បារាំង

បារាំងបង្កើតកម្មវិធីដែលនឹងកាត់បន្ថយការខ្ជះខ្ជាយចំណីអាហារ

នៅក្នុងទិសដៅ ប្រយុទ្ធប្រឆាំងនឹងការខ្ជះខ្ជាយ បោះចោលចំណីអាហារ ទៅក្នុងធុងសំរាម បារាំងបានបង្កើតកម្មវិធីមួយ ដែលនឹងអនុញ្ញាតឲ្យហាងទំនិញលក់អាហារ អាចទាក់ទងជាមួយសមាគមដែលធ្វើការទៅលើផ្នែកមនុស្សធម៌ ផ្តល់ចំណីអាហារ ដល់អ្នកដែលមានជីវភាពខ្វះខាត ឬអ្នកដែលរស់នៅតាមផ្លូវ គ្មានជម្រកនៅក្នុងប្រទេសបារាំង។ កម្មវិធី The Food Lifeត្រូវបានដាក់សម្ពោធឲ្យប្រើប្រាស់ ចាប់ពីថ្ងៃចន្ទ ទី ១៦ តុលា ដែលជាទិវាចំណីអាហារពិភពលោក។

ចុះផ្សាយនៅថ្ងៃ៖ 16/10/2017 - 13:15

យុទ្ធនាការដើម្បីប្រយុទ្ធប្រឆាំងនឹងការខ្ជះខ្ជាយចំណីអាហារនៅតាមហាងលក់ទំនិញនៅប្រទេសបារាំង AFP PHOTO MYCHELE DANIAU

ដោយ៖ ឈាង បុប្ផា

ផ្សាយពាណិជ្ជកម្ម

នៅប្រទេសបារាំង គេវាយតម្លៃថា ហាងទំនិញនីមួយៗ បោះចោល ក្នុងធុងសំរាម ចំណីអាហារ យ៉ាងហោច ៥០គីឡូក្រាម ក្នុងមួយថ្ងៃ ក្នុងពេលដែលប្រជាជនបារាំង រាប់លាននាក់ ជាពិសេស នៅខ្វះខាត រកតែនំប៉័ងសម្រាប់បំពេញក្រពះសឹងមិនបាន។ គឺនៅក្នុងទិសដៅ កាត់បន្ថយគំលាត ចន្លោះខ្វះខាតនេះ ដែល មន្ត្រីម្នាក់របស់សាលាក្រុងCourbevoie នៅជាយក្រុងប៉ារីស បានបង្កើតកម្មវិធី The Food Lifeនេះឡើង។

កម្មវិធី The Food Life ដែលអាចថតទុកពីក្នុងApple Store ឬ Play Store របស់ក្រុមហ៊ុនGoogleនឹងមានដាក់បង្ហាញ ផែនទីបារាំង ដែលនៅក្នុងនោះ មានរាយឈ្មោះរបស់ហាងទំនិញ លក់គ្រឿងបរិភោគប្រមាណ ៧ពាន់ ក្នុងប្រទេសបារាំង។ ហាងទំនិញ ដែលមានទំហំ ពី៤០០ម៉ែត្រការ៉េ ឡើងទៅ រហូតដល់២៥០០ម៉ែត្រការ៉េ ត្រូវចុះឈ្មោះ ដាក់លេខទូរស័ព្ទ និងបរិមាណចំណីអាហារដែល នៅសល់ ឬ ហួសកំណត់ថ្ងៃបរិភោគ ដែលហាងលក់លែងកើត។ ហាងទំនិញទាំងនោះត្រូវបញ្ជាក់ផងដែរ ម៉ោង ដែលគេអាចចុះទៅប្រមូលចំណីអាហារដែលនៅសល់ លក់លែងបាន នៅតាមហាង។ តាមរយៈព័ត៌មានដែលហាងទំនិញចុះ នៅក្នុង កម្មវិធី The Food Life សមាគមអាចទៅប្រមូលចំណីអាហារទាំងនោះ ដើម្បីយកចែកចាយបន្តទៀតទៅដល់ប្រជាជនដែលមានជីវភាពខ្វះខាត។

យោងតាម ច្បាប់ប្រយុទ្ធប្រឆាំងការខ្ជះខ្ជាយចំណីអាហារដែលត្រូវបានបោះឆ្នោតអនុម័ត នៅឆ្នាំ ២០១៦ ហាងទំនិញ ដែលបដិសេធ មិនផ្តល់អាហារ ដែលនៅសល់ ឬ គ្រឿងបរិភោគ ដែលហួសកាលកំណត់ ដល់សមាគម ទទួលស្គាល់ដោយរដ្ឋាភិបាល នឹងប្រឈមនឹងការពិន័យជាប្រាក់ ៣៧៥០អឺរ៉ូ។

នៅបារាំង សមាគមក្នុងស្រុកប្រមាណ ៥ពាន់ ត្រូវបានបង្កើតឡើង ដើម្បីដើរប្រមូលចំណីអាហារដែលនៅសល់ ពីហាងលក់ទំនិញ។ ប៉ុន្តែ កន្លងមក ក្នុងហេតុផលការពារកុំឲ្យមានគ្រោះថ្នាក់ ប៉ះពាល់សុខភាពដោយសារតែអាហារនៅសល់ ឬហួសកាលកំណត់ ហាងទំនិញ ជាច្រើន ចាក់ក្នុងធុងសំរាម ចំណីអាហារ ដែលគេមិនអាចលក់បាន (ហាងខ្លះបានចាក់ទឹកអាស៊ីដ ដើម្បីបំផ្លាញ ទាំងស្រុង កុំឲ្យគេអាចយកទៅបរិភោគបាន)។ លោកArash Derambqrsh មន្រ្តីសាលាក្រុង Courbevoie ដែលជាផ្តួចផ្តើមគំនិតឲ្យមានកម្មវិធី The Food Life សង្ឃឹមចង់ពង្រីកការប្រើប្រាស់កម្មវិធីដើរប្រមូលចំណីអាហារ ដែលនៅសល់ នៅតាមហាង នៅក្នុងទំហសហភាពអឺរ៉ុប។