ខួប២ឆ្នាំនៃការផ្តាច់ទឹកដីគ្រីមេចេញពីអ៊ុយក្រែនហើយភ្ជាប់វាមកនឹងរុស្ស៊ី
ចុះផ្សាយនៅថ្ងៃ៖
ស្តាប់ - ០៥:២៦
ពីរឆ្នាំមុនគត់ថ្ងៃ១៨មីនាឆ្នាំ២០១៤នៅរុស្ស៊ីមានប្រព្រឹត្តទៅព្រឹត្តិការណ៍ដែលវិមានក្រេមឡាំងដាក់ឈ្មោះថាការស្តារឡើងវិញយុត្តិធម៌ប្រវត្តិសាស្ត្រដោយរដ្ឋសភារុស្ស៊ីសុខចិត្តយល់ព្រមឲ្យទឹកដីគ្រីមេដែលកាលក្នុងឆ្នាំ១៩៥៤ របូតចេញពីរុស្ស៊ីទៅនៅក្នុងប្រទេសអ៊ុយក្រែន បានត្រឡប់មកស្ថិតនៅក្នុងមាតុភូម៌រុស្ស៊ីវិញទៅតាមសំណូមពរបណ្តាជនរុស្ស៊ី នៅទីនោះដែលក្នុងប្រជាមតិពីរថ្ងៃមុន គឺថ្ងៃ១៦មីនាដោយសំឡេងសឹងជាឯកច្ឆន្ទបានគាំទ្រដល់ការភ្ជាប់ទឹកដីខ្លួនមកនឹងរុស្ស៊ីវិញ។ ប៉ុន្តែ អ.ស.ប. ចាត់ទុកទង្វើរុស្ស៊ីថាខុសច្បាប់ដ្បិតរំលោភលើបូរណភាពដែនដីអ៊ុយក្រែន។ លោកប្រធានាធិបតីអ៊ុយក្រែន ប្រកាសឆ្នាំ២០១៦នេះថាជាឆ្នាំបង្វែរទឹកដីគ្រីមេទៅអ៊ុយក្រែនវិញ។ ក្រុងវ៉ាស៊ីនតោនក្នុងឱកាសខួបនេះ ប្រកាសថាបើម៉ូស្គូមិនប្រគល់គ្រីមេទៅអ៊ុយក្រែនវិញទេនោះអាមេរិកនឹងដាក់ទណ្ឌកម្មរុស្ស៊ីជារៀងរហូត។
មូលហេតុដែលបានញ៉ាំងអាជ្ញាធរសាធារណរដ្ឋគ្រីមេ ឲ្យធ្វើប្រជាមតិ គឺមកពីថ្ងៃ២២កុម្ភៈ ឆ្នាំ២០១៤នោះ នៅក្រុងគៀវមានប្រព្រឹត្តទៅរដ្ឋប្រហារដែលនាំឲ្យឡើងកាន់អំណាចគឺក្រុមមនុស្សបស្ចិមលោកនិយមហើយរើសអើងនិងស្អប់បណ្តាជនដែលរុស្ស៊ីនិយម រស់នៅគ្រីមេ។
ម៉្លោះហើយ បានជាក្នុងប្រជាមតិ ជាង៣សប្តាហ៍ក្រោយមក គឺនៅថ្ងៃ ១៦ មីនា ជុំវិញសំនួរ ៖ តើគួរស្ថិតនៅតទៅទៀតឬទេ ក្រោមអំណាចក្រុងគៀវនោះ “ អ្នកស្រុកគ្រីមេដល់ទៅ ៩៦,៧៧% និងបណ្តាជនក្រុងផែ សេបាស្តូប៉ុល ជាមូលដ្ឋានកងនាវារុស្ស៊ីប្រចាំសមុទ្រខ្មៅ ក្នុងចំនួនច្រើន ដល់ទៅ ៩៥,៦០% សុទ្ធតែបានបោះឆ្នោតគាំទ្រដល់ការភ្ជាប់ទឹកដីគេ មក ជាខេត្តថ្មីពីរ ចំណុះសហព័ន្ធរុស្ស៊ី ហេតុដែលបង្កើនចំនួនខេត្តចំណុះសហព័ន្ធរុស្ស៊ី ឲ្យឡើងពី ៨៣ដល់៨៥ខេត្តឯណោះ។
ក្នុងសុន្ទរកថា ថ្លែងពេលភ្ជាប់គ្រីមេនោះមកនឹងរុស្ស៊ី លោកប្រធានាធិបតីពូទីន បានសង្កត់ធ្ងន់គឺទៅលើក្រុងផែ សេបាស្តូប៉ុល ដោយគាត់គូសបញ្ជាក់ថា គាត់មិនអាចនឹកស្មានទៅកើតឡើយឲ្យថ្ងៃណាមួយ ក្រុងផែនេះ ដែលជាមូលដ្ឋានកងនាវារុស្ស៊ីស្រាប់តែប្រែក្លាយទៅជា មូលដ្ឋានរបស់បក្សសម្ព័ន្ធអូតង់ស្ថិតនៅកៀកជាប់នឹងព្រំដែនខាងត្បូងរបស់រុស្ស៊ីតែម្តងពីព្រោះពួកមេដឹកនាំថ្មីនៅអ៊ុយក្រែន រមែងប្រាថ្នាឲ្យប្រទេសអ៊ុយក្រែនរបស់គេក្លាយមិនគ្រាន់តែជាសមាជិកសហភាពអឺរ៉ុបប៉ុណ្ណោះទេ តែជាពិសេសគឺជាសមាជិកបក្សសម្ព័ន្ធអូតង់គ្រាន់នឹងជួយការពាររដ្ឋនេះពីប្រទេសរុស្ស៊ីនៅជិតខាងដែលតាមសម្តីគេជាប្រទេស”ឈ្លានពាន”។
អំពីការភ្ជាប់ទឹកដីគ្រីមេមកនឹងរុស្ស៊ី ក្រុងម៉ូស្គូតែងថ្លែងថាគឺស្របនឹងច្បាប់អន្តរជាតិ ស្របនឹងធម្មនុញ្ញអ.ស.ប. ដែលអ្នកស្រុកគ្រីមេ តាមផ្លូវប្រជាធិបតេយ្យសុទ្ធសាធ បានធ្វើប្រជាមតិប្រកបដោយបំណងភ្ជាប់ទឹកដីនេះមកនឹងរុស្ស៊ី ហើយម៉ូស្គូពីចំណែកខ្លួនត្រូវតែគោរពចំពោះជម្រើសធ្វើដោយបណ្តាជននោះ ដូច្នេះគឺចាំបាច់ត្រូវតែគន់គិត ដល់សេចក្តីសម្រេចរបស់គេ។
ប៉ុន្តែតាមសំណូមពររបស់គណៈប្រតិភូអ៊ុយក្រែនដែលគាំទ្រដោយបណ្តាប្រទេសខាងលិច នៅថ្ងៃ២៧មីនាឆ្នាំ២០១៤នោះ មហាសន្និបាត អ.ស.ប. បានធ្វើការបោះឆ្នោត ជុំវិញបញ្ហា “បូរណភាពដែនដីអ៊ុយក្រែន” បណ្តាលមកពីប្រជាមតិនៅគ្រីមេ។ លទ្ធផលនៃការបោះឆ្នោតនោះ សឲ្យឃើញថាពីក្នុងចំណោម ១៩៣ប្រទេស-សមាជិកអ.ស.ប. មានដល់ទៅ១០០ប្រទេសដែលចាត់ទុកប្រជាមតិនៅគ្រីមេថាខុសច្បាប់មិនអាចយកជាការឡើយ មានតែ ១១ប្រទេសប៉ុណ្ណោះ ដែលចាត់ទុកប្រជាមតិនោះថាស្របច្បាប់ អាចយកជាការបាន , ចំណែក ៥៨ប្រទេស បានប្រកាន់ឥរិយាបថអនុបវាទ ហើយ ២៤ប្រទេសថែមទាំងមិនព្រមចូលរួម ក្នុងការបោះឆ្នោត ទៅផង ពីព្រោះ សម្រាប់គេ ជាបញ្ហារសើប។
ក្នុងឱកាសខួប២ឆ្នាំនៃការភ្ជាប់យកទឹកដីគ្រីមេដោយរុស្ស៊ី ក្រសួងការបរទេសស.រ.អា. បានចេញ សេចក្តីថ្លែងការណ៍ទាមទារពីរុស្ស៊ី ឲ្យបង្វែរទឹកដីនោះទៅអ៊ុយក្រែនវិញ។ សេចក្តីថ្លែងការណ៍នោះ លើកឡើងថា ទណ្ឌកម្មអាមេរិកប្រឆាំងរុស្ស៊ីនឹងបន្តទៅជានិច្ច ដរាបណាដែលក្រុងម៉ូស្គូ មិនព្រមប្រគល់ ទឹកដីគ្រីមេ ទៅឲ្យអ៊ុយក្រែនវិញទេ។ ថ្លែងនៅពីមុខពួកអ្នកកាសែត ក្នុងក្រុង វ៉ាស៊ីនតោន អ្នកនាំពាក្យផ្លូវការរបស់ក្រសួងការបរទេសអាមេរិក លោក John Kirby ចង្អុលឲ្យ ឃើញថា ក្នុងសតវត្សរ័ទី២១ ការកាត់ចៀរព្រំដែនបែបនេះ គឺជាការមិនអាចទទួលយកបាន ជាដាច់ខាត។ ល្មមដល់ពេលដែលរុស្ស៊ីឈប់ “កាន់កាប់”ដែនដីនេះទៅ។
គឺរដ្ឋសភាអ៊ុយក្រែន ដែលក្នុងសេចក្តីសម្រេចរបស់ខ្លួន ហៅគ្រីមេ ថាជាដែនដី ”ស្ថិតនៅក្រោមការកាន់កាប់បណ្តោះអាសន្ន” របស់រុស្ស៊ី។ កាលពីថ្ងៃ១៤មករាកន្លងទៅ លោកប្រធានាធិបតីអ៊ុយក្រែន ប៉េត្រូ ប៉ូរ៉ូឆេនកូ បានប្រកាស ក្នុង សន្និសីទកាសែតនៅក្រុងគៀវថា ការបង្វែរទឹកដីគ្រីមេទៅអ៊ុយក្រែនវិញ សម្រាប់រដ្ឋអំណាចគាត់ គឺជា អាទិភាពចម្បងទី១ សម្រាប់ឆ្នាំ២០១៦នេះ។ នៅតាមទិដៅនេះ ថែមទាំងមានលេចចេញ មកព័ត៏មានដែលថា ក្រងគៀវបានបង្កើតទៅហើយ ជាអង្កភាពទ័ពពួកជាតិនិយមអ៊ុយក្រែន សម្រាប់រំដោះគ្រីមេ មកវិញ។
ទាក់ទងនឹងរឿងនេះ ក្នុងវេទិកាពិភាក្សាតាមទូរទស្សន៍អំពីបញ្ហាដែលមាន សមាជិកម្នាក់នៃ ព្រឺទ្ធសភារុស្ស៊ី បានព្រមានថា បើអ៊ុយក្រែនចង់មានកងទ័ពខ្លួននៅគង់វង់ដដែល សូមកុំលូកដៃ ចូលគ្រីមេ សោះឡើយ។ មិនតែប៉ុណ្ណោះ ទាំងលោកប្រធានាធិបតីពូទីន ទាំងលោកនាយករដ្ឋមន្ត្រីមេដវេដេវ តែងថ្លែង ហើយថ្លែងទៀតថា សម្រាប់រុស្ស៊ីបញ្ហាគ្រីមេ ឈប់ចោទទៀតឡើយ ក្នុងរបៀបរារៈប្រចាំថ្ងៃ របស់រដ្ឋរុស្ស៊ី។
ស្របនឹងលទ្ធផលនៃការស្ទង់មតិប្រជាពលរដ្ឋរុស្ស៊ី ធ្វើដោយអង្គការសង្គមសាស្ត្ររុស្ស៊ី VSIOM ចេញថ្ងៃ១៧មីនាម្សិលមិញ ពាក់ព័ន្ធនឹងខួប២ឆ្នាំនៃការភ្ជាប់ទឹកដីគ្រីមេ ឥឡូវ ពួកអ្នកដែលមិនសប្បាយចិត្តនឹងការភ្ជាប់យកទឹកដីនេះ គឺធ្លាក់មកនៅត្រឹមតែ ៥%ប៉ុណ្ណោះ។ ជាការប្រៀបធៀប កាលពី២ឆ្នាំមុន តួលេខនេះ មានដល់ ១១%។ ចំណែកអ្នកស្រុករុស្ស៊ីដែលគាំទ្រ ដល់ការភ្ជាប់ គ្រីមេ មកនឹងរុស្ស៊ី ហើយមិនគ្រាន់តែគាំទ្រទេ តែសន្និដ្ឋានថា គ្រីមេ ពិតជារបស់រុស្ស៊ី គឺ បានកើនឡើងពី៨៩% ក្នុងឆ្នាំ២០១៤ ស្ទុះដល់៩៥% ឯណោះ ក្នុងឆ្នាំ ២០១៦នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ