អន្តោប្រវេសន៍ អនាគតអឺរ៉ុប និងនយោបាយថ្មីរបស់អាមេរិក ជាប្រធានបទនៃជំនួបកំពូលអឺរ៉ុបក្នុងប្រទេសម៉ាល់ត៍
នៅថ្ងៃសុក្រ ទី៣ កុម្ភៈនេះ អឺរ៉ុបបានបើកជំនួបកំពូលក្នុងទីក្រុងវ៉ាឡែត ប្រទេសម៉ាល់ត៍។ ជំនួបកំពូលត្រូវរៀបចំធ្វើជាពីរវគ្គ គឺវគ្គរវាងប្រមុខរដ្ឋ និងប្រមុខរដ្ឋាភិបាលចំនួន ២៨ប្រទេស និងវគ្គរវាងប្រមុខរដ្ឋ និងប្រមុខរដ្ឋាភិបាលតែចំនួន ២៧ប្រទេសដោយគ្មានប្រទេសអង់គ្លេស។ អន្តោប្រវេសន៍ នយោបាយថ្មីរបស់រដ្ឋបាលអាមេរិក និងអនាគតអឺរ៉ុប គឺជាប្រធានបទសំខាន់នៃជំនួបកំពូល។
ចុះផ្សាយនៅថ្ងៃ៖
ស្តាប់ - ០១:៥៨
ជំនួបកំពូលអឺរ៉ុបពេលនេះបានធ្វើឡើង ចំពេលដែលអឺរ៉ុបកំពុងបន្តប្រឈមមុខនឹងលំហូរជនអន្តោប្រវេសន៍តាមផ្លូវសមុទ្រ ពិសេសសមុទ្រមេឌីទែរ៉ាណេ។ ពេញមួយឆ្នាំ ២០១៦ កន្លងទៅ មានជនអន្តោប្រវេសន៍ជាង ១៨ម៉ឺននាក់បានផ្សងព្រេងតាមសមុទ្រក្នុងនោះមាន ៩០% ចេញពីប្រទេសលីប៊ី។ ទន្ទឹមគ្នានេះ ចំនួនជនអន្តោប្រវេសន៍ស្លាប់ក្នុងសមុទ្រក៏មានច្រើនដែរ ពោលមានជាង ៤ ៥០០នាក់ នេះបើយោងតាមអង្គការអន្តោប្រវេសន៍អន្តរជាតិ។
នៅក្នុងសេចក្តីថ្លែងការណ៍ចុងក្រោយដែល AFP ទទួលបានមុនឲ្យដឹងថា អាទិភាពរបស់អឺរ៉ុបគឺចូលរួមជួយហ្វឹកហ្វឺនកម្លាំងឆ្នាំសមុទ្រលីប៊ីពីប្រតិបត្តិការឃ្លាំមើល ស្ទាក់ចាប់ទូក ឬកាណូតដឹកជនអន្តោប្រវេសន៍ និងប្រឆាំងពួកមេខ្លោង អ្នកនាំផ្លូវ។ ទន្ទឹមគ្នានេះ អឺរ៉ុបក៏ឯកភាពគ្នាក្នុងការជួយលើកដំកើងស្ថានភាពសេដ្ឋកិច្ចរបស់ប្រទេសលីប៊ី និងរួមសហការណ៍ស្អិតរមួតជាមួយឧត្តមស្នងការដ្ឋានអន្តរជាតិទទួលបន្ទុកជនភៀសខ្លួនដើម្បីធានាពីការទទួល និងការស្នាក់នៅរបស់ជនអន្តោប្រវេសន៍ដែលបានមកដល់ទឹកដីលីប៊ី។
ក្រៅពីបញ្ហាលំហូរជនអន្តោប្រវេសន៍ ជំនួបកំពូលអឺរ៉ុបក៏ជជែកអំពីភូមិសាស្រ្តនយោបាយ និងយុទ្ធសាស្រ្តថ្មី ពិសេសផ្លូវថ្មីដែលអឺរ៉ុបត្រូវដើរដើម្បីឆ្លើយតបនឹងរដ្ឋបាលអាមេរិករបស់លោកប្រធានាធិបតីដូណាល់ ត្រាំ។ កាលពីដើមសប្តាហ៍នេះ លោកប្រធានក្រុមប្រឹក្សាអឺរ៉ុបដូណាល់ ទូស្កបានចាត់ទុកគួរឲ្យបារម្ភនូវសេចក្តីសម្រេចមួយចំនួនរបស់លោកដូណាល់ ត្រាំ និងថា រដ្ឋបាលអាមេរិករបស់លោកត្រាំជាការគំរាមកំហែងអឺរ៉ុប។
នៅចុងបញ្ចប់ ជំនួបកំពូលជជែកពីអនាគតរបស់សហភាពអឺរ៉ុប បន្ទាប់ពីប្រជារាស្រ្តអង់គ្លេសបានបោះឆ្នោតចេញពីអឺរ៉ុបកាលពីខែមិថុនា ឆ្នាំ ២០១៦។ នៅក្នុងបញ្ហានេះ ជំនួបកំពូលបានរួមប្រជុំតែប្រមុខរដ្ឋ និងប្រមុខរដ្ឋាភិបាលចំនួន ២៧ប្រទេស ដោយគ្មានវត្តមាននាយករដ្ឋមន្រ្តីអង់គ្លេសលោកស្រី Theresa May ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ