ភេរវកម្មនៅសារៈមន្ទីរLouvre ៖ ទេសចរភេរវកម្ម ជាទម្រង់នៃការគំរាមកំហែងថ្មី ?!
ចុះផ្សាយនៅថ្ងៃ៖
ស្តាប់ - ០៥:៤១
ការវាយប្រហារនៅសារៈមន្ទីរ Louvre កណ្តាលក្រុងប៉ារីស ត្រូវបានរដ្ឋអាជ្ញាបញ្ជាក់ថាពិតជាសកម្មភាពភេរវកម្ម។ ២៤ម៉ោងក្រោយ ការអង្កេតកំពុងបន្ត និងបាននាំដល់ការរកឃើញអត្តសញ្ញាណជនដៃដល់ដែលទំនងជាជនជាតិអេហ្ស៊ីប អាយុ ២៩ឆ្នាំ ទើបចូលជាន់ទឹកដីបារាំងបានប្រមាណតែមួយសប្តាហ៍ប៉ុណ្ណោះ។ ភេរវជនសង្ស័យ បញ្ចេញសកម្មភាពតែម្នាក់ឯង ប៉ុន្តែអ្នកអង្កេតកំពុងស្រាវជ្រាវរកក្រែងមានក្រុម ឬមានអ្នកបញ្ជាពីក្រោយ។
អត្តសញ្ញាណពិតប្រាកដរបស់ភេរវជនសង្ស័យ មិនទាន់ត្រូវបានបញ្ជាក់ជាផ្លូវការនៅឡើយទេ ! ប៉ុន្តែបើតាមការស្រាវជ្រាវអង្កេត ក្នុងទូរស័ព្ទដៃ ក្នុងសំណុំឯកសារទិដ្ឋាការអឺរ៉ុប ព្រមទាំងការឆែកឆេរនៅក្នុងផ្ទះស្នាក់នៅក្នុងសង្កាត់ដ៏ប្រណិតនាក្រុងប៉ារីស របស់ជននេះទៅ បានបង្ហាញថា ភេរវជនសង្ស័យបានចូលក្នុងប្រទេសបារាំង ដោយស្របច្បាប់ ក្នុងនាមជាទេសចរ មិនមែនជាជនភៀសខ្លួន ឬអន្តោប្រវេសន៍ឡើយ កាលពីថ្ងៃទី ២៦មករា ដោយជិះយន្តហោះចាកចេញពីទីក្រុងឌូបៃ មកកាន់ក្រុងប៉ារីស។
មានអាយុ២៩ឆ្នាំ មានសញ្ជាតិអេហ្ស៊ីប រូបថតនៅលើទិដ្ឋការ នៅលើលិខិតឆ្លងដែនBiometrique ស៊ីគ្នានឹងរូបពិតរបស់ជនដៃដល់ដែលមានឈ្មោះ Abdallah El-Hamahmy និងគ្មានប្រវត្តិប្រលាក់ប្រលូសនឹងភេរវនិយម ឬជីហាតក្នុងប្រព័ន្ធស៊ើបការណ៍សម្ងាត់បារាំងទេ។ តែយ៉ាងណាក៏ដោយ អាជ្ញាធរបានចាត់ទុកទង្វើរបស់ជននេះ ថាជាទង្វើភេរវកម្ម ពីព្រោះ បើតាមសារTwitters សរសេរបង្ហោះជាភាសាអារ៉ាប នៅប៉ុន្មានមិនដល់មួយម៉ោងមុនពេលកើតហេតុ ថា ជំនួសមុខព្រះអាឡាហ៍ ... ដើម្បីបងប្អូនស៊ីរី និងយុទ្ធជន មួយនាទីក្រោយមកទៀត អាខោនTwitters ដដែលបានបង្ហោះសារមួយទៀត ប្រកាសភ្ជាប់ខ្លួនទៅនឹងក្រុមជីហាតរដ្ឋអ៊ីស្លាម។ បើគិតសរុបទៅមានសារទ្វីតបែបអ៊ីស្លាមជ្រុលនិយមដល់មានប្រមាណាជាង១០ ក្នុងរយៈពេលតែប្រមាណ៧នាទី។
ទេសចរ-ភេរវកម្ម
ជននេះ បានស្នើសុំទិដ្ឋាការទេសចរណ៍បារាំង កាលពីថ្ងៃ៣០តុលា ២០១៦។ ពេលមកដល់ក្រុងប៉ារីសភ្លាមនៅថ្ងៃទី ២៦ មករា ជនជាប់សង្ស័យនេះបានជួលបន្ទប់សណ្ឋាគារដ៏ប្រណិតក្នុងសង្កាត់ដ៏ល្អ កណ្តាលទីក្រុងប៉ារីស ប្រមាណពីរបីជំហានពីChamps Elysée ដ៏ល្បីល្បាញ តម្លៃ១៧០០អឺរ៉ូក្នុងសប្តាហ៍ គឺដូចជាទេសចរអ្នកមានមកពីអារ៉ាប់ និងបានទៅទិញកាំបិតផ្គាក់ពីរ ក្នុងតម្លៃជិត៧០០អឺរ៉ូ នៅថ្ងៃទី ២៨មករា។
នៅក្នុងលិខិតឆ្លងដែនគេបានរកឃើញទៀតថា ភេរវជនសង្ស័យនេះ មានទិដ្ឋាការទៅអារ៉ាប៊ីសាអូឌីត និងទិដ្ឋាការពីរទៅតួកគី កាលពីឆ្នាំ២០១៥ និង២០១៦ ព្រមទាំងលិខិតស្នាក់នៅប្រទេសអេមៀរ៉ាទៀត។ ហេតុដូច្នេះហើយបានជា អ្នកស្រាវជ្រាវកំពុងបន្តចោទសួររកមូលហេតុដែលនាំឱ្យជននេះបញ្ចេញសកម្មភាព និងជាពិសេស កំពុងចង់ដឹងថាគេធ្វើសកម្មភាពតែម្នាក់ឯង ដោយចិត្តឯង ឬក៏មានអ្នកបញ្ជាពីក្រោយ។ តែរហូតមកទល់នឹងម៉ោងនេះ ពុំទាន់មានក្រុមណាចេញមុខទទួលស្គាល់សកម្មភាពភេរវកម្មនៅឡើយទេ។
សារៈមន្ទីរLouvre និម្មិត្តរូបទេសចរណ៍និងវប្បធម៌
សារៈមន្ទីរLouvre នេះជាសារៈមន្ទីរដែលមានអ្នកចូលទស្សនាច្រើនជាងគេនៅលើពិភពលោក ក្នុងមួយឆ្នាំៗ ប្រមាណ ៧,៣លាននាក់ ក្នុងនោះ៧៥%ជាទេសចរបរទេស។ សកម្មភាពទេសចរណ៍ នៅសារៈមន្ទីរទើបចាប់រើបឡើងបន្តិចវិញ បានពីរខែ និងសង្ឃឹមលើឆ្នាំ២០១៧ តែត្រូវមករងការវាយប្រហារដោយកាំបិតលើទាហានរក្សាសន្តិសុខ។
តាំងពីពីរឆ្នាំមកហើយដែលបារាំងរស់ត្រាំត្រែងនឹងការគំរាមកំហែងភេរវកម្ម។ ហើយម្យ៉ាងទៀត ហេតុការណ៍នេះ ប្រព្រឹត្តទៅចំថ្ងៃដែលប៉ារីស បើកយុទ្ធនាការស្វែងរកការគាំទ្របេក្ខភាពប៉ារីសចង់ធ្វើជាម្ចាស់ផ្ទះទទួលរៀបចំកីឡាអូឡាំពិក JO២០២៤។ វាមិនមែនជាការចៃដន្យឡើយដែល ភេរវជនសង្ស័យជ្រើសរើសធ្វើសកម្មភាពនៅហាងទំនិញក្រោមដី ជាប់សារៈមន្ទីរ Louvre កន្លែងជានិម្មិត្តរូបទេសចរណ៍ វប្បធម៌ ប្រមូលផ្តុំទៅដោយសម្បត្តិសិល្បៈដ៏សម្បូរបែបជាងគេនោះ។
សារៈមន្ទីរបានបើកទ្វារជាធម្មតា នៅថ្ងៃសៅរ៍នេះ និងបានទទួលទេសចរច្រើនចូលទស្សនាដូចធម្មតា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ