លោក ហ្វ្រង់ស័រ ហូឡង់ ប្រកាសមិនឈរឈ្មោះជាប្រធានាធិបតីបារាំងអាណត្តិថ្មី
ចុះផ្សាយនៅថ្ងៃ៖
លោក ហ្វ្រង់ស័រ ហូឡង់ ប្រធានាធិបតីបារាំង ដ៏អប្រជាប្រិយភាពបំផុតក្នុងប្រវត្តិសាធារណរដ្ឋបារាំង បានប្រកាសនៅល្ងាចមិញ មិនឈរឈ្មោះជាបេក្ខជនប្រធានាធិបតី ដើម្បីប្រជែងយកតំណែងនៅអាណត្តិថ្មីទេ។ ជាសេចក្តីប្រកាសដែលពុំធ្លាប់មានប្រធានាធិបតីបារាំងណាធ្លាប់ធ្វើទាល់សោះ ក្នុងប្រវត្តិសាស្ត្របារាំងសម័យថ្មី។
នៅយប់មិញ លោកប្រធានាធិបតីបារាំងបានធ្វើសុន្ទរកថាតាមកញ្ចក់ទូរទស្សន៍ រយៈពេលប្រមាណ១០នាទី ក្នុងសំឡេងដ៏សក្តិសមជាប្រមុខរដ្ឋ ពន្យល់ប្រាប់ពលរដ្ឋអំពីតុល្យការការងារ៥ឆ្នាំរបស់លោក ក្នុងការលើកស្ទួយប្រទេស និងធ្វើប្រទេសមានយុត្តិធម៌ខ្លាំង ៖ ហិបរដ្ឋលែងក្រហត ការធានារ៉ាប់រងសង្គមក៏មានលំនឹង បំណុលរដ្ឋក៏មិនកើន គំរូសង្គមក៏បានប្រសើរ ពលរដ្ឋអាចចូលនិវត្តន៍នៅអាយុ៦០ឆ្នាំ ...
ប៉ុន្តែលោកសោកស្តាយចំពោះការចង់បង្កើតច្បាប់ដកសញ្ជាតិបារាំងពីភេរវជន។ និយាយចេញទៅហើយបែរធ្វើមិនកើត ត្រូវដកសំដីវិញ ព្រោះវាបានធ្វើឱ្យបារាំងបែកបាក់គ្នា។ ការសោកស្តាយមួយទៀត គឺលោកធ្លាប់បានសន្យាខកទៅហើយ ! តាំងពីនៅជាបេក្ខជននិងរហូតមកទល់នឹងពាក់កណ្តាលឆ្នាំ២០១៦នេះទៀត លោកប្រធានាធិបតី នៅតែទន្ទេញពាក្យដដែលៗ ថានឹងបញ្ចុះអត្រាអ្នកអត់ការងារធ្វើ ! ជោគវាសនានយោបាយរបស់លោក ផ្អែកទាំងស្រុងលើលទ្ធផលនៃការផ្តល់ការងារឱ្យពលរដ្ឋ។ តែផលបានធ្លាក់មកយឺតជាងអ្វីដែលលោកធ្លាប់បានប្រកាស។ លោកយល់អំពីហានិភ័យ ហើយដើម្បីប្រយោជន៍ជាតិជាធំ ព្រមទាំងដើម្បីកិត្តិនាមបារាំង ទើបលោកសម្រេចចិត្ត មិនឈរឈ្មោះជាបេក្ខជនប្រធានាធិបតីជាថ្មី។
អប្រជាប្រិយភាពខ្លាំងពេក ?
ថ្វីបើលោក ហ្វ្រង់ស័រ ហូឡង់ គ្មានប្រសាសន៍អ្វីទាក់ទងនឹងប្រជាប្រិយភាពលោកក៏ដោយ តែសព្វថ្ងៃនេះ មានប្រជាពលរដ្ឋបារាំងប្រមាណ៧,៥%ប៉ុណ្ណោះគាំទ្រលោក។ ហើយលោកធ្លាក់ចំណាត់ថ្នាក់ដល់ទី៥ ក្នុងស្ទង់មតិបើប្រៀបទៅនឹងបេក្ខជនប្រធានាធិបតីមកពីបក្សប្រឆាំងនិងបក្សផ្សេងទៀត។ ប្រសិនបើលោកស្ម័គ្រចិត្តឈរឈ្មោះជាបេក្ខជនប្រធានាធិបតីជាថ្មី លោកត្រូវឆ្លងកាត់វិញ្ញាសារបស់បក្ស ដែលលោកបានកំណត់ដោយខ្លួនឯង គឺឆ្លងកាត់ការបោះឆ្នោតជ្រើសរើសបេក្ខជនសិន។ នៅក្នុងការបោះឆ្នោតនេះ បើតាមការស្ទង់មតិ ក៏លោកស្ថិតនៅលំដាប់ទីបីដែរ បានន័យចាញ់កូនចៅក្នុងបក្សឯងទៀត។
រវាងការដកខ្លួននៅពេលនេះ និងការទទឹងរុលទៅមុខប្រឈមនឹងគ្រោះជួបបរាជ័យ-បរាជ័យខ្លួនឯងផង បរាជ័យដល់បក្សផង តើគេជ្រើសយកមួយណា ? លោកទំនងជាគិតដល់បញ្ហានេះ ទើបសម្រេចមិនធ្វើដូចលោក នីកូឡា សាកូហ្ស៊ី ដែលចាញ់ឆ្នោតម្តងហើយ វិលមកប្រកួតប្រជែងជាថ្មី ហើយត្រូវចាញ់ម្តងទៀតនោះទេ។
ដូច្នេះហើយបានជាបក្សនិងអ្នកគាំទ្របានចាត់ទុកសេចក្តីសម្រេចរបស់លោក ហូឡង់ ថាក្លាហាន និងភ្លឺស្វាង។ តែសម្រាប់បក្សប្រឆាំងពួកគេតែងពាក្យរិះគន់ជានិច្ច ជាន់បន្ថែមថា លោកហ្វង់ស័រ ហូឡង់ ទទួលស្គាល់បរាជ័យ -បរាជ័យក្នុងនយោបាយដឹកនាំប្រទេសមួយអាណត្តិ (នេះជាប្រសាសន៍របស់លោកហ្វ្រង់ស័រហ្វីយ៉ុង បេក្ខជនប្រធានាធិបតីបក្សប្រឆាំងស្តាំនិយម)។
លោកហូឡង់ និងលោកសាកូហ្ស៊ី នៅក្រៅសង្វៀនទាំងទ្វេ
នេះជាលើកទីមួយដែលប្រធានាធិបតីកាន់អំណាច បានសម្រេចមិនចូលប្រកួតប្រជែងដើម្បីសាកល្បងដណ្តើមយកអាណត្តិទីពីរ។ មិនតែប៉ុណ្ណោះនេះក៏លើកទីមួយដែរ សម្រាប់ប្រវត្តិសាស្ត្របារាំងសម័យសាធារណរដ្ឋ ដែលការបោះឆ្នោតប្រធានាធិបតីនៅខែឧសភា ខាងមុខ នឹងគ្មានបេក្ខជនធ្លាប់កាន់អំណាចកំពូលឈរឈ្មោះសោះ។ លើកលែងតែកាលពីឆ្នាំ១៩៧៤ ដែលកាលណោះប្រធានាធិបតី Pompidou បានទទួលមរណភាពពេលកំពុងកាន់អំណាច ឯចំណែកនៅឆ្នាំ២០០៧ លោកJacques Chirac មិនបន្តបេក្ខភាពមែន តែលោកបានកាន់អំណាចបានពីរអាណត្តិរួចមកហើយ។
មានប្រធានាធិបតីបារាំងខ្លះទៀត ក៏បានកាន់អំណាចតែមួយអាណត្តិដែរ តែសុទ្ធបានចាញ់ឆ្នោតនៅពេលប្រកួតយកអាណត្តិទីពីរ ជាឧទាហរណ៍ជាក់ស្តែង គឺលោកនីកូឡា សាកូហ្ស៊ី ដែលត្រូវយកឈ្នះដោយលោកហ្វ្រង់ស័រ ហូឡង់ នេះតែម្តង។ ចម្លែកតែលោក ហូឡង់ ដែលមានសិទ្ធិឈរឈ្មោះជាស្វ័យប្រវត្តិសោះ បែរជាសម្រេចដកខ្លួនមិនឈរឈ្មោះជាថ្មីដោយខ្លួនឯងទៅវិញ។ ពិតជាពុំធ្លាប់មានឡើយ ក្នុងប្រវត្តិបារាំង !
នៅក្នុងការបោះឆ្នោតប្រធានាធិបតីបារាំងឆ្នាំ២០១៧នេះ គ្រប់គ្នារង់ចាំមើលសង្គ្រាម ហូឡង់-សាកូហ្ស៊ី ដែលមានវ័យស្របាលគ្នា ស្គាល់គ្នាច្បាស់ អើអញក្នុងជីវិតឯកជន តែសំលៀងអាវុធប្រយុទ្ធគ្នាស៊ីដាច់ហុតឈាមក្នុងនយោបាយដណ្តើមកៅអីប្រធានាធិបតី បែរជាត្រូវអវត្តមានទាំងព្រម។ កាលពី១២ថ្ងៃមុន អតីតប្រធានាធិបតីនីកូឡា សាកូហ្ស៊ី ដែលសង្ឃឹមបានសងសឹកលោកហូឡង់ នៅខែឧសភា២០១៧ ត្រូវខ្ទាតពីសង្វៀងឆ្នោតតាំងពីជុំទីមួយ។ ថ្ងៃនេះ លោកហូឡង់ប្រកាសដើរចេញពីការប្រកួតទៀត។
ប្រធានាធិបតីដកថយ បើកផ្លូវឱ្យនាយករដ្ឋមន្ត្រី Manuel Valls
មានឥស្សរជនឆ្វេងនិយមច្រើននាក់ហើយបានប្រកាសបេក្ខភាពចង់ឈរឈ្មោះប្រធានាធិបតី តែគេនឹងអាចដឹងច្បាស់ ជាប្រាកដ ខែមករា ក្រោយការបោះឆ្នោតជ្រើសរើសបេក្ខជនបក្ស។ ប៉ុន្តែគ្រប់គ្នាកំពុងផ្តោតចក្ខុទៅលើលោក នាយករដ្ឋមន្ត្រី ម៉ានុយអែល វ៉ាល្ស ដែលមានប្រជាប្រិយភាពជាងគេ បើប្រៀបទៅនឹងឥស្សរជនក្នុងបក្ស និងដែលមិនលាក់អំពីមហិច្ឆតាចង់ឈរឈ្មោះជាជាបេក្ខជនប្រធានាធិបតីឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ