តួកគី៖ភេវកម្មអត្តឃាតចំនួន៣ដងនៅអាកាសយានដ្ឋានអន្តរជាតិស្លាប់ និងរបួសមនុស្សជាច្រើន
ចុះផ្សាយនៅថ្ងៃ៖
ស្តាប់ - ០៦:៣៩
នៅក្នុងប្រទេសតួកគី អាកាសយានដ្ឋានអន្តរជាតិអាតាតួក(Atatürk) ស្ថិតក្នុងទីក្រុងអ៊ីស្តង់ប៊ូលបានក្លាយជាផ្ទាំងស៊ីបនៃការវាយប្រហាររបស់ក្រុមភេរវជននៅយប់ថ្ងៃអង្គារ ទី២៨ មិថុនា។ យោងតាមលោកនាយរដ្ឋមន្រ្តីតួកគីប៊ីណាលី យីលឌីរីម អំពើភេរវកម្មអត្តឃាតនោះបានបណ្តាលឲ្យមានមនុស្សស្លាប់យ៉ាងតិច ៤១នាក់ និងរបួសធ្ងន់ ស្រាលជិត ២៤០នាក់ផ្សេងទៀត។ សហគមន៍អន្តរជាតិបានបញ្ចេញប្រតិកម្មថ្កោលទោសដោយបានចាត់ទុកជាទង្វើដ៏ថោកទាប។ ជាទូទៅ រដ្ឋាភិបាលទីក្រុងអង់ការ៉ាបានទម្លាក់កំហុសដាក់ក្រុមឧទ្ទាម PKK ឬអង្គការរដ្ឋអ៊ីស្លាម។
ព័ត៌មានទាក់ទងនឹងអំពើភេរវកម្មផ្ទួនៗគ្នាចំនួន ៣ដងនៅក្នុងអាកាសយានដ្ឋានអាតាតួកក្នុងប្រទេសតួកគីត្រូវបានប្រាប់ឲ្យដឹងដោយលោកនាយករដ្ឋមន្រ្តីតួកគីប៊ីណាលី យីលឌីរីម។ ថ្លែងនៅក្នុងសន្និសីទកាសែតមួយ លោកយីលឌីរីមបានបញ្ជាក់ថា មានភេរវជនអត្តឃាតយ៉ាងតិច ៣នាក់ដែលបានរៀបចំការវាយប្រហារនោះ។ ភេរវជនអត្តឃាតទាំង ៣នាក់ដែលកាន់អាវុធគ្រប់ដៃ និងពាក់ខ្សែក្រវ៉ាត់ផ្ទុកជាតិផ្ទុះជាប់នឹងខ្លួនបានមកដល់អាកាសយានដ្ឋានតាមឡានតាក់ស៊ីមួយនៅវេលាម៉ោង១០យប់ម៉ោងក្នុងប្រទេសតួកគីក្នុងថ្ងៃអង្គារ ទី២៨ មិថុនាត្រូវជាម៉ោង ២ភ្លឺម៉ោងក្នុងប្រទេសកម្ពុជា។
នៅពេលទៅដល់អាកាសយានដ្ឋានភ្លាម ភេរវជនក៏បានបើកការបាញ់រះលើហ្វូងមនុស្ស រួចបញ្ចប់ជីវិតខ្លួនឯងដោយចុចបំផ្ទុះខ្សែក្រវ៉ាត់បំពាក់ជាតិផ្ទុះជាប់នឹងខ្លួន។ ភេរវជនអត្តឃាតទាំង ៣នាក់បានស្លាប់ ដោយគេមិនទាន់បានដឹងអំពីអត្តសញ្ញាណ និងជនជាតិរបស់គេនៅឡើយទេ។ រីឯព័ត៌មានទាក់ទងនឹងភេរវជនទី៤ ដែលកំពុងរត់គេចខ្លួនមិនត្រូវបានបញ្ជាក់ដោយលោកប្រមុខរដ្ឋាភិបាលតួកគីទេ តែក៏លោកមិនបានឆ្លើយបដិសេធចោលទាំងស្រុងដែរ។ និយាយពីចំនួនជនរងគ្រោះវិញ គឺមានស្លាប់យ៉ាងតិច ៤១នាក់ និងរបួសជិត ២៤០នាក់។ អ្វីដែលកំពុងបន្តស្រពិចស្រពិល និងកំពុងស្ថិតក្នុងការស្រាវជ្រាវ គឺអត្តសញ្ញាណរបស់ជនរងគ្រោះដោយគេនៅមិនទាន់ដឹងថា មានជនជាតិអ្វីខ្លះទេ។
រដ្ឋាភិបាលបានទម្លាក់ការសង្ស័យលើអង្គការរដ្ឋអ៊ីស្លាម
ជិត ២០ម៉ោងក្រោយអំពើភេរវកម្ម នៅមិនទាន់មានចលនា ឬក្រុមណាមួយចេញមុខសារភាពទទួលខុសត្រូវនៅឡើយទេ តែរដ្ឋាភិបាលក្រុងអង់ការ៉ាបានសង្ស័យជាស្នាដៃរបស់អង្គការរដ្ឋអ៊ីស្លាម។ គួរជម្រាបជូនថា រាល់អំពើភេរវកម្មនៅតួកគីកន្លងមកត្រូវបានរដ្ឋាភិបាលទម្លាក់កំហុសទៅលើតែពីរក្រុមគត់ គឺក្រុមជីហាតអង្គការរដ្ឋអ៊ីស្លាម និងក្រុមឧទ្ទាមគួដ PPK ឬមួយក៏ក្រុមឧទ្ទាមផ្សេងដែលស្និទ្ធនឹង PKK។ តែគេមិនត្រូវភ្លេចនិយាយទេថា រាល់អំពើភេរវកម្មនៅក្នុងទឹកដីតួកគី PKK មិនញញើតនឹងចេញមុខសារភាពទេ តែគេកម្រឃើញអង្គការរដ្ឋអ៊ីស្លាមចេញមុខសារភាពជាស្នាដៃរបស់ខ្លួនណាស់។
ជាការពិត និងក៏ដូចជានៅក្នុងអំពើភេរវកម្មចុងក្រោយចំនួនពីរលើកថ្មីៗនេះក្នុងទីក្រុងអ៊ីស្តង់ប៊ូលដែរ រដ្ឋអំណាចតួកគីហាក់ដូចជាប្រញិបប្រញាប់សន្និដ្ឋានភ្លាមៗថា ជាស្នាដៃរបស់អង្គការរដ្ឋអ៊ីស្លាម។ ការហ៊ានអះអាងដូចនេះដោយសារតែសំអាងលើតម្រុយ និងផែនការវាយប្រហារ ព្រោះក្រុម PKK និងអង្គការរដ្ឋអ៊ីស្លាមបានរៀបចំផែនការវាយប្រហារមិនដូចគ្នាទេ ទាំងផ្ទាំងស៊ីប ទីកន្លែង និងរូបភាពទូទៅ។ រូបភាពនៃការវាយប្រហារលើអាកាសយានដ្ឋាននៅក្នុងក្រុងអ៊ីស្តង់ប៊ូលនៅយប់ថ្ងៃទី២៨ មិថុនា គឺស្រដៀនគ្នាបិះបិតនឹងរូបភាពនៃការវាយប្រហារនៅអាកាសយានដ្ឋានក្នុងទីក្រុងព្រុចសែល ប្រទេសបែលហ្ស៊ិកកាលពីថ្ងៃទី២២ មីនាកន្លងទៅ និងដែលអង្គការរដ្ឋអ៊ីស្លាមបានចេញមុខសារភាពថាជាស្នាដៃរបស់ពួកគេ។
ផ្ទាំងស៊ីបរបស់អង្គការរដ្ឋអ៊ីស្លាម គឺជនបរទេស និងទីកន្លែងយុទ្ធសាស្ត្រសំខាន់ៗ ដូចយ៉ាងអាកាសយានដ្ឋាន ស្ថានីយ៍រថភ្លើងដោយធ្វើយ៉ាងណា បង្កើតឲ្យមានបរិយាកាសតក់ស្លុត និងភ័យខ្លាចក្រោមទ្រង់ទ្រាយធំដែលធ្វើឲ្យពិភពលោកចាប់អារម្មណ៍ខ្លាំង។
ហេតុអ្វីបានជាតួកគីកំពុងក្លាយជាផ្ទាំងស៊ីបនៃការវាយប្រហាររបស់អង្គការរដ្ឋអ៊ីស្លាម?
ក្រៅពីជាផ្ទាំងស៊ីបនៃការវាយប្រហាររបស់អង្គការរដ្ឋអ៊ីស្លាម តួកគីក៏កំពុងបន្តក្លាយជាផ្ទាំងស៊ីបនៃការវាយប្រហាររបស់ក្រុមឧទ្ទាម PKK និងក្រុមផ្សេងទៀតដែលស្និទ្ធនឹង PKK ដែរ។ ចលនា PKK ដែលកំពុងកាន់កាប់ដែនដីស្វយ័តមួយក្នុងទឹកដីតួកគីបានធ្វើការតស៊ូប្រដាប់អាវុធប្រឆាំងនឹងរដ្ឋាភិបាលតួកគីតាំងពីឆ្នាំ ១៩៨៤។ ជារឿយៗ ក្រុមឧទ្ទាមមួយនេះតែងតែចូលទៅបង្កភេរវកម្មនៅក្នុងទីក្រុងអង់ការ៉ា និងទីក្រុងអ៊ីស្តង់ប៊ូលដោយបណ្តាលឲ្យស្លាប់ និងរបួសមនុស្សយ៉ាងច្រើន ហើយជារឿយៗ រដ្ឋាភិបាលក្រុងអង់ការ៉ាក៏មិនញញើតនឹងប្រើកម្លាំងបាយដើម្បីវាយបកវិញទេ។
ជម្លោះរវាងរដ្ឋាភិបាលតួកគី និង PKK ជាជម្លោះផ្ទៃក្នុងអូសបន្លាយ។ តែទន្ទឹមគ្នានេះ គេក៏ត្រូវហ៊ានទទួលស្គាល់ថា ដែនដីតួគកីក៏ជាជម្រកលួចលាក់មួយយ៉ាងសំខាន់របស់អង្គការរដ្ឋអ៊ីស្លាម។ ពួកជីហាតអង្គការរដ្ឋអ៊ីស្លាមបានប្រើប្រាស់ទឹកដីតួកគីដើម្បីឆ្លងចេញ ចូលក្នុងទឹកដីស៊ីរី និងអ៊ីរ៉ាក់។ ក្រៅពីនេះ នៅមានពលរដ្ឋតួកគីវ័យក្មេងប្រមាណពី ៣ ទៅ ៤ពាន់នាក់បានរត់ទៅចូលរួមជាមួយអង្គការរដ្ឋអ៊ីស្លាមនៅស៊ីរី ហើយពួកនេះបានវិលចូលស្រុកវិញ រួចបង្កភេរវកម្ម។
បន្ទាប់មក នៅមានពួកជីហាតជនបរទេសផ្សេងទៀតដែលបានបាក់ទ័ពពីស៊ីរី និងអ៊ីរ៉ាក់ចូលមកសំងំក្នុងទឹកដីតួកគី។ សូមជម្រាបជូនថានារយៈពេលចុងក្រោយនេះ អង្គការរដ្ឋអ៊ីស្លាមបានទទួលបរាជ័យ និងបាត់បង់ទឹកដីជាច្រើននៅស៊ីរី និងអ៊ីរ៉ាក់ដោយសារតែអន្តរាគមន៍របស់កម្លាំងសម្ព័ន្ធមិត្តអន្តរជាតិ។ ដូច្នេះចង់ ឬមិនចង់ តួកគីកំពុងក្លាយជាទឹកដីជ្រកកោណ និងការគំរាមរបស់ពួកជីហាតអង្គការរដ្ឋអ៊ីស្លាម។ គ្រាន់តែជិត ២ឆ្នាំកន្លងទៅ តួកគីទទួលរងគ្រោះភេរវកម្មមិនតិចជាង ១០លើក និងបានផ្តាច់ជីវិតមនុស្សជិត ៣០០នាក់ និងរបួសជិត ១ ០០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ