រដ្ឋមន្ត្រីការពារជាតិអាមេរិកលោក James Mattis បំពេញទស្សនកិច្ចលើកដំបូងនៅអូតង់
នៅថ្ងៃពុធទី១៥កុម្ភៈនេះ អង្គការអូតង់ទទួលស្វាគមន៍ជាលើកដំបូងរដ្ឋមន្ត្រីក្រសួងការពារជាតិអាមេរិកលោក James Mattis ក្នុងក្តីរំពឹងថា រដ្ឋមន្ត្រីអាមេរិករូបនេះនឹងធ្វើការបំភ្លឺឲ្យបានច្បាស់លាស់ពីកិច្ចសន្យារបស់អាមេរិកនៅក្នុងការចូលរួមជាមួយអូតង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
អ្នកការទូតអឺរ៉ុបម្នាក់បានអះអាងកាលពីម្សិលមិញថា ទស្សនកិច្ចរបស់រដ្ឋមន្ត្រីការពារជាតិអាមេរិកលោក James Mattis នៅអង្គការអូតង់នាពេលនេះ គឺជាដំណឹងល្អដើម្បីអនុញ្ញាតឲ្យអូតង់បានយល់ច្បាស់ពីជំហរពិតប្រាកដរបស់រដ្ឋបាលថ្មីអាមេរិក។
ការអះអាងរបស់អ្នកការទូតអឺរ៉ុបនេះ បានធ្វើឡើងនៅមួយថ្ងៃមុនសម័យប្រជុំរបស់ក្រុមរដ្ឋមន្ត្រីការពារជាតិទាំង២៨ប្រទេសសមាជិកអូតង់ដែលត្រូវចាប់ផ្តើមនៅថ្ងៃពុធនេះ និងថ្ងៃព្រហស្បតិ៍ស្អែក នៅទីក្រុងBruxelles។
គួររំលឹកថា ចាប់តាំងពីលោក Donald Trump បានជាប់ឆ្នោតឡើងជាប្រធានាធិបតីថ្មីសហរដ្ឋអាមេរិកមក លោក Trump បានធ្វើឲ្យអឺរ៉ុបដែលជាសម្ព័ន្ធមិត្តជាប្រវត្តិសាស្ត្ររបស់អាមេរិក មានការភ្ញាក់ផ្អើលមិនតិចឡើយ។ ភ្ញាក់ផ្អើល ដោយសារតែជំហរនយោបាយរបស់លោក Trump គិតតែប្រយោជន៍ជាតិឯងដោយមិនខ្វល់ឡើយពីបញ្ហាអ្នកដទៃ។
ហើយកាលពីពាក់កណ្តាលខែមករាមុននេះ លោក Trump បានប្រើពាក្យមើលស្រាលចំពោះអូតង់ថា ជាអង្គការចាស់គំរិលហួសសម័យនិងជាពិសេស ពុំបានគិតគូពីបញ្ហាភេរវនិយមអ្វីទេ។
នៅក្នុងដំណើរទស្សនកិច្ចលើកដំបូងរបស់រដ្ឋមន្ត្រីម្នាក់ ក្នុងរដ្ឋបាលលោកTRUMP នេះ អូតង់ ដាច់ខាតត្រូវតែលើកយកប្រធានបទដ៏សំខាន់មួយមកពិភាក្សាគ្នានៅល្ងាចថ្ងៃពុធនេះ។ បញ្ហានោះ គឺការចូលរួមចំណែករបស់បណ្តាប្រទេសសម្ព័ន្ធមិត្តអូតង់នៅក្នុងការប្រយុទ្ធប្រឆាំងទល់នឹងអំពើភេរវនិយមរបស់ពួកអ៊ីស្លាមជីហាត ជាពិសេសនៅក្នុងតំបន់ដើមបូព៌ា។
អគ្គលេខាធិការអង្គការអូតង់លោក Jens Stoltenberg វិញ កាលពីម្សិលមិញ បានអះអាងដែរថា ដំណើររបស់លោក James Mattis នៅអូតង់នាពេលនេះ គឺជាឱកាសដ៏ប្រពៃមួយ ដើម្បីការជជែកពិភាក្សាគ្នាឲ្យបានច្បាស់លាស់អំពីបំណងពិតរបស់អាមេរិក។ ប្រធានអូតង់ថែមទាំងបានគូសបញ្ជាក់ជាថ្មីទៀតថា លោក មានទំនុកទុកចិត្តទាំងស្រុងចំពោះការប្តេជ្ញាចិត្តទាំងស្រុងរបស់សហរដ្ឋអាមេរិកនៅក្នុងការស្ថិតនៅក្បែរជានិច្ចជាមួយអូតង់របស់លោក។
ហើយបញ្ហាសំខាន់មួយទៀតដែលប្រធានអូតង់លើកឡើងនាពេលនេះដែរ គឺអំពីបញ្ហាកម្រិតនៃការចំណាយយោធារបស់ប្រទេសសម្ព័ន្ធមិត្តអ៊ីរ៉ុបដែលទីក្រុងវ៉ាស៊ីនតោនយល់ថា នៅតែមិនទាន់គ្រប់គ្រាន់។
នៅថ្ងៃព្រហស្បតិ៍ស្អែកនៅទីក្រុងBruxelles ប្រទេសទាំង ២៨ ដែលជាសមាជិកអូតង់ នឹងលើកអំពីបញ្ហាកម្រិតនៃការចូលរួមរបស់ពួកគេនៅក្នុងការដាក់ពង្រាយកងវរសេនាតូចចម្រុះជាតិសាសន៍៤កងដែលកំពុងបន្តធ្វើនៅក្បែរមាត់ទ្វារនៃប្រទេសរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ