ម៉ូស្គូ មិនគាំទ្រ បុគ្គលអាសាដទេ ម៉ូស្គូគាំទ្រការប្រយុទ្ធទល់នឹងពួកភេរវជននៅស៊ីរី
សេចក្តីនេះ ថ្លែងក្នុងសន្និសីទកាសែត ដោយប្រមុខការទូតរុស្ស៊ី - ប្រទេសដែលរួមជាមួយអាមេរិក ជាសហប្រធាននៃ ក្រុមអន្តរជាតិខាងគាំទ្រស៊ីរី ដែលបានរួមប្រជុំ នៅក្រុង Vienne ម្សិលមិញ ដើម្បីពិភាក្សា បញ្ហាធំៗជាគោល ពាក់ព័ន្ធនឹងស៊ីរី បែបយ៉ាង ទស្សនវិស័យនៃការផ្លាស់ប្តូរអំណាចនៅក្រុងដាម៉ាស ពង្រឹងរបបឈប់បាញ់លើសមរភូមិស៊ីរី កែឲ្យប្រសើរឡើងស្ថានការណ៍ខាងដឹកជំនួយមនុស្សធម៌ទៅផ្គត់ផ្គង់ដល់បណ្តាជនរងគ្រោះ ស្តារឡើងវិញកិច្ចចរចាអន្តរស៊ីរី ក្រោយពីភាគីប្រឆាំងស៊ីរី បានចាកចេញពីក្រុងហ្ស៊ឺណែវទៅ ៤សប្តាហ៍មុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ក្នុង ក្រុមអន្តរជាតិខាងគាំទ្រស៊ីរី នោះ មាន១៧ប្រទេស ពោលគឺ រុស្ស៊ី ស.រ.អា. អ៊ីរ៉ង់ បណ្តាប្រទេសនាំមុខទ្វីបអឺរ៉ុប និង មជ្ឈឹមបូព៌ា។ ក្រោយពីរួមប្រជុំអស់៥ម៉ោង ក្នុងជាន់ថ្នាក់រដ្ឋមន្ត្រីការបរទេស ក្រុម១៧ប្រទេសនោះ បានអនុម័តសេចក្តីថ្លែងការណ៍ ដែលចែងអំពីវិធានការខាងទ្រទ្រង់របបឈប់បាញ់ វិធីដឹកជំនួយមនុស្សធម៌ និងដំណោះស្រាយវិបត្តិស៊ីរី តាមផ្លូវនយោបាយ។
តាមសម្តីលោកប្រមុខការទូតរុស្ស៊ី ស៊ែរហ្គៃ ឡាវ្រ៉ូវ នៅតាមទិសដៅទាំងនេះ មានការចម្រើន ទៅមុខ។ មានទាំងពន្លឺ នាំឲ្យសង្ឃឹមថា កិច្ចចរចាអន្តរស៊ីរី នឹងបន្តឡើងវិញ មុនថ្ងៃទី១មិថុនា។ ម៉ូស្គូ រំពឹងថា ក្នុងកិច្ចចរចានេះ ក៏នឹងមានតំណាងរបស់ជនជាតិគួដស៊ីរី ចូលរួមដែរ។
លោកឡាវ្រ៉ូវ គូសបញ្ជាក់ថា ម៉ូស្គូមិនគាំទ្ររបបនៃបុគ្គលលោក បាស្ហា អាល់ អាសាដ ឡើយ។ អ្វីដែលរុស្ស៊ី គាំទ្រ គឺ ការប្រយុទ្ធទល់នឹងពួកភេរវជននៅលើសមរភូមិស៊ីរីផ្ទាល់ ហើយតាមយោបល់ម៉ូស្គូ ក្នុងការប្រយុទ្ធនេះ គ្មានកម្លាំងណា ដែលមានប្រសិទ្ធិភាពជាក់លាក់ ជាងកងទ័ពរដ្ឋាភិបាលក្រុងដាម៉ាសឡើយ ទោះបីកងទ័ពនេះនៅខ្សោយនៅឡើយ។ លោក ឡាវ្រ៉ូវ ក៏រិះគន់អាជ្ញាធរតួកគី ដែលចេះតែបណ្តោយ ឲ្យមានការដឹកជំនួយយោធា ចេញពីតួកគី ទៅបំប៉នក្រុមភេរវជន នៅស៊ីរី។
ចំណែកភាគីប្រឆាំងស៊ីរី ឈរលើគោលជំហរ ដែលថាកិច្ចចរចាជាមួយរដ្ឋាភិបាលក្រុងដាម៉ាស ដែលនឹងប្រព្រឹត្តទៅឡើងវិញ ក្រោមការឧបត្ថម្ភរបស់ លោក Staffan de Mistura ត្រូវនាំទៅកាន់ការបង្កើតឡើងជា រដ្ឋាភិបាលអន្តរកាល ដោយគ្មានរូបលោកអាសាដទេ ឲ្យបានមុនថ្ងៃ ១ សីហា ដើម្បីបន្ទាប់មក ក្នុង១៨ខែទៅមុខ ចាត់ចែងឡើងជាការបោះឆ្នោតសាកលតែម្តងនៅស៊ីរី។
សេចក្តីថ្លែងការណ៍ចេញនៅក្រុង Vienne ម្សិលមិញ ក៏ប្រមើលឆូតចេញពី កិច្ចព្រមព្រៀងដែលស្តីអំពីការបញ្ឈប់ភាពជាខ្មាំងសត្រូវ ចុះកាលពីខែកុម្ភៈដែលបានជួយឲ្យមានការឈប់បាញ់ បានពីរខែជាប់ គឺក្រុមប្រដាប់អាវុធណាដែលជាប់ពិរុទ្ធក្នុងការរំលោភលើបទឈប់បាញ់នេះ ដោយលែងទទួលបានការការពារទៀតឡើយ។
ខាងមនុស្សធម៌វិញ ឯកសារក្រុង Vienne អនុញ្ញាត ឲ្យទម្លាក់តាមឆ័ត្រយោង នូវស្បៀងសម្រាប់ ផ្គត់ផ្គង់ដល់បណ្តាជនណានៅស៊ីរី ដែលជាប់ក្នុងការឡោមព័ទ្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ