មន្ត្រីប៉ូលិសតួកគីម្នាក់ បាញ់សម្លាប់ឯកអគ្គរដ្ឋទូតរុស្ស៊ីប្រចាំអង់ការ៉ា
លោក អង់ដ្រៃ ការឡូវ Andreï Karlov ឯកអគ្គរដ្ឋទូតរុស្ស៊ីប្រចាំតួកគី តាំងពីឆ្នាំ២០១៣មក ត្រូវបានខ្មាន់កាំភ្លើងបាញ់សម្លាប់ កាលពីថ្ងៃទី ១៩ ធ្នូ ពេលកំពុងថ្លែងសុន្ទរកថាបើកសម្ពោធសិល្បៈ នៅក្រុងអង់ការ៉ា។ លោកប្រមុខការទូត បានទទួលមរណភាព នៅពេលដឹកទៅសង្គ្រោះបន្ទាន់នៅមន្ទីរពេទ្យ! មនុស្សបីនាក់ផ្សេងទៀត បានរងរបួស ក្នុងទង្វើនេះ។ ចំណែកខ្មាន់កាំភ្លើងត្រូវបាន សម្លាប់នៅកន្លែងភ្លាមដែរ។ អ្នកនាំពាក្យ ក្រសួងការបរទេសរុស្ស៊ីបានចាត់ទុក អំពើភេរវកម្ម។ ប៉ុន្តែគ្មានក្រុមណាចេញមុខប្រកាសទទួលស្គាល់ទង្វើមនុស្សឃាតនេះនៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ជារូបភាពដ៏គួរឱ្យរន្ធត់ ! មានអាយុទើបតែ ២២ឆ្នាំ មេវលូត មើត អាល់តាំងតាស Mevlüt Mert Altintas ជាប៉ូលិសបានប្រែខ្លួនជាខា្មន់កាំភ្លើងជីហាត។
បានមកឈរក្បែរលោក ឯកអគ្គរដ្ឋទូតរុស្ស៊ីប្រចាំទីក្រុងអង់ការ៉ា តាំងពីកម្មវិធីចាប់ភ្លាម ក្នុងទម្រង់ជាអង្គរក្ស គ្រាន់តែលោកប្រមុខការទូត ចាប់ផ្តើមឡើងថ្លែងសុន្ទរកថាភ្លាម ស្រាប់តែ ជននេះ បានលើកដៃមួយចង្អុលមេឃ ស្រែកថាមកសងសឹងឱ្យក្រុងអាឡិបស៊ីរី រួចដកកាំភ្លើងខ្លី បាញ់ឡើងលើមួយគ្រាប់ និងជាច្រើនគ្រាប់ លើលោកឯកអគ្គរដ្ឋទូត ពីក្រោយខ្នង។
ប្រមុខការទូតរុស្ស៊ីបានដួលខ្ពោក ខ្មាន់កាំភ្លើងបានស្រែកជាភាសាអារ៉ាប ឧទ្ទិសដល់សកម្មភាពជីហាតរបស់ខ្លួន “អាឡា អាល់បាកា” អំពាវនាវហៅពួកជីហាតទាំងអស់ “កុំភ្លេចស៊ីរី កុំភ្លេចអាឡិប ! និងជាភាសាតួកគីនូវឃ្លាដ៏ល្បីរបស់អូសាម៉ា បិនឡាដិនថា បើពលរដ្ឋស៊ីរីគ្មានសុវត្ថិភាព អ្នកឯងក៏មិនបានសុខដែរ”។
ភ្លាមមួយរំពេច ប៉ូលិសប្រឆាំងភេរវកម្មតួកគី បានមកដល់កន្លែងកើតហេតុ នៅម្តុំម៉ោង ៧និង៥នាទីយប់ ម៉ោងនៅអង់ការ៉ា។ ការបាញ់រះតទល់គ្នាបានផ្ទុះឡើង។ កងកម្លាំងអន្តារាគមន៍ពិសេស ក៏ត្រូវបានបញ្ជូនមកបន្ថែមដើម្បីជាជំនួយ ទម្រាំកម្ចាត់ខ្មាន់កាំភ្លើងបាន ព្រោះត្រូវគ្រាប់ស្ទើរសុះពេញខ្លួន។
ជាប៉ូលិសប្រចាំការិយាល័យអង្គរក្សនៅក្រុងអង់ការ៉ា មេវលូត មើត អាល់តាំងតាស គ្មានភារកិច្ចត្រូវចូលទៅសម្ពោធពិព័រណ៍សិល្បៈជាមួយគណៈប្រតិភូរុស្ស៊ីទេ តែបានប្រើអត្តសញ្ញាណបណ្ណជាប៉ូលិស ដើម្បីបន្លំខ្លួនចូលទៅក្នុងកន្លែងបារព្ធកម្មវិធី ដោយអះអាងថាជាអង្គរក្សរបស់លោកប្រមុខការទូត។ ក្រោយហេតុការណ៍នេះភ្លាម ប៉ូលិសក៏បានទៅឆែកឆេរដល់ផ្ទះ និងចាប់ខ្លួនឪពុកម្តាយនិងបងស្រី ព្រមទាំងមនុស្សបីនាក់ផ្សេងទៀត មកសួរចម្លើយ និងឃុំឃាំងបណ្តោះអាសន្ន។
អាជ្ញាធរតួកគីក៏បានបង្កើនការពង្រឹងសន្តិសុខ នៅតាមស្ថានទូតនានា ព្រោះថា ក្រោយឃាតកម្មលើរូបឯកអគ្គរដ្ឋទូតរុស្ស៊ី តែប៉ុន្មានម៉ោង គេឃើញមានការបាញ់រះដោយចេតនា នៅមុខស្ថានទូតអាមេរិក ដែលប៉ូលិសចាប់ខ្លួនខ្មាន់កាំភ្លើងបានភ្លាមមួយរំពេច។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ