ជំនួបរវាងប្រធានាធិបតីរុស្ស៊ី និង នាយករដ្ឋមន្ត្រីអាល្លឺម៉ង់ ក្រោយពីអាក់ខានអស់ពីរឆ្នាំ
ថ្ងៃទី២ឧសភានេះ នៅឯនិវេសនដ្ឋានខ្លួនជាយក្រុង Sochi មាត់សមុទ្រខ្មៅ ចម្ងាយប្រមាណ ១.៨០០គម ខាងត្បូងពីរដ្ឋធានីម៉ូស្គូ លោកប្រធានាធិបតីរុស្ស៊ី Vladimir Poutineទទួលជួបលោកស្រីនាយករដ្ឋមន្ត្រីអាល្លឺម៉ង់ Angela Merkel ដែលបំពេញទស្សនកិច្ចផ្លូវការ នៅរុស្ស៊ី ក្រោយពី អាក់ខានអស់២ឆ្នាំ។ វិមានក្រេមឡាំងប្រកាសឲ្យដឹងថា ចង្កោមបញ្ហាស្ថិតក្នុងការពិភាក្សា គឺអំពីការប្រយុទ្ធទល់នឹងភេរវនិយម ក្នុងផ្ទៃនៃស្ថានការណ៍នៅស៊ីរី និងតំបន់ដើមបូព៌ា អំពីស្ថានការណ៍នៅអ៊ុយក្រែន អំពីទំនាក់ទំនងទ្វេភាគី បែបយ៉ាងសហប្រតិបត្តិការក្នុងវិស័យថាមពល ពាណិជ្ជកម្ម-សេដ្ឋកិច្ច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ប៉ុន្តែវិមានក្រេមឡាំង ចង្អុលឲ្យឃើញថា លេសជាទម្រង់ការសម្រាប់ការអញ្ជើញមកកាន់រុស្ស៊ី នៃលោកស្រីនាយករដ្ឋមន្ត្រី Angela Merkel គឺការរៀបចំជំនួបកំពូលនៃ២០ប្រទេសមានសេដ្ឋកិច្ចហំហួន ជាងគេហៅថា G-20 ដែលអាល្លឺម៉ង់នឹងធ្វើជាម្ចាស់ផ្ទះ ទទួលនៅក្រុង Hambourg ក្នុងខែកក្កដាខាងមុខ។
ទោះយ៉ាងណាក្តី ក៏ ស្ថិតក្នុងរង្វង់នៃការយកចិត្តទុកដាក់គឺ បញ្ហាគន្លឹះៗ នៃរបៀវារៈអន្តរជាតិ។ គួរនិយាយ ថាមុនព្រឹត្តិការណ៍នៅអ៊ុយក្រែនឆ្នាំ២០១៤ មេដឹកនាំប្រទេសទាំងពីរ ឧស្សាហ៍ជួបគ្នាជារឿយៗ។ រួចឥឡូវជាថ្មីវិញ គេមានលទ្ធភាពពិភាក្សាជាសាច់ការតែម្តង ទាំងអំពីសភាពការណ៍បច្ចុប្បន្ន ទាំងអំពីទស្សនវិស័យ នៃសហប្រតិបត្តិការក្នុងវិស័យថាមពល និង ពាណិជ្ជកម្មសេដ្ឋកិច្ច - នេះបើតាមវិមានក្រេមឡាំង។
ចំណែកតំណាងផ្លូវការនៃរដ្ឋាភិបាលអាល្លឺម៉ង់ លោក Steffen Zaibert បានឲ្យដឹងថា លោកស្រី Merkel គ្រោងលើកយកទៅពិភាក្សាជាមួយលោក ពូទីន គឺស្ថានការណ៍នៅអ៊ុយក្រែន ជម្លោះនៅស៊ីរី ព្រមទាំងស្ថានការណ៍នយោបាយនៅលីប៊ី។ មេដឹកនាំប្រទេសទាំងពីរ នឹងធ្វើកិច្ចចរចាដល់ទៅ ២វគ្គ ហើយពេលដកឃ្លាពីវគ្គមួយទៅមួយ គេនឹងមានឱកាសជួបជាមួយពួកអ្នកកាសែត។
អំពីស្ថានការណ៍នៅអ៊ុយក្រែន ក្រសួងការបរទេសអាល្លឺម៉ង់ បានចេញសេចក្តីថ្លែងការណ៍ ដោយប្រាកដ ក្នុងចិត្តថា ទោះបីគ្មានការចម្រើនទៅមុខជាដុំកំភួនក្តី ក៏គ្មានអ្វីអាចជំនួសកិច្ចព្រមព្រៀងក្រុងមិនស្ក៍ឡើយ សម្រាប់ដោះស្រាយជម្លោះនៅអ៊ុយក្រែន ហើយ “កូនសោនៃដំណោះស្រាយនេះ គឺស្ថិតនៅក្រុង ម៉ូស្គូ និង ក្រុង គៀវ តែម្តង”។
អំពីស្ថានការណ៍នៅស៊ីរី ប្រទេសទាំងពីរ នៅតែខ្វែងគំនិតគ្នា ឧទាហរណ៍ ពេលដែលកងទ័ពស៊ីរី បានរំដោះក្រុងអាឡិប និង ទាំងក្រោយពីមានឧប្បត្តិហេតុកើតឡើងមួយខែមុន ក្នុងខេត្តស៊ីរី Idlib បណ្កាលមកពីមានប្រើនៅទីនោះ គឺ ឧស្ម័នពុល ដែលភាគីអាល្លឺម៉ង់បានចោទរដ្ឋាភិបាលស៊ីរីភ្លាមភ្លែត ប៉ុន្តែម៉ូស្គូ ទាមទារឲ្យធ្វើអង្កេតយ៉ាងហ្មត់ចត់សិន មុននឹងសន្និដ្ឋាន។
មជ្ឈដ្ឋាន Business អាល្លឺម៉ង់ សំដែងសេចក្តីសង្ឃឹមថា ទស្សនកិច្ចលោកស្រី Merkel មុខជានឹងជួយប្រោះឲ្យរស់ឡើងវិញ ទំនាក់ទំនងពាណិជ្ជកម្ម ជាមួយរុស្ស៊ី ដែលកាលពីឆ្នាំ២០១២ បានមានទឹកប្រាក់ ៨០.០០០ លានអឺរ៉ូ ហើយស្រាប់តែធ្លាក់មកនៅត្រឹម ៥០.០០០ លានអឺរ៉ូ ក្នុងឆ្នាំ២០១៦កន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ