ភេរវកម្មនៅអាល្លឺម៉ង់៖មានស្លាប់យ៉ាងតិច ១២នាក់ និងរបួសធ្ងន់ ស្រាល ៤៨នាក់
ចុះផ្សាយនៅថ្ងៃ៖
ស្តាប់ - ០៦:៤០
នៅក្នុងប្រទេសអាល្លឺម៉ង់ មានមនុស្សស្លាប់យ៉ាងតិច ១២នាក់ និងរបួសធ្ងន់ស្រាលចំនួន ៤៨នាក់ផ្សេងទៀតនៅក្នុងហេតុការណ៍ឡានកាមីញ៉ុងមួយគ្រឿងបានបើកសំដៅផ្សារណូអែលមួយក្នុងទីក្រុងប៊ែរឡាំងនាយប់ថ្ងៃចន្ទ ទី១៩ ធ្នូ។ នៅមិនទាន់មានជន ឬក្រុមណាមួយចេញមុខសារភាពជាស្នាដៃរបស់ខ្លួនទេ តែរដ្ឋអំណាចអាល្លឺម៉ង់បានចាត់ទុកជាទង្វើភេរវនិយម។ ប្រតិកម្មថ្កោលទោសពីអន្តរជាតិបានបន្តធ្លាក់មកជាបន្តបន្ទាប់។ ព្រឹត្តិការណ៍នៅទីក្រុងប៊ែរឡាំងពេលនេះមានលក្ខណៈ និងទ្រង់ទ្រាយដូចគ្នាបិះបិតនឹងភេរវកម្មក្នុងទីក្រុងនីស ប្រទេសបារាំងកាលពីថ្ងៃទី១៤ កក្កដា។
នៅវេលាម៉ោង ៨យប់ម៉ោងក្នុងប្រទេសអាល្លឺម៉ង់នាថ្ងៃចន្ទ ទី១៩ ធ្នូ មានឡានកាមីញ៉ុងពណ៌ខ្មៅមួយគ្រឿងបានបើកសំដៅទីផ្សារមួយលក់អីវ៉ាន់ក្នុងឱកាសបុណ្យណូអែលស្ថិតក្នុងទីក្រុងប៊ែរឡាំង។ ឡានកាមីញ៉ុងបានបើកបុករបាំងសុវត្ថិភាពចូលក្នុងទីលានផ្សារនោះក្នុងចម្ងាយពី ៥០ ទៅ ៨០ម៉ែត្រ មុននឹងឈប់មួយកន្លែង ហើយអ្នកបើកបរក៏បានចុះពីឡានដើម្បីរត់គេចខ្លួនដែរ។ តែរត់បានប្រមាណជា ២គីឡូម៉ែត្រក៏ត្រូវកម្លាំងប៉ូលិស និងកម្លាំងសន្តិសុខព័ទ្ធស្ទាក់ក្របួច កជាប់។ ឧប្បត្តិហេតុនោះបានកើតមានឡើង ចំពេលមានមនុស្សជាច្រើនកំពុងដើរលេងនៅក្នុងទីផ្សារនោះ។
តុល្យការចុងក្រោយបណ្តោះអាសន្នឲ្យដឹងថា មានមនុស្សស្លាប់យ៉ាងតិច ១២នាក់ និងរបួសធ្ងន់ ស្រាល ៤៨នាក់។ តែគេនៅមិនទាន់ដឹងថា តើជនរងគ្រោះទាំងអស់នោះមានជនជាតិអ្វីខ្លះទេ។ តាមសាក្សីដែលបានឃើញហេតុការណ៍ផ្ទាល់ភ្នែកនៅយប់មិញឲ្យដឹងថា ក្នុងចំណោមជនរងគ្រោះក៏មានកូនក្មេងជាច្រើននាក់ដែរ។ ក្រោយពីក្របួច ក អ្នកបើកបរភ្លាម ប៉ូលិចក៏បានចូលឆែកឆេរក្នុងឡានកាមីញ៉ុង ហើយស្រាប់តែឃើញមនុស្សម្នាក់ស្លាប់ក្នុងកាប៊ីនអ្នកបើកបរ។
ប៉ូលិសបានប្រាប់ឲ្យដឹងថា ឡានកាមីញ៉ុងនោះមានស្លាកលេខប៉ូឡូញ ម្ចាស់របស់ឡានជាជនជាតិប៉ូឡូញ ហើយបុរសរកឃើញស្លាប់ក្នុងកាប៊ីនអ្នកបើកបរក៏ជាជនជាតិប៉ូឡូញដែលត្រូវគេបាញ់សម្លាប់។ ក៏ប៉ុន្តែ អ្នកបើកបរដែលប៉ូលិសកំពុងបន្តសួរចម្លើយមិនមែនជាជនជាតិប៉ូឡូញទេ តែអាចជាជនជាតិប៉ាគីស្ថាន ឬអាហ្វហ្កានីស្ថានដែលបានភៀសខ្លួនចូលក្នុងទឹកដីអាល្លឺម៉ង់ក្នុងខែកុម្ភៈ ឆ្នាំ ២០១៦។ តែព័ត៌មានមួយនេះនៅមិនទាន់មានការបញ្ជាក់ជាផ្លូវការយ៉ាងណាពីរដ្ឋអំណាចអាល្លឺម៉ង់នៅឡើយទេ។
ហេតុផលដែលអាល្លឺម៉ង់សន្និដ្ឋានជាទង្វើភេរវនិយម
បន្ទាប់ពីបានលើកសម្មតិកម្មជាច្រើនមក លោករដ្ឋមន្រ្តីក្រសួងមហាផ្ទៃអាល្លឺម៉ង់ Thomas de Maizière បានបញ្ជាក់ជាផ្លូវការថា ទង្វើបើកឡានកាមីញ៉ុងកិនមនុស្សស្លាប់ និងរបួសជាទង្វើភេរវនិយម។ ការសន្និដ្ឋានរបស់លោក Thomas de Maizière មិនមានអ្វីគួរឲ្យភ្ញាក់ផ្អើលទេ ព្រោះនៅប៉ុន្មានក្រោយព្រឹត្តិការណ៍នោះ លោក Thomas de Maizière បានថ្លែងឲ្យដឹងថា មានហេតុផលជាច្រើនដែលនាំឲ្យគេអាចសន្និដ្ឋានថាជាទង្វើភេរវនិយម។ នៅព្រឹកថ្ងៃអង្គារ ទី២០ ធ្នូ ក្រុមអ្នកស៊ើបអង្កេតក៏បានយល់ឃើញថា ទង្វើរបៀបនេះមិនមែនជារឿងចៃដន្យ ហើយក៏មិនមែនជាគ្រោះថ្នាក់ចរាចរណ៍ដែរ តែជាទង្វើមានចេតនាសម្លាប់មនុស្សទាំងកម្រោល។
ម្យ៉ាងទៀត សាក្សីជាច្រើនដែលបានឃើញហេតុការណ៍ផ្ទាល់ភ្នែកឲ្យដឹងថា ឡានកាមីញ៉ុងនោះពិតជាមានចេតនាបើកសំដៅចូលទីលានផ្សារដើម្បីកិនសម្លាប់មនុស្ស ព្រោះអ្នកបើកបរមិនបានព្យាយាមបន្ថយល្បឿន ឬមួយក៏ព្យាយាមបញ្ជៀសហ្វូងមនុស្សទេ។ ហេតុការណ៍មួយនេះ គឺមានលក្ខណៈ និងទ្រង់ទ្រាយដូចគ្នាបិះបិតទៅនឹងហេតុការណ៍នៅក្នុងទីក្រុងនីស ប្រទេសបារាំងកាលពីថ្ងៃទី១៤ កក្កដាដែលមានឡានកាមីញ៉ុងមួយបរបុកទម្លាយរបាំងសុវត្ថិភាពសំដៅលើហ្វូងមនុស្សក្មេង ចាស់ដែលកំពុងទស្សនាពិធីបាញ់កាំជ្រួចក្នុងពិធីអបអរសាទរបុណ្យជាតិបារាំង ១៤ កក្កដា។ កាលណោះបានបណ្តាលឲ្យមានមនុស្សស្លាប់ ៨៦នាក់ និងរបួសជាង ៤០០នាក់ផ្សេងទៀត។
ដូច្នេះសម្រាប់រដ្ឋអំណាចអាល្លឺម៉ង់ ទង្វើនេះពិតជាទង្វើភេរវកម្មដែលគ្មានអ្វីគួរឲ្យសង្ស័យទៀតទេ។ តែគេត្រូវរង់ចាំមើលថា តើក្រុម ឬចលនាភេរវជនមួយណាដែលស្ថិតនៅពីក្រោយទង្វើនេះ ព្រោះមកដល់ម៉ោងនេះ នៅមិនទាន់មានក្រុម ឬចលនាណាមួយចេញមុខសារភាពជាស្នាដៃរបស់ខ្លួននៅឡើយទេ។ តែថ្លែងតាមកញ្ជក់ទូរទស្សន៍ក្នុងថ្ងៃអង្គារ ទី២០ ធ្នូ លោកស្រីនាយករដ្ឋមន្រ្តីអាល្លឺម៉ង់អង់ហ្កឺឡា មែរកិលបានថ្កោលទោសលើទង្វើដ៏ឆ្កួតលីលាមួយនេះ និងថែមទាំងអះអាងថា អ្នកដែលបានប្រព្រឹត្តិទង្វើនេះអាចជាអ្នកដែលកំពុងសុំសិទ្ធិជ្រកកោណក្នុងទឹកដីអាល្លឺម៉ង់។
តើអាល្លឺម៉ង់កំពុងទទួលផលពីចិត្តធម៌ និងក្តីមេត្តាករុណារបស់ខ្លួនឬ?
អាល្លឺម៉ងមិនបានចូលរួមជាមួយក្រុមសម្ព័ន្ធមិត្តអន្តរជាតិដឹកនាំដោយអាមេរិកនៅក្នុងយុទ្ធនាការវាយប្រហារពួកជីហាតក្នុងទឹកដីស៊ីរី និងអ៊ីរ៉ាក់ដូចបារាំងទេ តែអាល្លឺម៉ង់ជាប្រទេសមហាអំណាចមួយក្នុងទ្វីបអឺរ៉ុប ជាប្រទេសស្ថាបនិកសហភាពអឺរ៉ុប ហើយក៏ជាប្រទេសដែលបានចូលរួមយ៉ាងសកម្មនៅក្នុងយុទ្ធនាការប្រឆាំងអង្គការរដ្ឋអ៊ីស្លាម ពិសេសបានផ្គត់ផ្គង់ផ្នែកភស្តុភាយ៉ាងច្រើនសម្បើមដល់កម្លាំងសម្ព័ន្ធមិត្តអន្តរជាតិ។ ដូច្នេះដោយផ្ទាល់ ឬដោយប្រយោល អាល្លឺម៉ង់ពិតជាមានចំណែកភាគហ៊ុន។
គួររម្លឹកជូនថា នេះមិនមែនជាលើកទី១ ទេដែលអាល្លឺម៉ង់បានរងការគំរាមកំហែងភេរវកម្ម ឬរងគ្រោះដោយភេរវកម្ម គ្រាន់តែថា លើកនេះមានលក្ខណៈធ្ងន់ធ្ងរជាងលើកមុនៗ។ តាំងពីលោកស្រីនាយករដ្ឋមន្រ្តីអង់ហ្កឺឡា មែរកិលបានបើកទ្វារទទួលជនភៀសខ្លួនជិត ១លាននាក់ដែលភាគច្រើនជាជនជាតិស៊ីរីក្នុងឆ្នាំ ២០១៥មក ក្តីបារម្ភរងគ្រោះដោយភេរវកម្មបានកើតមានយ៉ាងផុសផុលនៅក្នុងស្រទាប់អ្នកនយោបាយអាល្លឺម៉ង់។
តើផ្លែផ្ការបៀបនេះឬដែលអាល្លឺម៉ង់ត្រូវទទួលបានពីកាយវិការមនុស្សធម៌ និងចិត្តមេត្តាករុណារបស់ខ្លួន និងថាតើទង្វើរបៀបនេះ មិនមែនជាការស៊ីបាយ បោកឆ្នាំងទេ ឬយ៉ាងណា?។ នេះហើយជាអ្វីដែលលោកស្រីនាយករដ្ឋមន្រ្តីអង់ហ្កឺឡា មែរកិលកំពុងសង្ស័យដែលថា អ្នកបើកឡានកាំមីញ៉ុងកិនសម្លាប់ពលរដ្ឋអាល្លឺម៉ង់ជាអ្នកដែលកំពុងសុំសិទ្ធិ ជ្រកកោណក្នុងទឹកដីអាល្លឺម៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ