លោកដូណាល់ ត្រាំ ប្តូរចម្លើយចុះឡើងទាក់ទងនឹងការដកតំណែងនាយកFBI
ចុះផ្សាយនៅថ្ងៃ៖
ស្តាប់ - ០៥:៣០
ក្រោយដកលោកJames Comey ពីតំណែងនាយកFBI យ៉ាងទាន់ហន់ កាលពីថ្ងៃអង្គារ ថ្ងៃព្រហស្បតិ៍ម្សិលមិញ ប្រធានាធិបតីអាមេរិក ដូណាល់ ត្រាំ ទទួលស្គាល់ថា លោកបានសួរលោក ចេម ខមី ចំនួន៣ដង ថា តើលោកមានជាប់ក្នុងការស៊ើបអង្កេតនឹងរឿងសង្ស័យពីទំនាក់ទំនងរវាង ក្រុមការងារលោកជាមួយរុស្ស៊ីដែរទេ។ ការដកតំណែងលោកខមី ជានាយកFBI ក្រោមលេសថាលោកខមីគ្មានសមត្ថភាព ធ្វើអោយលោកត្រាំ រងការរិះគន់កាន់តែខ្លាំង ពិសេសក្រោយលោកត្រាំ ប្តូរចម្លើយចុះឡើងទាក់ទងនឹងការដកតំណែងនេះ។
ទីភ្នាក់ងារ FBI សន្យាបន្តការអង្កេតរបស់ខ្លួន ក្នុងលក្ខណៈឯករាជ្យតទៅទៀត។ សភាអាមេរិកវិញក៏សន្យាបន្តការស៊ើបអង្កេតចំពោះការសង្ស័យថា រុស្ស៊ីអាចលូកដៃក្នុងការបោះឆ្នោតប្រធានាធិបតីអាមេរិកកាលពីខែវិច្ឆិកាផងដែរ។
លោកដូណាល់ ត្រាំ និងសេតវិមានផ្តល់ចម្លើយបញ្ច្រាសគ្នា ទាក់ទងការដកតំណែងលោកចេម ខមី
លោកត្រាំប្តូរចម្លើយ ចុះឡើង នាំអោយគេវង្វេងគ្រប់គ្នាទៅហើយ។ រឿងដកតំណែងលោកចេម ខមី សេតវិមាននិងលោកដូណាល់ ត្រាំ និយាយបញ្ច្រាសគ្នា។ កាលពីថ្ងៃអង្គារ ថ្ងៃដែលដកតំណែងលោកខមី សេតវិមានប្រាប់ថា លោកត្រាំបានទទួលអានុសាសន៍ពីក្រសួងយុត្តិធម៌ ទើបបានជាដកតំណែងលោកខមី ពីនាយកអេហ្វប៊ីអាយតាមក្រោយ។ លោកស្រីសាន់ដឺ ជាអ្នកនាំពាក្យសេតវិមានប្រាប់ថា លោកត្រាំជួបរដ្ឋមន្ត្រីក្រសួងយុត្តិធម៌កាលពីថ្ងៃចន្ទ ហើយលោកបានសុំអោយមេដឹកនាំក្រសួងនេះ ធ្វើលិខិតអោយលោក ចំពោះអានុសាសន៍ដកលោកខមី។
អ្នកនាំពាក្យសេតវិមានប្រាប់ទៀតថា លោកត្រាំចង់ដកលោកខមី តាំងពីលោកឡើងកាន់អំណាចម្ល៉េះ លោកត្រាំលែងទុកចិត្តលោកខមីរាប់ខែហើយ។ តែក្នុងបទសម្ភាសជាមួយទូរទស្សន៍ NBCម្សិលមិញ លោកដូណាល់ ត្រាំ ប្រាប់ថា ទោះជាអានុសាសន៍អ្វីក៏ដោយចុះ ក៏លោកដកតំណែងលោកខមីដែរ។ លោកថា លោកខមីនេះជាមនុស្សអួតអាង។ ដល់អញ្ចឹងទៅ មិនដឺងថា លោកត្រាំដកតំណែងនាយក FBI ដោយមូលហេតុអ្វីច្បាស់ទេ។ ទាំងអ្នកនៅបក្សសាធារណរដ្ឋរបស់លោកត្រាំ ទាំងអ្នកនៅបក្សប្រជាធិបតេយ្យ មិនសប្បាយចិត្តទេ ចំពោះពាក្យលោកត្រាំថា បើទោះគ្មានអានុសាសន៍ក្រសួងយុត្តិធម៌ ក៏លោកដកលោកខមីដែរនោះ ព្រោះមានន័យថា លោកចង់ដកអ្នកណាគឺដកហើយ ស្រេចតែលោក។ ប្រធានាធិបតីមិនអាចធ្វើអ្វីស្រេចចិត្តអញ្ចឹងទេ។
“លោកត្រាំជាប់ក្នុងការអង្កេតរបស់FBI ?” លោកដូណាល់ ត្រាំទទួលស្គាល់ថា ធ្លាប់សួរលោកខមី ដល់ទៅ៣ដង
ត្រាំប្រាប់ទៀតថា លោកធ្លាប់ពិសាបាយល្ងាចជាមួយលោកខមី។ លោកធ្លាប់សួរលោកខមី ៣ដងឯណោះ សួរថា តើលោកត្រាំខ្លួនឯងនេះ មានជាប់ក្នុងការស៊ើ់បអង្កេតទាក់ទងការសង្ស័យពីទំនាក់ទំនងរវាងក្រុមការងារលោក ជាមួយរុស្ស៊ីដែរទេ។ បើតាមលោកត្រាំ លោកខមីឆ្លើយថាទេ។ គេមើលឃើញថា លោកត្រាំដកលោកខមី ចេញពីតំណែងនាយកFBIក៏អាចដោយសារFBIស៊ើបអង្កេតរឿងសង្ស័យទំនាក់ទំនងរវាងរុស្ស៊ី និងក្រុមការងារលោកដែរ ម្ល៉ោះហើយ បើលោកដូណាល់ ត្រាំ ដកមេអេហ្វប៊ីអាយ ចេញទៅ នោះអេហ្វប៊ីអាយលែងខ្លាំងដៃលែងធ្វើបាបក្រុមការងារលោកត្រាំហើយ។
FBIកំពុងស៊ើបអង្កេតពីការលូកដៃរបស់រុស្ស៊ីចូលក្នុងយុទ្ធនាការបោះឆ្នោតប្រធានាធិបតីអាមេរិក ហើយក៏ស៊ើបដែរថា តើក្រុមការងារលោកត្រាំ អាចទាក់ទងជាមួយរុស្ស៊ីដែរទេ។ ម្សិលមិញ លោកត្រាំប្រាប់ដែរថា ពេលលោកសម្រេចចិត្តដកលោកខមីពីតំណែងនោះ គឺពេលដែលលោកកំពុងគិតពីពាក្យថា ទំនាក់ទំនងរវាងរុស្ស៊ី និងក្រុមការងារលោកហ្នឹងហើយ។
លោកត្រាំលើកឡើងហ៊ានសួរនាយកអេហ្វប៊ីអាយ ទាក់ទងកិច្ចការស៊ើបអង្កេតបែបនេះ កាន់តែធ្វើអោយការសង្ស័យថា លោកអាចមានទំនាក់ទំនងនឹងលោកពូទីនមែនហើយ។ ហើយបើតាមច្បាប់វិញ គេអាចចោទលោកត្រាំ ថាដាក់សម្ពាធលើនាយកFBI ចង់លូកដៃក្នុងកិច្ចការFBI។ កាសែតញូវយក ថែមស៍ចុះផ្សាយដែរថា ប្រធានាធិបតីអាមេរិកធ្លាប់បានពិសាបាយល្ងាចជាមួយលោកចេម ខមី ហើយបានសុំអោយលោក ខមី សន្យាបង្ហាញភាពស្មោះត្រង់។ បើតាមកាសែតញូវយក ថែមស៍ អ្នកជំនួយការលោកខមី ២នាក់ ប្រាប់ថា លោកខមី បដិសេធការសុំរបស់លោកត្រាំ។
បើតាមអ្នកនាំពាក្យសេតវិមាន ការដែលកាសែតញូវយកថែមស៍ថា លោកត្រាំសុំអោយលោកខមី សន្យាស្មោះត្រង់នោះ គឺមិនមែនស្មោះត្រង់ស្តាប់តាមបញ្ជាលោកត្រាំទេ គឺស្មោះត្រង់នឹងប្រទេសជាតិទៅវិញទេ។ សេតវិមានមិនចង់អោយលោកត្រាំខូចឈ្មោះទេ។ លោកត្រាំប្រាប់ថា លោកខមី បាននិយាយពីតំណែងនាយកFBIជាមួយលោក។ អញ្ចឹងអាចថា លោកត្រាំនិងលោកខមី ចង់ពុករលួយបែបណាមួយទេដឺង មួយចង់បន្តតំណែង មួយទៀតចង់ទាមទារអោយស្តាប់បញ្ជាខ្លួន។ សេតវិមានច្បាស់ជាត្រូវរឹតខ្ចៅលោកត្រាំវិញបន្តិចហើយ ដើម្បីកុំអោយហួសហេតុជាងនេះ។
ដោយឡែក សភាអាមេរិកសន្យាបន្តស៊ើបអង្កេតចំពោះការសង្ស័យថា រុស្ស៊ីអាចលូកដៃក្នុងការបោះឆ្នោតប្រធានាធិបតីអាមេរិកកាលពីខែវិច្ឆិកា។ គេសង្ស័យថា រុស្ស៊ីបានទំលាយអ៊ីមែលលោកស្រីហ៊ីលឡារី គ្លីនតុន ធ្វើអោយបក្សប្រជាធិបតេយ្យចាញ់ឆ្នោត។ បក្សប្រជាធិបតេយ្យបានទាមទារអោយមានរដ្ឋអាជ្ញាពិសេសមួយ ដើម្បីត្រួតពិនិត្យការស៊ើបអង្កេតនេះ។
FBI ប្រកាសបន្តការងារក្នុងលក្ខណៈឯករាជ្យ និងបរិហារសេតវិមានបើសេតវិមានលូកដៃក្នុងកិច្ចការFBI
តំណែងនាយកFBI ជាតំណែងក្តៅ តំណែងខ្លាំង ជាតំណែងដែលតែងតាំងសម្រាប់រយៈពេល១០ឆ្នាំ ដើម្បីកុំអោយអេហ្វប៊ីអាយ រងសម្ពាធ និងឥទ្ធិពលនយោបាយ។ កិច្ចការFBI ជាកិច្ចការឯករាជ្យ។ ទាំងបក្សសាធារណរដ្ឋ ទាំងបក្សប្រជាធិបតេយ្យ បក្សណាកាន់អំណាចក៏ដោយ គឺសុទ្ធតែខ្លាចអេហ្វប៊ីអាយទាំងអស់។
លោកចេម ខមី គ្រប់គ្រងមិនដល់១០ឆ្នាំផង ឥឡូវ អស់តំណែងហើយ។ អេហ្វប៊ីអាយកំពុងរង់ចាំការតែងតាំងមេដឺកនាំថ្មី។ ប៉ុន្តែ លោកអេនឌ្រូ ម៉ាក់ ខាបេ ជាមេដឺកនាំបណ្តោះអាសន្នបានអះអាងថា ទោះជាស្ថានភាពផ្លាស់ប្តូរដូចម្តេចក៏ដោយចុះ ក៏បុគ្គលិកអេហ្វប៊ីអាយទាំងប្រុសទាំងស្រី នៅតែបន្តការងាររបស់ខ្លួន។ លោកម៉ាក់ខាបេ ប្រាប់ថា អេហ្វប៊ីអាយនឹងបន្តការងារយ៉ាងឯករាជ្យ។ FBI ប្រកាសទៀតថា នឹងបរិហារសេតវិមាន បើសេតវិមានលូកដៃក្នុងកិច្ចការខ្លួន។
មេដឺកនាំបណ្តោះអាសន្នអេហ្វប៊ីអាយរូបនេះ ថែមទាំងហ៊ានលើកឡើងទៀតថា បុគ្គលិកអេហ្វប៊ីអាយទាំងអស់គាំទ្រលោកចេម ខមី ជាអតីតនាយកអេហ្វប៊ីអាយ ដែលត្រូវដកតំណែងនោះទៀតផង។ ការប្រកាសថា បុគ្គលិកអេហ្វប៊ីអាយគាំទ្រលោកខមី មាន ខ្លឹមសារផ្ទុយស្រឡះពីអ្វីដែលសេតវិមានបានប្រាប់។ កាលពីថ្ងៃអង្គារ សេតវិមានប្រាប់ថា ភ្នាក់ងារអេហ្វប៊ីអាយលែងទុកចិត្តលោកខមីទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ