ពិភពកាតូលិកប្រារព្ធបុណ្យណូអែល ក្នុងបរិបទគំរាមកំហែងភេរវកម្ម និងអន្តោប្រវេសន៍
បន្ទាប់ពីបានសូត្រធម៌ប្រោះព្រំ ឆ្លងបុណ្យណូអែលនៅអាធ្រាត្រយប់កំណើតព្រះ នៅថ្ងៃសុក្រ ២៥ ធ្នូនេះ សម្តេចប៉ាប ហ្វ្រង់ស័រ ត្រូវថ្លែងសារប្រសិទ្ធីជាប្រពៃណីដល់ក្រុងនិងពិភពលោក។ បើមើលទៅលើបច្ចុប្បន្នភាពពិភពលោក សារអំពាវនាវនិងផ្តល់ឱវាទ របស់សម្តេចសង្ឃកាតូលិក ត្រូវផ្តោតខ្លាំងទៅលើការគំរាមកំហែងភេរវកម្ម និងលំហូរអន្តោប្រវេសន៍មកកាន់អឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
រវាងអាកាសធាតុក្តៅដូចរដូវផ្ការីក និងការគំរាមកំហែងភេរវកម្មជីហាត ណូអែល២០១៥ ហាក់ដូចជាមិនសូវខ្ទរខ្ទារសោះ។ អ្នកកាន់សាសនាកាតូលិកនៅលើពិភពលោកទាំងមូល បានប្រារព្ធថ្ងៃបុណ្យណូអែល ២៤ធ្នូ ក្រោមបរិយាកាសប្រុងប្រយ័ត្នយ៉ាងខ្លាំង នៅតាមរដ្ឋធានី និងក្រុងធំ ជាពិសេសនៅប៉ារីស និងនៅវ៉ាទីកង់។
តើគេអាចប្រារព្ធពិធីបុណ្យណូអែលដោយអារម្មណ៍ស្ងប់ស្ងាត់បានដែរឬទេ ? បើពិធីបុណ្យនេះ មានការយាមការពារយ៉ាងតឹងរ៉ឹង ខ្លាចមានភេរវកម្ម និងមានអ្នកអត់ឃ្លាន ជាអន្តោប្រវេសន៍ដល់រាប់លាននៅអឺរ៉ុបនោះ ?! ក្នុងអត្ថន័យឧទ្ទិសដល់ហេតុការណ៍នេះហើយ ដែលនៅក្នុងពិធីបុណ្យសូត្រធម៌ពេលយប់ សម្តេចប៉ាប បានអំពាវនាវឱ្យពិភពលោក ប្រារព្ធបុណ្យកំណើតព្រះ ដោយចេះប្រមាណខ្លួន កុំខ្ជះខ្ជាយ កុំភ្លើតភ្លើន កុំសម្ភារៈនិយម ត្រូវចេះស្គាល់តម្លៃនៃជីវិត និងចាប់យកតម្លៃនេះ បានហើយ។
សម្តេចប៉ាបបានអំពាវនាវឱ្យពិភពលោកចេះយល់អំពី តម្លៃនៃយុត្តិធម៌ បិទបញ្ចប់រាល់ការការភ័យនិងការខ្លាច។
នៅក្នុងសារប្រសិទ្ធីទៅកាន់ក្រុងនិងពិភពលោក "Urbi et Orbi" សម្តេចប៉ាប បានគាំទ្រសកម្មភាពរបស់អង្គការសហប្រជាជាតិ ក្នុងការស្វែងរកសន្តិភាពឱ្យស៊ីរី និងលីប៊ី និងបរិហាររាល់គ្រប់ទម្រង់នៃអំពើភេរវនិយម។ សម្តេចប៉ាបក៏សូមសុំពរជ័យពីព្រះឱ្យប្រសិទ្ធី ដល់រដ្ឋ និងដល់រាល់បុគ្គលសាមញ្ញគ្រប់រូប ដែលមានចិត្តសប្បុរសបានជួយសង្គ្រោះ និងទទួលយកជនភៀសខ្លួន ព្រមទាំងបានជួយជនភៀសខ្លួនឱ្យចេះសម្របខ្លួនក្នុងសង្គមមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ