ក្រោយការប្រកាសឯករាជ្យរបស់តំបន់កាតាឡូញ៉ា តើនឹងមានអ្វីកើតឡើងនាពេលខាងមុខ?
ចុះផ្សាយនៅថ្ងៃ៖
ស្តាប់ - ០៧:០៦
នៅទីបំផុតនាថ្ងៃសុក្រទី២៧ តុលា សភានៅតំបន់កាតាឡូញ៉ាដែលជាតំបន់ស្វយ័តរបស់ប្រទេសអេស្ប៉ាញបានបោះឆ្នោតប្រកាសឯករាជ្យជាឯកតាភាគីផ្តាច់ខ្លួនចេញពីរដ្ឋអំណាចកណ្តាលអេស្ប៉ាញ។ ប្រតិកម្មភ្លាមៗ ព្រឹទ្ធសភាអេស្ប៉ាញបានផ្តល់ភ្លើងខៀវឲ្យរដ្ឋាភិបាលទីក្រុងម៉ាឌ្រីដអនុវត្តមាត្រាទី១៥៥នៃរដ្ឋធម្មនុញ្ញដែលអនុញ្ញាតឲ្យយកតំបន់កាតាឡូញ៉ាមកគ្រប់គ្រងវិញ។ ទន្ទឹមគ្នានេះ លោកនាយករដ្ឋមន្រ្តីអេស្បាញ Mariano Rajoy បានប្រកាសរំលាយរដ្ឋបាល និងសភាកាតាឡូញ៉ា រួចកោះឲ្យមានការបោះឆ្នោតថ្មីនៅថ្ងៃទី២១ ធ្នូខាងមុខ។ ចំណែកសហគមន៍អន្តរជាតិ ពិសេសសហភាពអឺរ៉ុបបានគាំទ្រចំណាត់ការរបស់រដ្ឋាភិបាលអេស្ប៉ាញដោយចាត់ទុកទីក្រុងម៉ាឌ្រីដជាដៃគូតែមួយគត់នៅក្នុងអឺរ៉ុប។
គេពិបាកផ្តល់ចម្លើយមួយទៅនឹងសំណួរថា តើការប្រកាសឯករាជ្យជាឯកតាភាគីរបស់សភាកាតាឡូញ៉ាពេលនេះមានតម្លៃកម្រិតណានោះ ព្រោះដូចលទ្ធផលនៃការបោះឆ្នោតប្រជាមតិស្តីពីឯករាជ្យភាពរបស់ពលរដ្ឋកាតាឡូញ៉ាក្នុងថ្ងៃទី១ តុលាដែលមានពលរដ្ឋកាតាឡូញ៉ាប្រមាណជា ៩០% បោះឆ្នោតចង់បានឯករាជ្យ តែមានអ្នកចូលរួមតែ៤៣% ប៉ុណ្ណោះ។ នៅលើកនេះ សភាកាតាឡូញ៉ាបានបោះឆ្នោតដោយប្រើសន្លឹកឆ្នោតសម្ងាត់ប្រកាសឯករាជ្យជាឯកតោភាគីដោយមានសម្លេងគាំទ្រ ៧០សម្លេង ប្រឆាំង ១០សម្លេង និងអនុប្បវាទ ២សម្លេង។ តែគេមិនត្រូវភ្លេចនិយាយទេថា ក្រុមអ្នកតំណាងរាស្រ្តបក្សប្រឆាំងមិនមានវត្តមាននៅក្នុងការបោះឆ្នោតនោះទេ។
ត្រង់ចំណុចនេះនាំឲ្យមានសំណួរចោទឡើងទាក់ទងនឹងតម្លៃ និងភាពជឿជាក់នៃលទ្ធផលបោះឆ្នោតរបស់សភាកាតាឡូញ៉ា។ មួយវិញទៀត ពលរដ្ឋកាតាឡូញ៉ាភាគច្រើន ទាំងអ្នកចង់បានឯករាជ្យ និងមិនចង់បានឯករាជ្យមានបំណងឲ្យរៀបចំបោះឆ្នោតប្រជាមតិឡើងវិញ តែប្រមុខដឹកនាំកាតាឡូញ៉ាលោក Carles Puigdemont មិនយល់ព្រម។ ឥឡូវនេះ អ្វីៗហាក់ដូចជាជ្រុលខ្លួន និងដែលពលរដ្ឋកាតាឡូញ៉ាទាមទារឯករាជ្យបានស្នើឲ្យបើកកិច្ចចរចាភ្លាមជាមួយរដ្ឋអំណាចអេស្ប៉ាញ។ ជំហានដំបូង គេចង់ដាក់តំបន់កាតាឡូញ៉ាដែលទើបប្រកាសឯករាជ្យជាឯកតោភាគីឲ្យស្ថិតនៅក្រៅច្បាប់រដ្ឋធម្មនុញ្ញរបស់អេស្ប៉ាញ។
ជំហានបន្ទាប់ គេចង់ឲ្យគិតគូរពីការបង្កើតលិខិតឆ្លងដែន អនុញ្ញាតឲ្យមានសញ្ជាតិពីរ បង្កើតឲ្យមានសេវាសាធារណៈកាតាឡូញ៉ា បង្កើតឲ្យមានរដ្ឋធម្មនុញ្ញសម្រាប់កាតាឡូញ៉ា ឬមួយក៏ចរចាជាមួយរដ្ឋអំណាចអេស្បាញក្នុងរឿងបំណុលជាដើម។
អេស្ប៉ាញប្តេជ្ញាការពារនីតិរដ្ឋ និងអធិបតេយ្យភាព
នៅប៉ុន្មានម៉ោង ក្រោយសភាកាតាឡូញ៉ាបោះឆ្នោតប្រកាសឯករាជ្យ ព្រឹទ្ធសភាអេស្ប៉ាញបានផ្តល់ភ្លើងខៀវឲ្យរដ្ឋាភិបាលអនុវត្តមាត្រាទី១៥៥នៃរដ្ឋធម្មនុញ្ញ ហើយលោកនាយករដ្ឋមន្រ្តីអេស្បាញ Mariano Rajoy បានប្រកាសរំលាយរដ្ឋបាល និងសភាកាតាឡូញ៉ា រួចកោះឲ្យមានការបោះឆ្នោតថ្មីនៅថ្ងៃទី២១ ធ្នូខាងមុខ។ លោកប្រមុខរដ្ឋាភិបាលអេស្ប៉ាញ Mariano Rajoy បានថ្លែងថា ទីក្រុងម៉ាឌ្រីដគ្មានជម្រើសអ្វីផ្សេងក្រៅពីយកតំបន់ស្វយ័តមួយនេះទៅគ្រប់គ្រងវិញដើម្បីកសាងនីតិរដ្ឋរបស់អេស្ប៉ាញឡើងវិញ។ ដើម្បីអាចធ្វើដូចនេះបាន លោក Rajoy បានយកច្បាប់រដ្ឋធម្មនុញត្រង់មាត្រាទី១៥៥ ទៅសំអាងដែលចែងថា ទីក្រុងម៉ាឌ្រីដមានសិទ្ធិដកស្វ័យភាពពីតំបន់ណាមួយ និងយកតំបន់នោះមកគ្រប់គ្រងឡើងវិញ ប្រសិនបើតំបន់ស្វយ័តនោះបំពានច្បាប់រដ្ឋធម្មនុញ និងធ្វើឲ្យប៉ះពាល់ដល់ផលប្រយោជន៍ទូទៅរបស់ប្រទេសអេស្ប៉ាញ។
ទន្ទឹមនឹងការប្រកាសរំលាយរដ្ឋបាល និងសភាកាតាឡូញ៉ា លោកនាយករដ្ឋមន្រ្តីអេស្ប៉ាញ Rajoy ក៏បានប្រកាសឲ្យដឹងពីថ្ងៃរៀបចំបោះឆ្នោតថ្មីនៅកាតាឡូញ៉ានាថ្ងៃទី២១ ធ្នូខាងមុខ។ ការបោះឆ្នោតដែលលោក Rajoy បានសន្យារៀបចំដោយសេរី យុត្តិធម៌ និងមានតម្លាភាពក្នុងគោលដៅរៀបចំសណ្តាប់ធ្នាប់ និងច្បាប់នៅតំបន់កាតាឡូញ៉ាឡើងវិញដោយរក្សាទុកជាតំបន់ស្វយ័តដដែល ពោលមិនព្យួរស្វ័យភាពរបស់វាទេ។ ដូច្នេះចាប់ពីពេលនេះដល់ថ្ងៃបោះឆ្នោត ទីក្រុងម៉ាឌ្រីដគ្រប់គ្រង និងចាត់ចែងលើការងារប្រចាំថ្ងៃនៅតំបន់កាតាឡូញ៉ា ពិសេសគ្រប់គ្រងលើកម្លាំងប៉ូលិស ព្រោះលោក Rajoy ទើបបានដកតំណែងមេប៉ូលិសកាតាឡូញ៉ា។
វិធានការរបស់លោកប្រមុខរដ្ឋាភិបាលអេស្ប៉ាញ Mariano Rajoy ពេលនេះត្រូវបានគេមើលឃើញថា មិនមែនងាយស្រួលអនុវត្តដូចដែលលោកចង់បាននោះទេ។ អ្វីដែលគ្រប់គ្នាកំពុងចង់ដឹងនោះគឺថា បើប្រមុខដឹកនាំតំបន់កាតាឡូញ៉ាលោក Carles Puigdemont មិនព្រមស្តាប់តាមវិធានការរបស់លោក Rajoy និងមិនព្រមចុះចេញពីតំណែង តើលោក Rajoy គិតយ៉ាងម៉េច?។ យ៉ាងណាក៏ដោយ តុលាការអេស្ប៉ាញបានប្រាប់ឲ្យដឹងពីបំណងចង់ប្តឹងលោក Puigdemont ក្នុងបទរៀបចំការបះបោរ និងដែលទង្វើមួយនេះអាចនឹងដេករហូតដល់ទៅ ៣០ឆ្នាំ។
តំបន់កាតាឡូញ៉ាកំពុងស្ថិតឯកោ
ប្រទេសភាគច្រើនក្នុងលោកមិនបានគាំទ្រលើការប្រកាសឯករាជ្យជាឯកតោភាគីរបស់តំបន់កាតាឡូញ៉ាពេលនេះទេ។ សហភាពអឺរ៉ុបមិនចង់ឃើញសមាជិករបស់ខ្លួនទទួលរងការបាត់បង់ទឹកដី និងបានបញ្ជាក់ជាថ្មីថា អេស្ប៉ាញបន្តជាដៃគូចរចាតែមួយគត់របស់ខ្លួនសម្រាប់ពេលនេះ និងតទៅថ្ងៃអនាគត។ លោក Donald Tusk ប្រធានក្រុមប្រឹក្សាអឺរ៉ុបបានថ្លែងនៅក្នុងបណ្តាញសង្គម Twitter របស់លោកថា ការបោះឆ្នោតប្រកាសឯករាជ្យជាឯកតោភាគីរបស់សភាកាតាឡូញ៉ានឹងគ្មានអ្វីផ្លាស់ប្តូរសម្រាប់អឺរ៉ុបទេ។
ចំណែកលោកប្រធានគណៈកម្មការអឺរ៉ុប Jean-Claude Juncker ដែលរួមដំណើរទស្សនកិច្ចជាមួយលោកប្រធានាធិបតីបារាំងអេម៉ានុយអែល ម៉ាក្រុងក្នុងដែនដីបារាំង Guyane បានយល់ឃើញថា អ្វីដែលបានកើតឡើងនៅអេស្ប៉ាញពេលនេះជារឿងផ្ទៃក្នុងរបស់អេស្ប៉ាញ តែលោកក៏មិនចង់ឃើញអឺរ៉ុបត្រូវបន្ថែមសមាជិកថ្មីពីការបែកបាក់នៅក្នុងប្រទេសសមាជិកណាមួយដែរ។ ក្តីបារម្ភមួយនេះក៏មានពីប្រទេសអាល្លឺម៉ង់ដែលបានប្រកាសមិនទទួលស្គាល់ការប្រកាសឯករាជ្យរបស់តំបន់កាតាឡូញ៉ា និងថា អធិបតេយ្យភាពរបស់អេស្ប៉ាញមិនអាចរំលោភបំពាន និងបំបែកបានទេ។
នៅក្នុងប្រទេសអង់គ្លេស ទីក្រុងឡុងដ៏ក៏បានប្រកាសមិនទទួលស្គាល់ការប្រកាសឯករាជ្យរបស់តំបន់កាតាឡូញ៉ា។ ក្រៅពីអឺរ៉ុប ប្រតិកម្មក៏មានពីប្រទេសផ្សេង ពិសេសអាមេរិកបានប្រកាសគាំទ្រលើចំណាត់ការតាមផ្លូវច្បាប់របស់រដ្ឋាភិបាលអេស្ប៉ាញ និងបានអំពាវនាវឲ្យមានឯកភាពនៅក្នុងប្រទេសអេស្ប៉ាញ។ ក្រៅពីផលវិបាកនយោបាយដែលនឹងកើតមាននៅក្នុងតំបន់កាតាឡូញ៉ានាពេលខាងមុខ ក៏នឹងមានផលវិបាកសេដ្ឋកិច្ចដែរ។
ពិតមែនតែតំបន់កាតាឡូញ៉ាអាចកសាងអនាគតដោយខ្លួនបាន តែភាពចម្រូងចម្រាសរវាងរដ្ឋអំណាចអេស្ប៉ាញ និងរដ្ឋអំណាចកាតាឡូញ៉ានាប៉ុន្មានខែកន្លងទៅបានធ្វើឲ្យក្រុមហ៊ុន និងរោងចក្រសហគ្រាសធំ តូចប្រមាណជា ១ ៥០០ បាននាំគ្នារើចេញពីតំបន់កាតាឡូញ៉ា។ ចង់ ឬមិនចង់នៅចំពោះមុខអនាគតនយោបាយស្រពិចស្រពិលនៅកាតាឡូញ៉ាពេលនេះ នឹងធ្វើឲ្យចង្វាក់សេដ្ឋកិច្ចមានភាពរអាក់រអួលជាច្រើនខែទៅមុខទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ