ញត្តិ ប្រឆាំងនឹងដំណើរទស្សនៈកិច្ចផ្លូវរដ្ឋរបស់លោកDonald Trumpនៅអង់គ្លេស
នៅអង់គ្លេសពលរដ្ឋ ជាង១ លាននាក់ បាននាំគ្នាចុះហត្ថលេខាលើញត្តិមួយតាមរយៈwebsite សភា ដើម្បីទាមទារឲ្យអាជ្ញាធរអង់គ្លេស ដកចេញវិញនូវការអញ្ជើញលោក Donald Trump អោយមកបំពេញទស្សនៈកិច្ចផ្លូវរដ្ឋមួយនៅទីក្រុង Londres និងពិធីជប់លាងអាហារយប់ជាមួយព្រះមហាក្សត្រី Elisabeth។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
យោងតាមពិធីការ ការបំពេញទស្សនកិច្ចផ្លូវរដ្ឋនៅអង់គ្លេស គឺចាំបាច់ត្រូវធ្វើឡើងដោយមានការរៀបចំព្រះរាជពិធីបដិសណ្ឋារកិច្ចមួយនិងពិធីជប់លៀងមួយដែលថ្វាយឡើងដោយព្រះមហាក្សត្រីអង់គ្លេស Elisabeth ។
សួមបញ្ជាក់ថា ពលរដ្ឋអង់គ្លេស ដែលបានចុះហត្ថលេខាលើញត្តិមួួយតាមរយៈ website សភាអង់គ្លេសនោះ បានកើនឡើងដល់ចំនួនជាង ១ លាន ១សែន៥០០០នាក់ហើយនៅវេលាម៉ោង១២ម៉ោងសាកល កាលពីម្សិលមិញ។ ហើយចំនួននេះ កាន់តែកើនឡើងថែមទៀតយ៉ាងឆាប់រហ័សបំផុត។
នៅក្នុងសារនៃញត្តិនោះ ពលរដ្ឋអង់គ្លេស បានគូសបញ្ជាក់ប្រាប់ថា “លោក Donald Trump អាចនឹងអនុញ្ញាតឲ្យធ្វើដំណើរមកកាន់ប្រទេសអង់គ្លេសបាននៅក្នុងឋានៈជាប្រមុខរដ្ឋាភិបាលអាមេរិក។ ប៉ុន្តែ អាជ្ញាធរអង់គ្លេស ពុំត្រូវធ្វើការអញ្ជើញគាត់ឲ្យមកបំពេញទស្សនៈកិច្ចក្នុងនាមជាផ្លូវរដ្ឋឡើយ ពីព្រោះបញ្ហានេះ វានឹងបង្កជាស្ថានភាពអាម៉ាសមួយដល់ព្រះមហាក្សត្រីអង់គ្លេស។
ចំណែក ទស្សនាវត្តីអង់គ្លេសThe Sunday Times វិញ បានរៀបរាប់ប្រាប់ថា ដំណើរទស្សនៈកិច្ចរបស់លោក Donald Trump នៅអង់គ្លេស អាចបង្កឲ្យមានភាពស្មុកស្មាញដោយសារតែទីក្រុងឡុងដ្រ៍និងវ៉ាស៊ីនតោន មានភាពតានតឹងជាមួយគ្នា។ ពីព្រោះ ប្រធានាធិបតីអាមេរិករូបនេះ ដែលល្បីឈ្មោះខ្លាំង មិនឈឺក្បាលវិលមុខនឹងបញ្ហានៃការឡើងកំដៅនៃភពផែនដីនោះ ច្បាស់ជាពុំមានបំណងចង់ទទួលយកមេរៀនណាមួយពីព្រះអង្គម្ចាស់ Charrles ឡើយ។ ព្រះអង្គម្ចាស់ Charles ដែលជាអ្នកការពារនិងស្រឡាញ់បរិស្ថានពិភពលោកម្នាក់ដ៏ពិតៗ។
ម្យ៉ាងទៀតនៅពេលដែលចំនួនការចុះហត្ថលេខារបស់ពលរដ្ឋអង់គ្លេស បានឡើងដល់ជាង១សែនហើយនោះ អ្នកតំណាងរាស្ត្រអង់គ្លេស ត្រូវតែលើកយកបញ្ហាញត្តិនេះមកធ្វើការពិភាក្សាគ្នា។ ក៏ប៉ុន្តែ ការជជែកពិភាក្សារបស់សភាអង់គ្លេសនេះ គ្រាន់តែជានិមិត្តរូបប៉ុណ្ណោះគត់និងក៏ពុំមានឥទ្ធិពលអ្វីនៅក្នុងការហាមរដ្ឋាភិបាលអង់គ្លេស មិនឲ្យធ្វើការអញ្ជើញប្រមុខរដ្ឋអាមេរិកនេះ មកបំពេញទស្សនកិច្ចផ្លូវរដ្ឋនៅប្រទេសអង់គ្លេសដែរ។
គួររំលឹកថា ក្រុមអ្នកតំណាងរាស្ត្រនៃគណបក្សអភិរក្សនិយមអង់គ្លេសដូចជាគណបក្សពលករជាដើម បានធ្វើការទិតៀនយ៉ាងខ្លាំងក្លាចំពោះវិធានការនានារបស់លោក Donald Trump ជាអាទិ៍នៅលើបញ្ហាជនភៀសខ្លួននិងការហាមអណិកជនបរទេសដែលមកពីប្រទេសកាន់សាសនាអ៊ីស្លាម មកជាន់លើទឹកដីអាមេរិកឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ