សន្និសីទក្រុងប៉ារីស៖បង្កើតរដ្ឋពីររស់ក្បែរគ្នាជាផ្លូវតែមួយគត់សម្រាប់ជម្លោះអ៊ីស្រាអែល និងប៉ាឡេស្ទីន
ចុះផ្សាយនៅថ្ងៃ៖
ស្តាប់ - ០៦:៤៣
នៅថ្ងៃអាទិត្យ ទី១៥ មករានេះ ទីក្រុងប៉ារីស ប្រទេសបារាំងធ្វើជាម្ចាស់ផ្ទះរៀបចំសន្និសីទអន្តរជាតិស្តីពីជម្លោះអ៊ីស្រាអែល និងប៉ាឡេស្ទីន។ សន្និសីទលើកនេះចូលរួមដោយប្រទេសជាង ៧០ រួមទាំងស្ថាប័នអន្តរជាតិជាច្រើន ដូចយ៉ាងអង្គការសហប្រជាជាតិ ឬមួយក៏សម្ព័ន្ធអារ៉ាប់ជាដើម។ តែមិនមានអវត្តមានភាគីជម្លោះផ្ទាល់ គឺប៉ាឡេស្ទីន និងអ៊ីស្រាអែលទេ។ កំណត់សម្គាល់មួយទៀត សន្និសីទពេលនេះបានធ្វើឡើង ៥ថ្ងៃមុនការចូលកាន់តំណែងជាផ្លូវការរបស់លោកប្រធានាធិបតីអាមេរិកដូណាល់ ត្រាំ។ លោកត្រាំដែលបានបង្ហាញពីជំហរគាំទ្រអ៊ីស្រាអែលខ្លាំងជាងលោកប្រធានាធិបតីផុតអាណត្តិអូបាម៉ា។
នេះជាលើកទី២ ដែលបារាំងធ្វើជាម្ចាស់ផ្ទះរៀបចំកិច្ចប្រជុំអន្តរជាតិស្តីពីជម្លោះអ៊ីស្រាអែល និងប៉ាឡេស្ទីន។ កម្មវត្ថុរបស់ទីក្រុងប៉ារីស គឺដើម្បីជួយផ្តល់សន្ទុះកិច្ចចរចាសន្តិភាពរវាងភាគីជម្លោះទាំងពីរដែលកំពុងបន្តជាប់គាំងតាំងពី ២ឆ្នាំ និងហាក់កាន់តែធ្វើឲ្យស្ថានការណ៍កាន់តែធ្លាក់ដុនដាបទៅៗពីមួយថ្ងៃទៅមួយថ្ងៃ។ ទីក្រុងប៉ារីសបានយល់ច្បាស់ថា សន្និសីទអន្តរជាតិរៀបចំថ្ងៃនេះនឹងមិនអាចផ្តល់សន្តិភាពឲ្យប៉ាឡេស្ទីន និងអ៊ីស្រាអែលនៅថ្ងៃស្អែក ឬមួយក៏សម្រេចបាននូវរូបមន្តទិព្វអ្វីមួយដែលអនុញ្ញាតឲ្យប៉ាឡេស្ទីន និងអ៊ីស្រាអែលវិលចូលអង្គុយតុចរចាមួយទល់មួយភ្លាមៗទេ។
តែប្រសិនបើគេបន្តឈរក្រពាត់ដៃមើលមិនធ្វើអ្វីសោះ នោះស្ថានការណ៍នឹងរឹតតែធ្លាក់ធ្ងន់ធ្ងរខ្លាំងឡើង។ សម្រាប់បារាំង មានតែការកែនប្រមូលសហគមន៍អន្តរជាតិតាមរយៈកិច្ចប្រជុំរបៀបនេះទេទើបគេអាចដាស់ស្មារតីពិភពលោកកុំឲ្យភ្លេចជម្លោះរុំារ៉ៃ និងស្មុគស្មាញមួយនេះនៅតំបន់ដើមបូព៌ា។ កំណត់សម្គាល់មួយទៀត កិច្ចប្រជុំអន្តរជាតិស្តីពីជម្លោះអ៊ីស្រាអែល និងប៉ាឡេស្ទីនពេលនេះបានធ្វើឡើង ៥ថ្ងៃមុនការចូលកាន់តំណែងជាផ្លូវការរបស់លោកប្រធានាធិបតីអាមេរិកដូណាល់ ត្រាំនៅថ្ងៃទី២០ មករាខាងមុខ។
ការដែលបារាំងចង់កន្ទ្រាក់ស្មារតីលោកត្រាំក៏ដោយសារតែប្រធានាធិបតីថ្មីអាមេរិករូបនេះមានជំហរគាំទ្រអ៊ីស្រាអែលខ្លាំងជ្រុលធៀបនឹងជំហររបស់លោកប្រធានាធិបតីផុតអាណត្តិអូបាម៉ា ពិសេសទាក់ទងនឹងលក្ខន្តិកទីក្រុងយេរ៉ុយសាឡិម។
យេរ៉ុយសាឡិមជាបញ្ហាស្លាប់រស់រវាងប៉ាឡេស្ទីន និងអ៊ីស្រាអែល
ការកំណត់លក្ខន្តិកទីក្រុងយេរ៉ុយសាឡិម ជាប្រធានបទស្លាប់ រស់រវាងប៉ាឡេស្ទីន និងអ៊ីស្រាអែលដែលកំពុងដណ្តើមគ្នាយកយេរ៉ុយសាឡិមធ្វើជាទីក្រុងផ្តាច់មុខរបស់ខ្លួន។ កុំថាឡើយអាមេរិកក្នុងជំនាន់លោកប្រធានាធិបតីអូបាម៉ា សូម្បីតែប្រធានាធិបតីអាមេរិកមុនៗក៏មិនដែលហ៊ាននិយាយច្បាស់ៗទាក់ទងនឹងលក្ខន្តិកទីក្រុងយេរ៉ុយសាឡិមដូចលោកប្រធានាធិបតីជាប់ឆ្នោតថ្មីដូណាល់ ត្រាំដែរ។ លោកត្រាំដែលបាននិយាយនៅក្នុងយុទ្ធនាការឃោសនាបោះឆ្នោតថា បើលោកជាប់ឆ្នោត លោកនឹងទទួលស្គាល់យេរ៉ុយសាឡិមជាទីក្រុងផ្តាច់មុខរបស់អ៊ីស្រាអែល ហើយនឹងប្តូរទីតាំងស្ថានទូតអាមេរិកនៅអ៊ីស្រាអែលពីទីក្រុងតេឡាវីទៅដាក់នៅក្នុងទីក្រុងយេរ៉ុយសាឡិមវិញ។
ពិតណាស់ គេនៅមិនទាន់ដឹងថា តើលោកដូណាល់ ត្រាំនឹងធ្វើអ្វីដូចដែលលោកបាននិយាយដែរ ឬទេ។ តែសម្រាប់អ៊ីស្រាអែល ជំហររបស់លោកត្រាំរបៀបនេះជារឿងគួរឲ្យត្រេកត្រអាលខ្លាំងណាស់ ចំណែកប៉ាឡេស្ទីនបានយល់ឃើញថា លោកត្រាំកំពុងត្រៀមខ្លួនបំពានលើខ្សែបន្ទាត់ក្រហម និងគំរាមទុកមុនពីការដែលប៉ាឡេស្ទីនឈប់ទទួលស្គាល់រដ្ឋអ៊ីស្រាអែល។ ថ្មីៗនេះ លោកប្រធានរដ្ឋអំណាចប៉ាឡេស្ទីនម៉ាមូដ អាបាស់ថែមបានសរសេរសំបុត្រព្រមានលោកត្រាំឲ្យពិចារណាឡើងវិញលើជំហររបស់លោកត្រាំទាក់ទងនឹងទីក្រុងយេរ៉ុយសាឡិម។
នៅថ្ងៃសៅរ៍ ទី១៤ មករា លោកអាបាស់បានថ្លែងរម្លឹកនៅក្នុងកាសែតបារាំង Le Figaro ថា អនាគតលក្ខន្តិកទីក្រុងយេរ៉ុយសាឡិមនឹងត្រូវដោះស្រាយតាមផ្លូវចរចា និងថា វិធានការអត្តនោម័តិរបស់លោកត្រាំនឹងធ្វើឲ្យអាមេរិកបាត់បង់តួនាទីស្របច្បាប់របស់ខ្លួនក្នុងការស្វែងរកដំណោះស្រាយឲ្យវិបត្តិអ៊ីស្រាអែល និងប៉ាឡេស្ទីន។
សន្និសីទបង្កប់ដោយនិមិត្តរូបជាងការស្វែងរកដំណោះស្រាយស៊ីជម្រៅឲ្យបញ្ហា
សន្និសីទអន្តរជាតិស្តីពីជម្លោះប៉ាឡេស្ទីន និងអ៊ីស្រាអែលរៀបចំក្នុងទីក្រុងប៉ារីស ប្រទេសបារាំងថ្ងៃនេះមិនមានវត្តមានភាគីជម្លោះទាំងពីរទេ។ តាមគម្រោង បារាំងបានអញ្ជើញលោកប្រធានរដ្ឋអំណាចប៉ាឡេស្ទីនម៉ាមូដ អាបាស់ និងលោកនាយករដ្ឋមន្រ្តីអ៊ីស្រាអែលបិនយ៉ាមីន នេតាន់យ៉ាហ៊ូឲ្យចូលរួម តែដោយលោកនេតាន់យ៉ាហ៊ូបដិសេធមិនព្រមចូលរួម បារាំងក៏មិនអាចអនុញ្ញាតឲ្យលោកអាបាស់ចូលរួមបានដែរ បើលោកអាបាស់យល់ព្រមចូលរួមក៏ដោយ។
លោកនេតាន់យ៉ាហ៊ូបានលើកយកហេតុផលមួយចំនួនទៅពន្យល់ដើម្បីបញ្ជាក់ពីការមិនព្រមចូលរួមរបស់លោក ទី១ លោកនេតាន់យ៉ាហ៊ូបានចាត់ទុកកិច្ចប្រជុំរៀបចំដោយបារាំងថាមានគោលដៅប្រឆាំងអ៊ីស្រាអែល ទី២ លោកនេតាន់យ៉ាហ៊ូជំទាស់រាល់ដំណោះស្រាយឲ្យជម្លោះប៉ាឡេស្ទីន និងអ៊ីស្រាអែលជាលក្ខណៈអន្តរជាតិ និងទី៣ លោកនេតាន់យ៉ាហ៊ូប្រកាន់ខ្ជាប់នូវកិច្ចចរចាទ្វេភាគីមួយទល់មួយជាមួយប៉ាឡេស្ទីនដោយគ្មានលក្ខខណ្ឌ។
នៅក្នុងដំណោះស្រាយចំណុចទី៣ នេះក៏ជាការចង់បានរបស់សហគមន៍អន្តរជាតិ និងភាគីប៉ាឡេស្ទីនដែរ តែបញ្ហានៅត្រង់ថា តាំងពី ២ឆ្នាំមកហើយដែលកិច្ចចរចាទ្វេភាគីបានជាប់គាំង និងបានអូសបន្លាយស្ថានការណ៍ឲ្យធ្លាក់ដុនដាបកាន់តែខ្លាំងជាមួយនឹងការបន្តអនុវត្តន៍នយោបាយអាណានិគមលើដែនដីប៉ាឡេស្ទីនពីសំណាក់អ៊ីស្រាអែល។ មួយវិញទៀត ភាគីប៉ាឡេស្ទីនក៏ហាក់គ្មានជំនឿលើដំណោះស្រាយតាមផ្លូវចរចាទ្វេភាគី និងបានផ្តើមចាត់វិធានការផ្លូវទូតផ្ទាល់ខ្លួន និងបែររកអន្តរាគមន៍ពីអន្តរជាតិវិញម្តង។
នៅក្នុងកិច្ចប្រជុំថ្ងៃអាទិត្យ ទី១៥ មករានេះទៀតសោត ក៏គេមិនបានរកចាំលទ្ធផលដុំកំភួនអ្វីទាំងអស់ អ្វីដែលកិច្ចប្រជុំបញ្ជាក់នៅក្នុងសេចក្តីថ្លែងការណ៍រួមនោះ គឺរម្លឹកឡើងវិញពីគោលការណ៍រដ្ឋពីររស់ក្បែរគ្នារវាងប៉ាឡេស្ទីន និងអ៊ីស្រាអែលដែលជាផ្លូវតែមួយគត់ដើម្បីបញ្ចប់វិបត្តិរុំារ៉ៃ និងស្មុគស្មាញមួយនេះនៅតំបន់ដើមបូព៌ា។ ម្យ៉ាងទៀត កិច្ចប្រជុំក៏អាចរម្លឹកឡើងវិញពីសេចក្តីសម្រេចជាច្រើនរបស់អង្គការសហប្រជាជាតិនាពេលកន្លងមកដែលភាគីជម្លោះត្រូវបន្តយកធ្វើជាមូលដ្ឋានសម្រាប់កិច្ចចរចានាពេលខាងមុខ។ ដូច្នេះឃើញថា កិច្ចប្រជុំស្តីពីជម្លោះប៉ាឡេស្ទីន និងអ៊ីស្រាអែលក្នុងទីក្រុងប៉ារីសលើកទី២ ពេលនេះបានបង្កប់ច្រើនដោយនិមិត្តរូបជាងការស្វែងរកដំណោះស្រាយស៊ីជម្រៅឲ្យបញ្ហា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ