ប្រទេសអៀរឡង់ព្រួយបារម្ភចំពោះផែនការយកពន្ធលើប្រាក់ចំណេញសហគ្រាសរបស់លោក ដូណាល់ ត្រាំ
ចុះផ្សាយនៅថ្ងៃ៖
ស្តាប់ - ០៤:១១
ក្រោយពីបានជាប់ឆ្នោតជាប្រធានាធិបតីអាមេរិកទី ៤៥ លោក ដូណាល់ ត្រាំ មិនទាន់លាតត្រដាងផែនការសេដ្ឋកិច្ចរបស់រដ្ឋាភិបាលខ្លួននៅឡើយទេ។ម្នាក់ៗកំពុងទន្ទឹងរង់ចាំចង់ដឹងទិសដៅសេដ្ឋកិច្ចរបស់រដ្ឋាភិបាលថ្មី។ ប៉ុន្តែអ្វីដែលគេជឿជាក់ច្បាស់នោះ គឺលោក ដូណាល់ ត្រាំ មានផែនការបន្ថយអត្រាពន្ធលើប្រាក់ចំណេញរបស់សហគ្រាសក្នុងស្រុក។លើសពីនេះ លោកក៏គ្រោងបញ្ជុះអត្រាពន្ធមកនៅត្រឹមតែ ១០% ប៉ុណ្ណោះ ប្រសិនបើក្រុមហ៊ុនអាមេរិកណាចង់ផ្ទេរលុយចំណេញរបស់ខ្លួននៅក្រៅប្រទេសត្រលប់ចូលក្នុងស្រុកវិញ។ផែនការសេដ្ឋកិច្ចបែបការពារប្រយោធន៍អាមេរិកបែបនេះកំពុងតែធ្វើអោយអ្នកនយោបាយប្រទេសអៀរឡង់ភ័យព្រួយយ៉ាងខ្លាំង។
ក្នុងកំឡុងយុទ្ធនាការឃោសនាបោះឆ្នោតកន្លងមក ប្រធានាធិបតីទើបជាប់ឆ្នោតរូបនេះបានប្រកាសក្តែងៗហើយថា គាត់នឹងធ្វើកំណែទម្រង់ផែ្នកសារពើរពន្ធលើសហគ្រាស។ នៅក្នុងអត្ថបទមួយចុះផ្សាយកាលពីថ្ងៃសុក្រ ទី១១ វិចិ្ឆការ ដោយសារព័ត៌មាន Financial Times លោក Anthony Scaramucci ទីប្រឹក្សាសេដ្ឋកិច្ចរបស់លោក ដូណាល់ ត្រាំ បាននិយាយបញ្ជាក់ថា លោកប្រធានាធិបតីអាមេរិកថ្មីគ្រោងបញ្ជុះអត្រាពន្ធលើប្រាក់ចំណេញសហគ្រាសពី ៣៥% មកនៅតែ ១៥% ប៉ុណ្ណោះ។
លើសពីនេះ រដ្ឋាភិបាលថ្មីរបស់លោក ត្រាំ ក៏មានផែនការជំរុញលើកទឹកចិត្តអោយក្រុមហ៊ុនអាមេរិកធំៗធ្វើការបង្វិលលុយរបស់ខ្លួន ដែលតំកល់ទុកនៅបរទេសអោយត្រលប់ចូលមកសហរដ្ឋអាមេរិកវិញ។ រដ្ឋាភិបាលនឹងផ្តល់អត្រាពន្ធអនុគ្រោះលើការផ្ទេរលុយចូលក្នុងស្រុកវិញនេះគឺ ១០% ចំពោះក្រុមហ៊ុនទូទៅ។ ហើយក្រុមហ៊ុនអាមេរិកត្រូវរួសរាន់ផ្ទេរលុយត្រលប់មកវិញជាបន្ទាន់ បើចង់ទទួលបានអត្រាទាបបែបនេះ ព្រោះរយៈពេលអនុគ្រោះនេះមានកំណត់។
ផែនការពន្ធបែបនេះរបស់លោក ដូណាល់ ត្រាំ កំពុងតែធ្វើអោយថ្នាក់ដឹកនាំនយោបាយប្រទេសអៀរឡង់ព្រួយបារម្ភយ៉ាងខ្លាំង។ លោក Michael McGrath ជាអ្នកតំណាងរាស្រ្តអៀរឡង់ម្នាក់ ដែលបានសំដែងការភ័យព្រួយនេះមុនគេ។ នៅលើបណ្តាញសង្គម Twitter លោកបានអះអាងថា ផលវិបាកនឹងជះឥទ្ធិពលអាកក្រក់មកលើសេដ្ឋកិច្ចប្រទេសអៀរឡង់។ លំហូរវិនិយោគបរទេស ជាពិសេសវិនិយោគអាមេរិក គឺមានសារៈសំខាន់ណាស់សំរាប់ប្រទេសអឺរ៉ុបមួយនេះ។ បច្ចុប្បន្ននេះ ជោគជ័យសេដ្ឋកិច្ចរបស់ប្រទេសអៀរឡង់រំពឹងលើអត្រាពន្ធសហគ្រាស ដែលមានកំរិតទាបបំផុត ពោល គឺត្រឹមតែ ១២,៥% ប៉ុណ្ណោះ។
ហើយប្រសិនបើសហរដ្ឋអាមេរិកសំរេចចិត្តបន្ថយអត្រាពន្ធសហគ្រាសអោយមកនៅកំរិតទាប ក្រុមហ៊ុនអាមេរិកអាចនឹងផ្ទេរសកម្មភាពអាជីវកម្មរបស់ខ្លួនចេញពីប្រទេសអៀរឡង់ត្រលប់ទៅទឹកដីអាមេរិកវិញ។ ទន្ទឹមគ្នានោះផងដែរ សាច់ប្រាក់មួយចំនួននឹងធ្វើមាតុភូមិនិវត្តន៍ទៅសហរដ្ឋអាមេរិកវិញ។ ហេតុដូចនេះ រដ្ឋាភិបាលអៀរឡង់កំពុងប្រុងប្រយ័ត្នខ្លួន ហើយតាមដានបញ្ហានេះយ៉ាងល្អិតល្អន់បំផុត។ នៅក្នុងបទសម្ភាន៍មួយជាមួយសារព័ត៌មានបារាំង Le Monde លោក Tom White អ្នកជំនាញផែ្នកហិរញ្ញវត្ថុប្រចាំក្រុមហ៊ុនផ្តល់ប្រឹក្សាយោបល់ Gloabal Counsel ដែលមានមូលដ្ឋាននៅទីក្រុងឡុងដ៍ ប្រទេសអង់គ្លេសបានអោយដឹងថា វិនិយោគអាមេរិកបច្ចុប្បន្ននៅប្រទេសអៀរឡង់នឹងមិនប៉ះពាល់ទេ។ ប៉ុន្តែ លំហូរវិនិយោគសំរាប់ថ្ងៃអនាគតនឹងចុះថយយ៉ាងគំហុក។
អាមេរិកមានអត្រាពន្ធសហគ្រាសខ្ពស់បំផុត
ហេតុអ្វីក្រុមហ៊ុនអាមេរិកធំៗបង្កើតការិយាល័យអាជីវកម្មនៅបរទេស ឬរក្សាទុកប្រាក់ចំណេញនៅធនាគារបរទេស? ចំលើយ គឺរដ្ឋាភិបាលអាមេរិកដាក់កំរិតអត្រាពន្ធខ្ពស់លើប្រាក់ចំណេញប្រចាំឆ្នាំរបស់ក្រុមហ៊ុន។ ដើម្បីទាក់ទាញការវិនិយោគរបស់ក្រុមហ៊ុនអាមេរិក ឬប្រទេសដ៏ទៃ ប្រទេស និងដែនដីមួយចំនួនបានបង្កើតនយោបាយឋានសួគ៌គេចពន្ធ។ មានន័យថា ក្រុមហ៊ុនធំៗអាចចុះបញ្ជីអាជីវកម្មក្នុងទឹកដីនេះ ហើយអាចតំកល់ប្រាក់ និងរក្សាប្រាក់ចំណេញក្នុងធនាគារ។
តាមរយៈនយោបាយនេះ ប្រាក់ចំណេញទាំងប៉ុន្មានរបស់ក្រុមហ៊ុនទាំងនោះនឹងមិនចាំបាច់បង់ពន្ធឡើយ ឬក៏អាចបង់ពន្ធក្នុងកំរិតអត្រាទាបប៉ុណ្ណោះ។ ឧទាហរណ៍ដូចជាប្រទេសប៉ាណាម៉ា, កោះ Cayman និង កោះ Virgin របស់ប្រទេសអង់គ្លេសជាដើម ដែលសុទ្ធសឹងតែជាទិសដៅដ៏ពេញនិយមរបស់ក្រុមហ៊ុនអាមេរិកធំៗ។ ក្នុងរយៈពេលប៉ុន្មានទសវត្សន៍កន្លងមកនេះ ដែនដីឋានសួគ៌គេចពន្ធទាំងនោះបានរីករាយដុះដាលដូចផ្សិត។
យោងតាមរបាយការណ៍ក្រុមហ៊ុនផ្តល់ប្រឹក្សាយោបល់សេដ្ឋកិច្ច Capital Economics បានអោយដឹងថា សព្វថ្ងៃនេះ ក្រុមហ៊ុនអាមេរិកធំៗមានសាច់ប្រាក់ចំនួន ២ ៥០០ កោដិដុល្លាររក្សាទុកនៅក្រៅទឹកដី សហរដ្ឋអាមេរិក។ ចំនួនទឹកប្រាក់ដ៏មហាសាលនេះ គឺស្មើនឹង ១៤% នៃផលិតផលដុលសរុប (PIB) របស់អាមេរិក។ ក្រុមហ៊ុន Apple ត្រូវបានគេដឹងថាជាក្រុមហ៊ុនដែលសកម្មបំផុត ក្នុងការតំកល់សាច់ប្រាក់របស់ខ្លួនក្រៅទឹកដីអាមេរិក។ សព្វថ្ងៃនេះ ក្រុមហ៊ុន Apple មានសាច់ប្រាក់ចំនួន ២០០ កោដិដុល្លារនៅបរទេស។ កន្លងមក លោក Tim Cook ប្រធានក្រុមហ៊ុនស្លាកសញ្ញាផ្លែប៉ោមនេះបានថ្លែងអះអាងជាច្រើនដងហើយថា ប្រសិនបើអត្រាពន្ធផ្ទេរសាច់ប្រាក់ចំណេញសហគ្រាសចូលទឹកដីអាមេរិកនៅតែខ្ពស់បែបនេះ លោកនឹងមិនធ្វើមាតុភូមិនិវត្តន៍សាច់ប្រាក់ទាំងនោះចូលក្នុងគណនីធនាគារអាមេរិកឡើយ។
កំណែទម្រង់ប្រព័ន្ធសារពើរពន្ធជាអាទិភាព
ដើម្បីសំរេចបំណងបន្ថយអត្រាពន្ធនេះ ជាបឋម លោក ដូណាល់ ត្រាំ ត្រូវធ្វើកំណែទម្រង់ប្រព័ន្ធសារពើរពន្ធសហគ្រាសជាមុនសិន។ បន្ទាប់មក លោកត្រូវសុំការអនុម័តពីសភា។ បើតាមលោក Jon Taub អ្នកជំនាញប្រចាំក្រុមហ៊ុន Deloitte បានវិភាគថា កំណែទម្រង់នេះអាចលេចចេញជារូបរាង ដោយសារតែគណបក្សសាធារណរដ្ឋមានសមាជិកសភាភាគច្រើនលើសលុបនៅសភាទាំងពីរថ្នាក់។ ហើយកំណែទម្រង់នេះនឹងជះឥទ្ធិពលដល់ប្រព័ន្ធសារពើរពន្ធពិភពលោកទាំងមូល។ និយាយបែបសាមញ្ញ កំណែទម្រង់អាមេរិកអាចបង្កជាសង្គ្រាមផែ្នកអត្រាពន្ធរវាងប្រទេសនានា។ ប្រទេសនិមួយៗអាចនឹងបញ្ជុះអត្រាពន្ធរបស់ខ្លួន ដើម្បីទាក់ទាញការវិនិយោគបរទេស ជាពិសេសវិនិយោគអាមេរិក។
កំណែទម្រង់អាមេរិកបែបនេះអាចនឹងក្លាយជាដំណឹងអាក្រក់សំរាប់អង្គការសហប្រតិបត្តិការ និងអភិវឌ្ឈន៍សេដ្ឋកិច្ច (OCDE)។ សូមបញ្ជាក់ថា រយៈពេលប៉ុន្មានឆ្នាំចុងក្រោយនេះ អង្គការអន្តរជាតិមួយនេះបានព្យាយាមសំរបសំរួលបង្កើតប្រព័ន្ធសារពើរពន្ធស្រដៀងគ្នាមួយរវាងប្រទេសសមាជិក ដែលភាគច្រើនជាប្រទេសអភិវឌ្ឈន៍មានសេដ្ឋកិច្ចលូតលាស់។
ការចរចារវាងប្រទេសនានាត្រូវបានធ្វើឡើងយ៉ាងតឹងតែងបំផុត។ ហើយកាលពីកិច្ចប្រជុំប្រទេស G20 កាលពីឆ្នាំ២០១៥ ថ្នាក់ដឹកនាំប្រទេសទាំងនោះបានអនុម័តផែនការនេះ។ ប៉ុន្តែ ប្រព័ន្ធសារពើរពន្ធអាមេរិកថ្មីរបស់លោក ដូណាល់ ត្រាំ អាចបង្កអោយផែនការនេះបរាជ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ