អាមេរិកព្រួយបារម្ភនឹងសុវត្ថិភាពអាវុធនុយក្លេអ៊ែរស្តុកទុកទៅតួកគី
ចុះផ្សាយនៅថ្ងៃ៖
ស្តាប់ - ០៦:០៩
ក្រុមអ្នកវិភាគនយោបាយអាមេរិកនៃមជ្ឈមណ្ឌល Stimson Center បានចេញរបាយការណ៍មួយនៅថ្ងៃចន្ទនេះ បង្ហាញពីក្តីព្រួយបារម្ភ ខ្លាចអាវុធនុយក្លេអ៊ែរ ជាច្រើនសិបគ្រាប់ លាក់ទុកក្នុងឃ្លាំងនៅប្រទេសតួកគី ធ្លាក់ក្នុងកណ្តាប់ដៃពួកភេរវនិយម ឬក្រុមប្រដាប់អាវុធ ដែលមាននិន្នាការប្រឆាំងនឹងអាមេរិក។ ឃ្លាំងស្តុកអាវុធនុយក្លេអ៊ែរនេះ ស្ថិតនៅក្នុងមូលដ្ឋានទ័ពអាកាសអាមេរិក Incirkik ក្នុងទឹកដីតួកគី តែមិនឆ្ងាយប៉ុន្មានពីព្រំប្រទល់ប្រទេសស៊ីរី។
សម្រែកទាមទារ ឱ្យគិតគូរដល់សុវត្ថិភាពនៃឃ្លាំងរក្សាអាវុធនុយក្លេអ៊ែរ នៅតួកគី ក្នុងមូលដ្ឋានទ័ពអាកាសអាមេរិក Incirlik ដែលស្ថិតនៅចម្ងាយតែប្រមាណ១១០គីឡូម៉ែត្រពីស៊ីរី មិនមែនជារឿងថ្មីថ្មោងទេ។ ប៉ុន្តែក្តីព្រួយបារម្ភ និងការតស៊ូមតិស្តីពីអាវុធនុយក្លេអ៊ែរនេះ បានផ្ទុះឡើងជាថ្មី និងកាន់តែខ្លាំងបន្ថែមទៀត ក្រោយពីតួកគីបានឆ្លងកាត់រដ្ឋប្រហារមិនបានសម្រេចនៅ ថ្ងៃទី ១៥កក្កដា ២០១៦។
ក្រុមអ្នកវិភាគនិងសិក្សានយោបាយ Stimson Center បានទាញសញ្ញាអាសន្នជាថ្មី បង្ហាញពីមិនទុកចិត្ត ព្រោះមើលមិនឃើញថា តើអាមេរិកអាចរក្សា ក្តោបក្តាប់ និងត្រួតត្រាអាវុធដ៏គ្រោះថ្នាក់បំផុតនៅលើលោកបានយ៉ាងដូចម្តេចឡើយ ប្រសិនបើសង្គ្រាមស៊ីវិលអូសបន្លាយពេលវេលាយូរនៅតួកគីនោះ។
មូលដ្ឋានទ័ពអាកាសអាមេរិក Incirlik លើទឹកដីតួកគីនេះ ជាមូលដ្ឋានទ័ពប្រកបដោយយុទ្ធសាស្ត្របំផុតសម្រាប់កងទ័ពសម្ព័ន្ធមិត្តអន្តរជាតិ ដឹកនាំដោយវ៉ាស៊ីនតោន ដែលកំពុងប្រយុទ្ធប្រឆាំងនឹងពួកអង្គការរដ្ឋអ៊ីស្លាម ព្រោះមានទីតាំងល្អ អាចបង្ហោះយន្តហោះចេញទៅវាយប្រហារចំណុចដៅសត្រូវនៅស៊ីរី និងអ៊ីរ៉ាក់ បានយ៉ាងឆាប់រហ័ស។
ប៉ុន្តែតាំងពីខែមីនាមក ក្រោមមូលហេតុសុវត្ថិភាព មន្ទីរបញ្ចកោណបានបញ្ជាឱ្យជម្លៀសគ្រួសារយោធា បុគ្គលិកស៊ីវិល ប្រចាំនៅតំបន់ភាគខាងត្បូងតួកគីនេះ។ មេបញ្ជាការតួកគីប្រចាំមូលដ្ឋាននេះ ក៏ត្រូវបានអាជ្ញាធរអង់ការ៉ា ចាប់ខ្លួនទៀត ដោយជាប់ចោទថាបានផ្សំគំនិតគាំទ្រធ្វើរដ្ឋប្រហារមិនសម្រេចប្រឆាំងនឹងលោក អ៊ែរដូហ្កាន។
សម្រាប់ម្ចាស់របាយការណ៍ ដែលជំរុញឱ្យអាមេរិកគួរតែដកគ្រាប់បែកអាតូមិចB៦១ចេញពីតួកគីតែម្តង គេមិនគួរបណ្តោយរក្សាទុកអាវុធនុយក្លេអ៊ែរជាង៥០គ្រាប់នៅ មូលដ្ឋាន Incirlikឡើយ គឺ ដូចជាប្រថុយនឹងគ្រោះថ្នាក់ពេកណាស់ បើទោះបីជាមនុស្សការពារច្រើនមែន តែហានិភ័យនៅតែមានខ្ពស់ដដែល។
លេខសម្ងាត់បញ្ចៀសមហន្តរាយ
រហូតមកទល់ពេលនេះ អាមេរិកអាចគេចផុតពីមហន្តរាយនុយក្លេអ៊ែរបានរហូតមក ! ប៉ុន្តែក៏មានភស្តុតាង និងក៏កត្តាក្រៅជាច្រើនផ្សេងទៀត ដែលបញ្ជាក់ថាសុវត្ថិភាពនៃការស្តុកអាវុធនុយក្លេងអ៊ែរអាមេរិក នៅតួកគី អាចប្តូរផ្លាស់ ភ្លាមភ្លែត នៅថ្ងៃនេះឬថ្ងៃស្អែកក៏បាន។ ព្រោះបើក្នុងករណីមានរដ្ឋប្រហារផ្ទុះឡើងបានសម្រេច តើពេលនោះគេប្រាកដជាពិបាកកំណត់បានណាស់ ថាតើខាងណាជាអ្នកគ្រប់គ្រងមូលដ្ឋានទ័ពនោះ។
ប៉ុន្តែក្រសួងការពារជាតិអាមេរិក បានអះអាងថាបានចាត់វិធានការសមស្រប សម្រាប់ធានាសុវត្ថិភាពទាំងបុគ្គលិក ទាំងទីតាំងស្តុកអាវុធ។ ហើយបើតាមអ្នកឯកទេស បើទោះបីជាអាវុធនោះត្រូវបានធ្លាក់ទៅដល់ដៃនរណា ក៏គ្មានហានិភ័យអ្វីដែរ ព្រោះអាវុធនុយក្លេអ៊ែរទាំងនោះសុទ្ធតែមានលេខកូត លេខសំងាត់ -មិនអាចប្រើបានដោយគ្មានការអនុញ្ញាតពីវ៉ាស៊ីនតោនទេ។
យ៉ាងណាក៏ដោយ ក៏ក្តីព្រួយបារម្ភចំពោះមូលដ្ឋាន Incirlik មានចុះនៅក្នុងជំពូកដ៏ធំមួយនៃកម្មវិធីធ្វើទំនើបកម្មនុយក្លេអ៊ែររបស់ក្រសួងការពារជាតិអាមេរិក ដែលវ៉ាស៊ីនតោនត្រូវចំណាយដល់ទៅរាប់ពាន់លានដុល្លារ ដើម្បីឱ្យអាវុធនុយក្លេអ៊ែរអស់នោះដើរទាន់បច្ចេកវិទ្យាពីមួយឆ្នាំទៅមួយឆ្នាំ។
អាវុធនុយក្លេអ៊ែរកម្លាសត្រូវ
អាមេរិកបានសម្រេចចិត្តយកអាវុធនុយក្លេអ៊ែរ ទៅស្តុកទុកក្នុងឃ្លាំងនៃមូលដ្ឋានទ័ពអាមេរិក Incirlik ប្រទេសតួកគីនេះ ដំបូងឡើងគឺក្នុងបំណងកម្លាគូប្រជែងរុស្ស៊ីផង និងដើម្បីបង្ហាញពីឆន្ទៈដ៏មុតមាំរបស់អាមេរិកក្នុងរង្វង់អង្គការអូតង់ ដែលក៏មានតួកគីជាសមាជិកជាប្រវត្តិសាស្ត្រមួយដែរ។
ការប្រកួតប្រជែងផលិតអាវុធបែបប្រល័យលោក បានប្រដេញគ្នាខ្លាំងនៅពេលសហភាពសូវៀតបានកកើតនិងចាប់មានអាវុធនុយក្លេអ៊ែរ។ ពេលនោះអាមេរិកមានអាវុធនុយក្លេអ៊ែរគ្រប់ប្រភេទប្រមាណជា ៣១២៥៥ តែដល់សម័យសង្គ្រាមត្រជាក់ អាមេរិកបង្កើតផលិតអាវុធនុយក្លេអ៊ែរ មួយទ្វេជាពីរ មានអាទិ៍ គ្រាប់បែក គ្រាប់ផ្លោង ក្បាលគ្រាប់ ... សរុប៦៤ប្រភេទ។ ប៉ុន្តែតាំងពីសង្គ្រាមត្រជាក់បានបញ្ចប់ទៅ អាមេរិកបានកាត់បន្ថយ រួចបញ្ឈប់ការផលិតអាវុធនុយក្លេអ៊ែរ ចាប់ពីឆ្នាំ១៩១ ឬ១៩៩២ មុននឹងចាប់រើបឡើងវិញខ្លះៗនៅឆ្នាំ២០០៧។
អាមេរិកនិងរុស្ស៊ី បានផ្តួចផ្តើមគំនិតរំសាយអាវុធនុយក្លេអ៊ែរនេះ តែការចរចានៅតែមិនទាន់សម្រេចលទ្ធផល។ តែបើទោះបីជាពុំទាន់មានការរំសាយមែន ក៏តាំងពីឆ្នាំ២០០៤មក អាមេរិកបានយកសព្វាវុធនុយក្លេអ៊ែរទាំងនោះបញ្ជូលក្នុងបញ្ជីអាវុធអសកម្ម។ នៅឆ្នាំ២០១៥ គេរាប់ឃើញអាមេរិកមានក្បាលគ្រាប់នុយក្លេអ៊ែរ ៤៧១៧គ្រាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ