ប្រើប្រាស់Facebookច្រើនជ្រុលធ្វើឲ្យប៉ះពាល់ដល់សុខភាព?
តើបណ្តាញសង្គម Facebook ធ្វើឲ្យមនុស្សមិនសប្បាយចិត្ត និងរហូតទៅដល់ប៉ះពាល់ដល់សុខភាពរបស់អ្នកប្រើប្រាស់? នេះជាសំណួរដែលគេបានចោទសួរឡើងនៅសហរដ្ឋអាមេរិក និងជាដើមហេតុដែលធ្វើឲ្យមានការសិក្សាទៅលើឥរិយាបទរបស់អ្នកប្រើប្រាស់ Facebook។ Facebook Twitter Instagram ទើបតែត្រូវបានអ្នកសិក្សាជាតិអង់គ្លេសវាយតម្លៃថា ជាមូលហេតុដែលធ្វើឲ្យប៉ះពាល់ដល់សុខភាពផ្លូវចិត្តរបស់អ្នកប្រើប្រាស់ដែលជាយុវជន។
ចុះផ្សាយនៅថ្ងៃ៖ កែប្រែថ្ងៃទី៖
តើក្នុងមួយថ្ងៃៗ មេដៃរបស់អ្នកទាញចុះឡើងលើអេក្រង់ទូរស័ព្ទ ប៉ុន្មានដង? ចុចអក្សរ Like និងសរសេរលើទំព័របណ្តាញសង្គមFacebook ប៉ុន្មានដង? អ្នកស្រាវជ្រាវអាមេរិកាំង ពីររូបនៃសកលវិទ្យាល័យYale និងសកលវិទ្យាល័យ San Diego បានផ្តល់ដំបូនា្មនថា គេមិនត្រូវចូលប្រើញឹកញយបណ្តាញសង្គមFacebookនោះទេ។ ហេតុអ្វីបានជាដូច្នេះ?
នៅក្នុងអត្ថបទ សម្រាប់ទស្សនាវដ្តីJournal of Epidemiology (ទស្សនាវដ្តីដែលផ្តោតទៅលើកត្តាដែលជះឥទ្ធិពលទៅលើសុខភាពរបស់មនុស្ស) អ្នកស្រាវជ្រាវអាមេរិកាំងបានរកឃើញពីការជាប់ទាក់ទងគ្នារវាងការប្រើប្រាស់បណ្តាញសង្គមFacebook ហើយនិងសុខភាពផ្លូវចិត្តរបស់មនុស្ស។ ដោយតាមដានជួបសម្ភាសន៍អ្នកប្រើប្រាស់Facebookប្រមាណ ៥ពាន់នាក់ ក្នុងរវាង ឆ្នាំ ២០១៣ ហើយនិង២០១៥ គេ រកឃើញថា អ្នកដែលបានចូលប្រើប្រាស់ Facebookច្រើនជ្រុលបានជួបបញ្ហាសុខភាពដូចជាជម្ងឺថប់អារម្មណ៍ ហើយនិងភាពឯកោ។ អ្នកសិក្សាអាមេរិកាំងនៅហ៊ានសរសេរទៀតថា អ្នកដែលឧស្សាហ៍ចូលទៅចុចអក្សlike ច្រើនមិនឈប់ មានឱកាសប្រឈមនឹងជម្ងឺផ្លូវចិត្ត ពី៥ទៅ៨ភាគរយ ច្រើនជាងអ្នកប្រើប្រាស់ធម្មតា។
Facebookមិនមែន ជាបណ្តាញសង្គមតែមួយដែលអាចធ្វើឲ្យអ្នកប្រើប្រាស់អាចប្រឈមនឹងជម្ងឺផ្លូវចិត្តនោះទេ។ ការសិក្សាមួយទៀតរបស់ស្ថាប័នសុខភាពអង់គ្លេស (Royal Society for Public Health និងYoung Health Movement ដែលចុះផ្សាយនៅថ្ងៃសុក្រសប្តាហ៍មុន បានបង្ហាញថា បណ្តាញសង្គមចំនួន៤ ដែលគេកំពុងពេញនិយមប្រើច្រើនក្នុងពិភពលោក ដូចជា Facebook Twitter Snapchat និងInstagram បានប៉ះពាល់ដល់សុខភាពផ្លូវចិត្តរបស់យុវជន។ តាមអ្នកសិក្សាអង់គ្លេស បណ្តាញសង្គម ជាពិសេស Instagrame ដែលជាកន្លែងបង្អួតសម្រស់គ្នាទៅវិញ ទៅមក ជាប្រភព ដើមហេតុធ្វើឲ្យអ្នកប្រើប្រាស់ដែលជាយុវជន កើតជម្ងឺ គេងមិនលក់ តប់ប្រមល់ ធ្លាក់ទឹកចិត្ត និងឯកោរ។
ជារួម ទាំងអ្នកសិក្សាទាំងជាតិអាមេរិកាំង និងអង់គ្លេស មិនបានទម្លាក់កំហុស ការទទួលខុសត្រូវទាំងស្រុងលើក្រុមហ៊ុនបណ្តាញសង្គមដូចជា Facebook (ដែលមានអ្នកប្រើប្រាស់២ពាន់លាននាក់) នោះទេ ព្រោះថា ការប្រើប្រាស់ដោយសមហេតុផល និងសមរម្យមិនច្រើនជ្រុល នៅតែនាំប្រយោជន៍ ដល់អ្នកប្រើប្រាស់ ដែលចេះបែងចែកពេលវេលារវាងមិត្តភក្តិក្នុងជីវិតពិត ហើយនិងមិត្តក្នុងបណ្តាញសង្គមដូចជា Facebook៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ