លោក ត្រាំ រងការចោទប្រកាន់ថាបានផ្តល់ព័ត៌មានសម្ងាត់ទៅឱ្យរុស្ស៊ី
កាសែត Washington Post បានបង្ហើបឱ្យដឹងថា លោក ដូណាល់ ត្រាំ បានផ្តល់ព័ត៌មានសម្ងាត់ ទៅឱ្យរុស្ស៊ី កាលពីសប្តាហ៍មុន។ សប្តាហ៍ដែលលោកប្រធានាធិបតីទទួលស្វាគមន៍រដ្ឋមន្ត្រីក្រសួងការបរទេសរុស្ស៊ី នៅសេតវិមាន មួយថ្ងៃក្រោយការដកតំណែងនាយកទីភ្នាក់ងារចារកិច្ចFBI។ វិមានប្រធានាធិបតីបានបដិសេធព័ត៌មាននេះ ប៉ុន្តែប្រសិនបើគេរកឃើញភស្តុតាងពិត នោះលោកត្រាំ ពិតជាលំបាកខ្លាំងហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
កាសែត Washington Post បានទម្លាយព័ត៌មានគួរឱ្យព្រឺក្បាលមួយមុនគេនៅរសៀលម្សិលមិញ ថា លោក ដូណាល់ បានផ្តល់ព័ត៌មានមួយចំនួនទាក់ទងនឹងប្រតិបត្តិការនៅអ៊ីរ៉ាក់ និងនៅស៊ីរី ទៅភាគីរុស្ស៊ី។ ព័ត៌មានទាំងនោះត្រូវបានចាត់ទុកជាការសម្ងាត់ ដែលបណ្តាប្រទេសជាសម្ព័ន្ធមិត្តបានផ្តល់ឱ្យអាមេរិក និងដែលវ៉ាស៊ីនតោន គ្មានសិទ្ធចែកចាយព័ត៌មាននេះទៅអ្នកទីបី សូម្បីតែឱ្យសមាជិកក្នុងសម្ព័ន្ធក៏មិនបានផង ! រឿងអីអាមេរិកត្រូវឱ្យរុស្ស៊ីដឹង។ គឺមិនបានជាដាច់ខាត។
មិនដឹងថាតើទីប្រឹក្សានៅសេតវិមានមានអារម្មណ៍យ៉ាងណាទេ ពេលឮប្រធានាធិបតីអួតអាងថាមានព័ត៌មានសម្ងាត់ល្អៗ និងពិពណ៌នាអំពីភាពរីករាយរបស់ភ្ញៀវរុស្ស៊ី គឺលោកសែហ្គៃ ឡាវ្រូស រដ្ឋមន្ត្រីការបរទេសរុស្ស៊ីដែលលោក ត្រាំទទួលជួបកាលពីថ្ងៃទី ១០ឧសភា។បើតាមកាសែតដដែល ទីប្រឹក្សាម្នាក់បានទូរស័ព្ទហៅភ្នាក់ងារCIA និងNSA ភ្លាម ដើម្បីប្រាប់អំពីស្ថានភាពនេះ។
ការធ្លាយព័ត៌មាននេះ បានធ្វើបញ្ឆេះកំហឹងលោកត្រាំយ៉ាងខ្លាំង។ សេតវិមានបានចេញសេចក្តីថ្លែងការណ៍បដិសេធភ្លាម។ ទីប្រឹក្សាសន្តិសុខជាតិ បានគូសបញ្ជាក់ថានាឱកាសជំនួបជាមួយប្រមុខការទូតរុស្ស៊ីនោះ ភាគីទាំងពីរបានជជែកគ្នាអំពីការគំរាមកំហែងរួម គ្មានការទម្លាយរឿងសម្ងាត់ ឬវិធីសាស្ត្រ ឬយុទ្ធសាស្ត្រប្រតិបត្តិការយោធាណាមួយត្រូវបានបង្ហើបបង្ហាញនៅក្នុងជំនួបនោះឡើយ។ រដ្ឋមន្ត្រីការបរទេសអាមេរិក ក៏បានប្រកាសដែរជំនួបរវាងឥស្សរជនទាំងពីរផ្តោតជាសំខាន់លើការប្រយុទ្ធប្រឆាំងភេរវកម្ម។
ប៉ុន្តែអាមេរិកមិនអាចស្ងប់អារម្មណ៍បានឡើយ ! ព្រោះគេស្គាល់ចរិកលោកត្រាំច្បាស់ ! ជួនកាលលោកចង់សំញ៉ែងសាច់ដុំដាក់រុស្ស៊ី ទើបធ្លោយមាត់និយាយភ្លេចគិត។ ភាពសង្ស័យលើសមត្ថភាពដឹកនាំរបស់លោក ត្រាំ ដែលមានស្រាប់ នឹងកាន់តែរីកដុះដាល។ ថ្វីបើការទម្លាយរឿងសម្ងាត់មិនមែនសុទ្ធតែខុសច្បាប់សម្រាប់ប្រធានាធិបតីមែន ប៉ុន្តែពេលនេះ ការរិះគន់ធ្លាក់មកពីគ្រប់មជ្ឈដ្ឋាន។ មិនមែនត្រឹមអ្នកនៅក្នុងបក្សប្រឆាំងទេ សូម្បីតែអ្នកសាធារណរដ្ឋដូចគ្នា ក៏លែងអាចទប់ចិត្តបាន។ ប្រធានព្រឹទ្ធសភាអាមេរិកបានលាន់មាត់ថា សេតវិមានកំពុងស្ថិតក្នុងភាពវឹកវរ និងវិលវល់រកច្រកចេញមិនរួចទេ។ ឯប្រធានសភាមកពីបក្សសាធារណរដ្ឋដូចគ្នា និងតាមរយៈអ្នកនាំពាក្យ ក៏បានសម្តែងក្តីសង្ឃឹម ថា នឹងមានការពន្យល់បំភ្លឺពេញលេញពីរដ្ឋបាលលោកត្រាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ