ប៉ារីសបិទផ្លូវមួយភាគធំ ដើម្បី ជំនួបកំពូលអាកាសធាតុ
វត្តមានដ៏ច្រើនសន្ធឹកសន្ធាប់ នៃគណៈប្រតិភូ អ្នកជំនាញអ្នកសង្កេតការណ៍ និងអ្នកសារព័ត៌មានមកពីគ្រប់ទីកន្លែង បូករួមជាមួយការរឹតបន្តឹងសន្តិសុខ ជាបញ្ហាចោទដល់ចរាចរណ៍នៅក្នុងក្រុងប៉ារីស។ អាជ្ញាធរក្រុងបានសម្រេចបិទផ្លូវ សំខាន់ៗ ក្នុងក្រុងប៉ារីស និងផ្លូវនាំទៅកាន់មណ្ឌលរៀបចំសន្និសីទនៅជាងក្រុងប៉ារីស ប៉ែកខាងជើង ព្រមទាំងបានណែនាំពលរដ្ឋមិនឱ្យធ្វើដំណើរ តាមឡាន ឬតាមមធ្យោបាយដឹកជញ្ជូនសាធារណៈទេ បើគ្មានការចាំបាច់។
ចុះផ្សាយនៅថ្ងៃ៖
ស្តាប់ - ០២:២៣
សន្និសីទអន្តរជាតិ COP21 ដែលមានអ្នកចូលរួមដល់ទៅ បួនម៉ឺននាក់ ក្នុងនោះមានប្រមុខរដ្ឋប្រមុខ រដ្ឋាភិបាល ដល់ទៅ ១៤៧ប្រទេស បានតម្រូវឱ្យអាជ្ញាធរបារាំង ចាត់វិធានការធំ ទាំងផ្នែកសន្តិសុខ បញ្ចេញកម្លាំងរក្សាសុវត្ថិភាព និងសម្រួលចរាចរណ៍ ការពារក្បួនប្រតិភូ។
ក្រុងប៉ារីស និងតំបន់ជុំវិញ រងការប៉ះពាល់យ៉ាងខ្លាំង ដោយមានការបិទផ្លូវ ជាច្រើនខ្សែ និងជាច្រើនទិស។ នៅប៉ែកខាងជើង ពីវាលយន្តហោះមកកាន់ទីតាំងរៀបចំសន្និសីទBourget ត្រូវគាំងមួយភាគ ផ្លូវក្រវ៉ាត់ក្រុង ត្រូវបិទមួយភាគដែរ។ ក្រុងប៉ារីស ពីជើងទៅលិច ពីសង្កាត់ដ៏ល្អប្រណិតស្អាតៗ ជាបណ្តុះអ្នកមាន អ្នកការទូត សណ្ឋាគារថ្លៃៗ ទៅដល់ច្រកផ្លូវឆ្ពោះទៅទៅកាន់មណ្ឌលសន្និសីទ ត្រូវបិទ។
ប៉ុន្តែជាទូទៅ ចរាចរណ៍តាមផ្លូវរលូនខ្លាំង។ បើតាមមជ្ឈមណ្ឌលផ្តល់ព័ត៌មានចរាចរណ៍ នៅវេលាម៉ោង៨កន្លះព្រឹក ដែលតាមទម្លាប់ ជាម៉ោងស្ទះបំផុតនោះ គេសង្កេតឃើញមានការកកស្ទះតែប្រមាណ ២១គីឡូម៉ែត្រប៉ុណ្ណោះ បើប្រៀបទៅនឹងថ្ងៃចន្ទធម្មតា ដែលមានដល់ទៅ ២៥០គ.ម.។ ផ្លូវចូលពីប៉ារីស ក្នុងវេលាព្រឹកថ្ងៃចន្ទ ដែលធ្លាប់ជាប់គាំងរាប់ម៉ោង បែរជា រលូន ទូលាយស្ងាត់។ ស្ងាត់ទាល់តែអ្នករកស៊ីរត់ឡានតាក់ស៊ីរកភ្ញៀវស្ទើរលែងបាន។
ពលរដ្ឋបារាំងហាក់ស្តាប់ និងអនុវត្តតាមបទបញ្ជារបស់អាជ្ញាធរ ដែលបានណែនាំមិនឱ្យប្រជាជនប្រើប្រាស់រថយន្តចូលក្រុងប៉ារីស និងកាត់បន្ថយ ឬចៀសវាងការធ្វើដំណើរតាមមធ្យោបាយសាធារណៈ នៅថ្ងៃចន្ទនេះ។ មធ្យោបាយសាធារណៈ រថយន្តក្រុង រថភ្លើងក្រោមដី រថភ្លើងកាត់ក្រុង ដឹកជញ្ជូនដោយមិនគិតថ្លៃ តាំងពីម្សិលមិញមក មានដំណើរការយ៉ាងរលូនដែរ ហើយក៏ដូចជាមិនសូវចង្អៀត ណែនណាន់តាន់តាប់ដូចសព្វមួយដងសោះ។
សូមបញ្ជាក់ថា ដើម្បីអនុវត្តតាមអនុសាសន៍របស់អាជ្ញាធរ ក្រុមហ៊ុនខ្លះបានស្នើសុំឱ្យបុគ្គលិក ដាក់ពាក្យសុំឈប់សំរាកការងារមួយថ្ងៃ ឬពីរបីថ្ងៃ នៅថ្ងៃចន្ទនេះ និងខ្លះទៀត អនុញ្ញាតឱ្យបុគ្គលិកយកការងារទៅធ្វើនៅផ្ទះ។ រថយន្តធុនធ្ងន់ ត្រូវហាមឃាត់មួយរយៈមិនបើកក្នុងតំបន់ប៉ារីស លើកលែងតែរថយន្តដឹកទំនិញត្រជាក់។ ចំណែកអ្នកនៅភាគខាងត្បូង ការហាមឃាត់ និងបម្រាមទាំងឡាយ ត្រូវបានលើកចេញវិញហើយ នៅព្រឹកថ្ងៃចន្ទនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ