មដោយផ្ទាល់។ ក្រុមនេះមួយចំនួនធ្លាប់ទៅ ចូលរួមប្រយុទ្ធជាមួយក្រុមជីហាត នៅស៊ីរី ចំណែកក្រុមខ្លះទៀត គ្រាន់តែបានស្តាប់ លង់ជឿមនោគមវិជ្ជារបស់មេសាសនាអ៊ីស្លាម ក៏យល់ព្រមធ្វើភេរវកម្មដើម្បីបុព្វហេតុកាលីហ្វាដែរ។ ភេរវកម្មអត្តឃាត ឬការចុចបំផ្ទុះគ្រាប់បែកលើខ្លួន ដើម្បីសម្លាប់មនុស្ស នៅទីក្រុងប៉ារីសបានបង្ហាញថា ក្រុមជនជ្រុលនិយម មិនថា ស្រី ឬប្រុស លែខ្លាចស្លាប់ ដោយហ៊ានប្តូរផ្តាច់ជីវិតរបស់ខ្លួន ដើម្បីក្រុមជីហាត។ គឺសកម្មភាពជ្រុលនិយមនេះហើយ កំពុងធ្វើឲ្យគេបារម្ភបារាំង ទឹកដី អឺរ៉ុប នឹងអាចធ្លាក់ទៅក្នុងសោកនាដកម្ម បំផ្ទុះគ្រាប់បែក មិនខុសពីប្រទេសដែលកំពុងជួបសង្រ្គាមនៅអាហ្វហ្កានីស្ថាន ឬក៏អ៊ីរ៉ាក់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ