ភេរវកម្មប៊ែរឡាំង ជាសម្ពាធថ្មីសង្កត់លើលោកស្រីមែរកិល
ចុះផ្សាយនៅថ្ងៃ៖
ស្តាប់ - ០៤:០០
ភេរវជនបើកឡានកាមីញ៉ុងកិនមនុស្សនៅទីក្រុងប៊ែរឡាំង ថ្ងៃទី ១៩ ធ្នូ មិនទាន់ត្រូវបានចាប់ខ្លួន និងកំណត់អត្តសញ្ញាណច្បាស់លាស់ទេ ប៉ុន្តែការវាយប្រហារភេរវកម្មនេះ បានបំផុសឱ្យមានរឿងអាស្រូវជុំវិញនយោបាយមេត្តាធម៌ទទួលជនភៀសខ្លួនរបស់លោកស្រីមែលកិល ជាថ្មី។ លោកស្រីប្រមុខរដ្ឋាភិបាលអាល្លឺម៉ង់ ដែលទើបស្តារប្រជាប្រិយភាពបានបន្តិចឡើងវិញ ត្រូវរងសម្ពាធថ្មី និងកាន់ធ្ងន់ធ្ងរខ្លាំង។
សោកនាដកម្មនៅផ្សារណូអែលក្រុងប៊ែរឡាំង ថ្ងៃទី ១៩ ធ្នូ អាចចាត់ទុកថាភេរវកម្មជីហាតអ៊ីស្លាមជ្រុលនិយម “ពិតៗដំបូង” ដែលអាល្លឺម៉ង់បានជួបប្រទះ។ ពីមុនមក អាល្លឺម៉ង់តែងរឹងមាំ បង្ហាញជំហរឱ្យគេជឿថាភេរវកម្មអាចកើតឡើងតែក្នុងប្រទេសផ្សេង មិនមែនអាល្លឺម៉ង់។ អាល្លឺម៉ង់ធ្លាប់រងការវាយប្រហារភេរវកម្មជាញឹកញយដងមែន នារយៈពេលប៉ុន្មានខែចុងក្រោយនេះ ប៉ុន្តែមានទម្រង់តូចតាចទម្រង់ទោល មិនមែនជាការគំរាមកំហែងជាក់ស្តែងទ្រង់ទ្រាយធំឡើយ។
ប៉ុន្តែពេលនេះ អាល្លឺម៉ង់អាចនិយាយបាន ពេលមុន និងក្រោយភេរវកម្មថ្ងៃទី១៩ធ្នូ ! ជាការវាយប្រហារចំបេះដូង រដ្ឋធានី ត្រង់ចំណុចប្រកបដោយនិម្មិត្តរូបបីយ៉ាង ៖ ទីមួយផ្សារណូអែល ជាតំណាងវប្បធម៌ប្រពៃណីយូរលង់ប្រកាន់ខ្ជាប់ខ្លាំងនៅអាល្លឺម៉ង់ជាងប្រទេសអឺរ៉ុបផ្សេងទៀត ទីពីរកន្លែងកើតហេតុនៅចំពីមុខវិហារកាតូលិក ល្បីទូទាំងពិភពលោកដែលមានជួងបែក ក្នុងសម័យសង្គ្រាមលោកលើកទីពីរ និងចុងក្រោយទីលាននេះ ស្ថិតនៅចំងាយតែពីរជំហានពីមហាវិថីនិងសង្កាត់ពាណិជ្ជកម្មដែល ប្រមូលផ្តុំទៅដោយហាងម៉ាកអន្តរជាតិល្បីៗរបស់លោកខាងលិច ក្នុងសម័យសង្គ្រាមត្រជាក់។
ដោយសារតែហេតុផលខាងលើ បានជារដ្ឋាភិបាលអាល្លឺម៉ង់ ត្រូវរងគំនាបខ្លាំងគ្មានប្រៀប។ ទម្ងន់សម្ពាធដ៏ធ្ងន់នេះធ្លាក់ជាដំបូងលើរូបលោកស្រីអង់ហ្គឺឡា មែរកិល ដែលទើបប្រកាសថ្មីថ្មោង ថានឹងឈរឈ្មោះជាប្រមុខរដ្ឋាភិបាលលើកទីបួន នៅក្នុងការបោះឆ្នោតនាខែកញ្ញា ឆ្នាំ២០១៧ខាងមុខ។
លោកស្រីបានដឹងយ៉ាងច្បាស់ណាស់រួចមកហើយថា ដើម្បីអាចទាក់ទាញ និងជាប់ឆ្នោតជាថ្មីបាន ល្គិកណាតែលោកស្រីសម្រេចឱ្យបានជោគជ័យអ្វីជារូបភាពរបស់លោកស្រីពីមុន នោះគឺលោកស្រីជាប្រមុខរដ្ឋាភិបាលដែលការពារប្រយោជន៍អាល្លឺម៉ង់និយម លោកស្រីអាចការពារសន្តិសុខជាតិ ប្រឈមនឹងការគំរាមកំហែងភេរវកម្ម ប្រសើរជាងការពារអាល្លឺម៉ង់ប្រឈមនឹងវិបត្តិអឺរ៉ូ។
ប៉ុន្តែក្នុងរយៈពេលមួយឆ្នាំនេះ អាល្លឺម៉ងត្រូវរងគ្រោះមួយហើយមួយទៀត ដែលបង្កឱ្យពលរដ្ឋចាប់ផ្តើម មិនទុកចិត្តលើចំណាត់ការរបស់លោកស្រី។ កាលពីយប់ថ្ងៃបុណ្យឆ្លងឆ្នាំ ស្ត្រីជាង១២០០នាក់ រងការបំពារបំពានផ្លូវភេទពីសំណាក់ជនអន្តោប្រវេសន៍មិនស្គាល់មុខ។ នៅខែកក្កដា អាល្លឺម៉ង់រងការវាយប្រហារបួន ពីសំណាក់ជនភៀសខ្លួន ក្នុងនោះពីរត្រូវបានប្រកាសទទួលស្គាល់ជាស្នាដៃអង្គការរដ្ឋអ៊ីស្លាម។ លោកស្រីមែរកិលបានចាត់វិធានការជាបន្ទាន់៩ចំណុច ដើម្បីត្រួតពិនិត្យឱ្យកាន់ល្អិតល្អន់លើលំហូរអន្តោប្រវេសន៍ និងប្រយុទ្ធប្រឆាំងកម្ចាត់បណ្តាញផ្តាច់ខ្លួនជ្រុលនិយមអ៊ីស្លាម ព្រមទាំងបង្កើនល្បឿនបញ្ជូនជនភៀសខ្លួនមិនបំពេញសិទ្ធិសុំជ្រកកោនចេញក្រៅព្រំដែន។
អាជ្ញាធរអាល្លឺម៉ង់ក៏បានបញ្ចេញកម្លាំងបាយ បើកយុទ្ធនាការទ្រង់ទ្រាយស្រាវចាប់បណ្តាញអ៊ីស្លាមចាំអូសទាញមនុស្សទៅធ្វើជីហាតបានជាច្រើននាក់ ដើម្បីផ្តល់ទំនុកចិត្តដល់ពលរដ្ឋ ប៉ុន្តែការប្រើកម្លាំងមិនគ្រប់គ្រាន់នឹងបោសសម្អាតពួកជ្រុលនិយមទេ អាល្លឺម៉ង់នៅតែស្ថិតក្នុងភាពងាយរងគ្រោះដដែល។ ជាក់ស្តែង កាលពីចុងខែវិច្ឆកា គេបានវែករកឃើញមានជនអ៊ីស្លាមជ្រុលនិយមម្នាក់បង្កប់ខ្លួនក្នុងភ្នាក់ងារចារកិច្ចនៃក្រសួងមហាផ្ទៃ។ នៅថ្ងៃទី២ធ្នូ ជនសុំសិទ្ធិជ្រកកោនជាតិអាហ្វហ្កានីស្ថានម្នាក់ត្រូវចាប់ខ្លួនពីបទចាប់រំលោភស្ត្រី ហើយកាលពី៥ថ្ងៃមុនកុមារអាយុ១២ឆ្នាំដើមកំណើតអ៊ីរ៉ាក់ ប៉ុនប៉ងធ្វើភេរវកម្មបំផ្ទុះគ្រាប់បែកដែកគោល ...
ឥលូវមានភេរវកម្មនៅប៊ែរឡាំងទៀត ! ភេរវកម្មនេះត្រូវតែជះឥទ្ធពលអាក្រក់ដល់នយោបាយខ្លាំង ព្រោះវាបាននិងកំពុងនាំលោកស្រីមែរកិលឱ្យធ្លាក់ក្នុងអន្ទាក់ខ្លួនឯង។ មួយឆ្នាំចុងក្រោយនេះ លោកស្រីបានផ្តល់អាទិភាពដល់សន្តិសុខ តែបែរជាប្រទេសត្រូវរងការវាយប្រហារចំបេះដូងទៅវិញ។ សម្រាប់ក្រុមអ្នកប្រឆាំង អ្នកដែលមានទោសគឺលោកស្រីមែរកិលនេះតែម្តង ! ការរិះគន់មិនមែនហូរមកពីខាងទិសអ្នកប្រឆាំងទេ សូម្បីតែមែកធាងក្នុងបក្សតែមួយក៏បានដំឡើងសំឡេងប្រឆាំងដែរ អំពីហានិភ័យនៃដំណើរមកដល់យ៉ាងគំហុករបស់ជនភៀសខ្លួនចូលអឺរ៉ុប និងអាល្លឺម៉ង់។
ហើយនៅសល់តែប្រមាណ១០ខែទៀតប៉ុណ្ណោះ អាល្លឺម៉ង់នឹងត្រូវរៀបចំបោះឆ្នោតសភា។ ដូច្នេះលោកស្រី មែរកិល ពិតជានឹងត្រូវបានភ្លក្សរសជាតិនៃយុទ្ធនាការឃោសនាដ៏លំបាក និងតានតឹងបំផុត ដែលលោកស្រីមិនធ្លាប់ឆ្លងកាត់កាលពីបីអាណត្តិមុនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ