លទ្ធផលដ៏ភ្ញាក់ផ្អើលនៃការបោះឆ្នោតជ្រើសរើសបេក្ខជនប្រធានាធិបតីបក្សស្តាំនិយមបារាំង
ចុះផ្សាយនៅថ្ងៃ៖
ស្តាប់ - ០៨:០៩
អតីតប្រធានាធិបតីបារាំង លោក នីកូឡា សាកូហ្ស៊ី Nicolas Sarkozy ដែលបានវិលមកឈរឈ្មោះជាបេក្ខជនប្រធានាធិបតីជាថ្មី សម្រាប់បក្សស្តាំនិងកណ្តាលនិយម បានទទួលបរាជ័យយ៉ាងជូរចត់តាំងពីជុំទីមួយតែម្តង។ ខុសពីការស្ទង់មតិ លោក ហ្វ្រង់ស័រ ហ្វីយ៉ុង François Fillon អតីតនាយករដ្ឋមន្ត្រីពីឆ្នាំ២០០៧-២០១២ បានទទួលសំឡេងគាំទ្រយ៉ាងខ្លាំង (៤៤,១%) វិះតែនឹងឈ្នះដាច់ ក្លាយជាបេក្ខជនប្រធានាធិបតីបក្សស្តាំនិងកណ្តាលនិយមទៅហើយ។ ចំណែកលោក អាឡាំង ហ្ស៊ុបប៉េ Alain Juppé ដ៏ពេញនិយមតាំងពីដំបូង បានទទួលការគាំទ្រចំនួន២៨,៥%។
សេណារីយ៉ោ ដែលគ្រប់គ្នាប្រមើល និងព្យាករណ៍ ឃើញ វត្តមានលោក នីកូឡា សាកូហ្ស៊ី នៅជុំទីពីរប្រឈមនឹងលោក អាឡាំង ហ្ស៊ុបប៉េ ត្រូវរលុបចោលទាំងស្រុង។ ការស្ទង់មតិ ដែលធ្លាប់តែលោកហ្វីយ៉ុង ឈ្នះត្រឹមកំរិត ៩ ទៅ១១% បានបង្ហាញពីការស្ទុះឡើងរបស់លោក ហ្វីយ៉ុងដែរនារយៈពេល១៥ថ្ងៃចុងក្រោយ តែមិននឹកស្មានដល់ថាឡើងជិតឈ្នះដាច់តែម្តងសោះ។
គ្មានអ្នកកាសែត គ្មានអ្នកស្ទង់មតិ គ្មានមតិសាធារណៈ ឬនិយាយជារួមគឺគ្មាននរណាម្នាក់សោះ បានគិតនិងនឹកឃើញដល់ជោគជ័យរបស់លោក ហ្វីយ៉ុង តែនៅទីបំផុត លោក ហ្វ្រង់ស័រ ហ្វីយ៉ុង ដែលធ្លាប់ចាញ់ក្រាបនៅគ្រប់ការប្រយុទ្ធក្នុងបក្ស -ធ្លាប់ត្រូវបានគេបង្អាប់បន្តុះកាលនៅជានាយករដ្ឋមន្ត្រីរបស់លោកនីកូឡា សាកូហ្ស៊ី ថាត្រុយៗចាំតែគេដឹក ស្រាប់តែបានទទួលសំឡេងគាំទ្រ ដល់ទៅជាង៤៤% នាំមុខឆ្ងាយដាច់ស្រឡះពីគូប្រជែងផ្សេងៗទៀត។
ចុះតើគេអាចពន្យល់បានយ៉ាងដូចម្តេចទៅអំពីជោគជ័យដ៏ត្រចះត្រចង់របស់លោក ហ្វីយ៉ុង ?
សម្រាប់អ្នកវិភាគ លទ្ធផលដ៏ភ្ញាក់ផ្អើលនេះ គឺជាជោគជ័យរបស់លទ្ធិប្រជាធិបតេយ្យ និងបញ្ជាក់ថាពលរដ្ឋបារាំងមិនស្ថិតក្រោមអំណាចឬគំរូនយោបាយ គូសវាសដោយបក្ស និងបំពុលដោយប្រព័ន្ធឃោសនាព័ត៌មាន ដែលសម្រួចទៅលើគូប្រជែងសាកូហ្ស៊ី-ហ្ស៊ុបប៉េ។
ក្នុងពេលដែលគូប្រជែងដ៏មានប្រជាប្រិយភាព សាកូហ្ស៊ី-ហ្ស៊ុបប៉េ មួយគូនេះវាយប្រហារគ្នាទៅវិញមក អ្នកធ្វើឃោសនានយោបាយពិតប្រាកដ ដូចយ៉ាងលោក ហ្វីយ៉ុង ត្រូវតែឈ្នះ។ ព្រោះលោកបានប្រើពេលឃោសនានោះមកពន្យល់បំភ្លឺទិសដៅដឹកនាំនយោបាយរបស់ខ្លួន ដោយប្រើភាសាឃោសនាសាមញ្ញ បង្ហាញតម្លៃជាអ្នកអភិរក្ស និងបង្ហាញផែនការសេដ្ឋកិច្ចបែបសេរី លើកស្ទួយប្រទេសឱ្យមានកំណើនឡើងវិញ ឱ្យពលរដ្ឋបានយល់។
លោកនីកូឡា សាកូហ្ស៊ី ដែលសង្ឃឹមយ៉ាងមុតមាំ ថានឹងអាចវិលមកកាន់ឆាកនយោបាយ នឹងបានក្លាយជាប្រធានាធិបតីជាថ្មី មកសងសឹកលោក ហូឡង់ ពិតជាលំបាកធ្វើចិត្តបន្តិចហើយ នៅពេលត្រូវដើរចេញពីសង្វៀនតាំងពីជុំទីមួយយ៉ាងដូច្នេះ !
ប៉ុន្តែទោះចាញ់យ៉ាងជូរចត់ និងបាក់មុខខ្លាំងយ៉ាងណាក៏ដោយ ក៏អតីតប្រធានាធិបតីរូបនេះ បានចេញធ្វើសុន្ទរកថានយោបាយលា យ៉ាងសក្តិសម និងប្រកបដោយកិត្តិយសបំផុត។
សុន្ទរកថារបស់លោក នីកូឡា សាកូហ្ស៊ី ទទួលស្គាល់បរាជ័យក្នុងសម័យបោះឆ្នោតបេក្ខជនប្រធានាធិបតីបក្សស្តាំនិងកណ្តាលនិយម
លោក ហ្វីយ៉ុង លើវិថីនៃជោគជ័យ នៅជុំទីពីរ ?
នៅក្នុងនយោបាយ គេមិនអាចបូកដកលេខ ហើយប្រកាសជាលាយលក្ខណ៍អក្សរថានរណាជាអ្នកឈ្នះជាចាញ់ជាមុនបានទេ ! នៅក្នុងពេលនេះ ថ្វីបើលោក ហ្វីយ៉ុង បានទទួលការគាំទ្រភ្លាមពីលោក នីកូឡា សាកូហ្ស៊ី ដែលធ្វើឱ្យលោករឹតតែមានជំហររឹងប៉ឹង មានចលនាកាន់តែសកម្ម និងធ្វើឱ្យគូប្រជែង លោក ហ្ស៊ុបប៉េ កាន់តែជួបការលំបាក តែដរាបណា ម្ខាងទៀតមិនប្រកាសបោះបង់ចោលសង្វៀនទេ គ្មាននរណាអាចប្រកាសជោគជ័យបាន តាំងខ្លួនជាបេក្ខជនប្រធានាធិបតីរបស់បក្សបានឡើយ។
អ្វីៗត្រូវចាប់ផ្តើមជាថ្មីទៀតហើយ ចាប់ពីថ្ងៃនេះទៅ។ ហេតុដូច្នេះហើយបានជានៅពេលថ្លែងសុន្ទរកថាដំបូងយប់មិញ ក្រៅអំពីផ្តល់តម្លៃពិសេសដល់លោក នីកូឡា សាកូហ្ស៊ី ថាការចាញ់ឆ្នោត មិនមែនជាបង្អាប់បន្តុះមក លោក ហ្វីយ៉ុង បានប្រកាសចេញធ្វើយុទ្ធនាការបន្តទៀត។ លោក ហ្វីយ៉ុង ៖
ប្រសាសន៍របស់លោក ហ្វ្រង់ស័រ ហ្វីយ៉ុង
សម្រាប់លោក អាឡាំង ហ្ស៊ុបប៉េ ពេលវេលានៃការឃោសនានយោបាយ កម្មវិធីទល់នឹងកម្មវិធី បានមកដល់និងចាប់ផ្តើម ! លោកសង្ឃឹមលើការតស៊ូមតិនៅថ្ងៃព្រហស្បតិ៍ក្រោយ ដែលជាឱកាសព្រលាត់និងប្រៀបធៀបកម្មវិធីនយោបាយរបស់លោក ជាមួយកម្មវិធីរបស់លោកហ្វីយ៉ុង សម្រាប់ទាញនិន្នាការឆ្នោតឱ្យងាកមកខាងលោក។ លោក ក៏សង្ឃឹមថា បើបោះឆ្នោតថ្ងៃអាទិត្យនេះ បានបង្កភាពភ្ញាក់ផ្អើល ជាមួយការនាំមុខរបស់លោកហ្វីយ៉ុង នៅសប្តាហ៍ក្រោយក៏នឹងអាចមានការភ្ញាក់ផ្អើលមួយទៀត មកខាងលោកម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ